Isaías
25 Jehová Dios, qanmi Diosniyqa kanki.
Qantan alabasayki, sutiykitan jatunchasaq,
qanqa musphanapaq ruwaykunatan ruwanki,+
ñaupa tiempomantaraq piensasqaykikunatan ruwanki,+
chanintan,+ confianapaq jinan chaykunata ruwanki.
2 Llaqtatan rumi montonman tukuchipunki,
chay allin perqasqa llaqtatan lliuta thunipunki.
Waj runakunaq allin perqasqa llaqtanqa manan llaqtañachu;
manan jayk’aqpas jatarichisqañachu kanqa.
3 Juj atiyniyoq llaqtan jatunchasunki,
mana khuyapayakuq nacionkunaq llaqtanmi manchakusunki.+
4 Mana piniyoqkunaq pakakunanmi kanki,
wajchakunaq llakikuyninta thasnuqmi kanki,+
sinchi paramanta pakakunan kanki,
sinchi ruphaymanta llanthukunan kanki.+
Mana khuyapayakuq runaq phiñakuyninqa perqaman waqtakuq sinchi para jinan,
5 ch’aki pampapi sinchi ruphay jinan;
qanmi chay runaq qapariyninta upallachinki.
Imaynan phuyuqa ruphayta tapan,
chhaynatan millay runaq takiyninta ch’innichinki.
6 Kay orqopin+ ejercitokunata kamachiq Jehová Diosqa lliu llaqtakunata mijuchinqa,
sumaq mijunatan mijuchinqa,+
allin vinotan tomachinqa,
chilinasapa mijunatan mijuchinqa,
allin suysusqa vinotan ujachinqa.
7 Kay orqopin payqa llaqtakunata k’uyuq qatanata orqopunqa,
nacionkunata tapaq qatanatan llat’apunqa,* lliutan llik’ipunqa.
8 Wañuytapas wiñaypaqmi chinkachipunqa,*+
tukuy munayniyoq Señor Jehová Diosqa llapa runaq weqentan ch’akichinqa.+
Chinkachinqan llaqtanpa sarunchasqa kasqantapas,
Jehová Dios kikinmi chayta nin.
9 Chay p’unchaymi paykuna ninqaku:
“¡Qhawariychis! ¡Paymi Diosninchisqa!+
Paymi suyakusqanchis Diosqa,+ paymi salvawasun.+
¡Payqa Diosninchis Jehová Diosmi!
Paymi suyakusqanchis Diosqa.
Kunanqa kusikusun q’ochukusun,
paymi salvawasunchis, paymi librawasunchis”,+ nispa.
10 Jehová Diospa makinmi kay orqopi kashanqa.+
Moab llaqtaqa sarusqan kanqa,+
imaynan wanupi ichhuta sarukun chhayna sarusqan kanqa.
11 Paymi makinta jaywarimuspa waqtanqa,
imaynan nadaq runaqa makinwan unuta waqtan chhaynatan waqtanqa,
jatunchakuq kaynintan ñit’inqa,+
maki maywisqanwanmi ñut’unqa.
12 Allin perqasqa llaqtatan thunipunqa,
alto perqasqa llaqtatan ñit’ipunqa,
pampamanmi ch’aqenqa, ñut’u jallp’amanmi chanqaykunqa.