Ezequiel

36 Diosmi niwarqan: “Runaq churin, Israel orqokunawan imachus pasananta willay, niy: Israel orqo-orqokuna, uyariychis Jehová Diospa siminta. 2 Tukuy munayniyoq Señor Jehová Diosmi nin: Cheqneqniyki runakunan qan contra nishanku: ¡Allinmá kayqa! ¡Ñaupa tiempo yupaychana patakunapas* noqanchispaqmi kapun!,+ nispa.

3 ”Chayrayku kay profeciata willay: Tukuy munayniyoq Señor Jehová Diosmi nin: Paykunaqa llapa ladomantan qankuna contra phawaykamurqanku, muyuriqniyki nacionkunapi puchuqkunan dueñochakurqasunkiku, runakunan qankunamanta mana allinkunata rimarqanku,+ 4 chayrayku Israelpi orqokuna, tukuy munayniyoq Señor Jehová Diospa nisqanta uyariychis. Tukuy munayniyoq Señor Jehová Diosmi orqokunata, moqokunata, mayukunata, wayq’okunata, raqay-raqay* llaqtakunata,+ nacionkunapi puchuqkunaq suwasqan, p’enqayman churasqan wijch’usqa llaqtakunata nin,+ 5 arí, paykunatan tukuy munayniyoq Señor Jehová Dios nin: K’araq phiñakuyniypin rimasaq+ nacionkunapi puchuqkuna contra, llapa Edom contra. Paykunan may kusikuywan cheqnikuywan jallp’ayta dueñochakuyta munashanku,+ pastoyoq campoykunawan qhepakuytan munashanku, suwawaytan munashanku,+ nispa.

6 ”Chhaynaqa Israel jallp’amanta profetizay, orqokunata, moqokunata, mayukunata, wayq’okunata niy: Tukuy munayniyoq Señor Jehová Diosmi nin: Nacionkunaq pisichasqasuykichismantan, sinchi colerasqa, k’araq phiñasqa kashani, chaymi rimasaq,+ nispa.

7 ”Chayraykun tukuy munayniyoq Señor Jehová Diosqa nin: Makiyta oqarispan jurani, muyuriqniykichispi nacionkunaqa imachus ruwasqankuman jinan p’enqachisqa kanqaku.+ 8 Qankunaqmi ichaqa, Israelpi orqokuna, k’allmaykichiskuna wiñamunqa, sumaqtan rurunkichis Israel llaqtaypaq,+ paykunaqa kutimunqakuñan. 9 Noqaqa qankunawanmi kashani, llank’asqan, tarpusqan kankichis, sumaqtan qhawarisaykichis. 10 Israel llaqtataqa askhamanmi tukuchisaq, llaqtakunapipas askhan runakuna kanqa,+ thunisqa kaqkunapas jujmantan sayarichisqa kanqaku.+ 11 Arí, askhapunin qankunaqa kankichis, uywaykichispas askhan kanqa.+ Ñaupa tiempopi jinan askha runakunayoq kankichis;+ ñaupa tiempomantapas aswan allinraqmi kankichis.+ Chhaynapin yachankichis noqa Jehová Dios kasqayta.+ 12 Israel llaqtaymi qankuna patanta purinqa, paykunan jap’ikapusunkichis,+ herenciankun kapunkichis. Manan jayk’aqpas wawankunataqa qechunkichisñachu,+ nispa.

13 ”Tukuy munayniyoq Señor Jehová Diosmi nin: Qanmantan nishanku: Chay jallp’aqa runankunatan mijupun, nacionkunatan mana wawayoqta saqempun, nispa. 14 Chayraykun manaña qanpi tiyaq runakunata mijupunkichu, manañan nacionniykitapas mana wawayoqtachu saqenki, ninmi tukuy munayniyoq Señor Jehová Dios. 15 Manañan nacionkunapas qanmanta mana allinkunata rimanqakuñachu, manañan pipas asipayasunkichu.+ Qanpi tiyaq nacionkunataqa manañan urmachinkiñachu, nispan nin tukuy munayniyoq Señor Jehová Dios”, nispa.

16 Jujmantan Jehová Diosqa rimapayamuwarqan, paymi niwarqan: 17 “Runaq churin, jallp’ankupi tiyashaspan Israel runakunaqa mana allinta ruwaspa, mana chaninta kausaspa jallp’ankuta qhellichapurqanku.+ Noqapaqqa chay ruwasqankuqa killanpi kashaq warmiq qhellin jinan karqan.+ 18 Chaykuna ruwasqankuraykun, kay pachapi yawarta jich’asqankuraykun,+ kay jallp’ata millakunapaq idolonkunawan qhellichasqankuraykun+ paykunaman k’araq phiñakuyniyta jich’aykurqani. 19 Chaymi paykunata llapa nacionkunaman ch’eqerichirqani, llapa suyukunamanmi wisñirqani.+ Paykunataqa juzgarqani imaynachus kausasqankuman jinan, imachus ruwasqankuman jinan. 20 Juj nacionkunaman chayaqtinkun, chay nacionkunaqa ch’uya sutiyta qhellichayta qallarirqanku,+ paykunan nirqanku: Kay llaqtaqa Jehová Diospa llaqtanmá riki, kunantaq ichaqa llaqtankumanta karupi kashanku, nispa. 21 Israel runakunaqa may nacionmanchus chayarqanku chaypin sutiyta mana allinta rikuchirqanku,+ chaymi noqaqa sutiyta ch’uyanchasaq.

