Lucas

12 Chay kutipin waranqa-waranqanpi askhallaña runakuna juñunakamurqanku, sarunakusharqankuñan kanpas, jinan Jesusqa discipulonkunataraq ñaupaqta nirqan: “Cuidakuychis fariseokunaq levaduranmanta,* chayqa iskay uya kayninkun.+ 2 Manan ima allin tapasqa kaqpas mana rijurichisqaqa kanchu, manallataqmi ima pakasqa kaqpas mana yachakuqqa kanchu.+ 3 Chayrayku, pakallapi ima rimasqaykichispas lliupa uyarisqanmi kanqa, wasi ukhupi ninrillaman ima rimasqaykichispas wasi patakunamantan willasqa kanqa. 4 Amigoykuna,+ qankunatan niykichis: Ama manchakuychischu cuerpo wañuchiqkunataqa, paykunaqa manañan imatawanpas ruwayta atinkumanñachu.+ 5 Noqan nisaykichis pitachus manchakunaykichis chayta: Manchakuychis cuerpota wañuchispapas Gehenaman* wijch’uykunanpaq atiyniyoqta.+ Arí, niykichismi: Payta manchakuychis.+ 6 ¿Manachu pisqa pichinkuta iskay pisi valorniyoq qolqellapaq* vendekun? Chhaynaña kaqtinpas Diosqa manan mayqenninkutapas qonqanchu.+ 7 Qankunaqqa chujchaykichispas llapallanmi yupasqa kashan.+ Chayrayku, ama manchakuychischu, qankunaqa askha pichinkukunamantapas astawanraqmi valenkichis.+

8 ”Noqan nillaykichistaq: Pipas runakunaq ñaupanpi “reqsinin” niwaqniytaqa,+ runaq Churinpas Diospa angelninkunaq ñaupanpin “reqsinin” nillanqataq.+ 9 Runakunaq ñaupanpi negawaqniymi ichaqa Diospa angelninkunaq ñaupanpipas negasqallataq kanqa.+ 10 Pipas runaq Churinpa contranpi rimaqqa perdonasqaraqmi kanqa, pipas santo espirituta* pisichaspa k’amiqmi ichaqa mana perdonasqachu kanqa.+ 11 Jatun juñunakuykunaman,* gobiernoq churasqan runakunaman, autoridadkunamanpas apasunkichis chayqa, aman llakikunkichischu imatachus ni imaynatachus favorniykichispi rimankichis chaymantaqa, nitaq imatachus ninkichis chaymantapas.+ 12 Santo espiritun chay ratupi yachachisunkichis imatachus ninaykichista”,+ nispa.

13 Chayllamanmi runakuna ukhumanta juj runa nimurqan: “Yachachikuq, wayqeyta niykapuway herenciaykuta t’aqanakunaykupaq”, nispa. 14 Jinan Jesusqa chay runata nirqan: “Yau runa, ¿pin noqata churawarqan qankuna ukhupi juezta rakiqtapas?”, nispa. 15 Jinaspa runakunata nirqan: “Makilla kashaychis, amataq imaymanayoq kaypichu piensaychis,+ runaqa askha imayoqña kanman chaypas, manan chay kaqninkunachu kausaytaqa qonqa”,+ nispa. 16 Chaymantataq juj rijch’anachiyta* paykunaman willarqan: “Juj qhapaq runaq chajranmi askhallataña mijuyta qorqan. 17 Jinan payqa sonqollanpi nirqan: Kunanri, ¿imatataq ruwasaq? ¿Maymanñataq cosechaytari waqaychasaq?, nispa. 18 Jinallamanmi nirqan: Kaytayá ruwasaq:+ Taqena wasiykunata* thunispayá aswan jatunkunata ruwarusaq, chaymantaq juñumusaq llapa trigoyta llapa kaqniykunatawan, 19 jinaspa sonqoyta nisaq: Sonqolláy, askha watakunapaqmi imaymanaykikuna waqaychasqa kashan. Kunanqa ama llakikuspalla samakuy, mijukuy, ujakuy, kusikuy ima, nispa. 20 Diosmi ichaqa payta nirqan: Yau mana yuyayniyoq runa, kunan tutan wañunki.* ¿Pipaqtaq kunanri chay taqesqaykikuna kanqa?,+ nispa. 21 Chhaynapin tarikunqa pipas payllapaq qhapaq kayta juñunqa, manataq Diospaqchu qhapaq kanqa chayqa”,+ nispa.

