Hechos
13 Antioquía llaqtapi kaq iñiq t’aqapin karqan profetakuna yachachiqkuna+ ima, paykunan karqanku: Bernabé, Yana* nisqa Simeón, Cirene llaqtayoq Lucio, Saulo, Manaén ima (Manaenqa kamachikuq Herodeswan kuskan estudiasqa). 2 Paykuna Jehová* Diosta servishaqtinku ayunashaqtinku iman santo espirituqa nirqan: “Bernabeta Saulotawan t’aqapuwaychis,+ paykunatan ajllakuni juj llank’anata ruwanankupaq”,+ nispa. 3 Chaymi paykunaqa ayunarqanku Diosmantapas mañakurqanku, iskayninkuman makinkuta churaykuspataq kacharqanku.
4 Jinan Bernabewan Saulowanqa santo espirituq kallpachasqan kaspa Seleucia llaqtaman uraykurqanku, chaymantataq barcopi Chipre islaman rirqanku. 5 Salamina llaqtaman chayaspataq judiokunaq sinagogankunapi Diospa siminta willayta qallarirqanku. Marcos nisqa Juanpas paykunawanmi kasharqan yanapananpaq.+
6 Islantinta purispankun paykunaqa Pafos llaqtaman chayarqanku, chaypin tuparqanku Bar-Jesús sutiyoq layqa runawan, payqa judío runan karqan, falso profetataqmi karqanpas. 7 Jinaspapas payqa provinciapi kamachikuq yachaysapa Sergio Paulo runapaqmi llank’aq. Chay kamachikuqmi Bernabeta Saulotawan wajachimurqan Diospa siminta maytapuni uyariyta munaspa. 8 Chay layqaqa Elimas sutiyoqmi kallarqantaq (chay sutiqa “layqa” ninantan nin). Paymi paykuna contra sayarispa jark’akusharqan provinciapi kamachikuq iñipunanta. 9 Chaymi Pablo nisqa Sauloqa santo espirituwan junt’a kaspa payta allinta qhawaykurqan, 10 jinaspa nirqan: “¡Yau engañaq, tukuy mana allin kaqta ruwaq runa! Qanqa Saqraq wawanmi kanki,+ tukuy chanin kaqta cheqnikuqmi kanki, ¿jayk’aqkaman Jehová* Diospa chanin ñanninkunata q’ewinki? 11 Jehová* Diosmi kunan castigasunki, ñausayaspaykin juj tiempo intiq k’anchayninta mana rikunkichu”, nispa. Chayta niqtin jinan ñawinqa arphayaspa tutayapurqan, chaymi thampiykachaspa maskharqan pillapas makinmanta pusananpaq. 12 Chayta rikuspan provinciapi kamachikuqqa iñipurqan, payqa ancha admirasqan kasharqan Jehová* Diosmanta yachasqanwan.
13 Chaymantataq Pabloqa puriqmasinkunapiwan Pafos llaqtamanta barcopi ripurqanku, jinaspa Panfiliapi Perga llaqtaman chayarqanku. Chaypin Juanqa+ Pablota Bernabetawan saqerparispa Jerusalenman kutipurqan.+ 14 Paykunan ichaqa Perga llaqtamanta rispa Pisidiapi kaq Antioquía llaqtaman chayarqanku, samana p’unchaypi* sinagogaman+ jaykuspankutaq chaypi tiyaykurqanku. 15 Kamachikuy simita profetakunaq qelqasqantawan leekuqtintaq+ chay sinagogapi umallikunaqa paykunaman willachirqanku: “Wayqeykuna, ima simillapas kallpachawanaykikupaq kaqtinqa, kunan niwayku”, nispa. 16 Jinan Pabloqa sayarirqan, runakunata makinwan ch’inyachispataq nirqan:
“Israel runakuna, Diosta manchakuq juj runakunapas, uyariwaychis. 17 Israel llaqtaq Diosninmi ñaupa taytanchiskunata ajllarqan, paykunatan Egipto llaqtapi forastero kashaqtinku yanaparqan, jinaspa ancha atiywan chay llaqtamanta orqomurqan,+ 18 tawa chunka watata jinataqmi paykunata ch’inneqpi aguantarqan.+ 19 Canaán jallp’api qanchis nacionkunata ñut’uspataq chay jallp’ata ñaupa taytanchiskunaman herencianpaq qopurqan.+ 20 Tukuy chaykunaqa pasarqan tawa pachaj pisqa chunka watapi jinan.
”Chaykuna qhepatataq Diosqa juezkunata paykunapaq churarqan profeta Samuelpa tiemponkama.+ 21 Chaymantapachan ichaqa juj reyta mañakurqanku,+ chaymi Diosqa Benjamín ayllumanta Quispa wawan Saulta reyninkupaq churapurqan+ tawa chunka watapaq. 22 Saulta wijch’uspataq Davidta churarqan reyninku kananpaq,+ paymantan Diosqa nisqa: Jesepa+ wawan Davidtan tarini sonqoypaq jina runata,+ paymi lliu munasqayta ruwanqa, nispa. 23 Paypa mirayninmantan Diosqa prometesqanman jina Israel llaqtapaq juj salvaq runata kachamurqan. Chay salvaqqa Jesusmi.+ 24 Manaraq pay chayamushaqtinqa Juanmi llapa Israel runakunata nisharqan bautizakunankupaq, chhaynapi juchankumanta pesapakusqankuta rikuchinankupaq.+ 25 Ruwananta tukushaspan Juanqa runakunata niq: ¿Pin niwankichistaq qankunari? Noqaqa manan pipichus piensashankichis chay runachu kani. Aswanpas payqa qhepaytan jamushan, manataqmi noqaqa usut’allantapas paskanaypaq jinachu kani,+ nispa.
