Zacarías
6 Jujmantan rijuriypi rikullarqanitaq iskay orqokunaq chaupinmanta tawa carretakuna lloqsimushaqta, chay orqokunaqa cobremantan kasqa. 2 Ñaupaq kaq carretatan puka caballokuna aysamushasqa, iskay kaq carretatataq yana caballokuna aysamushasqa.+ 3 Kinsa kaq carretatataq yuraq caballokuna aysamushasqa, tawa kaq carretatataq ch’eqchi caballokuna muru* caballokunapiwan+ aysamushasqa.
4 Chaymi noqawan rimashaq angelta tapurqani: “Wiraqocháy, ¿imataq kay rikusqaykunari?”, nispa.
5 Angeltaq niwarqan: “Paykunaqa janaq pachamanta tawantin espiritukunan kanku,+ lliu kay pachaq Señorninpa+ ñaupanmantan lloqsimunku. 6 Yana caballokunaq aysasqan carretaqa wichay lado jallp’amanmi rishan,+ yuraq caballokunaq aysasqan carretataq lamar-qochaq jaqay ladonmanraq rishan, ch’eqchi caballokunaq aysasqan carretataq uray lado jallp’aman rishan. 7 Muru caballokunataq pachantinman phawariytaña munashanku”, nispa. Jinaspan nirqan: “Pachantinta qhawamuychis”, nispa. Jinan pachantinta qhawamurqanku.
8 Chaymantan angelqa wajamuwaspa niwarqan: “Wichay lado jallp’aman riq caballokunaqa chay jallp’a contra Jehová Diospa phiñakuynintan* thasnunku”, nispa.
9 Jehová Diosmi niwallarqantaq: 10 “Babiloniaman preso apasqa kasqankumanta kutimpuq Heldaimanta, Tobiyamanta, Jedayamantawan imachus apamusqankuta mañakunki, chay p’unchayllataqmi paykunawan kuska rinki Sofoniaspa churin Josiaspa wasinta. 11 Qolqemanta qorimantawanmi juj coronata ruwanki, jinaspan Jehozadacpa churin uma sacerdote Josueman+ churanki. 12 Jinaspan ninki:
”Ejercitokunata kamachiq Jehová Diosmi nin: Kaypin kashan Ch’ijchi sutiyoq runa,+ maypichus kasqanmantan ch’ijchimunqa, jinaspan Jehová Diospa wasinta jatarichinqa.+ 13 Paymi Jehová Diospa wasinta jatarichinqa, jatunchasqan kanqa. Trononpi tiyaykuspan kamachikunqa, trononpin sacerdote kallanqataq,+ iskaynintapas allinta ruwasqanwanmi thaj kay kanqa.* 14 Coronaqa Jehová Diospa wasinpin qhepanqa, chayqa Helenta, Tobiyata, Jedayata,+ Sofoniaspa churin Jentawan yuyarinapaqmi kanqa. 15 Karumantan Jehová Diospa wasinta ruwaysikuqqa jamunqaku, nispa. Chaypin qankunaqa yachankichis ejercitokunata kamachiq Jehová Dios qankunaman kachamuwasqanta. Sichus Jehová Diosniykichispa siminta uyarikunkichis chayqa tukuy chaykunan junt’akunqa, nispa”.