Filipenses
3 Chhaynaqa, wayqellaykuna,* kusisqalla kashaychis Señorwan jujllachasqa kasqaykichisrayku.+ Noqaqa manan sayk’usaqchu kaqllamantataq qankunaman qelqamuytaqa; chaykuna allinniykichispaq kasqanraykun qelqamushallasaq.
2 Cuidakuychis alqo jina kaq runakunamanta, sinchi mana allin ruwaq runakunamanta, qhari kay qaracha kuchuchikunaykichista munaq runakunamantapas.*+ 3 Noqanchismi cheqaq señalasqakunaqa* kanchis,+ arí, noqanchis Diospa espiritunpa yanapayninwan serviqkuna, noqanchis Cristo Jesusmanta alabakuqkuna,+ runaq imapichus confiasqanpi mana confiaqkuna. 4 Chaywanpas noqaqa razonllawanmi chaykunapi confiayman.
Lliu runamantapas aswan razonwanraqmi noqaqa runaq imapichus confiasqanpiqa confiayman. 5 Noqaqa pusaq p’unchayniypin qhari kayniy qaracha kuchusqa karqani,+ Israel nacionmantan kani, Benjamín ayllumanta, hebreo runakunaq wawan,+ kamachikuy simi waqaychaypitaq fariseo.+ 6 Chaymantapas sinchitapunin noqaqa iñiq t’aqata qatikachaq kani;+ kamachikuy simiq nisqanman jinaqa lliu imatapas chanintan ruwaq kani. 7 Kunanmi ichaqa imachus noqapaq ancha allin karqan chaykunataqa Cristorayku mana valeqpaq qhawaripuni.+ 8 Arí, Señorniy Cristo Jesusmanta yachay tukuy imamantapas aswan allin kasqanraykun lliuta mana valorniyoqpaq qhawaripuni. Payraykun lliuta saqepuni, mana valeq q’opata jinataqmi chaykunataqa qhawaripunipas, chhaynapi paywan jujllachasqa kanaypaq, 9 paywan jujllachasqa kasqaypas sut’i rikuy kananpaqwan. Chayqa kanqa manan kamachikuy simiq nisqanman jina chanin kasqayraykuchu, aswanpas Cristopi+ iñisqaywan chanin kasqayraykun;+ Diosqa iñiqkunatan chaninpaq jap’in.+ 10 Tukuy chaykunataqa ruwarqani payta reqsinaypaq, kausarimpuy atiyninta reqsinaypaq,+ pay jina ñak’arinaypaq,+ pay jina wañunaypaqwanmi,+ 11 chhaynapi imaynallamantapas ñaupaq kaq kausarimpuypi kausarimpunaypaq.+
12 Manan chaytaqa chaskiniraqchu nitaqmi maymanchus chayanaymanqa chayanipasraqchu, aswanmi noqaqa kallpachakushallani+ imapaqchus Cristo Jesús ajllawarqan chayta imaynallapipas chaskinaypaq.+ 13 Wayqeykuna,* noqaqa manan chay premiota chaskinaypaq jinaraqchu qhawarikuni, ichaqa tukuy imaymanata qhepapi qonqamuspaymi+ imakunachus ñaupaqpi kashan chayman phawashani.+ 14 Arí, ñaupaqllamanmi phawashani, chhaynapi Cristo Jesusrayku Diospa qosqan janaq pacha premioman aypanaypaq.+ 15 Chhaynaqa, chay nisqaykunaman jinayá piensasunchis noqanchis iñiypi allin poqosqa kaqkunaqa,+ ichaqa manachus chayman jina piensankichis chayqa, Diosmi yanapasunkichis chayman jina piensanaykichispaq. 16 Chaywanpas, maykamachus iñiyninchispi wiñarqanchis chayman jinapuni allinta purisun.
17 Wayqeykuna,* llapallaykichis noqa jina kaychis,+ pikunachus noqaykuq ejemplo qosqaykuman jina purishanku chay runakunatapas qatikuychis. 18 Askhan Cristoq ñak’arina k’aspipi* wañusqanta pisichaspa purishanku. Noqaqa rimallaqpunin kani paykunamantaqa ¿riki? Kunanmi ichaqa waqasparaq willamushaykichis. 19 Paykunaq diosninkuqa wijsankun, p’enqay ruwasqankumantan jatunchakunkupas, yuyayninkupas kay pacha kaqkunallapin kashan;+ paykunaqa chinkachisqapunin kanqaku. 20 Noqanchispan ichaqa janaq pachapi+ llaqtanchis kashan,+ chaymi tukuy sonqo suyakunanchis janaq pachamanta jamuspa Señor Jesucristo salvawananchista.+ 21 Paymi jatun atiyninwan kay pisi kallpa cuerponchista cuerpon jina k’anchashaqman tukuchinqa;+ chay atiywanmi payqa lliu imatapas munaychakun.+