2 Reyes

6 Profetakunaq churinkunan+ Eliseota nirqanku: “Kay tiyasqanchis wasiqa sinchi juch’uyllan. 2 ¿Manachu aswanpas Jordán jallp’aman riykuman, jinaspa sapankayku sach’ata wit’uspa chaypi juj wasita ruwamuykuman?”, nispa. Eliseotaq nirqan: “Allinmi, rillaychis”, nispa. 3 Jinan profetakunaq churinkunamanta jujnin kaq nirqan: “¿Manachu qanpas noqaykuwan* kuska riwaq?”, nispa. Eliseotaq nirqan: “Jakuyá risunchis”, nispa. 4 Jinan Eliseoqa paykunawan rirqan. Jordán jallp’aman chayaspataq sach’akunata wit’uyta qallarirqanku. 5 Profetakunaq churinkunamanta* jujnin sach’ata wit’ushaqtintaq hachanpa umanqa unuman urmaykurqan, chaymi payqa Eliseota alto kunkawan nirqan: “¡Wiraqocháy Eliseo! ¡Hachaypa umanmi unuman urmaykun, mañasqallan karqan! ¡Imanasaqtaq kunanri!”, nispa. 6 Jinan Diospa profetan Eliseoqa tapurqan: “¿Maymantaq urmaykunri?”, nispa. Maymanchus urmaykusqanta rikuchiqtintaq Eliseoqa juch’uy maderata wit’uspa hachaq kasqanman chanqaykurqan, jinan hachaq umanqa tuyturamurqan. 7 Eliseotaq nirqan: “Orqoy”, nispa. Jinan chay profetakunaq churinqa makinta jaywarispa orqorqan.

8 Chay tiempopin Siria reyqa Israel contra maqanakuq jamurqan.+ Kamachinkunata imaynatachus ruwanankuta tapuspataq paykunata nirqan maykunapichus karpakunankupaq. 9 Diospa profetan+ Eliseon ichaqa Israel reyman willachimurqan: “Aman chaynintaqa rinkichischu, chaynintan Siria runakuna jamushanku”, nispa. 10 Chaytan Israel reyqa kamachinkunaman willachimurqan, chhaynapi chayninta ama rinankupaq.+ Eliseoqa askha kutipin Israel reyman willachimurqan Siria runakuna maykunapichus kashasqankuta, chaymi Israel reyqa mana chayninta pasaqchu.

11 Chaymi Siria reyqa* sinchita phiñakurqan, jinan kamachinkunata juñuspa nirqan: “¡Rimariychis! ¡¿Mayqenniykichismi Israel reyta yanapashankichis?!”, nispa. 12 Jinan juj kaq kamachinqa nirqan: “¡Manan mayqenniykupas Israel reytaqa yanapaykuchu reyníy! Israelmanta profeta Eliseon paytaqa yanapashan, paymi puñunayki wasipi imatachus nisqaykitapas lliuta Israel reyman willan”,+ nispa. 13 Jinan Siria reyqa nirqan: “Allinta tapuparakamuychis maypichus kashasqanta, chhaynapi payta jap’imunankupaq runakunata kachanaypaq”, nispa. Maypichus kashasqanta yachaspankutaq reyta nirqanku: “Dotán+ llaqtapin kashan”, nispa. 14 Chayta willaqtinku jinan Siria reyqa askha soldadokunata kacharqan caballokunayoqta carretakunayoqta ima. Chay soldadokunan chay tuta chayaspa Dotán llaqtata muyuykurqanku.

15 Tutallamanta jatarispataq Diospa profetan Eliseoq kamachinqa llaqta muyuriqpi rikurqan askha soldadokunata caballokunayoqta carretakunayoqta. Chaymi Eliseota nirqan: “¡Wiraqocháy Eliseo, imanaykusuntaq kunanri!”, nispa. 16 Eliseon ichaqa nirqan: “¡Ama manchakuychu!+ Noqanchiswanmi aswan askha kashanku paykunawan kaqkunamantaqa”,+ nispa. 17 Jinan Eliseoqa Diosmanta mañakurqan: “Valekuykin Jehová Diosníy, kay kamachiypa ñawinta kichariy”,+ nispa. Chayllamanmi Jehová Diosqa Eliseoq kamachinpa ñawinta kicharirqan. Jinan Eliseoq kamachinqa lliu muyuriqninta+ qhawarispa orqo patakunapi rikurqan nina caballokunata nina carretakunatawan; chay caballokunawan chay carretakunawanqa sinchi askhapunin kashasqa.+

18 Eliseoq kasqanman Siria soldadokuna astawan asuykuqtintaq Eliseoqa Diosmanta mañakurqan: “Ama jinachu kay Jehová Diosníy, kay runakunata ñausayachiy”,+ nispa. Chaymi Diosqa Eliseoq mañakusqanman jina chay runakunata ñausayachirqan. 19 Jinan Eliseoqa paykunata nirqan: “Manan kaychu ñanqa, manan kay llaqtapichu maskhasqaykichis runaqa tiyan. Jamuychis, noqa chay runaman pusarusaykichis”, nispa. Eliseon ichaqa chay soldadokunata Samaria+ llaqtaman pusarqan.

