Isaías
60 Diosmi nin: “Yau warmi, ¡sayariy,+ k’anchariy!
K’anchayniykiqa kaypiñan kashan.
Jehová Diospa lliflli kayninmi k’anchaykamusunki.+
2 Kay pachan laqhayapunqa,*
nacionkunatan yana phuyu junt’aykunqa;
qanmanmi ichaqa Jehová Dios k’anchaykamusunki,
qanpin lliflli kaynin rikukunqa.
4 ¡Umaykita oqariy, muyuriqniykita qhawariy!
Llapa paykunan juñusqa kanku, qanmanmi jamushanku.
5 Chay tiempopin chayta rikunki, jinan uyaykiraq k’ancharinqa,+
sonqoykipas ancha kusikuymantan astawanraq phataqyanqa.
Lamar-qochaq qhapaq kayninkunan qanman jamunqa,
nacionkunaq tukuy ima kaqninkunan qanman jamunqa.+
6 Camellokunan mana yupay atiyraq jallp’aykiman junt’aykamunqa,
Madián ladomanta Efá ladomanta+ malta camellokunan jamunqa.
Saba ladomantan llapa runakuna jamunqaku,
qori aparisqa, yuraq incienso* aparisqa iman jamunqaku.
Paykunaqa lliupa ñaupanpin Jehová Diosta jatunchanqaku.+
7 Quedarpa+ llapa uywankunan qanpaq juñusqa kanqaku.
Nebayojpa+ ovejankunapas makiykipin kanqaku.
8 ¿Pikunan kayta phuyu jinaraq phawashanku?
¿Pikunan kayta t’oqonkuman phawaq urpi jinaraq phalashanku?
9 Islakunaqa noqapin suyakunqaku.+
Tarsis barcokunan ñaupaqta rishanku,
wawaykikunata karumanta apamuqmi rishanku,+
qorintinta qolqentinta apamuqmi rishanku,
paykunan jamunqaku Diosniykichis Jehová Diosta jatunchaq, Israelpa ch’uya Diosninta alabaq;
paymi qankunata munayman tukuchisunkichis.+
10 Waj llaqta runakunan perqaykikunata perqapusunkiku,
paykunaq reyninkunan kamachiykita ruwanqaku.+
Noqaqa sinchi phiñakuyniypin castigarqayki,
ichaqa sumaq sonqo kayniypin khuyapayasayki.+
11 Punkuykikunaqa manan jayk’aqpas wisq’akunqachu,+
kichasqallan kanqa tutapas p’unchaypas,
llapa nacionkunan imaymanakunata apamusunki,
reyninkuqa paykunaq ñaupankutaraqmi jamunqaku.+
12 Qanta mana serviq nacionkunaqa chinkachisqan kanqaku,
paykunaqa ch’usaqman tukuchisqan kanqaku.+
13 Líbano wichaymantan munay sach’akuna qanman jamunqa,+
jamunqakun enebro sach’akunapas, ciprés sach’akunapas, fresno sach’akunapas,+
chaykunan ch’uya wasiyta munayman tukuchinqa,
chaki sarunaytapas munaymanmi tukuchisaq.+
14 Sarunchaqniykikunaq wawankunan jamuspa qanman k’umuykunqaku,
pisichaqniykikunan chakiykiman k’umuykunqaku,
paykunan sutichasunkiku: Jehová Diospa llaqtan, Israelpa ch’uya Diosninpa Sion orqon,+ nispa.
15 Wijch’urqaykiña chaypas, cheqnisqaña karqanki chaypas,
manaña pipas qanman muyuykamurqasunkichu chaypas,+
noqan qanta runakunaq alabakunanman tukuchisayki,
llapa nacionkunaq wiñay-wiñaypaq kusikunanmanmi tukuchisayki.+
16 Nacionkunaq lechentan ujanki,+
reykunaq qhapaq kayninmantan mijunki;*+
allintan yachanki noqa Jehová Dios salvaqniyki kasqayta,
Jacobpa ancha atiyniyoq Diosnin rantiqniyki kasqayta.+
17 Cobreq rantinpin qorita apamusayki,
fierroq rantinpin qolqeta apamusayki,
maderaq rantinpin cobreta apamusayki,
rumiq rantinpin fierrota apamusayki.
Thaj kaytan qankuna qhawaqta churasaq,
chanin kaytataq qankuna kamachiqta churasaq.+
18 Llaqtaykipiqa manañan uyarikunqachu maqanakuymanta rimay,
linderoyki ukhupiqa manañan uyarikunqachu thuniymanta rimay.+
Llaqta perqaykikunatan Salvaq nispa sutichanki,+
punkuykikunatataq Jatunchaq nispa ninki.
19 P’unchayqa manañan intiq k’anchayninwanñachu k’anchakunki,
tutapas manañan killaq k’anchayninwanñachu k’anchakunki.
Diosniyki Jehová Diosmi k’anchayniyki kanqa, wiñaypaqmi k’anchasunki,+
paypa k’anchayninmi ancha munayman tukuchisunki.+
20 Intiykiqa manan jayk’aqpas chinkaykunqañachu,
killapas manan jayk’aqpas wañunqañachu.
21 Llaqtayki runakunaqa chaninkaman kanqa,
paykunan kay jallp’ata wiñaypaq jap’ikapunqaku.
22 Pisilla kaqmi waranqa kapunqa,
juch’uypaq qhawarisqan jatun nación kapunqa.
Noqan chaykunata tiempollanpi junt’achisaq,
noqa Jehová Diosmi usqhaylla junt’achisaq”, nispa.