Juan
10 Jesusqa nillarqantaqmi: “Cheqaqtapunin niykichis: Pipas oveja kanchaman mana punkuntachu jaykunman, aswanpas kancha patanta jaykunman chayqa, suwan chay runaqa, jujkunaq kaqninta qechuqtaq kanpas.+ 2 Pipas punkunta jaykuqmi ichaqa oveja michiq.+ 3 Paytaqa punku qhawaqmi kichan,+ ovejakunapas uyarinkun kunkanta,+ paytaq ovejankunata sutinmantakama wajaspa jawaman qarqon. 4 Llapanta qarqospañan ovejankunaq ñaupanta rin, ovejankunataq qhepanta rinku kunkanta reqsisqankurayku. 5 Mana reqsisqankuq qhepantan ichaqa manapuni rinkumanchu, aswanmi paymantaqa ayqekunkuman kunkanta mana reqsisqankurayku”, nispa. 6 Chay rijch’anachiyta* willaspan Jesusqa paykunata rimapayarqan, paykunan ichaqa mana entienderqankuchu imamantachus rimasharqan chayta.
7 Jinan Jesusqa nillarqantaq: “Cheqaqtapunin niykichis: Noqan ovejakunapaq punkuqa kani.+ 8 Sutiywan sutichakuspa jamuqkunaqa suwakunan kanku, jujkunaq kaqninta qechuqkunataq kankupas, chaymi ovejakunaqa mana paykunata uyarinkuchu. 9 Noqan punkuqa kani. Pipas noqanta jaykuqqa salvasqan kanqa, jinaspa jaykunqa, lloqsinqa, pastotapas tarinqa.+ 10 Suwaqa jamun ovejakunata suwakunanpaq, wañuchinanpaq, tukunanpaq imallan.+ Noqan ichaqa jamuni kausayniyoq kanankupaq, wiñay kausayniyoq kanankupaqwan. 11 Noqan ancha allin michiqqa kani.+ Ancha allin michiqqa ovejakunaraykun vidanta* qon.+ 12 Pagoraykulla michipakuqmi ichaqa mana michiqpunichu, manataqmi paypachu ovejakunapas, chaymi payqa loboq* jamushasqanta rikuspa ovejakunata saqerparispa ayqekapun, chhaynapin loboqa ovejakunata jap’ispa ch’eqerparichin. 13 Payqa pagoraykullataq michin chayqa, manan imapas ovejakunaqa qokunchu. 14 Noqan ichaqa ancha allin michiq kani. Noqaqa reqsinin ovejaykunata, paykunapas reqsiwankun.+ 15 Chhaynatan Taytaypas noqataqa reqsiwan, noqapas reqsinin paytaqa.+ Noqaqa ovejaykunaraykun vidayta qosaq.+
16 ”Kallantaqmi waj ovejaykunapas, paykunaqa manan kay t’aqamantachu kanku;+ paykunatapas pusamunaymi kashan, jinan kunkayta uyarinqaku, juj t’aqallataqmi kanqaku, juj michiqllayoqtaq kanqakupas.+ 17 Janaq pacha Taytaqa munakuwan vidayta qosqayraykun,+ noqaqa vidayta qosaq+ wajmanta chaskikapunaypaqmi. 18 Manan pichu vidaytaqa qechushawan, aswanmi noqallamanta qoshani. Noqaqa atiyniyoqmi kani vidayta qonaypaq, wajmanta chaskinaypaqpas.+ Chaytaqa Taytaymi kamachiwarqan”, nispa.
19 Chaykunata uyarispan judiokunaqa+ mana yuyayninkuta tupachillarqankutaqchu. 20 Askhan nisharqanku: “Supaypa junt’aykusqanmi kashan manataqmi yuyayninpichu kashanpas, imapaqñan uyarinkichis”, nispa. 21 Jujkunataq ichaqa nisharqanku: “Kaykunataqa manan supaypa junt’aykusqan runaqa rimanmanchu. Chaymantapas, ¿atinmanchu juj supay ñausakunaq ñawin kichariyta?”, nispa.
