Hechos

16 Chaymantataq Pabloqa Derbe llaqtaman chayarqan, chay qhepamantaq Listra llaqtaman+ chayarqan. Chay llaqtapin karqan juj iñiq, Timoteo+ sutiyoq, payqa karqan Jesuspi iñiq judía warmiq wawanmi, taytanmi ichaqa karqan griego runa; 2 Listra llaqtamanta Iconio llaqtamantawan iñiqkunaqa allintan paymanta rimaqku. 3 Pabloqa paywan kuskan viajayta munasharqan, chaymi payta pusarqan, ichaqa kuchurqanmi qhari kaynin qarachata chay ladokunapi tiyaq judiokunarayku,+ paykunaqa llapankun yacharqanku Timoteoq taytanqa griego runa kasqanta. 4 Llaqtan-llaqtanta purisqankuman jinan paykunaqa iñiqkunaman willarqanku Jerusalenpi kaq apostolkunaq umalliqkunaq rimanakusqanku kamachikuykunata, chhaynapi chayman jina ruwanankupaq.+ 5 Chaymi iñiq t’aqakunaqa iñiyninkupi aswan-aswanta kallpachakusharqanku, sapa p’unchaytaqmi askhayasharqankupas.

6 Paykunataqa santo espiritun jark’arqan Asia provinciapi Diospa siminta willanankuta, chaymi Frigia provincianta Galacia provincianta+ ima purirqanku. 7 Misia provinciaman qayllaykuspankutaq paykunaqa Bitinia provinciaman+ jaykuytapuni munarqanku, ichaqa Jesuspa espiritunmi jark’arqan chayman jaykunankuta. 8 Chaymi paykunaqa Misia provincianta pasaspanku chay provinciapi Troas llaqtaman jaykurqanku. 9 Tutapin Pablo juj rijuriypi rikusqa Macedonia llaqtayoq qharita chaypi sayashaqta, paymi Pablota rogakuspa nisqa: “Macedonia provinciaman jamuspa yanapaykuwayku”, nispa. 10 Chay rijuriyta Pablo rikuqtin jinan, noqaykuqa alistakurqayku Macedoniaman rinaykupaq: “Diospunichá wajachimushawanchis chay ladokunapi allin willakuykunata willananchispaq”, nispayku.

11 Chaymi barcoman seqaspayku Troas llaqtamanta Samotracia islaman chimparqayku, qhepantin p’unchaytaq Neápolis llaqtaman rirqayku. 12 Chaymantataq Filipos llaqtaman+ rirqayku, chay llaqtaqa Roma nacionpa jujnin llaqtanmi karqan,* Macedonia provinciapi kaq jujnin distritopi aswan allin kaq llaqtataq karqanpas; chaypin iskay kinsa p’unchaykuna qhepakurqayku. 13 Samana p’unchaytaq* llaqta punku jawaman lloqsispayku mayuq kasqanman rirqayku “chaypiqa juñukunkupaschá Diosmanta mañakunankupaq” nispayku, chaypi tiyaykuspan juñunasqa kashaq warmikunaman rimapayayta qallarirqayku. 14 Chaypin kashasqa Tiatira+ llaqtayoq Lidia sutiyoq warmi, payqa azulniraq puka telakunata qhatuq warmin kasqa, Diosta adoraqtaq kasqapas; payqa uyarisharqanmi rimasqaykuta, chaymi Jehová* Diosqa sonqonta kicharirqan Pabloq rimasqanta tukuy yuyaywan uyarinanpaq. 15 Paypas wasinpi kaqkunapas bautizasqa kaqtinkun+ Lidiaqa rogaykuwanku: “Jehová* Diospaq junt’aq kasqaytataq rikuwankichis chayqa, jamuychis wasiyman, chaypi qhepakuychis”, nispa. Payqa pusawarqankupunin wasinman.

16 Diosmanta mañakunaman rishaspaykun tupayku watuq supaypa junt’aykusqan kamachi sipaswan.+ Payqa suerte qhawasqanwanmi patronninkunaman askha qolqeta ganachiq kasqa. 17 Chay sipasmi qhepaykuta jamuspa qapariq: “Kay runakunaqa ancha jatun Diospa kamachinkunan kanku,+ paykunan willashanku imaynatachus salvasqa kankichis chayta”, nispa. 18 Payqa askha p’unchayñan chhaynata qaparispa qatikamushawarqanku. Pabloqa sayk’usqañan kasharqan chaywan, chaymi kutirispa chay espirituta nirqan: “Jesucristoq sutinpin kamachiyki: Lloqsiy paymanta”, nispa. Jinan chay espirituqa kaq ratu chay sipasmanta lloqsirqan.+

