Ezequiel
24 Isqon watapi, chunka kaq killapi, chunka kaq p’unchaypin, Jehová Diosqa jujmanta rimapayamuwarqan. Paymi niwarqan: 2 “Runaq churin, ima p’unchaychus kay p’unchay chayta qelqay. Kay p’unchaymi Babilonia reyqa Jerusalén contra jatariyta qallarishan.+ 3 Mana kasukuq k’ullu runakunaman kay rijch’anachiyta willamuy. Paykunatan ninki:
Tukuy munayniyoq Señor Jehová Diosmi khaynata nin:
Jatun mankata ninaman churaykuy, jinaspa unuta jich’aykuy.+
4 Chay mankaman aychakunata churay,+ allinkaq aychakunata churay.
Chakanta wasapatan aychata ima churay,
allin kaq tullukunata ajllay, chaykunatawan churay.
5 Allin kaq ovejakunata ajllamuy;+
chay mankaq uranman llant’ata churay,
chaypi aychata tullukunatapas allinta t’impuchiy, nispa.
6 ”Tukuy munayniyoq Señor Jehová Diosmi nin:
¡Imaraqmi kanqa yawar jich’aq llaqtamanta,+ sarroyasqa mankamanta, mana jayk’aq maqchisqa mankamanta!
Chay aychakunata orqomuy, ama ajllaspa orqomuy, ch’ulla-ch’ullamanta orqomuy.+
7 Kay llaqtaq yawar jich’asqanqa chayllapiraqmi kashan,+ qaqa patapin jich’asqa kashan.
Manan jallp’amanchu jich’asqa karqan, chhaynapi p’ampasqa kananpaq.+
8 K’araq phiñakuyniyta rijch’arichinaypaqmi chay yawartaqa qaqa patapi saqerqani,
castigoyta chayachimunaypaqmi k’anchashaq qaqa patapi churarqani,
mana pakasqa kananpaqmi chayman saqerqani,+ nispa.
9 ”Tukuy munayniyoq Señor Jehová Diosmi nillantaq:
¡Imaraqmi kanqa yawar jich’aq llaqtamanta!+
Askhatan llant’ata tauqasaq.
10 Llant’ata tauqaspa ninata jap’ichiy.
Aychata allinta chayachiy, caldonta ch’umay, tullukunapas ruphasqa kachun.
11 Sansa pataman ch’usaq mankata churay,
puka kanankama parinanpaq churay.
Qhellinkuna unuyapuchun,+ sarroyasqanpas chinkapuchun.
12 Uma nanaymi kayqa,
sarroyasqanqa sinchipunin, manan imawanpas lloqsinchu.+
¡Chay sarroyasqa mankata ninaman churay!, nispa.
13 ”Sinchi millayta kausasqaykiraykun qhelli kasharqanki.+ Maytan ch’uyancharqayki ichaqa qhellillan kasharqanki. Qan contra k’araq phiñakuyniy tiyaykullaqtinmi ch’uyanchasqaqa kanki.+ 14 Noqa Jehová Diosmi kaykunata rimashani. Rimasqayqa junt’akunqapunin, mana qhepaman kutirispan kaykunata ruwasaq.+ Imaynachus kausasqaykiman jinan, imachus ruwasqaykiman jinan juzgasqa kanki, ninmi tukuy munayniyoq Señor Jehová Dios”, nispa.
15 Jujmantan Jehová Diosqa rimapayamuwarqan, paymi niwarqan: 16 “Runaq churin, munakusqayki warmitan qechupusayki, qonqayllan chinkachisaq.+ Aman paymantaqa llakikunkichu,* aman waqankipaschu. 17 Pakallapin llakisqa purinki, aman pipas wañupuqtin ruwasqankuta jinaqa ruwankichu.+ Aswanmi uma k’uyunaykita+ usut’aykitapas churakunki.+ Aman simiykitapas tapakunkichu,+ amallataqmi jujkunaq apamusqan t’antatapas mijunkichu”,+ nispa.
18 Tutamantanmi llaqta runakunata rimapayarqani, tardeyaykuytataq esposayqa wañupurqan. Qhepantin p’unchayqa kamachisqa kasqayman jinan ruwarqani. 19 Jinan llaqta runakunaqa tapuwarqanku: “¿Manachu willawankiku imaniytachus munashawankiku chayta?”, nispa. 20 Noqataq nirqani: “Jehová Diosmi rimapayamuwan, paymi nimuwan: 21 Israel runakunata niy: Tukuy munayniyoq Señor Jehová Diosmi nin: Ch’uya wasiytan qhellichasaq;+ jatunchakusqaykichis wasitan, munakusqaykichis wasitan, sonqoykichispa munapayasqan wasitan qhellichasaq. Saqesqaykichis churiykichiskuna ususiykichiskuna iman espadawan wañuchisqa kanqaku.+ 22 Jinan qankunaqa noqaq ruwasqayta jina ruwankichis. Manan simiykichista tapakunkichischu, manan apamusqanku t’antatapas mijunkichischu.+ 23 Uma k’uyunaykichistapas usut’aykichistapas manan ch’utikunkichischu. Manan llakikunkichischu, manan waqankichischu. Aswanmi qankunaqa ukhullaykichispi pesapakunkichis,+ juchaykichispin ismunkichis. 24 Ezequielpa imachus ruwasqanmi juj señal jina qankunapaq kashan.+ Imaynatachus pay ruwarqan chhaynatan qankunapas ruwankichis. Llapa chaykuna pasaqtinmi qankunaqa yachankichis noqa tukuy munayniyoq Señor Jehová Dios kasqayta, nispa”.
25 “Runaq churin, paykunamanta allin perqasqa wasinkuta qechusqay p’unchaymi, kusikunanku munay wasinkuta, munakusqanku wasinkuta, sonqonkuq munapayasqan wasinkuta chinkachisqay p’unchaymi, churinkutapas ususinkutapas apapusqay p’unchaymi,+ 26 juj ayqekuq willakuyta chayachimusunki.+ 27 Chay p’unchaymi simiyki kicharikunqa, jinaspa chay ayqekamuqwan rimanki, manañan upallachu chaypi kanki.+ Paykunapaqmi juj señal jina kanki, chhaynapin paykunaqa yachanqaku noqa Jehová Dios kasqayta”.