1 Corintios

15 Kunanqa wayqeykuna,* qankunaman willasqay allin willakuykunatan yuyarichisaykichis,+ chay willakuykunatan qankunaqa chaskirqankichis, chaypitaqmi qaqata sayashankichispas. 2 Chay willasqay allin willakuykunata qaqata jap’ishallankichis chayqa, salvasqan kankichis, mana chayqa yanqapas iñiwaqchis karqan jinan kanman.

3 Noqaqa noqamanpas willawasqanku aswan allin kaqkunatan ñaupaqtaqa willarqaykichis, chaykunan kaykuna: Diospa simin qelqaq nisqanman jinan Cristoqa juchanchiskunarayku wañurqan,+ 4 chaymantataq p’ampasqa karqan,+ kinsa p’unchaymantataq+ kausarichisqa karqan;+ chaypas Diospa simin qelqaq nisqanman jinan karqan.+ 5 Chaymantataq Cefasman* rijurirqan,+ jinamantaq chunka iskayniyoq apostolkunaman;+ 6 chaymantataq juj kutipi pisqa pachaj más iñiqmasinchiskunaman rijurirqan;+ paykunamanta wakinqa wañupunkuñan,* ichaqa yaqa llapankun noqanchiswanraq kashanku. 7 Chaymantataq rijurirqan Santiagoman,+ chaymantataq llapa apostolkunaman.+ 8 Llapankuq qhepantañan noqamanpas rijurillawantaq+ manaraq nacenanpi naceq wawaman jina.

9 Noqaqa apostolkunamanta aswan juch’uy kaqmi kani, manataqmi apóstol nisqa kanaypaq jinapaschu kani Diospa iñiq t’aqanta qatikachasqayrayku.+ 10 Ichaqa Dios ancha sumaq sonqo kasqanraykun kay llank’anapi kashani. Manataqmi Diosqa yanqapaqchu chhayna sumaq sonqowan qhawariwarqan. Noqaqa llapa apostolkunamantapas mastaraqmi llank’ashani, ichaqa manan noqachu llank’ani, aswanpas noqapi kashaq Diospa ancha sumaq sonqo kayninmi llank’ashan. 11 Ichaqa noqaña willani otaq paykunaña willanku chaypas, chhaynatan willayku; chhaynapitaqmi qankunapas iñirqankichis.

12 Chayrayku, Cristoq kausarichisqa kasqanmantataq willashanchis chayqa,+ ¿imaynapitaq wakinniykichisri nishankichis: “Wañusqakunaqa manan kausarinqakuchu”, nispa? 13 Manataq wañusqakuna kausarimpunqakuchu chayqa, manachá riki Cristopas kausarichisqachu karqan. 14 Manataq Cristopas kausarichisqachu karqan chayqa, yanqapaqchá riki yachachishanchis, yanqachá riki iñinkichispas. 15 Chaymantapas, manataq wañusqakuna kausarichisqachu kanqaku chayqa, manachá riki Cristopas kausarichisqachu karqan, chhaynaqa “Diosmi Cristota kausarichin” nispanchisqa+ llullakushanchischá riki.+ 16 Arí, manataq wañusqakuna kausarichisqachu kanqaku chayqa, manachá riki Cristopas kausarichisqachu karqan. 17 Chaymantapas, manataq Cristo kausarichisqachu karqan chayqa, yanqachá riki iñiyniykichisqa, juchallapichá riki kausashankichispas.+ 18 Cristoq discipulon kashaspa wañupuqkunapas* wiñaypaqchá riki wañupunku.+ 19 Cristopi suyakuyqa kay kausayllapaqtaq chayqa, lliu runamantapas aswan khuyapayanachá riki kashanchis.

