Jueces

6 Israel runakunaqa jujmantan Jehová Diospa cheqnisqan ruwaykunata ruwallarqankutaq,+ chaymi Jehová Diosqa Madián runakunaman paykunata entregarqan, qanchis watan paykunata dominarqanku.+ 2 Madián runakunaqa nishutan Israel runakunata ñak’arichirqanku.+ Chaymi paykunata manchakuspa Israel runakunaqa orqokunapi, t’oqokunapi, sasa jaykunakunapi ima pakakunata ruwakuqku.+ 3 Israel runakunachus t’akaqku tarpuqku chayqa Madián runakuna, Amalec runakuna,+ inti lloqsimuy ladomanta runakunan+ phawaykamuqku. 4 Israel runakunaq cercanpin paykunawan maqanakunankupaq karpakuqku, chhaynapin Israel runakunaq llank’asqanta Gazakamaraq lliuta chinkachiqku. Manan imatapas saqeqkuchu Israel runakunapaqqa, lliutan qechuqku ovejankutapas, toronkutapas, asnonkutapas.+ 5 Paykunaqa llapa uywakunantin karpakunantin iman langosta* jinaraq askhallaña jamuqku,+ paykunapas camellonkupas mana yupay atiyraqmi kaq,+ chhaynapin chay jallp’ataqa lliuta q’arapuqku. 6 Chay Madián runakunaq causanpin Israel runakunaqa sinchita wajchayapurqanku,* jinan Jehová Diospa yanapayninta mañakurqanku.+

7 Madián runakunaq ñak’arichisqanrayku Israel runakuna Jehová Diospa yanapayninta mañakuqtinkun,+ 8 Jehová Diosqa juj profetata Israel runakunaman kacharqan, paymi nirqan: “Israelpa Diosnin Jehová Diosmi nin: Noqan Egiptomanta pusamurqaykichis, esclavo kashaqtiykichismi orqomurqaykichis.+ 9 Egiptoq makinmantan, ñak’arichiqniykichis runakunaq makinmantan libramurqaykichis. Enemigoykichiskunatan ñaupaykichismanta qarqorqani, jinaspan jallp’ankuta qorqaykichis.+ 10 Nirqaykichistaq: Noqan Diosniykichis Jehová Diosqa kani,+ aman amorreo runakunaq diosninkunataqa servinkichischu,*+ nispa. Qankunan ichaqa mana kasukuwarqankichischu,*+ nispa”.

11 Chaymantataq Jehová Diospa angelninqa+ Ofrá llaqtaman jamuspa Joaspa jatun sach’an k’uchupi tiyaykurqan, Joasqa Abí-Ezerpa familianmantan+ karqan. Joaspa wawan Gedeontaq+ pakallapi uvas sarunapi trigota p’anasharqan, chhaynapi Madián runakuna mana rikunanpaq. 12 Chaypin Jehová Diospa angelnin payman rijurirqan, jinaspa nirqan: “Mana manchakuq kallpasapa soldado, Jehová Diosmi qanwan kashan”,+ nispa. 13 Jinan Gedeonqa nirqan: “Disculpaykuway wiraqocháy, Jehová Diosqa noqaykuwantaq kashan chayqa, ¿imaraykutaq khaynatari sufrishayku?+ ¿Maytaq ñaupa taytaykuq Jehová Diospa imaymana milagrokuna ruwasqanmanta willawasqankuri?+ Egiptomantan pusamuwarqanku,+ niwarqankutaq. Kunantaq Jehová Diosqa Madián runakunaq makinman saqerpariwanku”,+ nispa. 14 Jehová Diostaq Gedeonta nirqan: “Qanmi kallpaykiwan Israel runakunata Madián runakunaq makinmanta libranki.+ Noqan chayta ruwanaykipaq kamachishayki”, nispa. 15 Gedeontaq nirqan: “Jehová Diosníy, ¿imaynapitaq noqari Israel runakunata salvayta atiyman? Noqaq familiayqa aswan juch’uyllan Manasés ayllupiqa, taytaypa wasinpipas noqaqa manan imapaschu kani”, nispa. 16 Jinan Jehová Diosqa nirqan: “Noqan qanwan kashasaq,+ Madián runakunataqa ch’ulla runata jinallan atipanki”, nispa.

17 Gedeontaq nirqan: “Allinpaq qhawariwanki chayqa, juj señalpi sut’ita rikuchiway qanwanpuni rimashasqayta. 18 Ama jinachu kay, ama ripuyraqchu, kayllapi suyashaway, juj regalota aparamusayki”,+ nispa. Jinan payqa nirqan: “Kutimunaykikaman kayllapi kashasaq”, nispa. 19 Jinan Gedeonqa malta cabrata wayk’urqan, juj arroba jina* jak’umantataq mana levadurayoq t’antata ruwarqan.+ Canastapin aychata churarqan mankapitaq caldota, chaykunatan angelman servirqan jatun sach’a k’uchupi.

