2 Crónicas

35 Josiasmi Jerusalén llaqtapi Jehová Diospaq Pascua Fiestata ruwarqan,+ jinan ñaupaq kaq killapi chunka tawayoq p’unchaypi+ animalkunata sacrificiopi jaywanankupaq ñak’arqanku.+ 2 Josiasmi sacerdotekunata maypichus llank’anankupi churarqan, jinaspa paykunata kallpacharqan Jehová Diospa wasinpi llank’anankuwan allinta junt’anankupaq.+ 3 Leví runakunan llapa Israel runakunata yachachiqku,+ paykunan Jehová Diospaq ch’uya karqanku, paykunatan Josiasqa nirqan: “Diospa rimanakuynin arcata Israel rey Davidpa churin Salomonpa ruwasqan wasiman churaychis,+ chay rimanakuy arcataqa manañan rijraykichispichu apankichis.+ Kunanqa Jehová Diosta Israel llaqtantawan serviychis. 4 Kunanqa alistakuychis mayqen familiamantachus kasqaykichisman jina, jayk’a t’aqachus kasqaykichisman jina, Israel rey Davidpa kamachisqanman jina,+ churin Salomonpa kamachisqanman jina.+ 5 Ch’uya cheqaspi t’aqa-t’aqapi churakuychis wayqeykichis Israel runakuna jayk’a familiachus kasqankuman jina. Leví runakunaqa kananpunin sapanka Israel familiata yanapananpaq. 6 Uywakunata ñak’aychis Pascua Fiesta sacrificiopi jaywanaykichispaq,+ qankunapas ch’uyanchakuychis wayqeykichiskuna jamuqtin listo kashanaykichispaq. Chhaynapin junt’ankichis Moisesman Jehová Diospa kamachisqanta”, nispa.

7 Josiasmi llapa chaypi kaq runakunaman qorqan ovejakunata cabrakunatawan Pascua Fiestapi jaywanankupaq, llapanpiqa kinsa chunka waranqatan qorqan, qollarqantaqmi kinsa waranqa wakakunatapas. Llapa chay uywakunaqa reypan karqan.+ 8 Chay llaqtapi autoridadkunapas qollarqankutaqmi ofrendankuta chay llaqta runakunapaq, sacerdotekunapaq, Leví runakunapaqpas. Diospa wasinpi umallikunan karqanku: Hilquías,+ Zacarías, Jeyelpiwan; paykunan sacerdotekunaman qorqanku Pascua Fiestapi jaywanankupaq iskay waranqa soqta pachaj uywakunata, kinsa pachaj wakakunatawan. 9 Leví runakunaq umallinkunan karqan: Asabías, Jeiel, Jozabaj, Conanías, Conaniaspa wayqenkuna Semayawan Netanelpiwan. Paykunan Leví runakunaman qorqanku Pascua Fiestapi sacrificiota jaywanankupaq pisqa waranqa uywakunata, pisqa pachaj wakakunatawan.

10 Chhaynatan Pascua Fiestapaq lliuta alistarqanku, sacerdotekunan maypichus llank’anankupi llank’arqanku, Leví runakunapas reypa kamachisqanman jinan maypichus llank’anankupi kasharqanku.+ 11 Jinan Pascua Fiestapaq uywakunata ñak’arqanku.+ Leví runakuna chay uywakunata ch’utishaqtinkutaq+ sacerdotekunaqa Leví runakunaq jaywasqan yawarta altar patapi ch’aqchurqanku.+ 12 Chaymantataq ruphachina ofrendakunata alistarqanku chay fiestaman jamuq runakunaman rakinankupaq, chhaynapi Moisespa chaskisqan kamachikuy qelqapi nisqanman jina Jehová Diosman chay sacrificiokunata jaywanankupaq. Israel runakunaqa mayqen familiamantachus kasqankuman jinan t’aqa-t’aqapi kasharqanku. Sacrificiopaq apamusqanku wakakunawanpas chhaynatan ruwallarqankutaq. 13 Costumbrenkuman jinan Pascua Fiestapaq ofrendata ninapi wayk’urqanku.*+ Ch’uya ofrendakunatataq wayk’urqanku mankakunapi, raki jina mankakunapi, sartenkunapi ima. Chaykunatataq usqhaylla runakunaman aparqanku. 14 Chaymantataq Leví runakunaqa Pascua Fiestapaq wayk’urqanku paykunapaqwan sacerdotekunapaqwan. Aaronpa mirayninmanta kaq sacerdotekunaqa tutakaman ruphachina sacrificiokunata wira sacrificiokunatawan jaywarqanku, chaymi Leví runakunaqa paykunapaqwan Aaronpa mirayninmanta kaq sacerdotekunapaqwan wayk’urqanku.

