Efesios
1 Diospa munayninpi Cristo Jesuspa apostolnin* noqa Pablon qankuna Éfeso llaqtapi+ kaq iñiqmasikunaman* qelqamushaykichis, arí, qankuna Cristo Jesuspa junt’aq discipulonkunaman:
2 Qankunawan kachun Taytanchis Diospa, jinallataq Señor Jesucristoq ancha sumaq sonqo kaynin thaj kayninpas.
3 Jatunchasqa kachun Señorninchis Jesucristoq Taytan Diosqa; paymi santo espiritunwan janaq pachapi bendeciwanchis, Cristowan* jujllachasqa kasqanchisrayku.+ 4 Manaraq runakuna kay pachapi mirayta* qallarishaqtinmi payqa Cristowan jujllachasqa kananchispaq ajllawarqanchis, chhaynapi munakuyta rikuchinanchispaq, paypa ñaupanpi ch’uya mana juchachana kananchispaqwan.+ 5 Payqa sonqonpaq jina, munayninman jina kasqanraykun+ ñaupaqmantaña ajllawarqanchis+ Jesucristowan uywakapusqan wawakuna jina kananchispaq.+ 6 Chaytaqa ruwarqan munakusqan Churinwan+ ancha sumaq sonqo kayninta rikuchiwasqanchisrayku alabasqa kananpaqmi.+ 7 Chay munakusqan Churinmi libre kananchispaq yawarninwan rantikapuwarqanchis,+ chhaynapi Diospa mana tukurikuq ancha sumaq sonqo kayninrayku juchanchiskunamanta perdonasqa kananchispaq.+
8 Payqa mana mich’akuspan qowarqanchis ancha sumaq sonqo kayninta, yachayta, allin reparaq kaytawan, 9 chaymantapas munayninmanta pakasqa ch’uya yachaytan reqsichiwarqanchis.+ Payqa imachus munasqanman jinan allinta yuyaykurqan 10 señalasqa tiempo junt’akuqtin imapas imayna aparikunanpaq, chhaynapi janaq pachapi kaqkunapas, kay pachapi kaqkunapas+ Cristopi juñusqa kananpaq. Arí, paywanmi tukuy imaymana juñusqa kanqa, 11 paywan jujllachasqan noqaykupas kashayku, paywan kuskataqmi herenciatapas chaskisaqku;+ chhayna kananpaqqa Diosmi imachus piensasqanman jina ñaupaqmantaña ajllawarqanku, payqa tukuy imatapas munasqanman jinapunin ruwan. 12 Chhaynapi noqayku Cristopi ñaupaqta suyakuqkunawan Diosqa alabasqa jatunchasqa ima kananpaq. 13 Qankunapas salvasqa kanaykichispaq cheqaq allin willakuykunata uyarispan paypi suyakushankichis ¿riki? Paypi iñiqtiykichisñan Diosqa prometesqan santo espirituwan sellarqasunkichis,+ Cristowantaqmi chaytaqa ruwarqanpas 14 (chay espiritun garantía* jina karqan herenciata chaskinanchispaq),+ Diosqa chayta ruwarqan juj preciota pagaspa+ llaqtanta librananpaqmi,+ chhaynapitaq pay ancha alabasqa kananpaq.
15 Chaymi noqapas Señor Jesuspi iñisqaykichista yachaspay, llapa iñiqmasikunata munakusqaykichistawan yachaspay 16 Diosman graciasta qollanipuni. Arí, Diosmanta mañakuspayqa yuyarillaykichispunin qankunataqa, 17 chhaynapi yachayta qonasuykichispaq, paymanta willasqa kaqkunata entiendechinasuykichispaqwan.+ Payqa Señorninchis Jesucristoq Diosnin qhapaq atiyniyoq Taytan. 18 Paymi sonqoykichista kicharirqan rikunaykichispaq, chhaynapi qosqasuykichis suyakuymanta yachanaykichispaq, iñiqkunaman ancha sumaq qhapaq herencia qonanmanta yachanaykichispaq,+ 19 paypi iñiqkunaman ancha jatun atiynin rikuchisqanta yachanaykichispaqwan.+ Chay jatun atiynintaqa rikuchirqan 20 Cristota wañusqanmanta jatarichimuspa janaq pachapi paypa paña ladonpi tiyaykachispan.+ 21 Paytan churarqan kunan tiempopipas* jamuq tiempopipas llapa gobiernokunamanta, autoridadkunamanta, atiyniyoq kaqkunamanta, munayniyoqkunamanta, jinallataq tukuy imamantapas aswan atiyniyoq kananpaq;+ 22 chaymantapas Diosqa tukuy imaymanatan chaki sarunanman churarqan,+ iñiq t’aqapipas tukuy imaymanapi uma kananpaqmi churarqan,+ 23 chay iñiq t’aqaqa cuerponmi,+ paywanmi chay iñiq t’aqaqa junt’a kashan, jinallataq lliu imapas tukuypi paywan junt’a kashan.