22 Chay tiempopin Jerusalén llaqtapi kasharqan Templota Ch’uyanchay Fiesta, chiri tiempon kasharqanpas. 23 Chaypin Jesusqa templopi purisharqan Salomonpa Columnankuna* nisqapi.+ 24 Chayllamanmi judiokunaqa payta muyuykurqanku, jinaspa nirqanku: “¿Jayk’aqkaman mana willawankikuchu pichus kasqaykita? Cristo kanki chayqa, sut’intayá niwayku”, nispa. 25 Jinan Jesusqa paykunata nirqan: “Ñamá riki nirqaykichisña, qankunataq ichaqa mana creewankichischu. Taytaypa sutinpi imaymanakuna ruwasqaymi noqamantaqa sut’ita willakun.+ 26 Qankunan ichaqa mana creenkichischu, mana ovejaykunachu kasqaykichisrayku.+ 27 Ovejaykunaqa uyarinkun kunkayta, noqapas reqsinin paykunataqa, paykunataq qhepayta jamunku.+ 28 Noqaqa wiñay kausaytan paykunaman qosaq,+ chhaynapin mana jayk’aqpas wañunqakuchu, manataqmi pipas makiymantaqa qechuwanqachu.+ 29 Taytaypa qowasqankunaqa tukuy imamantapas aswan allinmi, manataqmi pipas Taytaypa makinmantaqa qechunmanchu.+ 30 Noqawan Taytaywanqa jujllan* kayku”,+ nispa.
31 Wajmantan judiokunaqa rumikunata oqarikurqanku Jesusta ch’aqenankupaq. 32 Jinan Jesusqa paykunata nirqan: “Qankunamanqa Taytaymanta jamuq askha allin ruwaykunatan rikuchirqaykichis, ¿chaykunamanta mayqen kaqmantataq qankunari ch’aqeyta munashawankichis?”, nispa. 33 Judiokunataq payta nirqanku: “Manan imapas allin ruwasqaykimantachu ch’aqesaykiku, aswanpas Diosta pisichaspa k’amisqaykimantan,+ runalla kashaspayki Dios jinan kani nisqaykimantan”, nispa. 34 Jesustaq paykunata nirqan: “¿Manachu chaskisqaykichis kamachikuy simipi Diosqa nishan: Noqan nini: Qankunaqa dioskunan kankichis,*+ nispa? 35 Arí, Diosqa dioskuna nispan+ nirqan simin qelqaq juchachasqan runakunata, manataqmi Diospa siminqa jayk’aqpas pantanmanchu. 36 ¿Chaychu noqata, Taytaypa ch’uyanchasqan runata, kay pachaman kachamusqanta, “Diospa Churinmi kani”+ nisqaymanta “Diostan pisichaspa k’amishan” nishawankichis? 37 Manachus Taytaypa munayninta ruwashani chayqa, ama creewaychischu. 38 Ichaqa ruwashanichus chayqa, manaña rimasqayrayku creenkichischu chaypas, creeychisyá ruwasqaykunaraykullapas;+ chhaynapin reparaspaykichis allinta entiendenkichis Taytayqa noqawan jujllachasqa kasqanta, noqataq Taytaywan jujllachasqa kasqayta”,+ nispa. 39 Chayraykun wajmanta jap’iytapuni munasharqanku, Jesusmi ichaqa mana jap’ichikurqanchu.
40 Chaymantataq Jesusqa wajmanta Jordán mayu chimpaman rirqan, maypichus qallariypi Juan bautizarqan chayman,+ jinaspa chaypi qhepakurqan. 41 Chaypin askha runakuna payman jamurqanku, jinaspa ninakurqanku: “Juanqa manaña juj milagrollatapas ruwarqanchu chaypas, kay runamanta tukuy ima rimasqanqa cheqaqmá kasqa”,+ nispanku. 42 Chaypiqa askhan Jesuspi iñipurqanku.