Romanos
11 Chhaynaqa, ¿nisunmanchu: “Diosqa wijch’upunmi llaqtanta”,+ nispa? ¡Manapunin! Noqapas Israel llaqtamantan kani, Abrahanpa mirayninmanta, Benjamín ayllumanta. 2 Diosqa manan wijch’unchu llaqtantaqa, aswanmi payqa ñaupaqmantaraq paykunata ajllakurqan;+ icha, ¿manachu yachankichis imatachus Eliasmanta Diospa simin qelqa nisqanta? Paymi Israel llaqtaq contranpi Diosman willakurqan: 3 “Jehová* Diosníy, llapa profetaykikunatan wañuchipunku, altarniykikunatapas thunipunkun, noqallañan kausashani. Kunantaq noqatapas wañuchiyta munashawanku”,*+ nispa. 4 Ichaqa, ¿imanirqantaq Diosri? “Qanchis waranqa runakunatan qhepachikuni, paykunaqa manan Baalman qonqorikunkuchu”+ nispan nirqan. 5 Kunan tiempopipas kallantaqmi llaqtanpiqa wakin qhepaqkuna,+ paykunatan Diosqa ajllakun ancha sumaq sonqo kayninpi. 6 Arí, paykunataqa ancha sumaq sonqo kayninpin ajllan,+ manan imatapas ruwasqankuraykuchu;+ imapas ruwasqankuraykuchus ajllasqa kankuman chayqa, manañachá Diospa ancha sumaq sonqo kayninraykuchu chayqa kanman.
7 Chhaynaqa, Israel llaqta runakunaqa wakillanmi tarirqanku imatachus tukuy sonqowan maskhasharqanku chayta, paykunan karqanku ajllasqakuna;+ wakinmi ichaqa mana uyarikuyta munarqankuchu.+ 8 Paykunamantan Diospa simin qelqapas nin: “Diosmi paykunaq yuyayninta tutayachin puñuywanpas sinchita aysachishanman jinata,+ paykunamanmi qon mana rikuq ñawita mana uyariq ninritawan;+ paykunaqa kunankaman chhayna kashanku”, nispa. 9 Davidpas ninmi: “Mesankupas juj toqllaman, juj trampaman, urmachiq rumiman, castigonkuman ima tukuchun. 10 Ñawinkupas arphayachun, amaña rikuchunkuchu. Wasankupas k’umusqalla kachun”,+ nispa.
11 Chhaynaqa, ¿nisunmanchu: “Paykunaqa mana sayariqllañan urmapurqanku”, nispa? ¡Manapunin! Paykunaq urmasqankuraykun waj nacionkunamanta runakunaqa salvasqa kanku, chhaynapi paykuna phiñasqa kanankupaq.+ 12 Chhaynaqa, urmasqankuqa kay pachaq allinninpaqtaq karqan, pisiyasqankupas waj nacionkunamanta runakunaq allinninpaqtaq karqan chayqa,+ ¡imayna allinraqchá kanqa llapanku juñusqa kaqtinkuqa!
13 Kunanqa qankunatañataqmi rimapayamusaykichis, waj nacionkunamanta kaq iñiqmasiykuna. Noqaqa waj nacionkunapaq apostolmi kani,+ chaymi ancha allinpaq Dios serviyniyta qhawarini,+ 14 chhaynapi imaynallamantapas llaqtamasiy runakunata phiñachispay paykunamanta wakillantapas salvanaypaq. 15 Paykuna wijch’usqa kasqankuraykutaq+ llapa runakuna Dioswan allipunakapuyta atinkuman chayqa, ¿imaynaraqtaq kanman paykuna chaskisqa kaqtinkuri? ¡Wañuymantapas kausarimpunkuman jinaraqmi kanman! 16 Chaymantapas, masamanta ñaupaq kaq orqosqaqa ch’uyataq chayqa, llapa masapas ch’uyallataqmi. Sach’aq saphinchus ch’uya chayqa, k’allmankunapas ch’uyallataqmi.
