Hechos
28 Lamar-qochamanta lloqsispaykun yacharqayku chay islaqa Malta nisqa kasqanta.+ 2 Chay islapi tiyaqkunaqa may sumaq sonqowanmi chaskiwarqanku. Chay ratuqa paramusharqanmi chirimusharqantaqmi, chaymi paykunaqa ninata jap’ichispanku llapallaykuta sumaqta chaskiwarqanku. 3 Pablopas llant’ata pallaspan ninaman churaykusharqan, chayllamanmi picaq mach’aqway ninamanta ayqespa Pabloq makinman warkukurqan. 4 Chay mach’aqway Pabloq makinman warkukusqanta rikuspan chay islapi tiyaqkunaqa ninakurqanku: “Kay runaqa runa wañuchiqchá, chaychá lamar-qochapi wañunanmantaña salvakurqan chaypas, Chanin Kayqa* mana munanchu kausananta”, nispa. 5 Jinan Pabloqa chay mach’aqwayta ninaman chhafchirparirqan, manataq chay mach’aqwaypa kanisqanqa imanarqanpaschu. 6 Chay runakunan ichaqa nisharqanku: “Kunallanchá punkirinqachus icha wañusqachus wijch’ukunqa”, nispa. Unayña karuqtin Pablota mana imapas pasaqtintaq “juj dioschá payqa” nispañataq ninakurqanku.
7 Maypichus kasharqayku chay qayllallapin Publio sutiyoq runaq chajrankuna kasqa, payqa umallin chay islapi kasqa; paymi sumaqta chaskiwaspanku kinsa p’unchayta alojawarqanku. 8 Publioq taytanqa fiebrewanmi puñunapi kashasqa, wijsanpas sinchitan q’ewishasqa,* jinan Pabloqa paypa kasqanman jaykuspa Diosmanta mañakurqan, jinaspa makinta payman churaykuspa qhaliyachirqan.+ 9 Chayta yacharuspan chay islapi onqosqa runakunaqa Pabloman jamuyta qallarirqanku, jinan paykunapas qhaliyachisqa karqanku.+ 10 Chaymi paykunaqa askha regalokunata qoykuwarqanku, barcopi ripushaqtiykupas tukuy imachus necesitasqaykutan churaykapuwarqanku.
11 Kinsa killamantataq barcoman seqaspa ripurqayku, chay barcoq senqanpin nisqa Zeuspa wawankuna nispa. Chay barcoqa Alejandría llaqtamanta jamuspan chiri tiempota chay islapi pasasqa. 12 Siracusa llaqtaman chayaspaykun kinsa p’unchay chaypi qhepakurqayku, 13 chayta muyuykuspataq Regio llaqtaman chayarqayku. Chaymanta juj p’unchaymantataq uray ladomanta wayra wayrarimuqtin qhepantin p’unchay Puteoli llaqtaman chayarqayku. 14 Chay llaqtapin iñiqmasikunawan tupayku, jinan rogaykuwanku qanchis p’unchayta paykunawan qhepakunaykupaq. Chaymantataq Roma llaqta ladoman rirqayku. 15 Noqaykumanta uyarispan Roma llaqtamanta iñiqmasikunaqa Apio mercado plazakamaraq jamusqaku noqaykuwan tupaq, wakintaq Kinsa Tambo nisqakamaraq jamusqaku. Paykunata rikuspan Pabloqa Diosman graciasta qorqan, anchatataq kallpachakurqanpas.+ 16 Chaymantataq Roma llaqtaman chayarqayku, chaypin Pablotaqa jinallata saqerqanku payta cuidaq soldadollawan sapaqpi alojakunanpaq.
17 Kinsa p’unchaymantan Pabloqa chaypi kaq judío umallikunata wajachimurqan, jamuqtinkutaq paykunata nirqan: “Wayqeykuna, noqaqa manan imatapas ruwarqanichu llaqtanchis contrapas ni ñaupa taytanchiskunaq costumbrenkuna contrapas,+ chhaynaña kaqtinpas Jerusalén llaqtapin Roma runakunaman presota entregawanku.+ 18 Jinan paykunaqa allinta tapuykuwanku,+ noqapi mana imatapas wañunaypaq jina tarispankutaq kacharipuyta munashawarqanku.+ 19 Judiokunan ichaqa mana munankuchu, chaymi noqaqa, Roma rey juzgawachun nirqani,+ ichaqa manan nacionniy contra quejakunayraykuchu chaytaqa nirqani. 20 Israel llaqta runakunaq suyakuyninraykun kunan kay cadenawan watasqa kashani, chaymanta rimanaypaqmi noqaqa qankunata wajachimurqaykichis”,+ nispa. 21 Jinan paykunaqa nirqanku: “Noqaykuqa manan qanmanta rimaq ima cartatapas Judeamantaqa chaskiykuchu, jaqaymanta jamuq wayqekunapas manan ima mana allintapas qanmantaqa willawankuchu. 22 Ichaqa, ¿imatataq willaytari munashawankiku? Chaytan uyariyta munayku. Yachasqaykuman jinaqa jinantinpin rimashanku+ chay t’aqaq contranpi”,+ nispa.
23 Jinan rimanakurqanku juj p’unchayña paywan rimanankupaq; ima p’unchaypaqchus rimanakurqanku chay p’unchayqa aswan askhan Pabloq alojakusqan wasiman jamurqanku. Jinan payqa p’unchay ch’isiyaqta allintapuni paykunaman willarqan Diospa gobiernonmanta. Jesuspi iñichiytapuni munaspan+ Moisespa chaskisqan kamachikuymanta,+ profetakunaq qelqasqanmantawan allintapuni willarqan.+ 24 Wakinqa creerqankun imachus nisqanta, wakinmi ichaqa mana creerqankuchu. 25 Paykunaqa t’aqanasqan yuyayninkupi kasharqanku, chaymi ripushaqtinku Pabloqa nirqan:
“Razonwanchá santo espirituqa ñaupa taytaykichiskunaman willananpaq profeta Isaiasta kamachirqan: 26 Phaway chay runakunata nimuy: Uyarishaspapas manapunin entiendenkichischu, qhawashaspapas manapunin rikunkichischu.+ 27 Kay runakunaq sonqonqa rumiyapunmi; uyarishaspapas manan kasukunkuchu, ñawinkutan ch’illminku mana rikunankupaq, ninrinkutan roqt’uyachinku mana uyarinankupaq, chaymi mana imatapas sonqonkupi entiendenkuchu nitaqmi kutirikamuwankuchu, chhaynapi paykunata ama qhaliyachinaypaq,+ nispa. 28 Chhaynaqa yachaychis kayta: Dios imaynatachus salvanqa chayqa waj nacionkunamanmi willasqa kanqa,+ paykunaqa allintan uyarikunqaku”,+ nispa. 29 *——
30 Payqa iskay wata junt’an chaypi tiyarqan juj wasita alquilakuspa.+ Watukuqnin jamuqkunatapas sumaqtan chaskiq, 31 Diospa gobiernonmantapas sut’intan paykunaman willaq, Señor Jesucristomantapas sut’intan yachachiq;+ mana piqpa jark’asqanmi chaykunata ruwaq.