19 Chay sipaspa patronninkunataq manaña paywan qolqe gananankuta reparaspa+ Pablota Silastawan jap’irqanku, jinaspa mercado plazapi autoridadkunaman aysarqanku.+ 20 Jinaspa llaqtapi kamachikuqkunata nirqanku: “Kay runakunan llaqtanchista nishuta ch’aqwachishanku,+ paykunaqa judiokunan kanku, 21 Roma llaqtayoq runakunaq mana chaskinanchis mana ruwananchis costumbrekunatan willashanku”, nispa. 22 Jinan runakunaqa juj nisqalla paykuna contra jatarirqanku, llaqtapi kamachikuqkunataq kamachikurqanku p’achankuta llik’ispa k’aspikunawan waqtanankupaq.+ 23 Allin-allinta waqtaykuspankutaq carcelman wisq’arqanku, carcelerotataq kamachirqanku allintapuni paykunata qhawananpaq.+ 24 Chhaynata kamachisqankuraykun payqa ukhu kaq carcelman paykunata wisq’arqan, chakinkutataq cepopi* jap’ichirqan.

25 Kuska tutata jinan Pablowan Silaswanqa Diosmanta mañakusharqanku, takikunawantaq jatunchasharqanku;+ presokunaqa uyarisharqankun paykunata. 26 Chayllamanmi juj jatun terremoto sinchita carcelta chhafchirirqan. Jinan kaq ratu llapa punkukuna kicharikapurqan, llapa presokunaq cadenankunapas kacharikapurqan.+ 27 Carcelerotaq puñusqanmanta rijch’arispa carcelpa llapa punkunkuna kicharayashaqta rikurqan, jinan payqa espadanta orqokuspa wañuchikunanña kasharqan: “Lloqsirapunkuchá presokunaqa”,+ nispa. 28 Chayllamanmi Pabloqa fuerteta nimurqan: “¡Ama imanakuypaschu, llapaykun kaypi kashayku!”, nispa. 29 Jinan payqa k’anchayta mañakuspa carcel ukhuman phawaykurqan, maypichus Pablowan Silaswan kasharqanku chayman, khatatataspataq* ñaupankupi qonqoriykurqan. 30 Jinaspa paykunata jawaman pusaspa nirqan: “¿Wiraqochakuna, imatan ruwanay salvasqa kanaypaq?”, nispa. 31 Jinan paykunaqa nirqanku: “Señor Jesuspi iñiy, chhaynapin qanpas wasiykipi kaqkunapas salvasqa kankichis”,+ nispa. 32 Chaymantataq Jehová* Diospa siminta payman wasinpi llapa kaqkunamanwan willarqanku. 33 Jinaqtinmi carceleroqa chay tutapacha paykunata waj ladoman pusaspa k’irinkunata jampirqan. Jinaspa wasinpi llapa kaqkunapiwan bautizakurqankupacha.+ 34 Chaymantataq wasinman pusaykuspa mijunata paykunaman servirqan. Chay runaqa ancha kusisqan kasharqan Diospi iñipusqanmanta, wasinpi llapa kaqkunapas kusisqan kasharqanku.

35 P’unchayamuqtintaq llaqtapi kamachikuqkunaqa guardiakunata carceleroman kacharqanku: “Chay runakunata kacharipuy”, nimunankupaq. 36 Jinan carceleroqa chay nisqankuta Pabloman willarqan: “Llaqtapi kamachikuqkunan runakunata kachamusqaku iskayniykichis kacharichisqa kanaykichispaq. Chhaynaqa lloqsipuspa thaj ripuychis”, nispa. 37 Pablon ichaqa nirqan: “¿Roma llaqtayoq+ runakuna kashaqtiyku, mana juiciota ruwaspa* lliu runakunaq ñaupanpi waqtaykuspa carcelman wisq’achishawaspankuchu, kunanqa pakallapi kacharipuyta munashawanku? Manan chayqa allinchu kanman. Aswanpas paykuna kikinku jamuchunku pusapuwanankupaq”, nispa. 38 Jinan guardiakunaqa llaqtapi kamachikuqkunaman willamurqanku Pabloq chhayna nisqanta. Chay runakuna Roma llaqtayoq kasqankuta uyarispataq paykunaqa mancharikurqanku.+ 39 Chaymi jamuspanku disculpata mañakurqanku, chaymantataq pusapuspanku valekurqanku llaqtamanta ripunankupaq. 40 Carcelmanta lloqsispankun Pablowan Silaswanqa Lidiaq wasinta rirqanku, iñiqmasikunata rikuspankutaq kallpacharqanku,+ jinaspa ripurqanku.