Mateo

9 Chaymi Jesusqa boteman seqaspa juj ladoman chimparqan, jinaspa tiyasqan llaqtaman jaykurqan.+ 2 Chayllamanmi mana kuyuriy atiq runata camillapi apamurqanku. Chaymi Jesusqa iñiyniyoq kasqankuta rikuspa chay mana kuyuriq runata nirqan: “Wawalláy, kallpachakuy, juchaykikunan perdonasqa kapun”,+ nispa. 3 Jinan kamachikuy simita yachachiqkunamanta wakinqa ninakurqanku: “Kay runaqa Diospa contranpimá rimashan”, nispa. 4 Jesustaq imachus piensasqankuta yachaspa nirqan: “¿Imaraykun sonqoykichispi mana allin kaqkunata piensashankichis?+ 5 ¿Mayqentaq aswan fácil kanman: Juchaykikunan perdonasqa kapun, niychu, icha: Jatarispa puririy, niychu?+ 6 Yachanallaykichispaqpas, runaq Churinqa atiyniyoqmi kay pachapi juchakunata perdonananpaq”, nispa. Chaymantan chay mana kuyuriy atiq runata nirqan: “Sayariy, camillaykita oqarispa wasiykiman ripuy”,+ nispa. 7 Jinan payqa sayarispa wasinman ripurqan. 8 Chayta rikuspan runakunaqa sinchita admirakurqanku,* jinaspa Diosta jatuncharqanku runakunaman chhayna atiy qosqanmanta.

9 Chaymanta rishaspataq Jesusqa rikurqan Mateo sutiyoq runata, impuesto cobranapi tiyashaqta, jinaspa nirqan: “Qatikamuway”,* nispa. Jinan Mateoqa sayarispa qatikurqan.+ 10 Chaymantataq Mateoq wasinpi mijushaqtin askha jamurqanku impuesto cobraqkuna juchasapa runakuna ima, jinaspa Jesuswan discipulonkunapiwan kuska mijuyta qallarirqanku.+ 11 Chayta rikuspan fariseokunaqa Jesuspa discipulonkunata nirqanku: “¿Imaraykun yachachiqniykichis mijun impuesto cobraqkunawan juchasapa runakunawan ima?”,+ nispa. 12 Jesustaq chayta uyarispa nirqan: “Qhali runakunaqa manan doctorta necesitankuchu, onqosqakunan ichaqa necesitanku.+ 13 Chayrayku, riychis, jinaspa Diospa imachus nisqanta yachamuychis, paymi nin: Khuyapayakuq kanaykichistan munani, manan sacrificiokuna jaywawanaykichistachu,+ nispa. Noqaqa manan chanin runakunata wajaqchu jamuni, aswanpas juchasapakunata wajaqmi”, nispa.

14 Chaymantataq Juanpa discipulonkuna jamuspanku Jesusta tapurqanku: “Noqaykupas fariseokunapas ayunaykun, ¿imanaqtintaq discipuloykikunari mana ayunankuchu?”,+ nispa. 15 Jesustaq paykunata nirqan: “¿Llakikunkumanchu novioq amigonkuna paykunawanraq novio+ kashaqtin? Manan ¿riki? Ichaqa chayamunqan p’unchaykuna, chaypin casarakuq runaqa paykunamanta qechusqa kanqa,+ chayñan paykunaqa ayunanqaku. 16 Manan pipas mauk’a p’achamanqa mosoq telawan remiendanmanchu, mana chayqa chay mosoq telan q’estispa* mauk’a p’achata chutarinman, chhaynapitaq astawan llik’irparinman.+ 17 Manallataqmi pipas mana poqosqa vinotaqa mauk’a qara p’uyñukunaman* jich’aykunmanchu, chhayna kaqtinqa chay p’uyñukunachá phatapunman vino poqoqtin, vinotaq jich’akapunman, qara p’uyñukunapas manaña imapaqpas valepunmanchu. Aswanpas mana poqosqa vinotaqa mosoq qara p’uyñukunamanmi jich’aykuna, chhaynapin qara p’uyñupas mana phatanqachu, vinopas mana usunqachu”, nispa.

