1 Reyes

18 Kinsa watañan para mana karqanchu,+ jinan Jehová Diosqa Eliasta nirqan: “Phaway Ajabpa kasqanman riy, kay jallp’amanmi parata chayachimusaq”,+ nispa. 2 Jinan Eliasqa Ajabpa kasqanman rirqan. Samaria llaqtapiqa sinchipunin yarqay kasharqan.+

3 Chay p’unchaykunapin Ajabqa paypa wasinmanta encargakuq Abdiasta wajachirqan. (Abdiasqa Jehová Diosta manchakuq runan karqan. 4 Paymi Jehová Diospa pachaj profetankunata qaqa t’oqopi pakarqan. Pisqa chunka profetakunatan juj qaqa t’oqopi pakarqan, wakin pisqa chunka profetakunatataq juj qaqa t’oqopi, chaymantaq unutawan t’antatawan apaq. Chaytan Abdiasqa ruwarqan Diospa profetankunata Jezabel+ wañuchishaqtin). 5 Jinan Ajabqa Abdiasta nirqan: “Phaway kay nacionpi kaq lliu mayu wayq’okunata pujyukunata qhawaramuy. Yaqapaschá mayllapipas pastota tarimuwaq, chhaynapi caballonchiskunapas, mulanchiskunapas ama wañunanpaq, mana chayqa llapa animalninchiskunan wañurapunqa”, nispa. 6 Jinan Ajabqa juj ladoman maskhaq rirqan, Abdiastaq juj kaq ladoman rirqan, chhaynatan Israel jallp’ata t’aqanakurqanku pastota maskhamunankupaq.

7 Abdías ñanta rishaqtinmi Eliasqa paywan tupaq jamusharqan. Jinan Abdiasqa Eliasta rikuruspa jina qonqorikuspa pampakama k’umuykurqan, jinaspa nirqan: “Wiraqocháy, ¿Eliaspunichu kashanki?”,+ nispa. 8 Eliastaq nirqan: “Arí noqan kashani, phaway wiraqochaykita nimuy: Eliasmi kaypi kashan, nispa”. 9 Abdiasmi ichaqa nirqan: “Wiraqocháy, ¿imapin noqa juchallikurqani? ¿Ima juchaymantan Ajabman entregayta munawanki? Entregawanki chayqa wañuchiwanqachá. 10 Wiñaypaq kausaq Jehová Diospa sutinpin jurayki, Ajabqa lliu nacionkunapin lliu llaqtakunapin maskhachimusunki. Manan kaypiqa kanchu niqtinkutaq paykunata jurachiq cheqaqtapuni chaypi mana kasqaykita.+ 11 ¿Chaychu kunan noqata nishawanki: Phaway wiraqochaykita nimuy: Eliasmi kaypi kashan, nispa? 12 Kaymanta ripuqtiyqa Jehová Diospa espiritunchá maymanraq apasunki.+ Ajabman willaramuqtiy mana tarisunkichu chayqa wañuchiwanqachá riki. Noqaqa juch’uychaymantapachan Jehová Diosta manchakuywan kasukuni. 13 Wiraqocháy, ¿manachu willarqasunkiku Jehová Diospa profetankunata Jezabel wañuchishaqtin noqa paykunata yanapasqayta? ¿Manachu nirqasunkiku Jehová Diospa pachaj profetankunata qaqa t’oqopi pakasqayta? Noqan paykunataqa pakarqani pisqa chunkata juj qaqa t’oqopi wakin pisqa chunkatataq juj qaqa t’oqopi. Paykunamanqa noqan t’antatapas unutapas mana faltayta aparqani.+ 14 ¿Chaychu kunan noqata nishawanki: Phaway wiraqochaykita nimuy: Eliasmi kaypi kashan, nispa? ¿Ajabpa wañuchiwanantachu munanki?”, nispa. 15 Eliasmi ichaqa nirqan: “Ama manchakuychu, ejercitokunata kamachiq Jehová Diospa* sutinpin, servisqay wiñaypaq kausaq Diospa sutinpin jurayki, Ajabwanqa tupasaqpunin kay p’unchayqa”, nispa.

