Marcos
5 Jinan paykunaqa qocha chimpaman chayarqanku, Gerasa runakunaq llaqtanman.+ 2 Jesús botemanta lloqsiqtin jinan panteón ukhumanta millay espirituq junt’aykusqan runa paywan tupaq jamurqan. 3 Chay runaqa panteón ukhupin tiyaq, manan pipas watayta atiqchu ni cadenawanpas. 4 Askha kutitaña chakinta makinta cadenakunawan watarqanku chaypas, payqa cadenakunatapas p’itirpariqmi; manapunin pipas atipayta atirqanchu. 5 Tuta-p’unchaytaqmi panteonpipas orqokunapipas qaparkachaspa puriq, rumikunawantaq kuchukuqpas. 6 Karullamantaraq Jesusta rikuruspataq phawaylla rispa payman k’umuykurqan.+ 7 Jinaspa qaparirqan: “¿Iman noqawan ruwanayki, ancha jatun Diospa Churin Jesús? Diosrayku juray ama ñak’arichiwanaykipaq”,+ nispa. 8 Chaytaqa nirqan, “lloqsiy chay runamanta, millay espíritu”+ nispa Jesús nisqanraykun. 9 Chaymantataq Jesusqa tapurqan: “¿Iman sutiyki?”, nispa. Paytaq nirqan: “Waranqa-waranqan* sutiyqa, askha kasqaykurayku”, nispa. 10 Jinan Jesusta askha kutita rogakurqan paykunata ama chay llaqtamanta qarqonanpaq.+
11 Chaypin juj orqopi askhallaña khuchikuna+ mijusharqanku.+ 12 Jinan chay espiritukunaqa rogakurqanku: “Khuchikunaman kachawayku chaykunaman jaykunaykupaq”, nispa. 13 Jesustaq kachallarqan, chaymi chay millay espiritukunaqa lloqsispa khuchikunaman jaykurqanku, jinan t’aqantin khuchikunaqa phawarispa qochaman urmaykurqanku,* chaypin unuwan jeq’epaspa llapanku wañurqanku, chay khuchikunaqa iskay waranqa jinan karqan. 14 Khuchi michiqkunataq chaymanta ayqekuspa llaqtapi campokunapi ima willakamurqanku, jinan runakunaqa jamurqanku imachus pasasqanta rikuq.+ 15 Chaymi Jesuspa kasqanman chayamuspanku waranqa-waranqa* supaykunaq junt’aykusqan runata rikurqanku p’achasqa tiyashaqta, yuyayninpi kashaqta ima, jinan paykunaqa mancharikurqanku. 16 Chaykunata rikuq runakunapas willarqankun supaykunaq junt’aykusqan runawan khuchikunawanpas imachus pasasqanta. 17 Chaymi llapanku Jesusta rogakuyta qallarirqanku llaqtankumanta ripunanpaq.+
18 Boteman Jesús seqaqtinmi supaykunaq junt’aykusqan runaqa paywan ripunanpaq rogakurqan.+ 19 Jesusmi ichaqa mana munarqanchu, aswanmi nirqan: “Phaway wasiykita ripuy, jinaspa familiaykikunaman willamuy imatachus Jehová* Dios qanpaq ruwapurqasunki chayta, imaynatachus khuyapayarqasunki chaytawan”, nispa. 20 Jinan chay runaqa chaymanta ripuspa Jesuspa tukuy ima ruwapusqanta Decápolis* llaqtantinpi willayta qallarirqan, jinan lliu runakuna anchata admirakurqanku.
21 Wajmantan Jesusqa botepi qocha chimpaman chimparqan, jinan qocha patallapiraq kashaqtin ancha askha runakuna payman juñukamurqanku.+ 22 Chayllamanmi jamurqan sinagogapi jujnin umalli, Jairo sutiyoq runa, jinaspan Jesusta rikuspa ñaupanpi pampakama k’umuykurqan,+ 23 askha kutitataq rogakurqan: “Ususichaymi sinchi onqosqa* kashan, jamuy, llamiykampuway,+ chhaynapi qhaliyapuspa kausananpaq”, nispa. 24 Jinan Jesusqa paywan kuska rirqan, runakunapas askhan qhepanta rirqanku, jinaspa payman k’iskiykurqanku.
