Mateo
4 Chaymantataq Jesustaqa Diospa espiritun ch’in ladoman pusarqan, chaypin Saqraqa+ tentarqan.+ 2 Tawa chunka p’unchayta tawa chunka tutatawan ayunasqan qhepamanmi Jesusqa yarqachikurqan. 3 Chayllamanmi Saqraqa tentananpaq+ qayllaykurqan, jinaspa nirqan: “Diospa churinchus kanki chayqa, kay rumikunata niy t’antaman tukunanpaq”, nispa. 4 Jinan Jesusqa nirqan: “Qelqasqan kashan: Manan t’antallawanchu runaqa kausanqa, aswanpas Jehová* Diospa llapa nisqankunawan iman”,+ nispa.
5 Chaymantataq Saqraqa Jerusalén llaqtaman* payta aparqan,+ jinaspa templopi aswan alto perqapi sayaykachispa+ 6 nirqan: “Diospa churinchus kanki chayqa, kaymanta saltaykuy; qelqasqan kashan: Paymi angelninkunata kachamusunki. Paykunan makinkupi apasunkiku, mana ima rumiwanpas chakiykita takakunaykipaq,+ nispa”. 7 Jesustaq nirqan: “Qelqasqan kashallantaq: Aman Jehová* Diosniykita pruebaman churankichu,+ nispa”.
8 Chaymantataq Saqraqa sinchi jatunkaray orqomanñataq Jesusta aparqan, jinaspa kay pachapi llapa nacionkunata qhapaq kayninkunatawan qhawarichirqan,+ 9 nirqantaq: “Qonqorikuspachus juj kutillata adorawanki chayqa, llapan kaykunatan qopusayki”, nispa. 10 Jinan Jesusqa nirqan: “¡Ripuy kaymanta, Satanás! Qelqasqan kashan: Jehová* Diosniykitan adoranki,+ pay sapallantataqmi servinkipas,+ nispa”. 11 Jinan Saqraqa ripurqan,+ chaymantataq angelkuna jamuspa Jesusta atienderqanku.+
12 Juanpa preso kasqanta yachaspataq+ Jesusqa Galileaman+ rirqan. 13 Chaymantataq Nazaret llaqtamanta lloqsispa qocha patapi kaq Capernaún+ llaqtaman ripurqan chaypi tiyaq, chay qochaqa Zabulón jallp’aq, Neftalí jallp’aq kasqanpin kasharqan. 14 Chhaynapin profeta Isaiaspa willasqan junt’akurqan, paymi nirqan: 15 “¡Zabulón jallp’a, Neftalí jallp’a, lamar-qochaman riq ñan, Jordán mayu inti jaykuy lado jallp’a, waj nacionkunaq tiyanan Galilea jallp’a! 16 Tutayaqpi tiyaq runakunan jatun k’anchayta rikunku, wañuypa tutayachisqan jallp’api tiyaqkunamanmi k’anchay k’anchaykun”,+ nispa. 17 Chaymantapachan Jesusqa willayta qallarirqan: “Janaq pacha gobiernon qayllaykamunña, juchaykichismanta pesapakuspa Diosman kutirikuychis”,+ nispa.
18 Galilea qocha patanta purishaspan rikurqan iskay runakunata, Pedro sutiyoq Simonta+ wayqen Andrestawan+ challwa jap’inanku llikata qochaman wijch’uykushaqta, paykunaqa challwaqkunan karqanku. 19 Paykunatan nirqan: “Qhepayta jamuychis, noqan runakuna challwayta yachachisaykichis”,+ nispa. 20 Paykunataq kaq ratupacha llikankuta saqerparispa qatikurqanku.*+ 21 Astawan purispan Jesusqa rikullarqantaq iskay runakunata, Zebedeoq churin Santiagota wayqen Juantawan,+ paykunan taytanku Zebedeowan botepi kasharqanku llikankuta allichaspa; jinan Jesusqa paykunata wajarqan.+ 22 Paykunapas botenkuta taytankutawan saqerparispan kaq ratupacha payta qatikurqanku.
23 Chaymantataq Jesusqa jinantin Galileapi purirqan+ sinagogakunapi* yachachispa,+ Diospa gobiernonmanta allin willakuykunata willaspa, imaymana nanayniyoqkunata onqoyniyoqkunatawan qhaliyachispa ima.+ 24 Llapa Siria provinciantinpin paymanta uyarikurqan, jinan payman apamurqanku imaymana onqoykunawan nanaykunawan llapa ñak’ariqkunata,+ supayniyoqkunata,+ ataque* onqoyniyoqkunata,+ mana kuyuriy atiqkunatawan; paytaq llapankuta qhaliyachirqan. 25 Jinan ancha askha runakuna payta qatikurqanku Galileamanta, Decapolismanta,* Jerusalenmanta, Judeamanta, Jordán mayu inti lloqsimuy ladomantawan.