22 Chaymantataq Jesusqa discipulonkunata nirqan: “Chayraykun niykichis: Amaña vidaykichismantaqa llakikuychischu imatachus mijunaykichismanta imawanchus p’achakunaykichismantapas.+ 23 Vidan mijunamantaqa astawan valen, cuerpopas p’achamantaqa astawanmi valen. 24 Qhawariychis cuervokunata,* chaykunaqa manan tarpunkuchu ni cosechankupaschu, manan taqenkupas ni despensankupas kanchu, chaywanpas Diosmi mijuchin.+ ¿Manachu qankunaqa chay animalkunamantapas astawanraq valenkichis?+ 25 ¿Mayqenniykichistaq llakipakusqanwan juj chhikallantawanpas kausayta atinman? 26 Manataq chay ruwayllatapas atiwaqchischu chayqa, ¿imaraykutaq wakin kaqkunamantari llakikuwaqchis?+ 27 Qhawariychis lirio t’ikakunaq wiñasqanta, chay t’ikakunaqa manan llank’ankuchu ni puskankupaschu. Chaywanpas niykichismi: Salomonpas ancha qhapaqña kashaspapas manan chay jujnin t’ika jinallapas p’achakurqanchu.+ 28 Chhaynatan Diosqa campopi plantakunata p’achachin, chaykunan kunan kashan, paqarintaq hornoman wijch’uykusqa kanku, ¿chaychu qankunata mana p’achachisunkichisman, pisi iñiyniyoq runakuna? 29 Chayrayku amaña llakikuychischu imatachus mijunaykichismanta imatachus ujanaykichismantapas, amataq imamantapas nishutaqa llakikuychischu.+ 30 Tukuy chaykunataqa Diosta mana serviq runakunallan* ima jinaraq maskhashanku. Janaq pacha Taytaykichisqa yachanmi tukuy chaykuna necesitasqaykichista.+ 31 Chayrayku, aswanpas paypa gobiernonta maskhaychis,* jinan llapa chaykunaqa qankunaman qosqa kanqa.+

32 ”Ama manchakuychischu, pisi t’aqa ovejakuna,+ qankunamanmi Taytaykichisqa gobiernonta qosunkichis.+ 33 Kaqniykichiskunata vendeychis, jinaspa wajchakunaman qoychis.+ Mana thantakuq ch’uspakunata qolqeykichispaq ruwaychis, arí, mana tukukuq qhapaq kaykunata janaq pachapi juñuychis;+ chaymanqa manan suwapas chayanchu, manallataqmi chaypiqa thutapas kanchu thutananpaq. 34 Maypichus qhapaq kayniykichis kashan, chayllapitaqmi sonqoykichispas kashan.

35 ”P’achasqallaña listo kashaychis,*+ mecheroykichispas* jap’ichisqallaña kashachun,+ 36 casarakuy fiestamanta+ patronninpa kutimunanta suyashaq kamachikuna jinataq kaychispas,+ chhaynapi chayamuspa punkuta takamuqtin jina kichanaykichispaq. 37 Chay kamachikunaqa kusisqan kanku patronnin chayamuspa rijch’ashaqllata tariqtinqa. Cheqaqtan niykichis: Patronqa servinanpaq p’achakuspan* paykunata mesaman tiyachinqa, jinaspa qayllankuman rispa mijunata servinqa. 38 Tutatapas* kuska tuta pasaytapas* chayamuspa chhayna rijch’ashaqllata tariqtinqa kusisqan chay kamachikunaqa kanku. 39 Kayta yachaychis: Wasiyoq runachus yachanman karqan ima horastachus suwa jamunanta chayqa, manachá wasinman jaykuchinmanchu karqan.+ 40 Qankunapas rijch’ashaqlla kashaychis, mana piensasqaykichis horatan runaq Churinqa jamunqa”,+ nispa.

