Jeremías
29 Jerusalenmantapachan profeta Jeremías cartata apachirqan, Babiloniapi kaq umalliqkunaman,* sacerdotekunaman, profetakunaman, llaqta runakunamanwan. Paykunatan Nabucodonosorqa Jerusalenmanta presota aparqan, 2 rey Jeconiasta,+ maman reinata,+ reypa palacionpi oficialkunata, Judapi, Jerusalenpi kaq autoridadkunata, rumiwan, maderawan, fierrowan llank’aqkunatapas Jerusalenmanta preso apasqa kasqanku qhepaman.+ 3 Judá rey Sedequiasmi+ Safanpa+ churin Elasata Hilquiaspa churin Guemariastawan Babilonia rey Nabucodonosorman kacharqan, paykunamanmi Jeremiasqa cartata apachirqan. Chaypin nirqan:
4 “Ejercitokunata kamachiq Jehová Diosmi, Israelpa Diosninmi Jerusalenmanta Babiloniaman preso apachisqan llapa runakunata nin: 5 Wasikunata ruwakuychis chaypitaq tiyaychis, ruruq sach’akunata plantakuychis chaytataq mijuychis. 6 Esposayoq kaychis, churikunayoq ususikunayoq kaychis; churiykichiskunata casarachiychis, ususiykichiskunatapas casarakunanpaq qoychis, paykunapas wawakunayoq kachunku. Askhata chaypi miraychis, amataq pisiyaychischu. 7 Presota apachisqay llaqtapi thaj kayta maskhaychis, chay llaqtapaq Jehová Diosmanta mañakuychis, chay llaqtapi thaj kay kaqtinqa qankunapas thajpin kankichis.+ 8 Ejercitokunata kamachiq Jehová Diosmi, Israelpa Diosninmi nin: Ama engañachikuychischu qankuna ukhupi kaq profetakunawan watuqkunawanpas,+ ama uyariychischu mosqokuspa willasqankutapas. 9 Llullakuspan sutiypi willashasunkichis, manan noqachu paykunataqa kachamurqani,+ nispan nin Jehová Dios.
10 ”Babiloniapi qanchis chunka wata junt’akuqtinmi qankunata qhawarimusaykichis,+ kayman kutichimpuspaymi promesayta junt’asaq,+ ninmi Jehová Dios.
11 ”Allintan yachani qankunapaq yuyaykusqayta. Thaj kaytan qosaykichis manan ñak’ariytachu.+ Sumaq kausaytan, sumaq suyakuytan qoyta munaykichis,+ ninmi Jehová Dios. 12 Qankunan wajakamuwankichis, mañakuspan asuykamuwankichis, noqataq uyarimusaykichis.+
13 ”Maskhawaspaykichismi tariwankichis,+ tukuy sonqoykichiswan maskhawasqaykichisraykun tariwankichis.+ 14 Noqaqa tarichikusaykichismi,+ ninmi Jehová Dios. Maykunamanchus presota apachirqaykichis chaymantan kutichimpusaykichis, tukuy nacionkunamanta, maykunamanchus ch’eqechirqaykichis chaykunamantan apakampusaykichis.+ Maymantachus apachirqaykichis chaymanmi kutichimpusaykichis,+ ninmi Jehová Dios.
15 ”Qankunan ichaqa nirqankichis: Jehová Diosmi qowarqanchis Babiloniapi profetakunata, nispa.
16 ”Davidpa trononpi tiyaq reymanta,+ Jerusalenpi tiyaq llapa runakunamanta, mana qankunawan preso apasqa wayqeykichiskunamantan Jehová Dios nin: 17 Espadatan, yarqaytan, millay onqoytan paykunaman chayachisaq,+ ismusqa higosman jinan tukuchisaq, mana mijuna higosman jinan tukuchisaq,+ nispa. Ejercitokunata kamachiq Jehová Diosmi chhaynata nin.
18 ”Espadawan,+ yarqaywan, millay onqoywan iman paykunata ñak’arichisaq, pachantinpi suyukunaq mancharikunanmanmi tukuchisaq,+ llapa ch’eqechisqay nacionkunapin ñakasqa kayman,+ admirakunaman, silbapayanaman, asipayanaman tukuchisaq.+ 19 Paykunaqa manan sapa kutin kachamusqay kamachiy profetakunawan willachisqayta uyarirqankuchu,+ ninmi Jehová Dios.
”Qankunapas manan uyarikurqankichischu,+ ninmi Jehová Dios.
20 ”Chayrayku noqa Jehová Diospa simiykunata uyariychis, Jerusalenmanta Babiloniaman llapa preso apachisqaykuna uyariychis. 21 Colayaq churin Ajabwan Maseyaq churin Sedequiaswanqa llullakuspan sutiypi willashasunkichis.+ Ejercitokunata kamachiq Jehová Diosmi, Israelpa Diosninmi paykunamanta nini: Babilonia rey Nabucodonosorpa makinmanmi entregasaq, paymi ñaupaykichispi wañuchinqa. 22 Paykunata imachus pasasqanwanmi Judamanta Babiloniaman preso apasqa kaqkunaqa ñakaspa ninqaku: ¡Imaynan Sedequiasta Ajabtapas Babilonia rey ninapi kankarqan chhaynata qanwanpas Jehová Dios ruwachun!, nispa. 23 Jujkunaq warminwan pantaspan, mana kamachishaqtiy llullakuspa sutiypi rimaspan+ Israelpi millakunapaq kaqta ruwarqanku.+
”Noqan chayta yachani, noqan chaymanta testigo kani,+ ninmi Jehová Dios”, nispa.
24 Diosmi niwarqan: “Nelanmanta Semayatan+ khaynata ninki: 25 Ejercitokunata kamachiq Jehová Diosmi, Israelpa Diosninmi nin: Jerusalenpi kaq runakunaman, Maseyaq churin sacerdote Sofoniasman,+ llapa sacerdotekunaman iman sutiykipi cartakunata apachirqanki. Chay cartakunapin nirqan: 26 Jehová Diosmi sacerdote Jehoiadapa rantinpi sacerdoteta churasunki Jehová Diospa wasinta qhawarinaykipaq, profetaman tukuq mayqen locotapas cepoman* churanaykipaqwan.+ 27 Chhaynaqa, ¿imaraykutaq mana anyarqankichischu qankuna ukhupi profeta jina rimaq+ Anatoj llaqtayoq Jeremiastari?+ 28 Babiloniamanpas kay willakuytan apachimuwasqaku: ¡Unay tiempon pasanqa! Wasikunata ruwakuychis chaypitaq tiyaychis, ruruq sach’akunata plantakuychis chaytataq mijuychis,+ nispa”.
29 Sacerdote Sofonías+ Jeremiaspa ñaupanpi chay cartata leeqtinmi, 30 Jehová Diosqa Jeremiasta rimapayarqan, nirqanmi: 31 “Llapa preso apasqakunaman kay willakuyta apachiy: Nelanpi tiyaq Semayamantan Jehová Dios khaynata nin: Mana noqa kamachishaqtiy Semaya qankunaman willasqasuykichisraykun, yanqa willakuykunawan engañasqasuykichisraykun,+ 32 noqa Jehová Diosqa nini: Nelanmanta Semayatan miraynintawan castigasaq. Manan ni jujllapas familianmanta kay llaqtapi kausanqachu; Jehová Diosninku contra runakunata jatarichisqanraykun llaqtaypaq allin kaqkuna ruwasqayta mana rikunqachu, ninmi Jehová Dios, nispa”.