Jueces
15 Tiempoq pasasqanman jinan Sansonqa trigo cosechay tiempopi esposanta watukuq jaykurqan malta cabrachata aparikuspa. Jinan nirqan: “Esposaypa puñunan cuartotan jaykusaq, paywanmi tupayta munashani”, nispa. Chay warmiq papanmi ichaqa mana jaykuchiyta munarqanchu. 2 Sansontan nirqan: “Noqaqa manañachá munakapunchu nisharqanin,+ chaymi fiestapi compañaqniyki jujnin runaman qopurqani.+ Kaypin kashan sullk’an, payqa munay sipasmi, payta aswanpas ñañanpa rantinpi pusakapuy”, nispa. 3 Chaymi Sansonqa nirqan: “Kunanmi Filistea runakunata imataraq ruwaramusaq, chaytaq imatapas niwankuman”, nispa.
4 Jinan Sansonqa kinsa pachaj atoqkunata jap’imurqan, jinaspa iskay-iskaymanta chupankuta wataruspa nina k’anchanata watarqan. 5 Chaymantataq chay nina k’anchanata ninawan jap’iyachispa chay atoqkunata Filistea runakunaq chajran chaupiman kacharparirqan. Chhaynapin trigo chajrakunata rutusqatapas sayashaqtapas lliuta ruphapurqan. Chaymantapas ruphallarqantaqmi uvas chajrakunata aceituna chajrakunatapas.
6 Chayta rikuspan Filistea runakunaqa tapukurqanku: “¿Pin kayta ruwarurqan?”, nispa. Jinan paykunaman willarqanku: “Timná llaqtamanta runaq qataynin Sansonmi. Suegronmi paypa esposanta fiestapi compañaqnin waynaman qorapusqa, chaymi chayta ruwarusqa”,+ nispa. Chayta uyarispan Filistea runakunaqa chay runaq wasinman rispa ususintawan kuskata chay runata ninawan kanapurqanku.+ 7 Sansontaq ichaqa nirqan: “Chhaynatataq qankunapas ruwankichis chayqa, noqapas vengakunaykaman manapuni jinallachu kasaq”,+ nispa. 8 Jinan llapankuta ch’ulla-ch’ullamanta wañuchiyta qallarirqan, askhatapunin wañuchirqan. Chaymanta kutimpuspataq Etanpi kaq qaqa-qaqa t’oqopi pakakurqan.
9 Qhepamantaq Filistea runakunaqa Judá aylluman rispa chaypi karpakurqanku. Chaypin Leí ladopi+ wichayman urayman kutikacharqanku. 10 Jinan Judá ayllu runakunaqa tapurqanku: “¿Imamanmi jamurqankichis? ¿Imatan noqaykuwan munankichis?”, nispa. Paykunataq nirqanku: “Sansonta jap’iqmi jamushayku, imaynatachus ruwawarqanku chhaynatan ruwayta munashayku”, nispa. 11 Jinan Judá ayllumanta kinsa waranqa runakuna jaykurqanku Etanpi kaq qaqa-qaqa t’oqoman, chaypin Sansonta nirqanku: “¿Manachu yachanki Filistea runakunaq makinpi kashasqanchista?+ ¿Imaraykun kayta ruwawankiku?”, nispa. Sansontaq nirqan: “Noqaqa imaynachus ruwawasqankuman jinallan ruwarqani”, nispa. 12 Chaymantataq paykunaqa nirqanku: “Qanta jap’ispa Filistea runakunaman entreganaykupaqmi jamushayku”, nispa. Jinan Sansonqa paykunata nirqan: “Jurawaychis, aman imanawankichispaschu”, nispa. 13 Paykunataq nirqanku: “Manan imanasaykikupaschu ni wañuchisaykikupaschu, wataruspallan paykunaman entregasaykiku”, nispa.
Jinan iskay mosoq waskhawan wataruspa chay t’oqomanta orqomurqanku, jinaspa apamurqanku. 14 Leiman chayachimuqtinkun Filistea runakunaqa kusisqa qaparirqanku, chayllamanmi Jehová Diospa espiritun Sansonman junt’aykurqan,+ jinan Sansonqa waskhakunata ruphasqa lino hilokunata jina p’itirparirqan,* maki jap’ichina fierrokunapas chullushanmanpas jinaraqmi urmarqan.+ 15 Chaypin tarirqan manaraq unay wañusqa orqo asnoq qhaqllinta,* chayta oqarispan waranqa Filistea runakunata wañuchirqan.+ 16 Jinan Sansonqa nirqan:
“Asnoq qhaqllinwanmi monton-montontaraq runakunata wañurachini.
Asnoq qhaqllinwanmi waranqa runakunata wañurachini”,+ nispa.
17 Rimayta tukuspa jinataq Sansonqa asnoq qhaqllinta wijch’uspa chay parteta suticharqan Ramaj-Leí*+ nispa. 18 Sansonqa ch’akiymantan kasharqan, chaymi Jehová Diosmanta mañakurqan: “Diosníy, qanpa atiyniykiwanmi kay runakunata atipani. Kunanri, ¿ch’akiymantachu wañusaq? ¿Qanta mana serviq runakunaq makinmanchu entregawanki?”, nispa. 19 Jinan Diosqa Leipi kaq t’oqota kichaspa unuta chaymanta lloqsichimurqan.+ Chay unuta tomaspan Sansonqa wajmanta kallpata jap’irqan. Chaymi chay parteta suticharqan En-Acore* nispa. Kunan p’unchaykaman chay parteqa chhayna sutiyoq kashan.
20 Filistea runakuna kamachikushaqtinqa iskay chunka watan Sansonqa Israel runakuna ukhupi juez karqan.+