16 Chaymi Abdiasqa Ajabman chayta willamurqan. Jinan Ajabqa Eliaswan tupaq rirqan.

17 Eliasta rikuruspa jinataq Ajabqa nirqan: “¡Qanpa juchaykipin Israel llaqtaqa ñak’arishan!”, nispa.

18 Eliastaq nirqan: “Manan noqachu juchayoqqa kani. Aswanpas qanmi llapa familiaykipiwan* juchayoqqa kankichis. Qankunan Jehová Diospa kamachikuyninkunata saqespa Baal idolokunata yupaychashankichis.+ 19 Kunanqa Carmelo orqoman+ wajachiy llapa Israel runakunata, Jezabelpa mesanpi mijuq Baalpa tawa pachaj pisqa chunka profetankunata, sayashaq k’ulluta*+ yupaychaq tawa pachaj profetakunatawan, chay orqopin paykunawan tupamusaq”, nispa. 20 Jinan Ajabqa llapa Israel runakunaman willachimurqan, jinaspa profetakunawan kuska Carmelo orqopi juñukurqanku.

21 Jinan Eliasqa llapa runakunaman asuykuspa nirqan: “¡Jayk’aqkaman iskayankichis!+ ¡Sichus Jehová Dios cheqaq Dios chayqa, payta serviychis,+ Baalchus chayqa payta serviychis!”, nispa. Chaypi kaq lliu runakunan ichaqa mana imanirqankupaschu. 22 Chaymantataq Eliasqa paykunata nillarqantaq: “Jehová Diospa profetankunamantaqa sapallayñan kashani,+ Baalpa profetankunan ichaqa tawa pachaj pisqa chunka kashanku. 23 Chhaynaqa Baalpa profetankunapaqwan noqapaqwan iskay malta torokunata qowachunku. Jinaspa paykuna juj torota ajllakuchunku, chay torota ñak’aspataq kuchusqata llant’a pataman churaykuchunku, ichaqa aman ninawanqa jap’ichinqakuchu. Noqapas juj kaq torota ñak’aspaymi kaqllatataq llant’a pataman churasaq ichaqa manan ninawanqa jap’ichisaqchu. 24 Chay qhepamantaq diosniykichista wajakunkichis,+ noqataq Jehová Diosta wajakusaq. Mayqen Dioschus ninawan ofrendata ruphachinqa, chay Diosmi cheqaq Diosqa kanqa”,+ nispa. Jinan llapa runakunaqa nirqanku: “Allinmi”, nispa.

25 Jinan Eliasqa Baalpa profetankunata nirqan: “Qankunaqa askhataq kankichis chayqa, qankunaraq juj malta torota ajllakuychis, jinaspa nisqayman jina ruwaspa diosniykichista wajakuychis, ninawanmi ichaqa ama jap’ichinkichischu”, nispa. 26 Jinan paykunaqa juj malta torota ajllakuspa Eliaspa nisqanman jina ruwarqanku, jinaspa tutamantanmanta chaupi p’unchaykama Baalta wajakurqanku: “¡Diosniyku Baal, uyariykuwayku!”, nispa. Ichaqa manan pipas wajakusqankuta kutichimurqanchu.+ Paykunaqa mana samaspan salta-saltarispa altarpa muyuriqninpi tususharqanku. 27 Chaupi p’unchayta jinataq Eliasqa paykunamanta burlakuspa nirqan: “¡Aswan fuertetayá wajakuychis, Baalqa diostaq chayqa uyarimusunkichismi!+ ¡Wajakullaychis, imapipaschá piensashan icha jisp’akuqchu rinpas!* ¡Puñushanpaschá, rijch’arichiychis!”, nispa. 28 Chaymi paykunaqa astawan qaparirqanku, costumbrenkuman jinataq cuchillokunawan lanzakunawan cuerponkuta kuchukurqanku. Chhaynapin yawarwan bañasqaraq kasharqanku. 29 Chaupi p’unchay pasaytapas waq’a jinan phawakachashallarqanku, chhaynatan ruwashallarqanku jak’u ofrendata jaywana horas tardekama. Ichaqa manan pipas kutichimurqanchu, manan pipas paykunataqa uyarimurqanchu.+