20 Samaria llaqtaman chayachispataq Eliseoqa Diosmanta mañakurqan: “Jehová Diosníy, kunanqa kay runakunaq ñawinta kichariy”, nispa. Jinan Jehová Diosqa chay runakunaq ñawinta kicharirqan, chayraqmi paykunaqa repararqanku Samaria llaqta chaupipi kapushasqankuta. 21 Siria runakunata chaypi rikuspataq Israel reyqa Eliseota nirqan: “Taytáy, ¿imaninkin? ¿Wañuchisaqchu kay runakunata?”, nispa. 22 Eliseon ichaqa nirqan: “Ama wañuchiychu. ¿Maqanakuypi* pitapas presota apamuspaqa manamá riki wañuchinkichu? Aswanpas unutawan t’antatawan qoy mijunankupaq,+ jinaspa reyninkuman kutipuchunku”, nispa. 23 Jinan Israel reyqa paykunapaq sumaq mijunata askhatapuni wayk’uchirqan, chaytan chay runakunaqa mijurqanku ujarqanku. Chaymantataq reyninkuq kasqanman kachapurqan. Chay p’unchaymantapachan Siriamanta suwa t’aqa soldadokunaqa+ manaña jayk’aqpas Israel jallp’amanqa jaykurqankuchu.

24 Chay qhepamanmi ichaqa Siria rey Ben-Adajqa llapa Siria soldadokunata juñurqan, jinan Samaria llaqtaman rispa chay llaqtata muyuykurqanku.+ 25 Chay jawan Samaria llaqtapiqa sinchi yarqay karqan.+ Unaytan Samaria llaqtataqa muyuykurqanku, chaymi juj asnoq umallan pusaq chunka qolqe valepurqan,+ urpiq wanuntaq iskay jach’illa* pisqa qolqe valepurqan. 26 Juj p’unchaymi Israel reyqa llaqta perqa patapi purisharqan, chayllamanmi juj warmi alto kunkawan nimurqan: “¡Wiraqocháy, yanapaykuway!”, nispa. 27 Jinan reyqa nimurqan: “Manataq Jehová Diospas yanapayta atisunkichu chayri, ¿imaynatataq noqari yanapaykiman? ¿Imaytan qoykiman? Manan trigoypas, vinoypas ni aceiteypas kanchu”, nispa. 28 Chaymantataq reyqa tapurqan: “¿Imataq pasarusunkiri?”, nispa. Chay warmitaq nirqan: “Kay warmin niwarqan: Apamuy wawaykita mijunanchispaq, paqarintaq wawaytañataq mijusunchis,+ nispa. 29 Chayta niwaqtinmi wawayta t’impurachispa mijurqayku.+ Qhepantin p’unchaytaq noqañataq nirqani: Kunanqa wawaykitañataq apamuy mijunanchispaq, nispa. Paymi ichaqa wawanta pakarapun”, nispa.

30 Chay warmiq nisqanta uyarispan Israel reyqa p’achanta llik’ikurqan,+ jinaspa llaqta perqa patapi purirqan, chaymi runakunaqa rikurqanku qhasqa p’achayoq kashasqanta. 31 Jinan reyqa nirqan: “¡Dios sinchita castigawachun sichus kunan p’unchay Safajpa churin Eliseoq umanta mana wit’usaqchu chayqa!”,+ nispa.

32 Wasinpin Eliseoqa umalliqkunawan* tiyasharqanku, chaykaman Israel reyqa kamachinta ñaupachimurqan. Manaraq chay kamachi chayamushaqtinmi Eliseoqa umalliqkunata nirqan: “Runa wañuchiqpa wawanmi+ kamachinta kachamushan umayta wit’uwananpaq. Makilla kashaychis chay runa chayamuqtin punkuta wisq’anaykichispaq, punkuta wisq’aruspataq chay qhepapi qaqata sayankichis chhaynapi ama jaykumunanpaq. Uyarisqaykichis jina, paypa qhepantan reypas jamushan”, nispa. 33 Umalliqkunawan Eliseo rimashallaqtinraqmi reypa kamachinqa chayamurqan, chay qhepamantaq Israel reypas chayamurqan, jinaspa nirqan: “Jehová Diosmi kay yarqaywanqa ñak’arichishawanchis, chhaynaqa ¿imapaqñataq Jehová Diospa yanapaynintari suyakuyman?”, nispa.