20 Ichaqa manan chhaynachu, Cristoqa kausarichisqapunin karqan, paymi wañusqakunamanta* ñaupaq kausarimpuq* kashan.+ 21 Wañuyqa juj runallawantaq rijurirqan chayqa,+ wañusqakunaq kausarimpuyninpas juj runallawanmi kanqa.+ 22 Imaynan Adanpa causanpi lliu runa wañushanku,+ chhaynatan Cristorayku lliu runa kausarichisqa kanqaku.+ 23 Ichaqa jayk’aqchus kausarinanku tupan chayman jinan kanqa: Ñaupaq kausarimpuqmi* Cristo kashan,+ chaymantataq paypa chayamunan tiempopi* paypa kaqninkuna kausarimpunqaku.+ 24 Chaymantataq tukukuypi payqa Taytan Diosman gobiernota entregapunqa, chaytaqa ruwanqa llapa gobiernokunata, llapa autoridadkunata, llapa atiyniyoq kaqkunata ch’usaqyachispañan.+ 25 Paymi kamachikunqa llapa enemigonkunata chaki sarunanman Dios churanankama.+ 26 Último kaq enemigonchis wañuypas ch’usaqyachisqan kapunqa.+ 27 Diosmi “tukuy imaymanata Cristoq chaki sarunanman churarqan”.+ Ichaqa, “tukuy imaymanatan Cristoq chaki sarunanman churarqan” nispaqa+ manan chay churaqmantawanchu rimashan.+ 28 Tukuy imapas payman k’umuchisqa kaqtinmi Churipas chay k’umuchiqman k’umuykullanqataq,+ chhaynapi Dioslla lliupa kamachiqnin kananpaq.+

29 Manataq wañusqakuna kausarimunqakuchu chayqa, ¿imataq kanqa wañusqa kanankupaq bautizakushaqkunawanri?+ Yanqapaqchá riki paykunapas bautizakushanku. 30 Noqanchispas yanqapaqchá riki sapa kutillan wañuy patamanraq churakushanchis.+ 31 Noqapas sapa p’unchaymi wañuy patapi rikukushani. Chayqa cheqaqpunin, imaynan Señorninchis Cristo Jesuspi qankunamanta anchata kusikuni chhaynapunin. 32 Manataq wañusqakuna kausarichisqachu kanqaku chayqa, yanqapaqchá riki Éfeso llaqtapiqa juj runakuna jina salqa animalkunawan maqanakurqani;+ chhaynataq chayqa, runakuna jinayá nisun: “Mijusunchis ujasunchis paqarinmi wañupusun”,+ nispa. 33 Aman piwanpas engañachikunkichischu. Mana allin runakunawan juñukuspaqa allin ruwaykunatan qonqapunkichis.+ 34 Chanin kaqta ruwaspa yuyayniykichisman kutiychis, amataq juchapi puriychischu; wakinniykichisqa manan Diosmanta yachankichischu. Chaykunataqa nimushaykichis p’enqarikunaykichispaqmi.

35 Ichaqa, yaqapaschá pipas tapukunman: “¿Imaynatataq wañusqakunari kausarichisqa kanqaku? ¿Imayna cuerpoyoqtaq kausarinqakuri?”,+ nispa. 36 ¡Mana yuyayniyoq runa! Ima muju t’akasqaykipas wañunanraqmi wiñananpaqqa. 37 Ichaqa imatapas t’akaspaqa manan q’achutachu t’akanki ¿riki? Aswanpas trigoña imaña kaqtinpas mujutan t’akanki ¿riki? 38 Ichaqa Diosmi chaytaqa wiñachin imaynachus munasqanman jina, sapanka mujutaqmi jujniraytakama wiñan. 39 Llapa cuerpopas manan kaqllachu kanku, runaq cuerponqa jujniraymi, uywaq cuerponpas jujniraymi, phalaq animalkunaq cuerponpas jujniraymi, challwaq cuerponpas jujniraymi. 40 Kallantaqmi janaq pachapi cuerpokuna,+ kay pachapi cuerpokunapas;+ janaq pachapi cuerpokunaq sumaq kayninqa jujniraymi, kay pachapi cuerpokunaq sumaq kayninpas jujniraymi. 41 Intiq k’anchayninqa jujniraymi, killaq k’anchayninpas jujniraymi,+ ch’askakunaq k’anchayninpas jujniraymi; ichaqa ch’askakunapas manan llapankuchu igual-llata k’anchanku.

