1 Reyes
12 Llapa Israel runakunan Shejen+ llaqtata rirqanku Rehoboamta reyta churanankupaq, chaymi Rehoboamqa chayman rirqan.+ 2 Chaytan Nebajpa churin Jeroboanqa yacharurqan (Jeroboanqa rey Salomonmanta ayqekusqanraykun Egiptollapiraq tiyasharqan).+ 3 Chayllamanmi Jeroboanta wajachimurqanku. Chay qhepamantaq Jeroboanqa llapa Israel runakunapiwan Rehoboampa kasqanman rirqanku, jinaspa nirqanku: 4 “Papaykiqa sinchitan llank’achiwarqanku.+ Sichus papaykiq sinchi llank’achiwasqankuta pisiyachinki chayqa, qantan servisaykiku”, nispa.
5 Jinan Rehoboamqa nirqan: “Kutipuychis, kinsa p’unchaymantaña kutimunkichis”, nispa. Chaymi Israel runakunaqa ripurqanku.+ 6 Chaymantataq rey Rehoboamqa papan Salomonta yuyaychaqnin umalliqkunata* tapurqan: “¿Imaninkichismi? ¿Imanispan Israel runakunata niyman?”, nispa. 7 Chay umalliqkunataq nirqanku: “Sichus paykunata servinki, mañakusqankutapas kasunki, sumaqllatataq kutichinkipas chayqa qanllatapunin servisunkiku”, nispa.
8 Rehoboammi ichaqa chay umalliqkunaq yuyaychasqanta mana kasukurqanchu, aswanmi paywan kuska wiñaq waynamasinkunata tapurqan; chay tiempopaqqa chay waynakunaqa yanapaqninkunan kapurqanku.+ 9 Paykunatan nirqan: “¿Imatan ruwayman? Israel runakunan niwanku: Papaykiq sinchi llank’achiwasqankuta pisiyachiy, nispa. ¿Imanispan nisunman?”, nispa. 10 Jinan paywan kuska wiñaq waynakunaqa nirqanku: “Papaykiq sinchi llank’achiwasqankuta pisiyachiy, nispa niq runakunataqa khaynatan ninki: Uña dedoymi papaypa caderanmantaqa aswan rakhu kanqa. 11 Papayqa sinchitan llank’achirqasunkichis, noqan ichaqa chaymantapas astawanraq llank’achisaykichis. Papayqa jasut’iwanmi soq’arqasunkichis, noqan ichaqa filo puntayoq jasut’iwan soq’asaykichis, nispa”.
12 Jeroboanqa Israel runakunapiwanmi kinsa p’unchaymanta rey Rehoboamwan tupaq rirqanku. Paykunatan Rehoboamqa ñaupaq kutipi riqtinku nirqan: “Kinsa p’unchaymantaña kutimunkichis”,+ nispa. 13 Rey Rehoboammi ichaqa umalliqkunaq yuyaychasqanta mana kasukuspa chay runakunata k’araqta kutichirqan. 14 Jinan Rehoboamqa waynakunaq yuyaychasqanta kasukuspa nirqan: “Papayqa sinchitan llank’achirqasunkichis, noqaqa chaymantapas astawanraqmi llank’achisaykichis. Papayqa jasut’iwanmi soq’arqasunkichis, noqan ichaqa filo puntayoq jasut’iwan soq’asaykichis”, nispa. 15 Chhaynatan rey Rehoboamqa Israel runakunaq nisqanta mana kasurqanchu. Chay pasanantaqa Jehová Diospunin munarqan,+ chhaynapi Nebajpa churin Jeroboanman Jehová Diospa willachisqan junt’akunanpaq, chaytan willachirqan Siló llaqtayoq profeta Aiyawan.+
16 Rey Rehoboam manapuni uyariqtintaq Israel runakunaqa nirqanku: “¡Israel runakuna! Manan imapas Davidwanqa ruwananchis kanchu, manan Jesepa churinmantaqa ima herenciapas chaskinanchis kanchu. Jaku ripusunchis, diosninchiskunaman kutipusun. ¡Davidpa familiankuna, kunanqa qankuna kikiykichis cuidakuychis!”, nispa. Jinan Israel runakunaqa wasinkuman* kutipurqanku.+ 17 Judá ayllupi tiyaq Israel runakunatan ichaqa Rehoboamqa kamachishallarqan.+
18 Chaymantataq rey Rehoboamqa Israel runakunaman Adoranta+ kacharqan, Adoranqa reypaq llank’aqkunaq umallinmi karqan. Israel runakunan ichaqa Adoranta rumiwan ch’aqespa wañuchirqanku. Rey Rehoboamtaq carretanman wichaspa usqhaylla Jerusalenman ayqekurqan.+ 19 Chhaynapin Israel runakunaqa Davidpa familian contra+ kunan p’unchaykama kashanku.
