Colosenses
2 Maytan yachanaykichista munayman may tukuytachus qankunarayku, Laodicea llaqtapi+ iñiqmasikunarayku, noqata llapa mana reqsiwaqkunarayku ima kallpachakushani chayta, 2 chhaynapi sonqoykichis kallpachasqa kananpaq,+ llapaykichis munakuypi allin jujllachasqa kanaykichispaq ima;+ chhaynapin qhapaq kankichis, chay qhapaq kayqa Diospa pakasqa ch’uya yachayninmanta allinta yachaymi allinta entiendey iman, chay pakasqa ch’uya yachayqa Criston karqan.+ 3 Paypin allin pakasqa kashan ancha valorniyoq yachaypas entiendeypas.+ 4 Chaytaqa nishaykichis ama pipas sumaq simikunawan engañanasuykichispaqmi. 5 Manaña qankunawanchu kashani chaypas, yuyayniyqa qankunawanmi kashan,* imatapas allinta ruwasqaykichismanta+ kusikuspa Cristopi allinta iñisqaykichismanta+ kusikuspa ima.
6 Chhaynaqa, imaynan Señor Cristo Jesusta chaskirqankichis, chhaynallatapuni payman jujllachasqa purishaychis. 7 Imaynan yachachisqa karqankichis chayman jina Jesuspi allin saphichasqa allin perqasqa ima kaychis,+ iñiyniykichispipas qaqata sayaychis,+ Diosmanpas graciasta qollaychispuni.+
8 Allinta cuidakuychis, paqtataq pipas runaq piensayninman jina yachaykunawan yanqa mana valeq yuyaykuykunawan presota jina apasunkichisman,+ chaykunaqa runaq costumbrenkunaman jinallan kashan, kay pachaq kaqninkunaman jinataqmi kashanpas, manataqmi Cristoq yachachikuyninman jinachu. 9 Cristopin junt’a kashan Diospa imaynachus kasqanqa;+ 10 payraykun qankunamanqa mana imapas faltasunkichischu, paymi llapa gobiernoq umanqa llapa autoridadpa umanpas.+ 11 Paywan jujllachasqa kasqaykichisraykun señalasqa* karqankichis, ichaqa manan imaynan runakuna señalanku jinatachu señalachikurqankichisqa, aswanpas aycha cuerpoykichista ch’utikuspan;+ chhayna señalasqan kananku Cristota qatikuqkunaqa.+ 12 Qankunaqa paywan kuskan p’ampasqa karqankichis pay jina bautizasqa kasqaykichisrayku;+ paywan jujllachasqa kasqaykichisraykutaq paywan kuska kausarichisqa* karqankichis,+ payta kausarichiq Diospa atiyninpi iñisqaykichisrayku.+
13 Qankunaqa juchaykichisraykun wañusqa kasharqankichis, qhari kayniykichis qarachapas manan kuchusqachu kasharqan, chaywanpas Diosmi kausarichirqasunkichis Cristowan jujllachasqa kanaykichispaq.+ Sumaq sonqo kayninpin payqa llapa juchanchiskunata perdonapuwarqanchis,+ 14 llapa kamachikuy simitataqmi chinkachipurqanpas,+ chay kamachikuy simiqa+ noqanchispa contranchispin qelqasqa kasharqan,+ chaytan payqa chinkachipurqan ñak’arina k’aspiman* clavaspa.+ 15 Ñak’arina k’aspipi Cristoq wañusqanwanmi payqa gobiernokunata autoridadkunatapas q’alata ch’utirqan, jinaspa lliuman rikuchirqan guerrapi vencesqakunata jina,+ presochasqatataq apapurqanpas.
16 Chhaynaqa, manan pipas juchachanasuykichischu imachus mijusqaykichismanta, ujasqaykichismanta,+ fiesta p’unchaykunamanta, mosoq killa p’unchaymanta+ ni samana p’unchay* waqaychaymantapas.+ 17 Chaykunaqa imakunachus jamunan karqan chaykunaq llanthullanmi karqan,+ chay llanthuqmi ichaqa Cristo karqan.+ 18 Cuidakuychis runaq rikunallanpaq k’umuykukuq kaqkunamanta, angelkuna adoraqkunamantapas,* mana chayqa premio chaskinaykichistan jark’asunkichisman.+ Chay runakunaqa rikusqallankumanmi jap’ipakunku, yanqa piensasqankuwantaq jatunchakunku. 19 Paykunaqa manan umalliqtapas kasunkuchu;+ chay umalliqmi llapa cuerpota kausachiqqa, moqochunkunawan jank’unkunawan imataq llapa partenkunata jujllachasqata jap’in, jinaspa Diospa munayninman jina wiñachin.+
20 Cristo Jesuswan kuskataq kay pacha kaqkunapaqqa wañupurqankichis chayqa,+ ¿imaynapitaq qankunari kay pachamantaraqpas kawaqchis jinaraq kasukushallankichis+ 21 “aman llaminkichu, aman malliykunkichu, aman tupaykunkipaschu” nisqa kamachikuykunata? 22 Chaykunaqa mijusqa kaspa ujasqa kaspa iman tukukapun, chay kamachikuykunapas yachachikuykunapas runallamantan jamun.+ 23 Chay kamachikuykunaqa allin yuyaywan qosqa jinapaschá kanman, ichaqa manan valenchu aychaq munayninta vencenapaq, chhayna adorayqa runaq munayninman jinalla kasqanrayku, chaymantapas chhayna adoraqkunaqa ñak’arinkun, chaymi chhayna adorayta ajllakunku runakuna k’umuykukuqpaq piensanankuta munaspanku.+