Isaías
11 Jesepa k’ullunmantan+ juj k’allmacha ch’ijchimunqa,+
saphinmantan ch’ijchi phutumunqa,+ jinaspa rurunqa.
2 Jehová Diospa espiritunmi* payman chayamunqa,+
chaywanmi allin yachayniyoq, allin reparaq kanqa,+
chaywanmi allin yuyaychaq jinallataq atiyniyoq kanqa,+
chaywanmi allinta imatapas yachanqa;
yachanqan Jehová Diosta manchakuytapas.
3 Payqa Jehová Diosta manchakuspan kusisqa kanqa.+
Manan ñawinpa rikusqanman jinallachu juzganqa,
manataqmi uyarisqanman jinallachu wanachinqa.+
4 Chanin kayman jinan wajchakunata juzganqa,
llamp’u sonqokunaq favorninpin chaninta rimanqa.
Siminmanta lloqsimuq varawanmi kay pachata waqtanqa,+
samaynillanwanmi millay runakunata wañuchinqa.+
5 Chanin kaymi cintura watakunan kanqa,
junt’aq sonqo kaymi chumpin kanqa.+
6 Loboqa* ovejawan kuskan tiyanqa,+
leopardopas* cabrachawan kuskan kumparayanqa;
malta toropas, leonpas, wira animalpas kuskan tiyanqaku;*+
juj erqechallan paykunataqa michinqa.
7 Wakawan china osowanqa kuskan mijunqaku,
uñankupas kuskan kumparayanqaku.
Leonqa toro jinan q’achuta mijunqa.+
8 Ñuñuq wawan cobra mach’aqwaypa t’oqonpi pujllanqa,
juj erqechan picaq mach’aqwaypa t’oqonman makinta jaywaykunqa.
9 Ch’uya orqoypiqa+ manan kanqachu ima mana allinpas ni thuniypas;+
jallp’a pachaqa Jehová Diospa yachayninwanmi junt’a kanqa,
imaynan lamar-qochapas unuwan junt’a kashan chhaynan kanqa.+
10 Chay p’unchaymi Jesepa saphinqa+ llaqtakunapaq señal jina jatarimunqa.+
Nacionkunan paypa yanapayninta maskhanqaku,+
paypa samananqa munay k’ancharishaqmi kanqa.
11 Chay p’unchaymi Jehová Diosqa jujmanta makinta jaywarimunqa, jinaspa puchuq llaqtanta juñumunqa Asiriamanta,+ Egiptomanta,+ Patrosmanta,+ Cusmanta,+ Elammanta,+ Sinarmanta,* Amajmanta, lamar-qochapi kaq islakunamanta ima.+ 12 Paymi nacionkunapaq juj señalta churanqa, jinan ch’eqerisqa Israel runakunata juñumunqa,+ ch’eqerisqa Judá runakunatapas jallp’aq tawantin k’uchunmantan juñumunqa.+
13 Efrainqa manañan envidiakunqachu,+
Judá contra jatariqkunapas chinkachisqan kanqaku.
Efrainqa manañan Judamanta envidiakunqachu,
Judapas manan Efraín contraqa jatarinqañachu.+
14 Inti jaykuy ladopi Filistea qhatakuna contran phawaykunqaku;
iskayninkun inti lloqsimuy ladopi tiyaqkunata ch’utinqaku.
15 Jehová Diosmi Egiptopi wakin lamar-qochata iskayman t’aqanqa,+
makintan Éufrates mayu contra oqarinqa.+
Payqa q’oñi samayninwanmi qanchis mayukunata ch’akichinqa,
chaynintan runakunata chimpachinqa.