25 Chaypin kasharqan chunka iskayniyoq wataña+ yawar apaywan onqoshaq warmi,+ 26 payqa askha doctorkunawanñan jampichikusqa, sinchitan ñak’arichisqaku, tukupusqañan lliu imantapas, manataqmi qhaliyasqachu, aswanpas astawanraqmi onqopusqa. 27 Jesusmanta rimaqta uyarispan payqa runa-runa ukhunta qhepallanmanta qayllaykuspa Jesuspa jawa p’achanta llamiykurqan.+ 28 Payqa nisqañan: “Jawa p’achallantapas llamiykusaq chayqa, qhaliyarusaqmi”,+ nispa. 29 Jinan kaq ratu yawar apayninqa ch’akipurqan, paytaq cuerponpi reparakurqan chay ñak’arichiq onqoymanta qhali kapusqanta.
30 Jesuspas kaq ratun reparakurqan paymanta atiy lloqsisqanta,+ chaymi kutirispa nirqan: “¿Pin p’achayta llamiykamuwan?”,+ nispa. 31 Jinan discipulonkunaqa nirqanku: “¿Khaytukuy runakuna qanman k’iskipakamushaqtinchu ninki: Pin llamiykamuwan, nispa?”, nispanku. 32 Jesustaq muyuriqninta qhawarirqan pichus llamiykurqan chayta rikuyta munaspa. 33 Chay warmitaq imachus paywan pasasqanta yachaspa, mancharisqa khatatatasparaq* Jesusman asuykurqan, ñaupanpi qonqoriykuspataq lliuta willakurqan. 34 Jinan Jesusqa nirqan: “Ususilláy, iñiyniykin qhaliyachisunki, ama llakikuspalla ripuy,+ qhaliñan kapunki chay ñak’arichiq onqoyniykimantaqa”,+ nispa.
35 Jesús rimashallaqtinraqmi sinagogapi umalli runaq wasinmanta wakin runakuna jamurqanku, jinaspa nirqanku: “¡Ususiykiqa wañurapunñan! ¿Imapaqñan yachachikuqta sayk’uchiwaq?”,+ nispa. 36 Jesustaq chay nisqankuta uyarispa sinagogapi umallita nirqan: “Ama manchakuychu, iñillay qanqa”,+ nispa. 37 Jinaspan Pedrota, Santiagota, Santiagoq wayqen+ Juantawan pusarikurqan; payqa manan munarqanchu jujkunaq rinantaqa.
38 Sinagogapi umalliqpa wasinman chayaspankun Jesusqa rikurqan chaypi runakuna ch’aqwashaqta, waqashaqta, qaparkachashaqta ima.+ 39 Jinan payqa jaykuspa nirqan: “¿Imanaqtinmi waqashankichis ch’aqwashankichispas? Sipaschaqa manan wañunchu, puñushallanmi”,+ nispa. 40 Chayta niqtinmi paykunaqa Jesusta pisichaspa asipayayta qallarirqanku. Jesustaq llapankuta jawaman lloqsichispa chay sipaschaq taytanwan, mamanwan, paywan kaqkunallapiwan sipaschaq kasqanman jaykurqan. 41 Jinan makinmanta jap’ispa nirqan: “Talita kumi”, nispa. Chayqa “sipascha, ¡jatariy!” ninantan nin.+ 42 Chaymi sipaschaqa kasqan ratu jatarispa purikachayta qallarirqan (payqa chunka iskayniyoq watayoqmi karqan). Chaywanmi tayta-mamanqa anchatapuni admirakurqanku, maytataqmi kusikurqanku. 43 Jesusmi ichaqa allin-allintapuni paykunata kamachirqan amapuni pimanpas chayta willanankupaq,+ kamachillarqantaqmi chay sipaschaman mijuchinankupaqpas.