41 Jinan Pedroqa nirqan: “Señor, ¿noqallaykupaqchu chay rijch’anachiyta willashanki, icha llapapaqchu?”, nispa. 42 Chaymi Señorqa nirqan: “¿Pipunitaq kanman allin yuyayniyoq junt’aq mayordomori? Paytan patronninqa churanqa kamachinkunaman necesitasqanku mijunata tiempollanpi qonanpaq.+ 43 Chay kamachiqa maytan kusikun patronnin kutimuspa chhayna ruwashaqta tariqtinqa. 44 Cheqaqtan niykichis: Paytan patronqa llapa kaqninkuna qhawaqta churanqa. 45 Ichaqa chay kamachichus sonqonpi ninman: Patronniyqa jayk’aqraqchá kutimunqa, nispa, jinaspa qhari kamachikunata warmi kamachikunatawan maqayta qallarinman, jinallataq mijunman, ujanman, machanman chayqa,+ 46 patronninmi mana suyasqan p’unchayta mana yachasqan horata jamuspa sinchitapuni castiganqa, mana iñiqkunawan kuskatataq churanqapas. 47 Imachus patronninpa munaynin kasqanta yachashaspa mana alistakuq, mana kasukuq kamachiqa sinchi soq’aykusqan kanqa.+ 48 Mana yachashaspa soq’aykunapaq jina imatapas ruwaq kamachin ichaqa pisi soq’asqalla kanqa. Pimanpas askhata qokunqa chayqa, askhallatataqmi chay runamantaqa mañakunqa; pimanchus askhata jap’ichikunqa chaypas, aswan askhatan chay runamantapas mañakunqa.+

49 ”Noqaqa kay pachapi ninata jap’ichiqmi jamurqani, ñataq jap’ichisqaña kashan chayqa, ¿imatawanñataq munaymanri? 50 Juj bautismowanmi bautizasqa kanay kanqa, ¡may llakisqan kashani chay bautismo junt’akunankama!+ 51 ¿Kay pachaman thaj kausayta apamunaypaqchu piensashankichis? Manan thaj kausayta apamuqchu jamuni, aswanpas t’aqanachiqmi.+ 52 Kunanmantaqa pisqan juj wasipi t’aqanasqa kanqaku, kinsan kanqa iskaypa contranpi, iskaytaq kinsaq contranpi. 53 Taytan jatarinqa churin contra, churitaq taytan contra, mamataq ususin contra, ususitaq maman contra, suegrataq qhachunin contra, qhachuntaq suegran contra”,+ nispa.

54 Jesusqa runakunatapas nillarqantaqmi: “Inti jaykuy ladomanta phuyu lloqsimuqta rikuspaykichismi qankunaqa: Sinchi wayrantinmi paramunqa, ninkichispacha, chhaynapunitaqmi kanpas. 55 Uray ladomanta wayramuqtintaq: Nishutan ruphamunqa, ninkichis, chhaynapunitaqmi kanpas. 56 ¡Iskay uyakuna! Cielota qhawarispan qankunaqa yachankichis imaynachus tiempo kanqa chayta. Chhaynaqa, ¿imaynapitaq manari reparankichischu kay tiempopi imakunachus pasashan chayta?+ 57 ¿Imaraykutaq qankunallamantari mana reparankichischu ima ruwaychus chanin chayta? 58 Piwanpas quejapi kaspa autoridadman rishaspaykiqa, ñanllapiraq kashaspa allichapuy chay quejakuqniyki runawan; mana chayqa juezmanmi aysaykusunkiman, jueztaq juzgana wasipi guardiaman entregasunkiman, guardiataq carcelman wisq’asunkiman.+ 59 Niykin: Manapunin chaymantaqa lloqsimunkichu manuykita llapantapuni paganaykikama”,* nispa.