Isaías
41 Diosmi nin: “Islakuna, ch’inlla uyariwaychis,
nacionkuna kallpachakuchunku.
Qayllaykamuchunku jinaspa rimachunku.+
Juiciopaq llapallanchis juñukusun.
2 ¿Pin inti lloqsimuy ladomanta juj maqanakuqta jamuchirqan?+
¿Pin justiciata ruwananpaq ñaupanman* wajarqan?
¿Pin nacionkunata jap’ichirqan reykunatapas k’umuchirqan?+
¿Pin espadanwan lliuta ñut’uman tukuchirqan?
¿Pin flechanwan rastrojota* jina lliuta ch’eqechirqan?
3 Paymi paykunata qatikachan,
manan pipas paytaqa jark’anchu,
mana jayk’aq purisqan ladokunapin qatikachan.
4 ¿Pin chaykunata ruwarqan?
¿Pin qallariymantapacha runakunata juñurqan?
Noqa Jehová Diosmi, noqaqa qallariymantapachan kaypi kashani,+
qhepa wiñaykunapaqpas noqaqa chayllapin kaqlla kashasaq”,+ nispa.
5 Islakunapas payta rikuspan mancharikunku,
kay pachaq k’uchunkunapi tiyaqkunapas khatatataytan* qallarinku.
Llaqtakunan juñukunku jinaspa jamunku.
6 Sapankan runamasinta yanapan,
sapankan wayqenta nin: “Kallpachakuy”, nispa.
7 Chhaynatan artesanoqa kallpachan qolqe takaqta,+
chhaynatan ruphashaq fierrota ñit’iqpas kallpachan fierro takaqta.
Soldasqata qhawaspan nin: “Allinmi kashan”, nispa.
Chaymantataq idolokunata clavokunawan allinta jap’ichinku.
8 “Israel, qanqa kamachiymi kanki,+
Jacob, qantan noqaqa ajllakuyki,+
qanqa amigoy Abrahanpa mirayninmi kanki.+
9 Qantan kay pachaq k’uchunmantaraq apamurqayki,+
qantan kay pachaq cantonmantaraq wajamurqayki.
10 Ama manchakuychu, noqaqa qanwanmi kashani.+
Ama llakikuychu, noqaqa Diosniykin kani.+
Noqan kallpachasayki, noqan yanapasayki.+
Paña makiywanmi jap’isayki,
chanin ruwaq makiywanmi aysarisayki, nispa.
11 Qanwan phiñakuqkunaqa llapankun p’enqachisqa k’umuchisqa kanqaku,+
qanwan maqanakuqkunapas chinkachisqan ch’usaqyachisqan kanqaku.+
12 Qanwan maqanakuqkunatan maskhanki, ichaqa manan tarinkichu.
Qan contra maqanakuq jamuqkunaqa manapas kankumanchu jinan kanqaku.+
13 Noqa Diosniyki Jehová Diosqa, paña makiykimantan jap’ishayki.
Noqan niyki: Ama manchakuychu, noqan yanapasayki,+ nispa.
Israel llaqtalláy, noqan yanapasayki” ninmi rantiqniyki Jehová Dios,+ Israelpa ch’uya Diosnin.
15 Diosmi nillantaq: “Fierro kiruyoq saruchinamanmi tukuchiyki,+
erapaq filochasqa mosoq sarunatan ruwayki.
Orqokunatan sarunki, ñut’umanmi tukuchinki,
moqokunatan polvoman tukuchinki.
16 Chaykunatan wayrachinki,
jinan wayra apapunqa,
sinchi wayran ch’eqerichinqa.
17 Wajchakunan, mana imayoqkunan unuta maskhanku,
ichaqa manan tarinkuchu, qallunkupas ch’akillañan kashan.+
Ch’in pampakunatan carrizoq* wiñanan unu pampakunaman tukuchisaq,
ch’aki pampakunatan pujyu-pujyuman tukuchisaq.+
19 Ch’inneq ladokunapin cedro sach’akunata, acacia sach’akunata,
arrayán sach’akunata, pinokunatawan plantasaq.+
Ch’in aqo pampakunapin enebro sach’akunata,
fresno sach’akunata, cipreskunatawan plantasaq.+
20 Chhaynapin llapa runakuna yachanqaku,
Jehová Diospa makin chaykuna ruwasqanta;
lliumi rikunqaku, lliumi yachanqaku,
Israelpa ch’uya Diosnin chaykuna kamasqanta”,+ nispa.
21 “Quejaykichista apamuychis” ninmi Jehová Dios.
“Iman rimanaykichis kashan, rimariychis” ninmi Jacobpa reynin.
22 Diosmi nillantaq: “Yau idolokuna, razonniykichista willakuychis,
imakunachus pasanqa chayta willawayku. Ñaupaqpi imakunachus pasarqan chayta willawayku,
chaykunapi piensaspan yachasaqku imaynatas imapas tukunqa chayta.
Mana chayqa imakunachus chayamunqa chayta willawayku.+
23 Jamuq tiempopi imakunachus pasanqa chayta willawayku,
chhaynapin yachasaqku dioskunachus kankichis icha manachus chayta.+
Imallatapas ruwaychis, allinña mana allinña kachun chaypas,
ima ruwasqaykichiswanpas admirachiwayku.+
24 Qankunaqa mana valeqmi kankichis,
ima ruwasqaykichispas manan valenchu.+
Qankunata ajllakuqkunaqa may millakunapaqmi kanku.+
25 Wichay ladomantan juj runata rijurichimushani, paymi jamunqa,+
inti lloqsimuy ladomantan jamunqa,+ paymi sutiyta jatunchanqa.
Paymi t’uruta jina kamachikuqkunata sarunqa,+
imaynan t’uruwan llank’aqqa t’uruta sarun chhaynatan sarunqa.
26 ¿Pillapas qallariypi kaykunamanta rimarqanchu, yachaykun ninaykupaq?
¿Pillapas ñaupaqpi chaykunamanta rimarqanchu, razonwanmi rimashan, ninaykupaq?+
Manan pipas ¿riki?
¡Manan mayqenpas chaytaqa willarqanchu!
¡Manan pipas imatapas uyarirqasunkichischu!”,+ nispa.
27 Noqan Siontaqa ñaupaqta nirqani: “¡Qhawariy, kaypiñan kashanku!”,+ nispa.
Jerusalenmanmi juj willakuqta kachasaq, allin willakuykunatan apachisaq.+
28 Noqaqa qhawashallarqanin manataqmi pipas karqanchu,
paykuna ukhupiqa manan pipas yuyay qoqqa karqanchu.
Noqaqa tapushallarqanin manataqmi mayqenpas rimarinchu.
29 Chaykunaqa yanqallan kanku.
Manan ima ruwaytapas atinkuchu.
Chay metalmanta idolokunaqa wayra jinallan kanku,
yanqallan chaypi kashanku.+