15 Asafpa mirayninmanta+ takiqkunaqa maypichus kanankupin kasharqanku Davidpa,+ Asafpa,+ Emanpa, Jedutunpa+ kamachisqankuman jina. Jedutunqa Diospa rikuchisqantan reyman willaq. Punku qhawaqkunataq sapanka punkupi kasharqanku.+ Leví runakunaqa lliutan paykunapaq alistarqanku chaymi mana llank’anankutaqa saqenankuchu karqan. 16 Chhaynatan chay p’unchay Jehová Diospaq Pascua Fiestata ruwanankupaq lliuta alistayta tukurqanku,+ Jehová Diospa altarninpi ruphachina ofrendakunata jaywanankupaqpas lliutan alistarqanku. Tukuy chaykunatan ruwarqanku rey Josiaspa kamachikusqanman jina.+

17 Jinan Jerusalén llaqtaman jamuq Israel runakunaqa chay p’unchay Pascua Fiestata ruwarqanku, chay qhepamantaq Mana Levadurayoq T’anta Fiestata qanchis p’unchay ruwarqanku.+ 18 Profeta Samuelpa tiemponmantapachaqa Israelpiqa manan jayk’aqpas chhayna Pascua Fiestataqa ruwarqankuchu. Israelpi kamachikuq reykunapas manan jayk’aqpas chhayna Pascua Fiestataqa ruwarqankuchu, imaynan Josiaspas,+ sacerdotekunapas, Leví runakunapas, Judá ayllu runakunapas, chaypi kaq Israel runakunapas, Jerusalén llaqta runakunapas ruwarqanku jinataqa. 19 Chay Pascua Fiestatan ruwarqanku chunka pusaqniyoq wataña rey Josías kamachikushaqtin.

20 Rey Josiasmi tukuy chaykunata ruwarqan, Diospa wasintapas allichaytan tukurqan. Josías tukuy chaykunata ruwasqan qhepamanmi Egipto rey Nekoqa+ maqanakuq risharqan Éufrates mayupi kaq Carquemis llaqtaman. Jinan rey Josiasqa paywan maqanakuq rirqan.+ 21 Chaymi Nekoqa kamachinkunata kacharqan Josiasta kayta nimunankupaq: “Judá ayllu rey, ¿imaraykun jamushanki? Manan noqaqa qanwan maqanakuqchu jamushani, noqaqa Diospa kamachisqanmi juj reykunawan maqanakuq usqhaylla rishani. Diosqa noqawanmi kashan chayrayku ama pay contraqa sayariychu, mana jinaqa paymi wañuchisunki”, nispa. 22 Josiasmi ichaqa mana kasurqanchu, chaymi payqa juj p’achawan churarukuspa+ Nekó contra maqanakuq rirqan. Nekoqa Diospa nisqantan Josiasman willarqan, Josiasmi ichaqa mana uyarirqanchu, jinan payqa Meguidó pampaman rirqan+ Nekowan maqanakuq.

23 Jinan chay maqanakuypi Josiastaqa flechawan flechaqkuna jap’irachirqanku, chaymi Josiasqa kamachinkunata nirqan: “Orqowaychis kaymanta, sinchitan k’iriruwanku”, nispa. 24 Jinan kamachinkunaqa carretanmanta orqospa juj kaq carretanman churarqanku, jinaspa Jerusalén llaqtaman apamurqanku. Chhaynapin Josiasqa wañukapurqan, jinan ñaupa taytankunaq sepulturanpi p’ampapurqanku.+ Judá ayllu runakunapas Jerusalén llaqtapi tiyaq runakunapas llapankun Josiasmanta khuyayta waqarqanku. 25 Jeremiasmi+ Josiaspa wañupusqanmanta juj takita takirqan, chay takitan kunankamapas takiqkunaqa qharikunapas warmikunapas+ takishallanku llaki takikunata takispa. Jinaspapas juj kamachikuytan churarqanku chay takita Israelpi takishanallankupaq, chay takiqa takina libropin qelqasqa kashan.

26 Josiasmanta wakin willakuykunapas, Jehová Diospa kamachikuyninta tukuy sonqowan* kasukusqanpas, 27 wakin ruwasqankunapas llapanmi Israel reykunamanta Judá ayllu reykunamanta willaq libropi qelqasqa kashan.+