Hechos

10 Cesarea llaqtapin karqan Italiamanta t’aqa nisqapi juj capitán* Cornelio sutiyoq. 2 Payqa Dios sonqo runan karqan, wasinpi kaqkunapas llapankun Diosta manchakuqku, wajchakunatapas yanapallaqpunin, rogakullaqmi Diosmantapas. 3 Paymi las tresta jina*+ juj rijuriypi sut’itapuni rikurqan Diospa angelnin paypa kasqanman jaykushaqta, chay angelmi nirqan: “¡Cornelio!”, nispa. 4 Jinan Cornelioqa mancharisqa qhawarikurqan, jinaspa nirqan: “¿Imata, Señorníy?”, nispa. Angeltaq nirqan: “Mañakusqaykitan Dios uyarin,+ wajchakuna yanapasqaykitapas rikunmi. 5 Jope llaqtaman runakunata kachaspa Pedro nisqa Simonta wajachimuy. 6 Paytan alojashan qarakuna llamp’uyachiq Simón, paypa wasinqa lamar-qocha patapin kashan”, nispa. 7 Rimaykuqnin ángel ripuqtin jinan Cornelioqa iskay kamachinkunata wajaspa, serviqnin soldadokunamanta Dios sonqo soldadotawan wajaspa 8 paykunaman willarqan lliu imachus pasasqanta, jinaspa Jope llaqtaman paykunata kacharqan.

9 Qhepantin p’unchay paykuna Jope llaqtaq cercanpiña kashaqtinkun Pedroqa las doceta jina* wasi pataman seqarqan Diosmanta mañakuq. 10 Chayllamanmi payqa sinchita yarqachikurqan. Wayk’ushaqtinkutaq qonqaylla juj rijuriypi rikurqan+ 11 cielota kicharisqata, chaymantan uraykamushasqa juj jatun tela jina tawantin ch’ullpanmanta jap’isqa; 12 chaypin kasqa imaymana clase tawa chakiyoq animalkuna, pampanta suchuqkuna, phalaq animalkuna ima. 13 Chayllamanmi juj kunka payta nimurqan: “¡Pedro, sayariy, chay animalkunata ñak’aspa mijuy!”, nispa, 14 jinan Pedroqa nirqan: “Señor, amapuni chaytaqa niwaychu, noqaqa manapunin mijuymanchu ima qhelli kaqtapas ni ima millakuna kaqtapas”,+ nispa. 15 Chaymi chay kunkaqa nimullarqantaq: “Ama qhelli niychu Diospa ch’uyanchasqan kaqkunataqa”, nispa. 16 Chay kunkaqa kinsa kutikaman rimamurqan, chaymantataq Pedroq imachus rikusqanqa cieloman oqarisqa karqan.

17 Imachus chay rijuriy kasqanpi Pedro piensashallaqtinraqmi Cornelioq kachamusqan runakunaqa Simonpa wasinta tapukuspa punkupiña kasharqanku.+ 18 Jinaspan wajakuspa tapukurqanku: “¿Kaypichu Pedro nisqa Simón alojakushan?”, nispa. 19 Pedroqa piensashallarqanraqmi imachus rikusqanpi, chayllamanmi Diospa espiritunqa+ nirqan: “Kinsa qharikunan maskhamushasunki. 20 Uraykuy, jinaspa ama iskayaspa paykunawan riy, noqan paykunataqa kachamushani”, nispa. 21 Jinan Pedroqa uraykuspa chay qharikunata nirqan: “Noqan kashani maskhasqaykichis runaqa, ¿imamantaq jamushankichisri?”, nispa. 22 Jinan paykunaqa nirqanku: “Ejercitopi capitán Cornelioq+ kachamusqanmi jamushayku, payqa Dios manchakuq chanin runan, llapa judiokunan paytaqa allinta qhawarinku. Paytan Diosqa juj santo angelwan kamachisqa qanman kachamuwanankupaq, chhaynapi wasinman riqtiyki nisqaykikunata uyarinanpaq”, nispa. 23 Jinaqtinmi Pedroqa paykunata jaykuchispa chay wasipi alojarqan.

Qhepantin p’unchaytaq jatarispa paykunawan kuska rirqan, rillarqankutaqmi Jope llaqtamanta wakin iñiqkunapas. 24 Juj p’unchay qhepamantaq Cesarea llaqtaman jaykurqanku. Cornelioqa suyasharqanmi paykunata, juñusqan parientenkunata confianza amigonkunatapas. 25 Pedro jaykushaqtinmi Cornelioqa chaskiq lloqsimurqan, jinaspa ñaupanpi qonqoriykukuspa k’umuykurqan. 26 Pedron ichaqa aysarispa nirqan: “Sayariy, noqapas qan jina runallan kani”,+ nispa. 27 Pedroqa paywan riman-rimanmi wasiman jaykurqan, chaypin askha runakuna juñunasqa kashasqaku. 28 Jinan Pedroqa paykunata nirqan: “Yachasqaykichis jina, judiokunapaqqa manan allinchu waj llaqtayoq runakunaman qayllaykuyqa ni paykunawan juñukuypas.+ Ichaqa Diosmi juj rijuriyta qhawachispa nimuwan ama pitapas qhelli ninaypaq.+ 29 Chaymi wajamuwaqtinku mana iskayaspa jamushani. Chayrayku tapusaykichis, ¿imapaqtaq wajachimuwarqankichisri?”, nispa.

