1 Reyes
16 Jehová Diosmi Ananipa churin Jehuman+ willarqan Basá contra khaynata ninanpaq: 2 “Jallp’amanta sayarichispan Israel llaqtaypa umallinta churarqayki,+ qanmi ichaqa Jeroboán jina juchallikurqanki. Chaymantapas qanqa Israel llaqtaytan juchallichirqanki, chaymi paykunaqa sinchita phiñachiwarqanku.+ 3 Chayraykun qantapas familiaykitapas lliuta chinkachisaykichis, Nebajpa churin Jeroboanpa familianta jinan familiaykitapas ruwasaq.+ 4 Llaqtapi wañuq familiaykitan alqokuna mijunqa, campopi wañuq familiaykitataq phalaq animalkuna mijunqa”, nispa.
5 Basá reymanta wakin willakuykunapas, atiyninwan ruwasqankunapas, lliu ruwasqankunapas Israel reykunamanta willaq libropin qelqasqa kashan. 6 Chaymantataq Basaqa ñaupa taytankuna jina wañukapurqan, jinaspa Tirzá+ llaqtapi p’ampapurqanku. Chay qhepamantaq churin Elá rey kapurqan. 7 Basaqa Jeroboanpa familian jinan juchallikurqan, mana allin ruwaykunata ruwaspan Jehová Diosta phiñachirqan, chaymantapas Nadabtan wañuchirqan. Tukuy chaykuna ruwasqanmantan Jehová Diosqa profeta Jehuwan willachirqan Basatapas familiantapas imachus pasananta.+
8 Rey Asá iskay chunka soqtayoq wataña Judá ayllupi kamachikushaqtinmi Basapa churin Elaqa Israelpi rey kapurqan. Payqa iskay watan Tirzá llaqtamanta Israel runakunata kamachirqan. 9 Elapa carretankunata manejaqkunaqa iskay t’aqan karqanku, jujnin t’aqaq umallinmi karqan Zimrí. Paymi Elá contra jatarirqan. Elaqa Tirzá llaqtapin machasharqan Arzapa wasinpi, Arzaqa Tirzá llaqtapi kaq reypa wasinmanta encargakuqmi karqan. 10 Chaypi machashaqtinmi Zimriqa qonqaylla jaykuspa rey Elata wañuchipurqan,+ chhaynapin payqa rey kapurqan. Chaytan Zimriqa ruwarqan iskay chunka qanchisniyoq wataña rey Asá Judá ayllupi kamachikushaqtin. 11 Kamachikuyta qallarispa jinataq Basapa familianta lliuta wañuchipurqan. Parientenkunatapas* amigonkunatapas lliutan wañuchipurqan, manan ni juj qharipas* qheparqanchu. 12 Chhaynatan Zimriqa Basapa familianta lliuta chinkachipurqan, Jehú profetawan Basá contra Jehová Diospa willachisqanman jina.+ 13 Chaykunaqa pasarqan Basawan churin Elawan juchallikusqankuraykun. Paykunaqa mana valeq idolokunata ruwaspankun Israel runakunata juchallichirqanku, chayta ruwaspankun Israelpa Diosnin Jehová Diosta phiñachirqanku.+ 14 Elapa wakin ruwasqankunapas lliumi Israel reykunamanta willaq libropi qelqasqa kashan.
15 Rey Asá Judá ayllupi iskay chunka qanchisniyoq wataña kamachikushaqtinmi Zimriqa qanchis p’unchaylla Tirzá llaqtapi rey karqan. Chay p’unchaykunapiqa Guibetón+ llaqtatan Israel soldadokunaqa muyuykusharqanku Filistea runakunawan maqanakunankupaq. 16 Chaypi kashaspan Israel soldadokunaqa uyarirqanku rey Elá contra Zimrí jatarisqanta, jinaspa wañuchipusqanta. Chaymi paykunaqa chay p’unchaypacha Israel soldadokunaq umallin Omrita+ reyta churarqanku. 17 Jinan Omriqa llapa Israel soldadokunantin Guibetón llaqtamanta Tirzá llaqtaman rirqanku jinaspa chay llaqtata muyuykurqanku. 18 Llaqtata muyuykusqankuta rikuspataq Zimriqa reypa wasinpi aswan allin perqasqa wasiman jaykurqan, jinaspa reypa wasinta* kanaykuspa chay ukhupi wañupurqan.+ 19 Tukuy chaykunaqa pasarqan Jehová Diospa cheqnikusqan ruwaykunata ruwasqanraykun, Jeroboán jina juchallikusqanrayku, Israel runakunatapas juchallichisqanrayku ima.+ 20 Zimripa wakin ruwasqankunapas, rey contra jatarisqanpas Israel reykunamanta willaq libropin qelqasqa kashan.
