Jeremías
23 “¡Imaraqmi kanqa michisqay ovejakunata tukuq michiqkunamanta! ¡Imaraqmi kanqa ovejaykunata ch’eqechiq michiqkunamanta!”+ ninmi Jehová Dios.
2 Jehová Diosmi, Israelpa Diosninmi llaqtanta michiqkuna contra nin: “Qankunaqa ovejaykunatan ch’eqechirqankichis, sapa kutinmi ch’eqechirqankichis, manan qhawarirqankichischu”,+ nispa.
“Chayraykun qankunata castigasaykichis, mana allinta ruwasqaykichismantan castigasaykichis” ninmi Jehová Dios.
3 “May jallp’akunamanchus ch’eqechirqani chaykunamantan puchuq ovejaykunata apakampusaq,+ mijunanku pastonkumanmi kutichimpusaq,+ chaypin askhata miranqaku.+ 4 Paykunata michinanpaqmi allin michiqkunata churasaq.+ Manan imatapas manchakunqakuñachu, manataqmi jujllapas faltanqachu” ninmi Jehová Diosqa.
5 Jehová Diosmi nin: “Davidmanta chanin ch’ijchita* lloqsichimunaypaqmi p’unchaykuna chayamushanña.+ Juj reymi kamachikunqa,+ allin yachaywanmi kamachikunqa, chanin kaqtan, allin kaqtan kay jallp’api defiendenqa.+ 6 Paypa tiemponpin Judaqa salvasqa kanqa,+ Israelpas thajpin tiyanqa.+ Jehová Diosmi justicia ruwapuwaqninchisqa, nispan sutichakunqa”,+ nispa.
7 Jehová Diosmi nin: “¡Egiptomanta Israel llaqtata orqomuq, wiñaypaq kausaq Jehová Diospa sutinpin jurani!, nispa ninanku tukukapunan p’unchaymi chayamushanña.+ 8 Aswanmi ninqaku: ¡Wichay lado suyumanta, tukuy suyukunaman ch’eqechisqa kasqankumanta Israelpa mirayninkunata orqomuq, pusamuq, wiñaypaq kausaq Jehová Diospa sutinpin jurani!, nispa. Noqan juj lado suyukunaman ch’eqechirqani, paykunan ichaqa kikin jallp’ankupi tiyakapunqaku”,+ nispa.
9 Profetakunatan nini:
Sonqoymi k’irisqa kashan.
Tulluykunan khatatatashan,*
machasqa runa jinan kashani,
vinoq atipasqan runa jinan kashani,
Jehová Diosraykun, ch’uya siminraykun chhayna kashani.
10 Kay jallp’aqa jujwan pantaqkunawanmi junt’a kashan.+
Mana allinkunatan ruwanku,
kamachikuq kasqankuraykun munasqankuta ruwanku.
11 Jehová Diosmi nin: “Profetapas sacerdotepas noqa contra jatariqkunan* kanku,+
kikin wasiypipunin tarini mana allin ruwasqankuta”,+ nispa.
12 Jehová Diosmi nin: “Ñanninkuqa llusk’an, tutayaqmi kanqa,+
tanqarpariqtinkun urmaykunqaku.
Cuentata mañanay watapin paykunaman ñak’ariyta chayachimusaq.
13 Samaria profetakunapin millakunapaq kaqta rikuni.+
Baalpa sutinpin profetizanku,
Israel llaqtaytan pantachinku.
14 Jerusalén profetakunapin mana allinkunata rikuni.
Jujwanmi pantanku,+ llullakuspan kausanku,+
millay runakunatan yanapanku,
manan mana allinkuna ruwasqankumantapas pesapakunkuchu.
Noqapaqqa llapankun Sodoma runakuna jina kanku,+
Jerusalenpi tiyaqkunapas Gomorra runakuna jinan kanku”,+ nispa.
15 Chayraykun ejercitokunata kamachiq Jehová Dios profetakuna contra nin:
“Ajenjotan mijuchisaq, venenoyoq unutan tomachisaq.+
Jerusalén profetakunaqa suyuntinmanmi mana allin yachachikuykunata ch’eqerichirqanku”, nispa.
16 Ejercitokunata kamachiq Jehová Diosmi nin:
“Ama profetakunaq willasqanta uyariychischu,+
paykunaqa yanqan q’otushasunkichis.
17 Mana respetawaqkunatan nishanku:
Jehová Diosmi nin: Thajpin tiyakunkichis,+ nispa.
Llapa k’ullu sonqonkuq munasqanta ruwaqkunatan nishanku:
Manan ima ñak’ariypas chayamusunkichischu,+ nispa.
18 ¿Pin Jehová Diospa confianza amigonkunawan kasharqan,
chhaynapi siminkunata reparananpaq uyarinanpaqpas?
¿Pin tukuy yuyaywan siminkunata uyarirqan?