30 Jinan Cornelio nirqan: “Qayninpan kunan horas las tresta jina kay wasiypi Diosmanta mañakusharqani, chaymantaqa tawa p’unchayñan karun. Mañakushaqtiymi qonqaylla ñaupaypi rijurirun juj runa k’ancharishaq p’achayoq. 31 Paymi niwan: Cornelio, mañakusqaykitan Dios uyarin, wajchakuna yanapasqaykitapas yuyashanmi. 32 Jope llaqtaman runakunata kachaspa Pedro nisqa Simonta wajachimuy, payqa qarakuna llamp’uyachiq Simonpa wasinpin alojakushan,+ paypa wasinqa lamar-qocha patapin kashan, nispa. 33 Chaymi noqaqa chayta niwaqtin jina qanta wajaqta kachamurqayki, allinpunin jamusqaykiqa. Kaypin llapayku Jehová* Diospa ñaupanpi kashayku imakunata ninaykipaqchus pay kamachimurqasunki chayta uyarinaykupaq”, nispa.

34 Chayta niqtinmi Pedroqa nirqan: “Kunanraqmi allinta entiendeni Diosqa lliutapas igual-llata rikusqanta,+ 35 payta manchakuspa allin kaqta ruwaq runakunataqa may nacionmantaña kanku chaypas sumaqta chaskisqantawan.+ 36 Paymi siminta willachirqan Israel runakunaman, chhaynapi paywan sumaqpi kausaymanta+ allin willakuykuna willasqa kananpaq, chay sumaq kausayqa Jesucristowanmi jamun, paymi lliupa Señorninqa.+ 37 Qankunaqa yachashankichismi riki bautizakuymanta Juanpa willasqan qhepata Galileamanta+ qallarispa lliu Judeapi imamantachus rimakusqantaqa. 38 Nazaret llaqtayoq Jesusmantan rimakurqan ¿riki? Paytan Dios ajllarqan santo espiritunwan,+ jinaspa atiyta qorqan. Jinan payqa lliuta purirqan imaymana allin ruwaykunata ruwaspa, Saqraq ñak’arichisqan+ runakunata qhaliyachispa ima. Chaykunataqa ruwarqan paywan Dios kashasqanraykun.+ 39 Noqaykun testigo kayku judiokunaq llaqtanpi Jerusalenpipas imaymana ruwasqanmanta, ichaqa k’aspipi* warkuspan paytaqa wañuchirqanku. 40 Paytan Diosqa kinsa p’unchaymanta kausarichirqan,+ jinaspa runakunaman rikuchirqan. 41 Ichaqa manan llapa runakunamanchu rikuchirqan, aswanpas ñaupaqmantapacha ajllasqan testigokunallamanmi, arí, noqallaykuman. Noqaykun kausarimpusqan qhepaman paywan kuska mijurqayku ujarqayku ima.+ 42 Paytan Dios churan kausaqkunata wañusqakunatapas juzgananpaq,+ chayta llapa runakunaman willanaykupaq allinta entiendechinaykupaqwanmi payqa kamachiwarqanku.+ 43 Paymantan llapa profetakunapas rimarqanku,+ paykunan willarqanku lliu paypi iñiqkunaqa paypa sutinpi juchankumanta perdonasqa kanankuta”,+ nispa.

44 Chaykunata Pedro rimashallaqtinraqmi Diospa siminta llapa uyarishaqkunaman santo espíritu chayamurqan.+ 45 Pedrowan jamuq iñiq judiokunataq* ancha admirasqa kasharqanku waj nacionkunamanta runakunapas Diospa gratislla qosqan santo espirituta chaskisqankumanta. 46 Paykunatan uyarirqanku juj rimaykunapi rimaqta Diosta jatunchashaqta+ ima. Jinan Pedroqa nirqan: 47 “Kay runakunapas noqanchis jinataq santo espirituta chaskishanku chayqa, ¿pitaq jark’akunman unuwan bautizasqa kanankutari?”,+ nispa. 48 Jinaspan paykunata kamachirqan Jesucristoq sutinpi bautizasqa kanankupaq.+ Chaymantataq paykunaqa Pedrota valekurqanku iskay kinsa p’unchaytawan paykunawan qhepakunanpaq.