Marcos

10 Chaymanta jatarispan Jesusqa Judea linderoman* rirqan, Jordán mayu chimpaman; chaypin runakunaqa wajmanta payman juñukamurqanku. Paytaq imaynan ruwallaqpuni jinata wajmanta yachachiyta qallarirqan.+ 2 Wakin fariseokunataq Jesusman qayllaykuspa pruebaman churayta munaspa tapurqanku: “¿T’aqakapullanmanchu* juj runa esposanmanta?”,+ nispa. 3 Jinan Jesusqa nirqan: “¿Imatan Moisés kamachirqasunkichis?”, nispa. 4 Paykunataq nirqanku: “Pi runapas t’aqanakuy papelta esposanman qospaqa t’aqakunmanmi, nispan Moisesqa kamachikurqan”,+ nispa. 5 Jesustaq paykunata nirqan: “Moisesqa k’ullu sonqo kasqaykichisraykun+ chay kamachikuytaqa qelqapurqasunkichis.+ 6 Diosmi ichaqa qallariymantapacha “runataqa kamarqan qharita warmitawan”.+ 7 “Chayraykun qhariqa taytantapas mamantapas saqepunqa,+ 8 iskayninkutaq juj aychalla kapunqaku”,+ chhaynaqa manan iskayñachu kanku, aswanpas juj aychallañan. 9 Chayrayku, Diospa jujllachasqantaqa* ama pipas t’aqachunchu”,+ nispa. 10 Discipulonkunapas chayllamantataqmi Jesusta wasipi tapurqanku. 11 Jinan payqa nirqan: “Pipas esposanmanta t’aqakuspa jujwan casarakunman chayqa, esposanpa contranpin pantay juchaman urmashanman,+ 12 juj warmitaqchus qosanmanta t’aqakuspa jujwan casarakunman chayqa, pantay juchamanmi urmashallanmantaq”,+ nispa.

13 Chaymantataq runakunaqa wawakunata Jesusman apamuyta qallarirqanku paykunaman makinta churaykunanpaq, discipulonkunataq chay runakunata phiñarikurqanku.+ 14 Chayta rikuspan Jesusqa phiñakurqan, jinaspa discipulonkunata nirqan: “Jinalla wawakunaqa noqaman jamuchunku, ama jark’aychischu; Diospa gobiernonqa paykuna jina kaqkunapaqmi.+ 15 Cheqaqtan niykichis: Pipas Diospa gobiernonta mana juj wawa jinachu chaskinqa chayqa, manapunin chaymanqa jaykunqachu”,+ nispa. 16 Wawakunata marq’arikuspataq paykunaman makinta churaykuspa allinlla kanankupaq Diosmanta mañakurqan.+

17 Ñanninta Jesús rishaqtinmi juj runa phawaylla jamuspa ñaupanpi qonqorikurqan, jinaspa tapurqan: “Allin yachachikuq, ¿imatan ruwanay wiñay kausayta chaskinaypaq?”,+ nispa. 18 Jinan Jesusqa nirqan: “¿Imaraykun allin niwanki? Manan pipas allinqa kanchu, aswanpas Diosllan.+ 19 Yachankiñamá riki kamachikuykunataqa: Aman pitapas wañuchinkichu,+ aman jujwan pantankichu,+ aman suwakunkichu,+ aman pitapas yanqamanta tumpankichu,+ aman pitapas engañankichu,+ tayta-mamaykitan sumaqta qhawarinki,+ nisqata”, nispa. 20 Chay runataq nirqan: “Yachachikuq, juch’uychaymantapachan chaykunataqa junt’ashani”, nispa. 21 Jinaqtinmi Jesusqa munakuywan qhawaykuspa payta nirqan: “Kanraqmi juj ruwanayki: Phaway kaqniykikunata vendemuspa wajchakunaman qomuy, chhaynapin janaq pachapi qhapaq kayniyki kanqa; jinaspa qatikamuway”,+ nispa. 22 Paytaq Jesuspa chay nisqanwan llakikurqan, sinchi llakisqataq ripurqanpas askha kaqniyoq kasqanrayku.+

23 Jinan Jesusqa muyuriqninta qhawarispa discipulonkunata nirqan: “¡May sasapunin qolqesapakunapaqqa Diospa gobiernonman jaykuyqa kanqa!”,+ nispa. 24 Chayta uyarispan discipulonkunaqa admirakurqanku, Jesustaq paykunata nirqan: “Wawallaykuna, ¡may sasapunin Diospa gobiernonman jaykuyqa! 25 Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”,+ nispa. 26 Paykunataq aswan admirasqaraq nirqanku:* “Chhaynaqa, ¿pillañataq salvasqari kanman?”,+ nispa. 27 Jinaqtinmi Jesusqa paykunata qhawaykuspa nirqan: “Runakunaqa manan atinkumanchu chay ruwaytaqa, Diospaqmi ichaqa tukuy imapas atikuqlla”,+ nispa. 28 Jinan Pedroqa Jesusta nirqan: “Noqaykuqa tukuy imata saqespaykun qatikamushaykiku”,+ nispa. 29 Jesustaq nirqan: “Cheqaqtan niykichis: Pipas wasintapas, wayqenkunatapas, panankunatapas, mamantapas, taytantapas, wawankunatapas, chajrankunatapas, noqarayku allin willakuykunarayku ima saqeqqa+ 30 qatikachasqan kanqa;+ ichaqa pachaj kutitawanraqmi kay tiempopi chaskinqa wasikunata, wayqekunata, panakunata, mamakunata, wawakunata, chajrakunata ima; jamuq tiempopitaq* wiñay kausayta chaskinqa. 31 Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku”,+ nispa.

