2 Reyes
16 Rey Jotanpa churin Ajazmi+ Judá ayllupi rey kapurqan Remaliaspa churin Péca chunka qanchisniyoq wataña Israelpi kamachikushaqtin. 2 Ajazqa iskay chunka watanpi kashaspan rey kapurqan, chunka soqtayoq watataqmi Jerusalenmanta kamachikurqan. Payqa manan ñaupa taytan David jinachu Jehová Diosninpa munasqanman jina ruwarqan.+ 3 Aswanpas Israel reykuna jinan mana allinkunata ruwarqan.+ Ajazqa kikin wawantan ninapi ruphachirqan.+ Chhaynatan payqa millakunapaq kaqkunata ruwarqan imaynan Israel runakunaq ñaupanmanta Jehová Diospa qarqosqan nacionkuna ruwaqku jinata.+ 4 Chaymantapas Ajazqa yupaychana patakunapi,+ moqo patakunapi, k’allmasapa sach’a ukhukunapi iman sacrificiokunata juj dioskunaman q’osñichiq.+
5 Chay p’unchaykunapin Siria rey Rezinwan Israel rey Pecawanqa (Pecaqa Remaliaspa churinmi karqan) Judá rey Ajaz contra maqanakuq jamurqanku, jinan Jerusalén llaqtata jap’ikapunankupaq muyuykurqanku,+ ichaqa manan atirqankuchu. 6 Chay tiempopin Siria rey Rezinqa Judá ayllu runakunamanta Elaj+ llaqtata qechurqan, jinaspa Edom runakunaman kutichipurqan, chaypi tiyaq Judá ayllu runakunatapas lliutan qarqopurqan. Chay p’unchaymantapachan Edom runakunaqa kunankama Elaj llaqtapi tiyashanku. 7 Chaymi Ajazqa Asiria rey Tiglaj-Pileserman+ willachimurqan: “Siria reywan Israel reywanmi sinchita ñak’arichishawanku. Jamuy, chay runakunaq makinmanta salvaway. Noqaqa kamachiykin kani, wawaykin kani”, nispa. 8 Jinan Ajazqa Jehová Diospa wasinmanta reypa wasinmantawan* qorita qolqeta juñurqan, jinaspa Asiria reyman regalota jina apachirqan.+ 9 Asiria reytaq Ajazpa valekusqanta uyarispa Damasco llaqtaman rirqan, jinan chay llaqtata atipaspa jap’ikapurqan, chay llaqtapi tiyaq runakunatataq presota Quirman+ apachirqan, Siria rey Rezintataq wañuchipurqan.+
10 Chay qhepamantaq rey Ajazqa Damasco llaqtata rirqan Asiria rey Tiglaj-Pileserta watukuq. Chay llaqtapi kashaspan Ajazqa juj altarta rikurqan, jinan chay altar imayna ruwasqachus kasqanta dibujarqan, chay planotataq sacerdote Uriyaman apachimurqan.+ 11 Jinan sacerdote Uriyaqa+ rey Ajazpa apachimusqan planoman jina juj altarta ruwarqan.+ Chay altartaqa Ajazpa nisqanman jinan Uriyaqa ruwarqan, tukurqantaq manaraq Damasco llaqtamanta Ajaz kutimushaqtin. 12 Damasco llaqtamanta kutimuspataq rey Ajazqa chay altarman qayllaykurqan, jinaspa chay patapi ofrendakunata jaywarqan.+ 13 Chay altarpin Ajazqa jaywashallarqan ruphachina ofrendakunatapas jak’u ofrendakunatapas. Jinaspapas chay altarmanmi vino ofrendakunata jich’aykuq, sumaq kausay sacrificiopaq jaywasqan animalkunaq yawarninwantaq ch’aqchuq. 14 Jehová Diospa cobremanta altarninqa+ Jehová Diospa wasinpa ñaupanpin kasharqan, chay altarpa ñaupanpitaq Ajazpa ruwachisqan mosoq altarqa kasharqan. Jinan Ajazqa Diospa altarninta paypa ruwachisqan altarninpa wichay ladonman suchuchirqan. 15 Chaymantataq rey Ajazqa sacerdote Uriyata+ kamachirqan: “Chay ruwasqayki jatun altar patapi q’osñichiy tutamantan ruphachina ofrendata,+ tardeyaykuy jaywana jak’u ofrendata,+ reypa ruphachina ofrendanta, reypa jak’u ofrendanta, jinallataq llapa runakunaq ruphachina ofrendantapas, jak’u ofrendankutapas, vino ofrendankutapas. Llapa ruphachina ofrendakunaq juj sacrificiokunaq yawarninwantaq altar pataman ch’aqchunki. Cobremanta Diospa altarninqa jinalla chaypi kashachun, noqaña imatapas chaywan ruwasaq”, nispa. 16 Jinan sacerdote Uriyaqa rey Ajazpa kamachisqanman jina lliuta ruwarqan.+
17 Chaymantapas rey Ajazqa unu apana carretakunaq tawantin ladonpi kaq p’alta planchakunatan ñut’uta kuchurqan,+ carretakuna patapi kaq puruñatataq*+ orqopurqan. Cobremanta ruwasqa torokuna patapi kaq Jatun Qocha nisqa puruñatapas*+ urayachipurqanmi, jinaspa rumi pampaman churarqan.+ 18 Chaymantapas Jehová Diospa wasinman jaykunapaq techoyoq karpatan orqopurqan, chay karpaqa samana p’unchaypaqmi ruwasqa karqan. Diospa wasinman reykunaq jaykunan punkutapas wisq’apurqanmi. Tukuy chaykunatan rey Ajazqa ruwarqan Asiria reyta manchakuspa.
19 Ajazpa kausayninmanta wakin willakuykunapas imachus ruwasqankunapas Judá ayllu reykunamanta willaq libropin qelqasqa kashan.+ 20 Chaymantataq Ajazqa ñaupa taytankuna jina wañukapurqan, jinaspa ñaupa taytankunatawan kuskata Davidpa Llaqtan nisqapi p’ampapurqanku. Chay qhepamantaq churin Ezequías*+ rey kapurqan.