1 Timoteo
6 Kamachikunaqa tukuy sonqonkuwan patronninkuta respetachunku,+ chhaynapi ama pipas Diospa sutinmanta ni yachachikuyninmantapas mana allinta rimananpaq.+ 2 Iñiq patronniyoqkunapas manan patronninku iñiqmasinku kasqanraykuchu respetota faltananku, aswanmi paykunataqa astawanraq servinanku, chay servisqanku runa munasqa iñiqmasinku kasqanrayku.
Yachachishallay kay yachachikuykunata, kallpachashallaytaq chaykunata ruwanankupaqpas. 3 Pipas yachachinman jujniray yachachikuyta, manataq chay yachachikuyqa Señorninchis Jesucristomanta jamuq allin yachachikuyman jinachu kanman,+ nitaq Dios sonqo kanapaq willaq yachachikuyman jinapaschu kanman chayqa,+ 4 chay runaqa sinchi jatunchakuqmi kashan, manataqmi imatapas entiendenchu.+ Chhayna runakunaqa ima jinallañan munanku ima yachachikuymantapas* churanakuyta tapunakuyta ima.+ Chaykuna jawataq jatarin envidianakuykuna, churanakuykuna, yanqa tumpaykuna,* jujkunamanta mana allin piensaykuna, 5 mana valeq kaqkunamanta discutiykuna ima. Chay discutiykunataqa jatarichinku ismusqa yuyayniyoq,+ cheqaq kaqta manaña entiendeq runakunan, paykunaqa imatapas tarinankuraykullan Dios sonqo kayta munanku.+ 6 Ichaqa Dios sonqopunichus kasunchis, contentotaq imanchiswanpas kasun chayqa, ancha qhapaq kayta tariy jinan chayqa kanqa.+ 7 Yachasqayki jinapas, manan imatapas kay pachamanqa apamurqanchischu, manallataqmi imatapas apasunchu.+ 8 Chayrayku mijunanchispas p’achanchispas* kashaqtinqa, contentoyá chaykunawan kasun.+
9 Qhapaq kaytapuni munaq runakunan ichaqa tentacionman, trampakunaman,+ yanqa mana allin munapayaykunaman ima urmanku, chhaynapitaq ch’usaqyachisqa kayman jaykunku.+ 10 Qolqe sonqo kayqa imaymana mana allinkunaq saphinmi, chaymi wakinqa qolqe sonqo kasqankurayku iñiymanta t’aqakapurqanku, jinaspa imaymana nanaykunawan k’irikurqanku.+
11 Qan ichaqa, Diosta serviq runa, amapuni chaykunataqa maskhankichu, aswanpas kallpachakushallay chanin kanaykipaq, Dios sonqo kanaykipaq, allin iñiq kanaykipaq, munakuq kanaykipaq, aguantaq kanaykipaq, llamp’u sonqo kanaykipaqwan.+ 12 Chaymantapas iñiyrayku allin kaq maqanakuypi maqanakuy, Diospa wajasqasuyki wiñay kausaymanpas qaqata jap’ipakuy, chay kausaymantan riki qanqa askha runakunaq ñaupanpipas allinta willarqanki.
13 Tukuy imata kausachiq Diospa ñaupanpi, iñiymanta Poncio Pilatoman allinta willaq+ Cristo Jesuspa ñaupanpi iman kamachiyki 14 kay kamachikuykunata ch’uyata, mana piqpa juchachananta waqaychanaykipaq, chaytan ruwanki Señorninchis Jesucristo rijurimunankama.+ 15 Arí, chay kusisqa sapallan kamachikuqqa señalasqa tiempopipunin rijurimunqa, paymi reykunaq reyninqa, gobiernaq señorkunaq Señorninpas,+ 16 payllan mana jayk’aq wañuyta atiqqa,+ mana qayllaykuy k’anchaypin tiyanpas,+ paytaqa manan pipas rikurqanchu ni rikuytapas atinmanchu.+ Paypaq kachun jatunchayqa, atiyninpas wiñay-wiñaypaq kachun. Amén.
17 Kay tiempopi* qhapaqkunata niy ama jatunchakuq kanankupaq, chaymantapas ama chay tukukuq qhapaq kaykunapiqa confiachunkuchu,+ aswanpas Diospi confiachunku, paymi tukuy imatapas askhatapuni qowanchis chaykunawan kusisqa kausananchispaq.+ 18 Paykunata nillaytaq allin kaqkunata ruwanankupaq, chay allin kaqkuna ruwaypi qhapaqqa kachunku, chaymantapas qoykukuq kachunku, listotaq kashachunku imankutapas jujkunaman qoykunankupaq.+ 19 Chayta ruwaspaqa qhapaq kaykunatapas juñushankuman jinan kanqaku,+ chhaynapitaq segurakushanqaku qhepa tiempoman cheqaq kausayta chaskinankupaq.+
20 Timoteo, imachus qanman jap’ichisqa karqan chayta allinta cuiday;+ amapunin uyarinkichu Diospa contranpi mana allin yanqa rimaykunataqa, ni allin yachaypas kanman jina cheqaq kaqpa contranpi yanqa rimaykunatapas.+ 21 Chay yachaywan allin yachaqman tukuspankun wakinqa iñiymanta karunchakapurqanku.
Diospa ancha sumaq sonqo kaynin qankunawan kachun.