Hebreos
3 Chhaynaqa, ch’uya wayqeykuna,* janaq pachapaq wajasqamasiykuna,+ pimantachus rimanchis chay apostolpi chay uma sacerdotepi allinta piensaychis, payqa Jesusmi.+ 2 Payqa junt’aqmi karqan ajllaqnin Diospaq,+ imaynan Moisespas Diospa lliu wasinpi junt’aq karqan chhayna.+ 3 Ichaqa, imaynan wasi ruwaqqa ruwasqan wasimanta aswan jatunchasqa, chhaynan paypas Moisesmanta aswan jatunchasqa.+ 4 Lliu wasipas runaq ruwasqanmi, tukuy iman ichaqa Diospa ruwasqan. 5 Moisesqa junt’aq kamachin karqan Diospa lliu wasinpi, chay ruwasqanmi rikuchirqan imakunatachus qhepaman willakunan karqan chayta. 6 Criston ichaqa Diospa wasinmanta encargakuq junt’aq Churi karqan.+ Chayrayku, mana manchakuspachus rimashallasun, tukukuykamataqchus suyakuyninchismanpas kusisqalla jap’ipakusun chayqa, noqanchismi paypa wasin kasunchis.+
7 Chayraykun santo espíritu nin:+ “Kunanchus siminta uyarinkichis chayqa, 8 ama sonqoykichista k’ulluyachiychischu imaynan juj kutipi ñaupa taytaykichiskuna sonqonkuta k’ulluyachispa sinchita colerachiwarqanku jinataqa, imaynan ch’inneqpi prueba karqan jinatapas.+ 9 Chaypin paykunaqa, imaymana ruwasqaykunata tawa chunka wataña rikurqanku chaypas,+ pruebaman churawarqanku. 10 Chaymi noqaqa chay miray runakunata millakapurqani, jinaspa nirqani: Kay runakunaq sonqonqa mana allinllamanmi rishan. Paykunaqa manan ñanniykunataqa reqsinkuchu, nispay. 11 Chaymi noqaqa k’araq phiñakuyniypi jurarqani: Paykunaqa manan jaykunqakuchu samanay p’unchaymanqa, nispay”,+ nispa.
12 Wayqeykuna,* allinta cuidakuychis, paqtataq kausaq Diosmanta karunchakuwaqchis, chhaynapitaq sonqoykichis millayman, mana iñiqman tukupunman.+ 13 Chayrayku, “kunan” nisqa manaraq tukukushaqtin+ qankunapura sapa p’unchay kallpachanakushaychis, chhaynapi jucha ama sonqoykichista engañaspa k’ulluyachinanpaq. 14 Cristoq chaskisqanta chaskinanchispaqqa tukukuykaman tukuy sonqowan confiananchis, imaynan qallariypipas confiarqanchis jinata.+ 15 Diospa simin qelqapipas ninmi: “Kunanchus siminta uyarinkichis chayqa, ama sonqoykichista k’ulluyachiychischu imaynan ñaupa taytaykichiskuna sonqonkuta k’ulluyachispa sinchita colerachirqanku jinataqa”,+ nispa.
16 Chhaynaqa, ¿pikunataq Diospa kunkanta uyarishaspa payta sinchita colerachirqanku? ¿Manachu chaykuna karqanku Egipto llaqtamanta Moisespa pusasqan llapa lloqsimuqkuna?+ 17 Chaymantapas, ¿pikunamantataq Diosqa tawa chunka watantin millasqa kasharqan?+ ¿Manachu ch’inneqpi wañumuq juchasapa runakunamanta?+ 18 Chaymantapas, ¿pikunamantaq jurarqan samanan p’unchayman mana jaykunankupaq? ¿Manachu jurarqan chay mana kasukuqkunaman? 19 Chhaynaqa, mana iñisqankuraykun paykunaqa Diospa samanan p’unchayman mana jaykurqankuchu.+