30 Chay qhepamantaq Eliasqa llapa runakunata nirqan: “Kayman asuykamuychis”, nispa. Jinan llapa runakuna asuykurqanku. Chaymantataq Eliasqa Jehová Diospa thunisqa altarninta allicharqan.+ 31 Payqa chunka iskayniyoq rumikunatan ajllarqan Israelpi chunka iskayniyoq ayllukuna kasqanman jina. Chay ayllukunaqa Jacobpa wawankunamantan mirarqan. Paytan Jehová Diosqa nirqan: “Sutiykiqa Israelmi kapunqa”,+ nispa. 32 Chay rumikunawanmi Eliasqa Jehová Diospa sutinta jatunchanapaq juj altarta ruwarqan.+ Chay altarpa muyuriqninpitaq ruwarqan juj zanjata, chay zanjamanta altar k’uchukama jallp’aqa iskay canasta* mujuta t’akanapaq jinan karqan. 33 Chay altar patamanmi llant’ata churarqan,+ llant’a patamantaq ñak’asqa malta torota kuchusqata churarqan. Jinaspan nirqan: “Tawa jatun p’uyñukunaman unuta junt’achimuychis, chay unutataq jich’aykuychis ofrendamanwan llant’amanwan”, nispa. 34 Jujmantan Eliasqa nillarqantaq: “Jujtawan tawa p’uyñu unuta jich’aykuychis”, nispa. Jinan paykunaqa jich’aykurqanku. Chaymantapas nillarqantaqmi: “Jujtawanpuni chhaynata ruwallaychistaq”, nispa. Jinan paykunaqa kinsa kaq kutipi jujtawan unuta jich’aykullarqankutaq. 35 Chaymi unuqa altarpa muyuriqninpi puririrqanraq. Chaymantapas Eliasqa zanjamanmi unuta junt’ata jich’aykullarqantaq.

36 Tardenmantaq jak’u ofrenda jaywana horasta+ jina profeta Eliasqa altarman asuykuspa mañakurqan: “Jehová Diosníy, qanmi kanki Abrahanpa,+ Isaacpa,+ Israelpa Diosnin. Kunan p’unchay Israel runakuna yachachunku Israelpiqa qanlla Dios kasqaykita. Yachallachunkutaq qanpa profetayki kasqayta, tukuy kaykunata kamachiwasqaykirayku ruwasqaytapas.+ 37 ¡Uyariykuway mañakusqayta Jehová Diosníy! ¡Kutichimuway Jehová Diosníy! Chhaynapin kay llaqta runakuna yachanqaku qanlla cheqaq Dios kasqaykita, qanman kutimunankupaq yanapay munasqaykitapas”,+ nispa.

38 Chayllamanmi Jehová Diosqa janaq pachamanta ninata kachayamurqan, jinaspan chay ninaqa ofrendata,+ llant’ata, rumikunata, jallp’atawan lliuta rupharqan; zanjapi unutapas lliutan ch’akichipurqan.+ 39 Chayta rikuspan runakunaqa kaq ratupacha qonqorikuspa pampakama k’umuykurqanku, jinaspa nirqanku: “¡Jehová Diosmi cheqaq Diosqa! ¡Jehová Diosmi cheqaq Diosqa!”, nispa. 40 Jinan Eliasqa nirqan: “¡Jap’iychis Baalpa profetankunata! ¡Ama ni jujpas ayqechunchu!”, nispa. Baalpa profetankunata lliuta jap’imuqtinkutaq Eliasqa Cisón wayq’oman+ apaykuspa chaypi llapankuta wañuchirqan.+

41 Chaymantataq Eliasqa Ajabta nirqan: “Sinchi paraq chayamushasqantan uyarishani, phaway mijuramuy ujaramuy”,+ nispa. 42 Jinan Ajabqa mijuq ujaq rirqan. Eliasmi ichaqa Carmelo orqo pataman seqarqan, chay patapin qonqorikuspa pampakama k’umuykurqan, uyanpas moqonkamaraqmi* chayarqan.+ 43 Chaymantataq Eliasqa yanapaqninta nirqan: “Phaway lamar-qocha ladota qhawaramuy”, nispa. Jinan yanapaqninqa seqaspa qhawamurqan, jinaspataq nirqan: “Manan imapas kanchu”, nispa. Eliasqa qanchis kutitan nirqan: “Phaway lamar-qocha ladota qhawaramuy”, nispa. 44 Qanchis kaq kutipin yanapaqninqa Eliasta nirqan: “¡Qhawariy! Lamar-qochamanta maki sayay phuyu wichamushan”, nispa. Eliastaq nirqan: “Phaway Ajabta nimuy: ¡Carretaykita alistakuy, jinaspa uraykuy! Mana chayqa paran jark’asunki, nispa”. 45 Chayllamanmi yana phuyu wayrantin jamurqan, jinan paraqa cielomanta unu jinaraq jich’arikamurqan.+ Ajabqa carretanpin Jezrel llaqtaman ripurqan.+ 46 Eliasmanqa Jehová Diosmi atiyta qorqan, chaymi payqa cinturanman p’achanta watarukuspa Ajabpa ñaupanta phawaylla Jezrel llaqtakama rirqan.