17 Wakin k’allmakunan ichaqa wit’usqa karqanku, chhaynapin qanqa k’ita aceituna sach’aq k’allmanña karqanki chaypas, huerta aceituna sach’aman k’askachisqa karqanki wakin k’allmankunawan kuska kanaykipaq, chaymi kunanqa qanpas chay sach’aq saphinmanta imaymana allinkunata chaskishanki. 18 Chayraykun mana pisichanaykichu chay wit’usqa k’allmakunataqa;+ manan qanchu saphimanqa kausayta qonki, aswanpas saphin qanman kausayta qoshasunki. 19 Yaqapaschá qanqa nishanki: “Chay sach’aman k’askachisqa kanaypaqmá riki wakin k’allmakunaqa wit’usqa karqanku”,+ nispa. 20 Arí, chhaynan karqan, paykunaqa mana iñisqankuraykun wit’usqa karqanku,+ qanmi ichaqa iñisqaykirayku qaqata sayashanki.+ Chayrayku ama jatunchakuychu, aswanpas Diosta manchakuy. 21 Diosqa manataq kikin k’allmakunatapas jinallatachu qhawarqan chayqa, qantapas manan jinallatachu qhawasunki paykuna jina imatapas ruwanki chayqa. 22 Chhaynaqa, yuyariy Diospa ancha sumaq sonqo kasqanta+ phiñakuq kasqantapas. Payqa juchaman urmaqkunapaqqa phiñakunmi,+ qantan ichaqa sumaq sonqowan qhawarisunki, chayrayku chhayna sumaq sonqollawan qhawarinasuykipaq jina kausay, mana chayqa wit’usqan qanpas kawaq. 23 Ichaqa paykunachus iñiyta qallarinkuman chayqa, paykunapas k’askachisqallataqmi kankuman+ aceituna sach’amanqa, Diosqa atiyniyoqmi kikin sach’ankuman k’askachipunanpaq. 24 Qanpas k’ita aceituna sach’amanta wit’usqa kaspan huerta aceituna sach’aman k’askachisqa karqanki, manaña chayta ruwakunchu chaypas; chhaynaqa, astawanraqchá riki kikin k’allmankunaqa chay sach’aman k’askachisqa kankuman.
25 Wayqeykuna,* ama “llapantan yachayku” nispa ninaykichispaqmi kay pakasqa ch’uya yachayta yachanaykichista munani:+ Israel llaqta wakin runakunan mana uyarikunkuchu, chayqa chhaynapunin kanqa waj nacionkunamanta Diospa ajllasqan runakuna junt’akunankama, 26 chhaynapin llapa Israel llaqta+ salvasqa kanqa. Diospa simin qelqapipas ninmi: “Sionmantan juj kacharichiq* lloqsimunqa,+ jinan Jacobpa mirayninta mana allin ruwaykunamanta karunchachinqa. 27 Maypachachus juchankuta perdonasaq,+ chaypachan noqaqa paykunawan rimanakusaq”,+ nispa. 28 Paykunaqa allin willakuykunata mana uyarisqankuraykun Diospa enemigon kanku, chayqa allinniykichispaqmi, ichaqa ñaupa taytankuman prometekusqanraykun Diosqa paykunamanta wakinta ajllarqan amigonkuna kanankupaq.+ 29 Diosqa manan pesapakunqachu imatapas qosqanmantaqa ni pita wajasqanmantapas. 30 Qankunapas ñaupa tiempopiqa manan Diosta kasukurqankichischu,+ kunanmi ichaqa khuyapayasqa kankichis+ paykuna mana kasukusqankurayku.+ 31 Chhaynaqa, paykunaq mana kasukusqankuraykun Diosqa qankunata khuyapayashasunkichis, chaymi kunanqa paykunapas khuyapayasqa kashanku. 32 Jinaspapas Diosqa lliu runatan mana kasukuq kasqankurayku presota jina rikun,+ chhaynapi llapankuman khuyapayakuyninta rikuchinanpaq.+
33 ¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas! 34 “¿Pipas Jehová* Diospa yuyayninta reqsinmanchu? ¿Pipas yuyaychaqnin kanmanchu?”.+ 35 “¿Pipas payman ñaupaqta imatapas qonmanchu, chhaynapi pay kutichipunanpaq?”.+ Manan ¿riki? 36 Aswanmi tukuy imapas paymanta jamun, payraykutaq kanpas, paypaqtaqmi kanpas. Chayrayku, payqa wiñay-wiñaypaq jatunchasqa kachun. Amén.