Habacuc
3 Kaymi llaki takiwan profeta Habacucpa mañakusqan:
2 Jehová Diosníy, imaymana ruwasqaykitan uyarini.
Jehová Diosníy, chaykuna ruwasqaykiwanmi admirasqa kashani.
¡Tiempollanpi* ruwasqaykikunata yuyarichiy!
Tiempollanpi* ruwasqaykikunata yachachiy.
Phiñakuyniyki p’unchay chayamuqtinqa khuyapayaykuwankikuyá.+
Jatun kayninpas janaq pachataraqmi pakaykurqan,+
yupaychasqa kayninpas pachantinmanraqmi junt’aykurqan.
4 K’anchayninqa inti k’anchay jinan karqan,+
iskay llifllikiymi makinmanta lloqsimurqan,
chaypin kallpanqa pakasqa kasqa.
5 Ñaupantan rishasqa onqoykuna,+
qhepantataq rishasqa millay fiebre onqoy.
Ñaupa tiempomantaraq kaq orqokunan thunisqa kapurqan,
unay tiempomantaña kaq moqokunan paypa ñaupanpi k’umuykurqanku.+
Ñaupa tiempomantaña kaq ñankunaqa paypa ñanninmi.
7 Cusán lado karpakunapin sasachakuykunata rikurqani.
Madián lado karpakunapi telakunan chhafchikurqan.+
8 Diosníy Jehová, ¿mayukunapaqchu phiñasqa kashanki?
¿Mayukunapaqchu sonqoyki t’impurishan?
¿Lamar-qochapaqchu phiñasqa kashanki?+
Chaychu caballoykikunapi jamurqanki.+
Carretaykikunapas atiparqankun.+
9 Flechana arcoykitaqa orqomunkiñan, listoñan kashan.
Varakunaqa* imachus ruwanankupaqmi juraspa kamachisqaña kashanku. (Séla).
Qanmi kay jallp’ata mayukunawan t’aqarqanki.
10 Orqokunan qanta rikuspa nanaymanta q’ewiykachakurqanku.+
Paran jich’akamuspa kay jallp’ata picharqan.
Ukhu pacha unun qaparimurqan,+
makintan altoman oqarimurqan.
11 Intiwan killawanqa janaq pachapin, maypichus kasqankupin qheparqanku,+
flechaykikunaqa k’anchay jinan lloqsimurqan.+
Lanzaykiqa rayoq llifllikiynin jinan k’anchamurqan.
12 Jallp’antinpin phiñasqa purirqanki.
Sinchi phiñasqan nacionkunata sarurqanki.
13 Llaqtaykita salvaqmi lloqsimurqanki, ajllakusqaykita libraqmi jamurqanki.
Millay kaqpa wasinpi umallitan sarurqanki,
techonmanta* cimentacionninkaman lliuta thunirqanki. (Séla).
14 Soldadonkunatan maqanakunanku armallankuwantaq wañuchirqanki,
muyuq wayra jina noqa contra lloqsimuqtinkun paykunata wañuchirqanki.
Maytan ñak’ariq runata pakallapi mijuruyta munasharqanku.
15 Lamar-qochantan caballoykikunapi jamurqanki,
unu phoqchiqeshaqtinmi chayninta pasamurqanki.
16 Willakuyta uyarispan ukhuypi sinchita mancharikurqani,*
simiykunaraqmi khatatatarqan,
tulluykunaraqmi pisi kallpayarqan,+
chakaykunaraqmi khatatatarqan.
Ichaqa llakikuy p’unchay chayamunantan pacienciawan suyakusaq,+
chay llakikuy p’unchayqa noqaykuman phawaykamuq llaqta contran jamushan.
17 Higos sach’aña mana t’ikanmanchu chaypas,
uvas sach’aña mana rurunmanchu chaypas,
aceitunaña mana kanmanchu chaypas,
chajrakunaña mana mijuyta qonmanchu chaypas,
ovejakunaña kanchankumanta ch’usaqyapunman chaypas,
wakakunaña puñunanmanta mana kapunmanchu chaypas,
18 Jehová Diosraykun noqaqa kusisqa kashasaq,
arí, salvaqniy Diosraykun kusisqalla kashasaq.+
19 Tukuy munayniyoq Jehová Diosmi kallpayqa,+
paymi chakiykunata tarukaq chakinkunaman jinaraq tukuchinqa,
paymi alto patakunata saruchiwanqa.+
Takiqkunata pusariqpaq. Cuerdayoq tocanaykunawan tocanapaq.