2 Reyes
11 Atalian+ yacharurqan churin Ocoziasta wañuchipusqankuta,+ chaymi reypa familianmanta kaqkunata lliuta wañuchirqan.+ 2 Rey Jehorampa ususin, Ocoziaspa panan Jehoseban ichaqa Ocoziaspa churin Jehoasta+ pakarqan. Jehosebaqa reypa churinkunata llapanta wañuchinanku kashaqtinmi chay wawata uywaqnintawan puñuna cuartopi pakarqan. Chhaynapin Ataliaqa mana Jehoasta wañuchirqanchu. 3 Jehoastaqa Jehová Diospa wasinpin soqta wata pakarqanku, chaykamataq Atalía Judá ayllupi kamachikusharqan.
4 Qanchis kaq watapitaq Jehoiadaqa wajachirqan reyta cuidaq soldadokunaq* umallinkunata, palaciopi llank’aq soldadokunaq umallinkunatawan,+ chay umallikunaqa pachaj soldadokunaq umallinkunan karqanku. Paykunatan Jehoiadaqa Jehová Diospa wasinman wajachirqan. Chaypin paykunawan juj acuerdota ruwarqan, jinaspa chay acuerdota junt’anankupaq Jehová Diospa wasinpi jurachirqan. Chaymantataq reypa churin Jehoasta paykunaman rikuchirqan.+ 5 Chaymantataq nirqan: “Khaynatan ruwankichis. Samana p’unchaypi llank’aq soldadokunan reypa wasinta* makilla cuidanqa;+ 6 iskay kaq t’aqa soldadokunataq Cimentación Punku nisqapi kanqa; kinsa kaq t’aqa soldadokunataq kanqa maypichus palaciopi llank’aq soldadokuna kashanku chay qhepa punkupi. Llapaykichismi tupasqasuykichisman jina templota* cuidankichis. 7 Iskay t’aqamanta kaqkunapas kinsa t’aqamanta kaqkunapas manaña samana p’unchaypi llank’ankichischu chaypas, llapaykichismi chay p’unchay jamunkichis, jinaspa Jehová Diospa wasinta makilla qhawankichis reyta cuidanaykichispaq. 8 Sapankaykichismi makiykichispi armantinkama tukuy ladomanta reyta cuidankichis, maymanña rey rinqa chaypas paywan kuskan rinkichis, pipas qayllaykamunqa chayqa wañuchinkichismi”, nispa.
9 Pachaj soldadokunaq umallinkunaqa+ sacerdote Jehoiadapa nisqanman jinan lliuta ruwarqanku. Sapanka umallin runankunata wajachirqan, samana p’unchaypi llank’aqkunatapas chay p’unchaypi mana llank’aqkunatapas, chaymantataq llapanku sacerdote Jehoiadapa+ kasqanman jaykurqanku. 10 Jinan sacerdote Jehoiadaqa pachaj soldadokunaq umallinkunaman qorqan rey Davidpa lanzankunata jark’apakuna muyu escudonkunata ima. Chaykunaqa Jehová Diospa wasinpin waqaychasqa kasharqan. 11 Chaymantataq palaciopi llank’aq soldadokunaqa+ makinkupi armantinkama maypichus kanankuman rirqanku. Chay soldadokunaqa wasiq ñaupanpin sayasharqanku paña ladomanta lloq’e ladokama, wakintaq sayasharqanku altarpa qayllanpi,+ wakintaq wasiq qayllanpi. Chhaynapin reyta tukuy ladomanta cuidasharqanku. 12 Jinan sacerdote Jehoiadaqa reypa churin Jehoasta jawaman pusamurqan,+ jinaspa umanman juj coronata churaykurqan, Diospa kamachikuynin qelqatataq qorqan.*+ Chaymantataq aceitewan jich’aykuspa reyta churarqan, jinan runakunaqa t’aqllakuspanku nirqanku: “¡Kausachun rey!”,+ nispa.
13 Ataliataq runakunaq phawashasqanta uyarispa Jehová Diospa wasinta rirqan imachus pasashasqanta yachananpaq.+ 14 Chaypin reyta rikurqan costumbrenkuman jina columna qayllapi sayashaqta.+ Umallikunapas reywan kuskan kashasqaku, trompeta tocaqkunapas trompetatan tocashasqaku,+ llapa runakunan ancha kusisqa kashasqaku. Chayta rikuspa jinan Ataliaqa p’achanta llik’ikuspa qaparirqan: “¡Reina contran sayarishanku! ¡Reina contran sayarishanku!”, nispa. 15 Sacerdote Jehoiadami ichaqa pachaj soldadokunaq umallinkunata+ nirqan: “¡Orqoychis kay warmita! ¡Pipas payta qatikuqtapas wañuchiychis!”, nispa. Sacerdote Jehoiadaqa ñan nisqaña: “Aman Jehová Diospa wasinpiqa wañuchinkichischu”, nispa. 16 Jinan paykunaqa Ataliata jap’ispa chaymanta orqorqanku, jinaspa reypa wasinman+ caballokunaq jaykunan cheqaspi wañuchipurqanku.
17 Chaymantataq Jehoiadaqa reytawan llaqta runakunatawan nirqan Jehová Dioswan juj acuerdota ruwanankupaq,+ chaypin paykunaqa prometekurqanku Jehová Diospa llaqtallanpuni kashanankupaq. Chaymantapas llaqta runakunatawan reytawanmi juj acuerdota ruwachirqan.+ 18 Chaykuna qhepamantaq runakunaqa llapanku Baalpa templonman rirqanku, jinaspa altarkunata thunirqanku+ idolokunatapas lliuta chhallurqanku.+ Baalpa sacerdoten Matantapas altarpa ñaupanpin wañuchipurqanku.+
Chaymantataq sacerdote Jehoiadaqa Jehová Diospa wasinta qhawanankupaq encargakuqkunata churarqan.+ 19 Chay qhepamantaq Jehoiadaqa juñurqan pachaj soldadokunaq umallinkunata,+ reyta cuidaq soldadokunata,* palaciopi llank’aq soldadokunata,+ llapa runakunatawan, chhaynapi Jehová Diospa wasinmanta reypa wasinkama reyta riysinankupaq. Reypa wasinman chayaspataq Jehoasqa tronopi tiyaykurqan.+ Reypa wasinmanqa palaciopi llank’aq soldadokunaq purinanku punkuntan chayarqanku. 20 Ataliataqa reypa wasin qayllapin espadawan wañuchipurqanku, chaymi llapa runakunaqa ancha kusisqa thaj kasharqanku.