20 Jeroboanpa kutimpusqanta yachaspan llapa Israel runakunaqa juñukurqanku, jinaspa chay juñunakuyman Jeroboanta wajachirqanku, chaymantataq lliu Israelpi reyta churarqanku.+ Davidpa familianmanta runakunataqa Judá ayllu runakunallan yanaparqan, chaymantaqa manan pipas yanaparqanchu.+
21 Rehoboammi Jerusalenman chayaspa usqhaylla juñurqan Judá ayllumanta Benjamín ayllumantawan pachaj pusaq chunka waranqa allin maqanakuq* soldadokunata. Chay soldadokunatan Salomonpa churin Rehoboamqa juñurqan Israel runakunawan maqanakunanpaq, chhaynapi paylla lliuta kamachinanpaq.+ 22 Chay qhepamanmi Diosqa profeta* Semayata nirqan:+ 23 “Salomonpa churin Judá ayllupi kamachikuq Rehoboamta, llapa Judá ayllu runakunata, Benjamín ayllu runakunata, wakin runakunatawan khaynata nimuy: 24 Jehová Diosmi nin: Ama wayqeykichis Israel runakunawanqa maqanakuq riychischu. Sapankaykichis wasiykichisman kutipuychis, noqaq munayniypin kaykunaqa pasashan,+ nispa”. Chaymi paykunaqa Jehová Diospa nisqanta kasukurqanku, jinaspa Jehová Diospa nisqanman jina wasinkuman kutipurqanku.
25 Jeroboanqa Efraín orqo-orqopi kaq Shejen+ llaqtatan jujmanta allicharqan, jinaspa chaypi tiyapurqan. Chaymantataq Penuel+ llaqtaman rispa chay llaqtatapas jujmanta allichallarqantaq. 26 Jeroboanmi sonqonpi yuyaykurqan: “Davidpa familianmanta runapaschá kamachisqay ayllukunataqa lliuta kamachipullanmantaq+ 27 sichus kay runakuna Jehová Diospa wasinpi sacrificiokunata jaywaq Jerusalenta rishallanqaku chayqa.+ Rishallanqaku chayqa sonqonkuchá aysanman Judá rey Rehoboamman kutipunankupaq, chhaynapitaq noqata wañuchiwankuman, jinaspa Judá rey Rehoboamta servipunkuman”, nispa. 28 Yuyaychayta mañakusqan qhepamantaq Jeroboanqa qorimanta iskay torillokunata ruwarqan,+ jinaspa lliu llaqtata nirqan: “Israel runakuna, sasatan Jerusalenmanraq rishankichis. Qhawariychis, kaymi Egiptomanta orqomuqniykichis Diosqa”,+ nispa. 29 Jinan juj qori torillota Betel+ llaqtapi churarqan, juj kaqtataq Dan+ llaqtapi churarqan. 30 Chaykunaraykun Israel runakunaqa juchallikurqanku.+ Runakunaqa Dan llaqtakamaraqmi rirqanku chay qori torillota yupaychaq.
31 Chaymantapas Jeroboanqa yupaychana patakunapin* templokunata ruwarqan, chaymanmi sacerdotekunata churarqan. Chay sacerdotekunaqa manan Leví ayllumantachu karqanku.+ 32 Chay qhepamanpas Jeroboanqa juj fiestatan qallarichirqan, pusaq kaq killapi, chunka pisqayoq p’unchaypi. Chay fiestataqa Judá ayllupi fiestata jinan ruwarqan.+ Betel llaqtapi ruwasqan altarpipas+ qori torillokunapaqmi sacrificiokunata jaywarqan. Jinaspapas sacerdotekunatan churarqan Betel llaqtapi yupaychana patakuna ruwasqanman. 33 Jeroboanqa Betel llaqtapi altar ruwasqanpin ofrendakunata jaywayta qallarirqan, chayqa karqan munasqanman jina ajllasqan pusaq kaq killapin, chunka pisqayoq p’unchaypi. Chhaynatan Jeroboanqa Israel llaqtapaq juj fiestata qallarichirqan, ruwasqan altarman rispataq ofrendakunata jaywarqan sacrificiokunatapas q’osñichirqan.