Isaías
46 Belmi qonqorikun,+ Nebon k’umuykun.
Idolonkunaqa uywa patapin purinku,
carga q’epiq animalpa wasanpin purinku,+
animalkunaqa sayk’usqan chaykunata q’epinku.
2 Kuskan k’umuykunku, kuskan qonqorikunku,
manan paykuna kikinkutapas librakuyta atinkuchu,
iskayninkun preso jina apasqa kapunku.
3 Diosmi nin: “Jacobpa miraynin runakuna,
Israelpa wasinmanta qhepaqkuna, uyariwaychis;+
nacesqaykichismantapacha yanapasqay runakuna,
wijsallapiraq kashaqtiykichis pusasqay runakuna,+ uyariwaychis.
4 Machuyapunkiña chaypas noqaqa kaqllan kasaq,+
soqo umaña* kapunki chaypas noqaqa jap’ishallasaykin.
Imaynan ruwallaqpuni kani chhaynatan pusasayki, jap’isayki, librasayki+ ima.
5 ¿Piwanmi tupanachiwankichis, pimanmi igualachiwankichis?+
¿Piqpa rijch’aynin rijch’ayniyoq kanaypaqmi piensankichis?+
6 Runakunan qori waqaychananmanta qorita orqonku,
balanzapin qolqenkuta pesanku,
chaykunatan qolqe takaqman qonku,
paytaq chayta juj idoloman tukuchin.+
Chaymanmi paykunaqa k’umuykunku, chaymanmi qonqorikunku.+
Runakunaqa wajakunkun manataqmi rimarinchu,
manan pitapas llakikuymanta librayta atinchu.+
8 Aman chaykunataqa qonqankichischu,
aman imamantapas manchakunkichischu.
Juchasapa runakuna, allinta chaypi piensaychis.
9 Ñaupa kaqkunata, unay tiempo kaqkunata yuyariychis,
noqallan Diosqa kani, manan noqamanta jujqa kanchu.
Noqallapunin Diosqa kani, manan pipas noqa jinaqa kanchu.+
10 Qallariymantapachan imapas imayna tukunanta willani.
Ñaupa tiempomantapachan qhepaman imachus kananta willani.+
11 Inti lloqsimuy ladomantan aycha mijuq phalaq animalta wajani,+
karu llaqtamantan juj runa jamunqa,
paymi imachus munasqayta ruwanqa.+
Noqan chaytaqa nini, chhaynataqmi kanqapas.
Ñan chaytaqa piensaykuniña, chaytan ruwasaq.+
12 Yau k’ullu sonqo runakuna, uyariwaychis,
yau chanin kaqmanta t’aqakuqkuna, ninriykichista kichaychis.
13 Justiciata rikuchinay p’unchayqa chayamushanñan,
chay p’unchayqa manan nishu karupichu kashan,
salvanay p’unchayqa cercapiñan kashan.+
Siontan salvasaq, Israelmanmi k’anchaykusaq”,+ nispa.