32 Jerusalenman wichaq ñannintan risharqanku, Jesustaq ñaupankuta risharqan. Discipulonkunaqa ancha admirasqan kasharqanku, qhepankuta riqkunataq manchakuyta qallarirqanku. Jesusqa wajmanta chunka iskayniyoq apostolkunata juj ladoman pusaspan imakunachus payta pasananña kasharqan chayta willayta qallarirqan:+ 33 “Jerusalén llaqtamanmi wichashanchis, chaypin runaq Churinqa umalli sacerdotekunaman kamachikuy simi yachachiqkunamanwan entregasqa kanqa. Paykunan wañunanpaq juchachanqaku, jinaspa waj nacionmanta runakunaman entreganqaku. 34 Paykunataq asipayanqaku, thoqaykunqaku, jasut’inqaku, wañuchinqaku ima; kinsa p’unchaymantan ichaqa kausarimpunqa”,+ nispa.

35 Chaymantataq Zebedeoq wawankuna+ Santiagowan Juanpiwan Jesusman qayllaykuspa nirqanku: “Yachachikuq, ima mañakusqaykutapas ruwapuwanaykikutan munayku”,+ nispa. 36 Jesustaq paykunata nirqan: “¿Ima ruwapunaytan munankichis?”, nispa. 37 Paykunataq nirqanku: “Kamachikuspayki jujniykuta paña ladoykipi jujniykutataq lloq’e ladoykipi tiyachiwankiku”,+ nispa. 38 Jinan Jesusqa paykunata nirqan: “Qankunaqa manan yachankichischu imatachus mañakushankichis chayta. ¿Atiwaqchischu ujanayña kashan chay copa* ujayta? ¿Atiwaqchischu bautizakushasqay bautismowan bautizakuytapas?”,+ nispa. 39 Paykunataq nirqanku: “Atisaqkun”, nispa. Jesustaq nirqan: “Ujanay copataqa ujankichismi, bautizakushasqay bautismowanpas bautizakunkichismi.+ 40 Paña ladoypi lloq’e ladoypi pipas tiyaykunanmi ichaqa mana noqaq ninaychu, aswanpas Diosmi ajllanqa pikunachus chaypi tiyanqa chaytaqa”, nispa.

41 Chayta yachaspan chunka discipulonkunaqa phiñakurqanku Santiagopaq Juanpaqwan.+ 42 Jinan Jesusqa paykunata wajaspa nirqan: “Yachasqaykichis jina, nacionkunapi kamachikuq jina kaqkunaqa kamachisqan runakunatan dueñochakunku, umalli kaqkunapas jujkunatan sarunchanku.+ 43 Qankuna ukhupin ichaqa mana chhaynachu kanan, aswanmi pipas qankuna ukhupi kuraq kayta munaqqa serviqniykichis kanan,+ 44 mayqenniykichispas ñaupaqpi kayta munaqtaq llapaykichispa kamachin kanan. 45 Runaq Churinpas manan servichikuqchu jamurqan, aswanpas jujkunata servinanpaqmi,+ vidanwan* pagaspa askha runakunata kacharichinanpaqwan”,+ nispa.

46 Chaymantataq Jericó llaqtaman jaykurqanku. Chay llaqtamantan Jesusqa lloqsisharqan discipulonkunawan askha runakunapiwan; ñan patapitaq Timeoq wawan Bartimeo tiyashasqa, payqa limosnata mañakuq ñausa runan karqan.+ 47 Nazaret llaqtayoq Jesús chayninta pasashasqanta uyarispan payqa wajakuyta qallarirqan: “¡Davidpa Churin+ Jesús, khuyapayaykuway!”,+ nispa. 48 Jinan askha runakuna payta phiñarikurqanku upallananpaq, paytaq ichaqa astawanraq wajakurqan: “¡Davidpa Churin, khuyapayaykuway!”, nispa. 49 Chaymi Jesusqa sayaykuspa nirqan: “Chay runata pusamuychis”, nispa. Jinan chay ñausa runata nirqanku: “¡Kallpachakuy! Sayariy, wajamushasunkin”, nispa. 50 Jinan chay ñausa runaqa jawa p’achantapas wijch’usparaq usqhaylla sayarirqan jinaspa Jesusman rirqan. 51 Jinan Jesusqa payta tapurqan: “¿Ima ruwapunaytan munanki?”, nispa. Chay ñausa runataq nirqan: “Yachachikuq,* ñawiyta kichariway”, nispa. 52 Jesustaq nirqan: “Phaway ripuy, iñiyniykin qhaliyachisunki”,+ nispa. Paytaq kaq ratu qhawarirqan,+ jinaspa Jesusta qatikurqan.