26 ”Wayqeykuna, Abrahanpa mirayninkuna, Diosta manchakuq juj runakunapas, uyariwaychis. Noqanchisqa uyarinchisñan imaynatachus Dios salvawasun chayta.+ 27 Jerusalenpi tiyaq runakuna umallinkuna iman ichaqa mana reqsirqankuchu pichus chay kasqanta, aswanmi payta juchacharqanku, chhaynapin profetakunaq qelqasqanpi willakuykunata junt’arqanku.+ Profetakunaq qelqasqantaqa sapa samana p’unchaymi leenkupas. 28 Manaña imatapas wañunanpaq jina tarirqankuchu chaypas,+ Pilatotan mat’ipayarqanku wañuchisqa kananpaq.+ 29 Paymanta qelqasqa kaqkunata lliuta ruwaqtinkutaq, payqa k’aspimanta* uraykachisqa karqan, jinaspa sepulturaman churarqanku,+ 30 Diosmi ichaqa kausarichimpurqan,+ 31 jinan payqa askha p’unchaykuna rikuchikurqan Galileamanta Jerusalenman paywan kuska riq runakunaman. Chay runakunan llaqtaman paymanta willashanku.+
32 ”Chaymi noqaykupas willashaykiku ñaupa taytanchiskunaman imachus prometesqa karqan chaykunamanta allin willakuykunata. 33 Noqanchis wawankupaqmi Diosqa chay promesata junt’an Jesusta kausarichimuspa.+ Iskay kaq salmopi qelqasqa kasqanman jinataqmi chayqa karqan, chaypin nin: Qanqa churiymi kanki, kunanmantan taytayki kapuni,+ nispa. 34 Diosqa manaña jayk’aqpas ismuq cuerpoyoq kananpaqmi paytaqa kausarichimpurqan. Chay ruwananmantan payqa nirqan: Noqaqa junt’aq sonqowanmi+ qankunaman qosaykichis Davidman prometesqay mana tukukuq munakuyta,* nispa. 35 Juj salmo qelqapin nillantaq: Manan munankichu tukuy sonqowan serviqniykiq cuerpon ismunantaqa,+ nispa. 36 Davidqa tukuy kausasqan tiempopin Diosta servirqan, wañupuqtintaq* ñaupa taytankunawan churasqa karqan, paypa cuerponqa ismupurqanmi.+ 37 Diospa jatarichisqan Jesuspa cuerponmi ichaqa mana ismurqanchu.+
38 ”Chayrayku, wayqeykuna, yachaychis; paywanmi kan jucha perdonay, chaytan noqaykuqa willashaykiku.+ 39 Moisespa chaskisqan kamachikuy simiwanqa+ manan chaninpaqchu jap’isqa karqankichis, Jesuspa wañusqanraykun ichaqa pipas iñiqtaqa chaninpaq Diosqa qhawarinqa.+ 40 Chhaynaqa allinta qhawarikuychis, chaytaq qankunawan junt’akunman profetakunaq qelqasqan, chaypin nin: 41 Yau pisichaqkuna, chayta qhawarispa admirakuychis, jinaspa wañuychis. Chaytan noqaqa qankunaq tiempoykichispi ruwashani, chaytaqa manapunin creeyta atiwaqchischu sut’itaña pipas willasunkichisman chaypas,+ nispa”.
42 Chaymanta lloqsipushaqtinkun runakunaqa paykunata valekurqanku jamuq samana p’unchaypipas chaykunamanta rimapayanankupaq. 43 Sinagogamanta ch’eqeripushaqtinkun askha judiokuna, judioman tukupuspa Diosta adoraqkuna ima Pablota Bernabetawan qatikurqanku, chaymi paykunaqa rimapayaspanku chay runakunata kallpacharqanku Dios ancha sumaq sonqowan qhawarinanpaq jinallapuni kausanankupaq.+
44 Jamuq samana p’unchayqa yaqa llapa llaqtantinmi juñukurqanku Jehová* Diospa siminta uyarinankupaq. 45 Chhaytukuy runakunata rikuspan judiokunaqa sinchita envidiakurqanku, jinaspan Pabloq rimasqan contrapi millayta rimarqanku.+ 46 Jinan Pablowan Bernabewanqa mana manchakuspa paykunata nirqanku: “Qankunamanmi ñaupaqtaqa Diospa simin willasqa kanan karqan.+ Wijch’uykukushankichistaq chayqa, manan wiñay kausayta chaskinaykichispaq jinachu kankichis. Chayraykun waj nacionmanta runakunaman ripusaqku.+ 47 Jehová* Diospunin kamachiwarqanku: Nacionkunapaq k’anchay kanaykipaqmi churayki, chhaynapi kay pachaq k’uchunkunakamaraq salvacionta apanaykipaq,+ nispa”.
48 Chayta uyarispan waj nacionkunamanta runakunaqa anchata kusirikurqanku, jinaspa Jehová* Diospa siminta jatuncharqanku, wiñay kausayman apaq ñanninta llapa puriy munaqkunataq iñipurqanku. 49 Jehová* Diospa siminmanta willakuyqa lliu llaqtantinmanmi ch’eqerisharqan. 50 Judiokunan ichaqa Diosta manchakuq qhapaq warmikunata llaqtapi respetasqa qharikunatawan jatarichirqanku Pablota Bernabetawan qatikachanankupaq,+ jinan paykunaqa llaqta jawaman wijch’urqanku. 51 Chaymi Pablowan Bernabewanqa chakinkupi jallp’ata paykuna contra chhafchirparispa Iconio llaqtaman ripurqanku.+ 52 Iñiqkunaqa junt’an kasharqanku santo espirituwan, ancha kusisqataqmi kasharqankupas.+