22 ”Chhaynaqa, Israel runakunata nimuy: Tukuy munayniyoq Señor Jehová Diosmi nin: Israel llaqta, manan qankunaraykuchu chaytaqa ruwasaq, aswanpas sutiyraykun chaytaqa ruwasaq. Qankunan sutiytaqa purisqaykichis nacionkunapi qhellicharqankichis,+ nispa. 23 Jatun sutiytaqa ch’uyanchasaqpunin.+ Qankunan nacionkuna ukhupi qhellicharqankichis, paykunaq chaupinpin qhellicharqankichis. Paykuna rikushaqtinmi sutiyta ch’uyanchasaq, chhaynapin llapa nacionkuna yachanqaku noqa Jehová Dios kasqayta,+ ninmi tukuy munayniyoq Señor Jehová Dios. 24 Llapa nacionkunamantan orqomusaykichis, lliu ladokunamantan juñumusaykichis, jinaspan jallp’aykichisman apasaykichis.+ 25 Ch’uya unuwanmi ch’aqchusaykichis, jinan llapa mana allin ruwasqaykichismanta+ qhelli idoloykichiskunamanta+ limpio ch’uya kapunkichis.+ 26 Mosoq sonqotan churasaykichis,+ mosoq yuyaytan qosaykichis.+ Rumi sonqoykichistan orqopusaq,+ jinaspan kasukuq sonqota churasaykichis. 27 Espirituywanmi* imayna yuyaykusqaykichista cambiasaq, jinan qankunaqa leyniykunata kasukunkichis,+ kamachikuyniykunatan junt’ankichis. 28 Chhaynapin ñaupa taytaykichiskunaman qosqay jallp’api tiyankichis. Qankunan llaqtay kankichis, noqataq Diosniykichis kasaq.+

29 ”Manaña qhellichakunaykichispaqmi yanapasaykichis. Mijunatan askhata ruruchisaq, manañan yarqaypiqa tarikunkichisñachu.+ 30 Sach’akunatan askhata ruruchisaq, campokunapas sumaqtan mijunata qonqa, chhaynapin qankunaqa manaña yarqaypichu kankichis,+ manañan nacionkunaq p’enqachisqanchu kankichis. 31 Chhaynapin qankunaqa yuyarinkichis mana allin ruwasqaykichiskunata millay kausasqaykichiskunata; qankuna kikiykichistan millakunkichis, qhelli ruwasqaykichiskunatan juchaykichiskunatan millakunkichis.+ 32 Ichaqa kayta allinta yachaychis: Kaytaqa manan qankunaraykuchu ruwashani.+ Noqaqa munani mana allin ruwasqaykichismanta p’enqasqa kanaykichistan, k’umuykukuq kanaykichistan, nispan nin tukuy munayniyoq Señor Jehová Dios.

33 ”Tukuy munayniyoq Señor Jehová Diosmi nin: Llapa juchaykichista ch’uyanchasqay p’unchaypin, llaqtakunaqa runakunayoq kanqa,+ thunisqa kaqkunapas jatarichisqan kanqa.+ 34 Purun jallp’an, wijch’usqa jallp’an llank’asqa kapunqa. Chay jallp’ataqa llapa chayninta puriqmi rikuq. 35 Runakunan ninqaku: Purunyachisqa jallp’an Edén huerta jina kashan,+ thunisqa llaqtakunapas, purunyachisqa llaqtakunapas, ch’usaqyachisqa llaqtakunapas kunanqa allin perqasqan kashan, runakunawanmi junt’a kashan,+ nispa. 36 Muyuriqniykichispi nacionkunan yachanqaku noqa Jehová Diosqa thunisqa kaqta jujmanta sayarichisqayta, purunyachisqa jallp’ata jujmanta plantasqayta. Noqa Jehová Diosmi chayta nini, chhaynatataqmi ruwanipas,+ nispa.

37 ”Tukuy munayniyoq Señor Jehová Diosmi nillantaq: Israel llaqtaq mañakuwasqantan ruwasaq, paykunatan ovejakunata jinaraq askhayachisaq. 38 Paykunaqa ch’uya runakunaq ovejankuna jinan kanqaku, Jerusalenpi fiestapaq ovejakuna jinan kanqaku.+ Thunisqa llaqtakunan runakunawan junt’a kanqa,+ chhaynapin yachanqaku noqa Jehová Dios kasqayta, nispa”.