42 Chhaynallataqmi wañusqakunaq kausarimpuyninpas. Ismuq cuerpotan p’ampakun, chaymantataq mana jayk’aq ismuyta atiq cuerpo jatarimpun.+ 43 P’enqaypaq qhawarisqatan p’ampakun, jatarimpuspataq jatunchasqa kapun;+ pisi kallpatan p’ampakun, jatarimpuspataq atiyniyoq kapun.+ 44 Aycha cuerpotan p’ampakun, jatarimpuspataq espíritu cuerpo kapun. Kantaq aycha cuerpo chayqa, kallantaqmi espíritu cuerpopas. 45 Diospa simin qelqapipas ninmi: “Ñaupaq kaq Adanqa kausaq runan kapurqan”,*+ nispa. Qhepa kaq Adanmi ichaqa kausay qoq espíritu kapun.+ 46 Ichaqa, manan espíritu cuerpochu ñaupaqqa, aswanpas aycha cuerpon ñaupaqqa, chaymantañan espíritu cuerpoqa. 47 Ñaupaq kaq runaqa kay pachamantan karqan, jallp’amanta ruwasqataqmi karqanpas;+ qhepa kaq runan ichaqa janaq pachamanta karqan.+ 48 Imaynachus jallp’amanta ruwasqa runa karqan, chhaynallataqmi kanku kay pacha runakunapas. Janaq pachapi kaqkunapas, janaq pachamanta jamuq jinan kanku.+ 49 Imaynan jallp’amanta ruwasqa runaman rijch’akunchis,+ chhaynallataqmi janaq pachamanta kaqman rijch’akusunchis.+

50 Ichaqa wayqeykuna,* kaytan niyta munaykichis: Aycha cuerpoqa* manan Diospa gobiernonmanqa jaykunmanchu, manallataqmi ismuq cuerpopas mana jayk’aq ismuyta atiq cuerpomanqa tukunmanchu. 51 Juj pakasqa ch’uya yachayta willasaykichis: Manan llapanchischu wañuypi puñusunchis, ichaqa llapanchismi cambiasqa kasunchis+ 52 juj ratullapi, ñawi ch’illmiyllapi, último trompeta waqashaqtin. Arí, trompetan waqanqa,+ jinan wañusqakunaqa mana jayk’aq ismuyta atiq cuerpoyoqña jatarichisqa kanqaku, noqanchispas cambiasqan kasunchis. 53 Kay ismuq cuerpon mana jayk’aq ismuyta atiq cuerpoman cambiapunqa,+ arí, kay wañuq cuerpon mana jayk’aq wañuyta atiq cuerpoman cambiapunqa.+ 54 Kay ismuq cuerpo mana jayk’aq ismuyta atiq cuerpoman cambiapuqtinmi, kay wañuq cuerpo mana jayk’aq wañuyta atiq cuerpoman cambiapuqtinmi junt’akunqa “wañuyqa wiñaypaqmi chinkachisqa* kapunqa”+ niq qelqa. 55 “Wañuy, ¿maytaq atipasqayki? Wañuy, ¿maytaq wañuchiq picanayki?”.+ 56 Wañuchiq picanaqa juchan,+ juchaq atiynintaq kamachikuy simi.*+ 57 Ichaqa, ¡Diosman gracias kachun, Señorninchis Jesucristowan wañuyta atipachiwasqanchismanta!+

58 Chayrayku, munakusqay wayqellaykuna,* qaqata sayaychis+ amataq kuyuriychischu, Señorpa llank’ananpi tukuy tiempo imaymanata ruwashaychis;+ yachasqaykichis jina, Señorpaq llank’asqaykichisqa manan yanqapaqchu.+