Malaquías

3 Ejercitokunata kamachiq Jehová Diosmi nin: “¡Qhawariychis! Willaqniytan kachamusaq, paymi ñaupayta jamuspa ñanta allichanqa.+ Qonqayllan maskhasqaykichis cheqaq Señorqa templonman jamunqa.+ Ancha kusikuywan suyasqaykichis willaqmi, rimanakuymanta willaqmi jamunqa. ¡Qhawariychis! Payqa jamunqapunin”, nispa.

2 Diosmi nin: “Ichaqa, ¿pin aguantayta atinman jamunan p’unchayta? ¿Pin sayashallanman pay rijurimuqtin? Payqa ch’uyanchaq nina jinan kanqa, t’aqsaqkunaq lejian*+ jinan kanqa. 3 Payqa qolqe ch’uyanchaq jinan tiyaykunqa,+ jinaspan Leví aylluta ch’uyanchanqa. Qorita qolqeta jinan ch’uyanchanqa, jinan paykunaqa Jehová Diosman chanin kaywan ofrendata jaywaq runakuna kanqaku. 4 Judá aylluq, Jerusalén llaqtaq ofrenda jaywasqankuwanmi Jehová Diosqa kusikunqa, imaynan unay watakunapi, ñaupa tiempokunapi ofrenda jaywasqankuwan kusikuq jinata”,+ nispa.

5 Ejercitokunata kamachiq Jehová Diosmi nin: “Qankunamanmi asuykamusaq juzganaypaq, usqhayllan juchachasaq layqakuqkunata,+ jujwan pantaqkunata, llullakuspa juraqkunatapas,+ juchachallasaqtaqmi llank’apakuq runakunata engañaqkunatapas,+ viudakunata mana taytayoqkunata engañaqkunatapas,+ waj llaqtayoqkunata mana yanapaqkunatapas.*+ Chay runakunaqa manan manchakuwarqankuchu.

6 ”Noqaqa Jehová Diosmi kani, manataqmi cambianichu.+ Qankunaqa Jacobpa wawankunan kankichis, manataqmi chinkankichisraqchu. 7 Ñaupa taytaykichiskunaq tiempomantapachan qankunaqa kamachikuyniykunata mana kasukurqankichischu, manan chayman jinachu kausarqankichis.+ Noqaman kutirikamuwaychis, noqataq qankunaman kutirimusaq”,+ nispa. Ejercitokunata kamachiq Jehová Diosmi chayta nin.

Qankunataq ichaqa nishankichis: “¿Imaynatataq kutirikamuykikumanri?”, nispa.

8 Diosmi nin: “¿Runari atinmanchu noqamanta suwakuyta? Qankunan ichaqa suwakushawankichis”, nispa.

Ninkichisraqtaq: “¿Jayk’aqmi suwakurqaykiku?”, nispa.

Diosmi nin: “Diezmokunata* ofrendakunatapas mana apamuwaspaykichismi suwakuwankichis. 9 Qankunaqa suwakuwasqaykichisraykun ñakasqa kashankichis.* Arí, llapa nacionnintinmi suwakushankichis. 10 Mijuy waqaychana wasiman diezmoykichista llapallanta apamuychis,+ wasiypi mijuy kananpaq.+ Chaywan probaykuwaychis, chhaynapin rikunkichis janaq pacha punkukunata kicharispa+ bendicionniyta askhatapuni jich’aykamusqayta”,+ nispa. Ejercitokunata kamachiq Jehová Diosmi chayta nin.

11 Ejercitokunata kamachiq Jehová Diosmi nin: “Qankunaraykun langostakunata* anyasaq, manataqmi chajraykichispi mijuykunatapas imananqakupaschu, uvas chajraykichispas rurushallanqan”,+ nispa.

12 Ejercitokunata kamachiq Jehová Diosmi nin: “Llapa nacionkunan kusisqa llaqta nisunkichis,+ jallp’aykichisqa kusikunapaqmi kanqa”, nispa.

13 Jehová Diosmi nin: “Qankunaqa noqa contran millayta rimarqankichis”, nispa.

Ninkichisraqtaq: “¿Jayk’aqmi qan contra rimarqayku?”,+ nispa.

14 Diosmi nin: “Qankunan ninkichis: Yanqapaqmi Diosta serviyqa.+ ¿Ima allinninchispaqtaq payta kasukusqanchisri? ¿Ima allinninchispaqtaq ejercitokunata kamachiq Jehová Diospa ñaupanpi juchanchiskuna jawa llakisqa purisqanchisri? 15 Kunanqa jatunchakuq runakunan kusisqa kashanku. Mana allin ruwaqkunapas ima munasqankutan ruwashanku.+ Mana p’enqarikuspan Diostapas pruebaman churashanku, manataqmi ima mana allinpipas tarikunkuchu, nispa”.

16 Chay p’unchaykunallapitaqmi Jehová Diosta manchakuqkunaqa paykunapura rimasharqanku, sapankan amigonkuwan rimasharqanku, Jehová Diostaq makilla uyarisharqan. Paypa ñaupanpitaqmi juj libro qelqasqa karqan,+ chhaynapi Jehová Diosta manchakuqkuna sutinpi yuyaymanaqkunapas*+ yuyarisqa kanankupaq.

17 Ejercitokunata kamachiq Jehová Diosmi nin: “Maypachachus paykunata munakusqay llaqtaman*+ tukuchisaq chay p’unchaymi paykunaqa llaqtay kapunqaku.+ Imaynan juj taytapas kasukuq wawanta khuyapayan, chhaynatan noqapas paykunata khuyapayasaq.+ 18 Qankunan wajmanta reparankichis imaynas chanin runa, imaynas millay runa chayta,+ imaynas Diosta serviq runa, imaynas Diosta mana serviq runa chaytapas”, nispa.