18 Chaykunata rimashallaqtinraqmi juj umalli runa payman qayllaykuspa ñaupanpi k’umuykurqan, jinaspa nirqan: “Ñachá ususiyqa wañurapunña, jamuy, payta llamiykampuway kausarinanpaq”,+ nispa.

19 Chaymi Jesusqa sayarispa discipulonkunawan kuska qhepanta rirqan. 20 Chayllamanmi chunka iskayniyoq wataña yawar apay onqoywan ñak’arishaq warmi+ Jesuspa qhepallanta qayllaykuspa jawa p’achanpa puntanta llamiykurqan.+ 21 Payqa sonqonpin nisqaña: “Jawa p’achallantapas llamiykusaq chayqa, qhaliyarusaqmi”, nispa. 22 Jesustaq kutirispa payta rikurqan, jinaspa nirqan: “¡Ususíy, kallpachakuy! Iñiyniykin qhaliyachisunki”,+ nispa. Chay ratumantapachan chay warmiqa qhali kapurqan.+

23 Umalli runaq wasinman jaykuspataq Jesusqa rikurqan flauta* tocaqkunata askha runakunatawan bullachakushaqta.+ 24 Jinan Jesusqa nirqan: “Lloqsiychis, sipaschaqa manan wañunchu, puñushallanmi”,+ nispa. Chayta niqtinmi paykunaqa pisichaspa asipayayta qallarirqanku. 25 Jawaman runakuna lloqsiqtinkutaq sipaschaq kasqanman jaykurqan, jinaspa makinmanta jap’iykurqan,+ jinan chay sipaschaqa jatarirqan.+ 26 Chay pasasqantaqa llapa chay lado llaqtakunapin yacharqanku.

27 Chaymanta Jesús rishaqtintaq iskay ñausa runakuna wajakuspa payta qatikurqanku:+ “¡Davidpa Churin, khuyapayawayku!”, nispa. 28 Juj wasiman jaykuqtintaq, chay ñausakunaqa payman qayllaykurqanku, jinan Jesusqa tapurqan: “¿Iñinkichischu ñawiykichis kicharinaypaq atiyniyoq kasqayta?”,+ nispa. Paykunataq: “Arí, Señor”, nispa nirqanku. 29 Chaymi ñawinkuta llamiykuspa+ nirqan: “Iñisqaykichisman jina ruwasqa kachun”, nispa. 30 Ñawinkutaq kicharikapurqan. Jinan Jesusqa paykunata allin-allinta kamachirqan: “Amapunin pimanpas willankichischu”,+ nispa. 31 Paykunan ichaqa wasimanta lloqsispanku chayneqpi kaq llapa llaqtakunapi ayllukunapi ima Jesuspa imachus ruwasqanmanta willayta qallarirqanku.

32 Chay runakuna ripushaqtinmi Jesusman pusamurqanku supaypa junt’aykusqan upa runata.+ 33 Chay supay qarqosqa kaqtintaq chay runaqa rimaripurqan.+ Chaymi runakunaqa admirasqa nirqanku: “Israelpiqa manan jayk’aqpas rikukurqanchu khayna ruwaykunaqa”,+ nispa. 34 Fariseokunataq ichaqa nirqanku: “Kay runaqa supaykunata kamachiqpa atiyninwanmi supaykunata qarqon”,+ nispa.

35 Jesusqa llapa llaqtakunata llapa ayllukunatawanmi purirqan sinagogakunapi yachachispa, Diospa gobiernonmanta allin willakuykunata willaspa, imaymana onqoyniyoqkunata nanayniyoqkunatawan qhaliyachispa.+ 36 Runakunata rikuspan Jesusqa paykunata khuyapayarqan,+ paykunatan rikurqan mana michiqniyoq ovejakunata jina+ khuyay k’irisqata, ch’eqerisqata. 37 Chaymi discipulonkunata nirqan: “Cosechanaqa askhapunin kashan, llank’aqkunan ichaqa pisilla kanku.+ 38 Chayrayku, cosecha oqarichiq dueñota rogakuychis cosechanman llank’aqkunata kachamunanpaq”,+ nispa.