21 Chay tiempopin Israel runakunaqa iskayman t’aqanakurqanku. Juj t’aqan Guinajpa churin Tifnita reyta churayta munarqanku, juj t’aqataq Omrita yanaparqanku. 22 Omrita yanapaqkunan ichaqa Guinajpa churin Tifnipa yanapaqninkunata atiparqanku, jinan Tifniqa wañupurqan Omritaq rey kapurqan.
23 Judá ayllupi rey Asá kinsa chunka jujniyoq wataña kamachikushaqtinmi Omriqa Israelpi kamachikuyta qallarirqan, chunka iskayniyoq watataq Israelpi rey karqan. Payqa soqta watan Tirzá llaqtamanta kamachikurqan. 24 Omriqa Samaria orqotan Semermanta rantirqan iskay talento* pesaq qolqewan, chay orqopin payqa juj llaqtata jatarichirqan, jinaspa Samaria* nispa suticharqan.+ Chhaynatan suticharqan chay orqo vendeqnin Sémer sutiyoq kasqanrayku. 25 Omriqa Jehová Diospa cheqnisqan ruwaykunatan ruwarqan, paypa ñaupanta kaq reykunamantapas aswan mana allintaraqmi ruwarqan.+ 26 Omriqa Nebajpa churin Jeroboán jinan juchallikurqan. Payqa Jeroboán jinan mana valeq idolokunata ruwarqan, chaywantaq Israel runakunata juchallichirqan, chhaynapin Israelpa Diosnin Jehová Diosta phiñachirqan.+ 27 Omripa wakin ruwasqankunapas guerrakunapi atipasqankunapas lliumi Israel reykunamanta willaq libropi qelqasqa kashan. 28 Chaymantataq Omriqa ñaupa taytankuna jina wañukapurqan, jinaspa Samaria llaqtapi p’ampapurqanku. Chay qhepamantaq churin Ajab+ rey kapurqan.
29 Judá ayllupi rey Asá kinsa chunka pusaqniyoq wataña kamachikushaqtinmi Omripa churin Ajabqa Israelpi rey kapurqan. Ajabqa iskay chunka iskayniyoq watan Samariamanta+ Israelta kamachirqan. 30 Omripa churin Ajabqa ñaupanta kaq reykunamantapas astawanraqmi Jehová Diospa cheqnikusqan ruwaykunata ruwarqan.+ 31 Ajabqa Nebajpa churin Jeroboán jinan juchallikurqan,+ ichaqa manan chayllatachu ruwarqan, payqa Sidón runakunaq+ reynin Ejbaalpa ususin Jezabelwanmi+ casarakurqan. Jinan Ajabqa Baal idoloman qonqorikuspa chay idolota yupaychayta qallarirqan.+ 32 Chaymantapas Samaria llaqtapi Baalpaq templota*+ ruwachisqanpin juj altarta chay idolopaq ruwachirqan. 33 Jinaspapas k’ullutan* sayachirqan yupaychanankupaq.+ Ajabqa paypa ñaupanta kaq llapa Israel reykunamantapas aswan mana allintaraqmi ruwarqan, chhaynatan Israelpa Diosnin Jehová Diosta phiñachirqan.
34 Ajab kamachikushasqan tiempopin Betel llaqtayoq Jielqa Jericó llaqtata jujmanta sayarichirqan. Chay llaqtaq cimentacionninta churaqtinmi phiwi* churin Abiram wañupurqan, punkukunata churaqtintaq sullk’a kaq churin Segufñataq wañupurqan. Tukuy chaykunaqa junt’akurqan Nunpa churin Josuewan Jehová Diospa willachisqanman jinan.+