Job
21 Jobtaq khaynata nirqan:
2 “Makilla uyariwaychis imachus rimasqayta,
uyarispallapas kallpachawaychis.
3 Ch’inlla kaychis, rimasqayta uyariwaychis,
rimayta tukuqtiyña munaspaqa asipayawankichis.+
4 Noqari, ¿runa contrachu rimashani?
¿Imaraykutaq mana pacienciayoqri kayman?
5 Jinalla admirasqa qhawamuwaychis,
simiykichista makiykichiswan tapakuspa qhawamuwaychis.
6 Kaykunapi piensaspaqa noqapas admirakunin,
cuerpoyraqmi manchakuymanta khatatatan.*
7 ¿Imaraykun millay runakuna kausashallanku?+
¿Imaraykun machuyapunankukama kausashallanku?
¿Imaraykun qhapaqyashallanku?+
8 Wawankunapas paykunawan kuskallan kashan,
qhepa mirayninkutapas paykunaqa rikunkuraqmi.
9 Wasinkupiqa thajmi tiyanku,
manan imamantapas manchakunkuchu,+
Diospas manan paykunataqa castiganchu.
10 Toronkunapas allin chichuyachiqkunan kanku,
wakankunapas mana sulluspan wachashallanku.
11 Erqenkunapas askha oveja jinaraqmi phawakachanku,
wawankunapas salta-saltarisparaqmi purinku.
12 Paykunaqa tamborpa tocasqanman jina, arpaq tocasqanman jinan takinku,
13 Paykunaqa sapa p’unchaypas kusisqallan kausanku,
wañuspapas thajmi Sepulturaman* jaykupunku.
14 Diostan ninku: ¡Ama rimapayawaykuchu!
Manan ñanniykikunataqa reqsiyta munaykuchu.+
15 ¿Pitaq tukuy atiyniyoq Diosri payta servinaykupaq?+
Reqsiykumanña chaypas, ¿iman noqaykupaq kanqa?,+ nispa.
16 Ichaqa manan paykunallamantaqa allillan kayta atinkumanchu.+
(Noqaqa manapunin millay runakuna jinaqa yuyaykunichu).+
17 ¿Jayk’a kutitan millay runakunaq k’anchaynin wañun?+
¿Jayk’a kutitan paykuna llakikuykunapi tarikunku?
¿Jayk’a kutitan Diospas phiñakuspa paykunata ch’usaqman tukuchin?
18 ¿Jayk’aqmi paykuna tarikurqanku wayraq apakachasqan ñut’u paja jina?
¿Jayk’aqmi karqanku wayraq apakachasqan q’opa jina?
19 Juj runaq castigontaqa wawankunapaqmi Diosqa waqaychan.
Ichaqa paytapas Diosqa castigachunyá chhaynapi yachananpaq.+
20 Ñawinpuni rikuchun juchanrayku ñak’arisqanta,
pay kikinpuni chaskichun tukuy atiyniyoqpa phiñakuyninta.+
21 P’unchayninkuna tukupuqtinqa,+
manan reparanqachu wasinpi kaqkunawan imachus pasasqanta.
22 Diosqa atiyniyoqmi jatun autoridadkunatapas juzgananpaq,+
¿pin payta imatapas yachachiyta atinman?+
24 Payqa wirallañan wañupun,
tullunkunapas ch’ilaraq kashaqtinmi ripun.
25 Juj kaq runan ichaqa sinchi llakisqa wañupun,
payqa manan jayk’aqpas ima allintapas malliykurqanchu.
27 Noqaqa allintan yachani imachus piensasqaykichista,
allintan yachani imatachus contraypi ruwayta munashankichis chayta.+
28 Qankunan nishankichis: ¿Maypitaq kashan allin respetasqa runaq wasinri?
¿Maypitaq kashan millay runaq tiyasqan karpari?,+ nispa.
29 ¿Manachu tapurikurqankichis ñan puriq runakunata?
¿Manachu uyarirqankichis paykunaq willasqankuta?
30 Millay runakunaqa sasachakuy chayamuqtinqa perdonasqas kapunku,
Diospa phiñakuynin chayamuqtinpas pakaykusqas kanku.
31 ¿Pin millay runata imatapas ninqa?
¿Pin mana allin ruwasqanmanta castiganqa?
32 Panteonman apaqtinkuqa,
p’ampasqanku cheqastapas cuidanqakun.
33 Jallp’aq sonqonpi kumparayayqa sumaqmi paypaqqa kanqa.+
Paypa ñaupantaqa askha runakunan rirqanku,
paypa qhepantapas runakunaqa rillanqakun.+
34 Chhaynaqa, ¿imapaqmi yanqa rimapayawankichis?+
¡Tukuy ima rimasqaykichispas yanqan!”, nispa.