20 Diospa angelnintaq nirqan: “Chay aychata mana levadurayoq t’antakunatawan jaqay qaqa pataman churay, chay patamantaq caldowan jich’aykuy”, nispa. Gedeontaq nisqanman jina ruwarqan. 21 Jehová Diospa angelnintaq makinpi taunata jaywarispa chay taunanpa puntanwan tupaykurqan aychatapas mana levadurayoq t’antatapas. Jinan rumimanta nina lloqsimuspa aychatapas mana levadurayoq t’antatapas ruphapurqan.+ Jehová Diospa angelnintaq chinkarapurqan. 22 Chayraqmi Gedeonqa Jehová Diospa angelnin kasqanta repararqan.+

Chaymi Gedeonqa nirqan: “¡Ay Señor Jehová Diosníy, Jehová Diospa angelninpa uyantan rikuruni!”,+ nispa. 23 Jehová Diostaq nirqan: “Thaj kay, ama mancharikuychu,+ manan wañunkichu”, nispa. 24 Chaymi Gedeonqa Jehová Diospaq juj altarta ruwarqan. Chay altartan kunankama nikun Jehová-Salom*+ nispa. Chayqa Ofrá llaqtapin kashan Abí-Ézer runakunaq jallp’anpi.

25 Chay tutan Jehová Diosqa Gedeonta nirqan: “Papaykiq Baalpaq ruwachisqan altartan thuninki, ladonpi sayashaq k’ullutapas* wit’unkin.+ Papaykiq qanchis watayoq malta torontataq* apanki. 26 Jinaspa kay moqo patapi Jehová Diospaq rumikunawan altarta perqanki, chaypin papaykiq qanchis watayoq malta toronta sacrificiopi jaywanki, wit’usqayki k’ullukuna patapi”, nispa. 27 Chaykunata niqtinmi Gedeonqa chunka qhari kamachinkunata wajarqan, jinaspa Jehová Diospa kamachisqanman jina ruwarqan. Ichaqa familiantapas llaqtapi runakunatapas manchakusqanraykun tutallapi chayta ruwarqan.

28 Qhepa p’unchaytaq runakuna tutallamanta sayarispa rikurqanku Baalpa altarnin thunisqa kashasqanta, ladonpi kaq sayashaq k’ullutapas wit’usqata, malta torotapas altarpi sacrificiopi jaywasqata. 29 Jinan paykunapura tapunakurqanku: “¿Pin kayta ruwarun?”, nispa. Allinta yacharuspataq nirqanku: “Joaspa churin Gedeonmi ruwarusqa”, nispa. 30 Chaymi chay llaqta runakunaqa Joasta nirqanku: “¡Chay churiykita orqomuy wañuchinaykupaq! Paymi Baalpa altarninta thunisqa, ladonpi sayashaq k’ullutapas wit’usqa”, nispa. 31 Joastaq+ llapa chay runakunata nirqan: “¿Qankunachu Baalman sayapakunaykichis? ¿Qankunachu payta salvanaykichis? Baalqa diostaq chayqa pay kikin respetachikuchun+ altarninta thunisqankumanta. Pipas paypa rantinpi imatapas ruwaqqa kunanpacha wañuchisqa kachun”,+ nispa. 32 Chay p’unchaymantapachan Joasqa churin Gedeonta suticharqan Jerubaal* nispa. Paymi nirqan: “Baalyá defiendekuchun altarnin thunisqankumanta”, nispa.

33 Madián runakunawan,+ Amalec runakunawan,+ inti lloqsimuy ladomanta runakunawantaq+ guerrapaq juñukuspanku mayuta chimpamurqanku, jinaspa Jezrel wayq’opi karpakurqanku. 34 Jinan Jehová Diospa espiritunqa Gedeonman junt’aykurqan,+ Gedeontaq oveja waqrata tocarqan.+ Chayta uyarispan Abí-Ézer runakunaqa+ paypa kasqanman juñukamurqanku. 35 Chaymantapas Gedeonqa llapa Manasés ayllumanmi willachimurqan, jinan paykunaqa jamurqanku. Willachimullarqantaqmi Aser, Zabulón, Neftalí ayllu runakunamanpas, jinan paykunapas jamullarqankutaq.

36 Chaymantataq Gedeonqa Diosta nirqan: “Noqawanchus Israel runakunata prometesqaykiman jina libranki+ chayqa, 37 kay era patapi* masasqay willma sullawan* ch’aran kachun, muyuriqnin pampataq ch’akilla kachun. Chhaynapin yachasaq: Qanmi Israel runakunata libranki, nispa niwasqaykiqa cheqaq kasqanta”, nispa. 38 Qhepantin p’unchay tutallamanta jatariqtintaq paypa mañakusqanman jina kashasqa, willmata ch’irwaspan jatun p’ukumanraq unuta junt’achirqan. 39 Chhaynaña kaqtinpas, jujmantan Gedeonqa Diosta nirqan: “Juj pruebatawan ruwaykapuway Diosníy, ichaqa amayá phiñarukunkichu. Kunanqa masasqay willmañataq ch’aki kachun, muyuriqnin pampataq sullawan ch’aran kachun”, nispa. 40 Gedeonpa mañakusqanman jinan Diosqa chay tuta ruwarqan, willmallan ch’aki kasharqan muyuriqnin pampataq ch’aran kasharqan.