19 ¡Qhawariychis! Jehová Diosmantan sinchi atiyniyoq wayra phiñakuywan jatarimunqa;
muyuq wayra jinaraqmi millay runakunaq umankuman uraykamunqa.+
20 Jehová Diospa phiñakuyninqa manapunin thaninqachu,
imachus yuyaykusqanta junt’anankaman mana thaninqachu,
sonqonpa munasqanta ruwanankaman mana tiyaykunqachu.
Qankunaqa tukukuy p’unchaykunapin chayta allinta entiendenkichis.
21 Manan noqaqa profetakunata kacharqanichu, paykunan ichaqa willaq purirqanku.
Manan paykunawanqa rimarqanichu, paykunan ichaqa profetizarqanku.+
22 Sichus confianza amigoykunawan kashankuman karqan chayqa,
simiykunatan llaqtayman uyarichinkuman karqan,
mana allin ñanpi puriyninkuta, mana allin ruwayninkutapas qonqachinkumanmi karqan”,+ nispa.
23 Jehová Diosmi nin: “Manan ladoypi imachus pasashan chayllatachu rikuni, karupi imachus pasashan chaytapas yachanin”, nispa.
24 Jehová Diosmi nin: “¿Runa atinmanchu noqamanta pakakuyta? ¿Kanmanchu mana rikunay pakakunan?”,+ nispa.
Jehová Diosmi nin: “¿Manachu noqa rikushani janaq pachapi, kay pachapi tukuy imatapas?”,+ nispa.
25 Diosmi nin: “Llullakuspa sutiypi willaq profetakunatan uyarini: ¡Kaytan mosqokusqani! ¡Kaytan mosqokusqani!,+ nishaqta. 26 ¿Jayk’aqkaman profetakunaq sonqonpi llullakuspa willay kashallanqa? Llulla sonqonkuq profetankunan kanku.+ 27 Sutiyta llaqtay qonqapunanta munaspan mosqoykunata willanakunku, imaynan taytankupas Baalrayku sutiyta qonqapurqanku jinata.+ 28 Profetaqa mosqokusqanta willakuchun, simiyta chaskiq ichaqa cheqaqllata willachun”, nispa.
“¿Mayqenmi aswan valorniyoq, trigoq tullunchu icha rurunchu?” ninmi Jehová Dios.
29 “¿Manachu simiyqa nina jina?+ ¿Manachu qaqa ñut’una combo jina?”+ nispan nin Jehová Dios.
30 “Rimasqayta suwanakuq profetakuna contran kaypi kashani”+ ninmi Jehová Diosqa.
31 Jehová Diosmi nin: “¡Paymi nin!, nispa rimaq profetakuna contran kaypi kashani”,+ nispa.
32 Jehová Diosmi nillantaq: “Mosqoyninkumanta llullakuspa willaq profetakuna contran kaypi kashani, mosqokusqankuta willaspa, llullakuspa yanqata rimaspan llaqtayta pantachinku”,+ nispa.
“Paykunataqa manan kacharqanichu ni kamachirqanipaschu, chayraykun kay llaqtata mana imapipas yanapanqakuchu”+ ninmi Jehová Diosqa.
33 Diosmi nin: “Sichus mayqen llaqta runapas, profetapas, sacerdotepas tapusunki: ¿Kashanchu Jehová Diospa llasaq willakuynin?,* nispa chayqa, khaynatan ninki: ¡Qankunan llasa q’epiqa kankichis! Chayraykun qankunataqa wijch’upusaykichis,+ ninmi Jehová Dios, nispa. 34 Sichus mayqen profetapas, sacerdotepas, mayqen llaqta runakunapas ninqa: ¡Kayqa Jehová Diospa llasa willakuyninmi!, nispa chayqa, castigasaqmi chay runata familiantapas. 35 Sapankaykichismi runamasiykichista, wayqeykichista nishankichis: ¿Imatan Jehová Dios kutichimurqan? ¿Imanintaq Jehová Diosri?, nispa. 36 Amaña niychischu: Jehová Diospa willakuyninqa llasanmi, nispa; rimasqaykichismi llasa q’epi jinaqa, qankunaqa kausaq Diospa simintan cambiarqankichis, ejercitokunata kamachiq Jehová Diosninchispa simintan cambiarqankichis.
37 ”Khaynatan profetata ninki: ¿Imanispan Jehová Dios kutichimurqasunki? ¿Imaninmi Jehová Dios? 38 Sichus nishallankichis: Jehová Diospa llasa willakuynin, nispa chayqa, Jehová Diosmi nin: Amaña, Jehová Diospa llasa willakuynin, nispa rimaychisñachu nishaqtiypas qankunaqa, kaymi Jehová Diospa llasa willakuynin, nispallapunin rimashankichis; 39 chayraykun qankunata, ñaupa taytaykichiskunaman qosqay llaqtata, qankunaman qosqay llaqtatapas ñaupaymanta oqarispa karuman wijch’umusaykichis. 40 Wiñaypaq p’enqachisqa kaytan, wiñaypaq pisichasqa kaytan apamusaykichis, manan jayk’aqpas chayqa qonqasqachu kanqa,+ nispa”.