Sofonías
1 Amonpa+ churin Josías+ Judapi kamachikushaqtinmi Sofoniasqa* Jehová Diospa siminta chaskirqan. Sofoniasqa Cusipa churinmi karqan, Cusitaq Guedaliaspa churin, Guedaliastaq Amariaspa churin, Amariastaq Ezequiaspa churin.
2 Jehová Diosmi nin: “Kay pachapi tukuy imaymana kaqtan ch’usaqman tukuchisaq”,+ nispa.
3 Jehová Diosmi nillantaq: “Runakunata animalkunatawanmi ch’usaqman tukuchisaq,
phalaq animalkunata lamar-qochapi challwakunatawanmi chinkachisaq,+
Kay pachamantan llapa runakunata ch’usaqyachisaq.
4 Judá contran makiyta jaywarisaq,
Jerusalenpi llapa tiyaqkuna contran makiyta jaywarisaq,
Baal yupaychaytan kaymanta chinkachisaq,+
waj llaqta idolokunaq sacerdotenkunaqa manañan yuyarisqachu kanqaku,
wakin sacerdotekunatapas chinkachisaqmi.+
5 Wasinku patapi ch’askakunaman* k’umuykuqkunatan ch’usaqyachisaq.+
Jehová Diosman k’umuykushaspa, junt’aq kanankupaq jurashaspa,+
Malcan idolomanpas junt’aq kanankupaq juraqkunatan chinkachisaq.+
6 Chinkachisaqmi Jehová Diosta mana qatikuqkunatapas,+
chinkachillasaqtaqmi Jehová Diosta mana maskhaqkunatapas mana tapukuqkunatapas”,+ nispa.
7 Tukuy munayniyoq Jehová Diospa ñaupanpi ch’inlla kaychis, Jehová Diospa p’unchayninqa ñan chayamushanña.+
Jehová Diosmi juj sacrificiota ruwan, invitasqan runakunatan ch’uyanchan.
8 Diosmi nin: “Sacrificio ruwanay p’unchaypin noqa Jehová Diosqa umallikunamanta cuentata mañasaq,
reypa churinkunamantan,+ waj llaqtayoq runakunaq p’achanwan churakuqkunamantan cuentata mañasaq.
9 Chay p’unchaymi alto pataman* wichaqkunamanta cuentata mañasaq,
patronninpa wasinta millay ruwaykunawan q’otuywan junt’achiqkunamantan cuentata mañasaq.
10 Jehová Diosmi nin:
Chay p’unchaymi Challwa Punku+ nisqamanta juj qapariy uyarikunqa,
llaqtapi kaq Mosoq Barriomantan+ waqay uyarikunqa,
moqo patakunamantan suenay uyarikunqa.
11 Mactespi* tiyaqkuna, waqaychis,
negocio ruwaqkunan ch’innichisqa kapun,
qolqe pesaqkunan chinkachisqa kapun.
12 Chay p’unchaymi Jerusalenta lamparakunawan k’anchaykuspa k’uchunmanta k’uchunkamaraq qhawasaq,
jinaspa vinoq qonchun jina llakhi tiyaqkunamanta cuentata mañasaq,
paykunan sonqonkupi ninku: Jehová Diosqa manan allintapas ni mana allintapas ruwanqachu,+ nispa.
13 Qhapaq kayninkun qechusqa kanqa, wasinkun thunisqa kanqa.+
Wasikunatan ruwakunqaku, ichaqa manan chaypiqa tiyanqakuchu,
uvaskunatan plantanqaku, ichaqa manan vinota tomanqakuchu.+
14 ¡Jehová Diospa jatun p’unchayninqa asuykamushanñan!+
¡Chay p’unchayqa chayamushanñan, usqhayllan qayllaykamushan!+
Jehová Diospa p’unchayninqa sinchi manchakuy p’unchaymi kanqa.+
Chay p’unchayqa maqanakuypaq preparasqa runakunapas manchakuymantan qaparinqaku.+
15 K’araq phiñakuy p’unchaymi kanqa,+
sinchi ñak’ariy, sinchi waqay p’unchaymi kanqa,+
sinchi wayra p’unchaymi kanqa, ch’usaqyachiy p’unchaymi kanqa,
tutayaq, laqhayaq p’unchaymi kanqa,+
tutayaq yana phuyu p’unchaymi kanqa,+
16 chay p’unchaymi allin perqasqa llaqtakuna contra waqrata tocanqaku,+
17 Runakunatan llakiwan ñit’iykusaq,
ñausa jinan purinqaku,+
paykunaqa Jehová Dios contran juchallikurqanku.+
18 Jehová Diospa phiñakuynin p’unchaypiqa manan qolqenkupas qorinkupas salvanqachu.+