LEVÍTICO

1 Jehová Diosmi Moisesta wajaspa tupana karpamantapacha+ nimurqan: 2 “Israel runakunata nimuy: Pipas uywanta Jehová Diosman ofrendapi jaywayta munan chayqa, jaywanmanmi wakatapas, ovejatapas, cabratapas.+

3 ”Wakakunamanta jujta jaywanqa chayqa mana imanasqa qhali torotan+ jaywanqa. Chaymantapas pay kikillanmantan+ chaytaqa jaywanqa. Chay torotan Jehová Diospa ñaupanman, tupana karpa jaykunaq ñaupanman apaykunqaku. 4 Chay uywaq umanmanmi ofrenda jaywaqqa makinta churaykunqa, chhaynapin Diosqa chay ofrendata chaskinqa juchantapas perdonapunqa.

5 ”Chay malta torotan Jehová Diospa ñaupanpi ñak’anqaku. Chaymantataq Aaronpa churin sacerdotekunaqa+ chay yawarta Diosman jaywanqaku, jinaspa chaywan ch’aqchunqaku tupana karpaq ñaupanpi kaq altar muyuriqta.+ 6 Chaymantapas qaranta ch’utispan chay aychata askhaman kuchunqaku.+ 7 Aaronpa churin sacerdotekunan altarman ninata churanqaku,+ chay patamantaq llant’ata churanqaku. 8 Chaymantataq Aaronpa churin sacerdotekunaqa chay kuchusqa aycha ofrendata+ umantinta wirantinta* altarpi raurashaq llant’a pataman churanqaku. 9 Ch’unchulninkunatapas patasnintapas, maqchispan sacerdoteqa altar patapi ruphachinqa q’osñinanpaq. Chayqa ruphachina ofrendan, ninapi kanasqa ofrenda; sumaq q’apaymi Jehová Diospaqpas.+

10 ”Pipas ovejanmanta+ cabranmantapas ruphachina ofrendata jaywanqa chayqa, anejotan jaywanqa, ichaqa qhali uywan kanqa.+ 11 Chay uywataqa Jehová Diospa ñaupanpin ñak’anqaku, altarpa wichay ladonpi. Aaronpa churin sacerdotekunan chay uywaq yawarninwan altar muyuriqta ch’aqchunqaku.+ 12 Chaymantataq chay aychaqa askhaman kuchusqa kanqa, chaytan sacerdoteqa umantinta wirantinta altarpi raurashaq llant’a pataman churanqa. 13 Ch’unchulninkunatapas patasnintapas maqchispan sacerdoteqa llapanta jaywanqa, jinaspa altar patapi ruphachinqa q’osñinanpaq. Chayqa ruphachina ofrendan, ninapi kanasqa ofrenda; sumaq q’apaymi Jehová Diospaqpas.

14 ”Pipas Jehová Diosman phalaq animalta jaywanqa chayqa, kukuli urpita otaq malqo* palomatan jaywanqa.+ 15 Chaytan sacerdoteqa altarman apamunqa, umanta p’itispataq* altarpa ladonman yawarninta sut’uchinqa jinaspa altarpi ruphachinqa. 16 Orqonqan q’otuntapas,* pelanqan phuruntapas, chaykunatataq altarpa inti lloqsimuy ladonman wijch’unqa, maypichus altar uspha kashan chayman.+ 17 Chaymantataq iskaynin rafranta kichanqa, ichaqa aman iskaymanqa partenqachu. Chaytan sacerdoteqa altar patapi ruphachinqa, raurashaq llant’a patapi. Chayqa ruphachina ofrendan, ninapi kanasqa ofrenda; sumaq q’apaymi Jehová Diospaqpas.

2 ”Pipas jak’u ofrendata+ Jehová Diosman jaywayta munan chayqa, allin jak’utan* jaywanqa. Chay jak’umanmi aceiteta jich’aykunqa, chay patamantaq yuraq inciensota* churaykunqa.+ 2 Chaytataq Aaronpa wawan sacerdotekunaman apamunqa, sacerdotetaq aceitewan tupachisqa jak’umanta juj jaft’ayta* oqarinqa, oqarinqan llapa yuraq inciensotapas. Chaytan altarpi q’apachinqa llapa ofrendaq rantinpi.+ Chay ofrendaqa ninapi kanasqa ofrendan, Jehová Diospaq sumaq q’apaq ofrenda. 3 Chay ofrendamanta puchuq jak’uqa Aaronpaq wawankunapaqwanmi+ kanqa. Chay puchuq jak’uqa ancha ch’uyan,+ Jehová Diosman jaywasqa ruphachisqa ofrendakunamanta puchuq kasqanrayku.

4 ”Chay jak’u ofrendaykitachus hornopi ruwasqata jaywanki chayqa, mana levadurayoq allin jak’umanta ruwasqa t’antan kanqa, aceitewan tupachisqataqmi kanqapas. Chay t’antaqa rosquillakuna jinan kanqa, kallanmantaqmi aceitewan jich’aykusqa llaflla* t’antapas.+

5 ”Sartenpi chayasqatachus jak’u ofrendaykita jaywanki chayqa,+ mana levadurayoq allin jak’umantan kanqa, aceitewan tupachisqataqmi kanqapas. 6 Chay ruwasqaykitaqa askhamanmi p’akinki, chay patamantaq aceiteta jich’aykunki.+ Chayqa Diospaq jak’u ofrendan.

7 ”Mankapi chayasqatachus jak’u ofrendaykita jaywanki chayqa, allin jak’umanta ruwasqan chay ofrendaqa kanqa, aceitewan tupachisqataqmi kanqapas. 8 Chay jak’u ofrendakunatan Jehová Diosman apamunki, chaytan sacerdoteman qonki, paytaq altarman chayta apanqa. 9 Chay ofrendatan sacerdoteqa juj chhikanta oqarinqa, jinaspa llapa ofrendaq rantinpi altar patapi q’osñichinqa.+ Chay ofrendaqa ninapi kanasqa ofrendan, Jehová Diospaq sumaq q’apaq ofrenda.+ 10 Chay ofrendamanta puchuq jak’u ofrendaqa Aaronpaq wawankunapaqwanmi kanqa. Chaymantapas chay puchuq jak’uqa ancha ch’uyan, Jehová Diosman jaywasqa ruphachisqa ofrendakunamanta puchuq kasqanrayku.+

11 ”Amapunin Jehová Diosman jaywasqayki jak’u ofrendamanqa levadurata churankichu.+ Aman imatapas levadurayoqtaqa ni mielniyoqtapas* Jehová Diospaqqa ruphachinkichu.

12 ”Chaykunataqa jaywawaqchismi Jehová Diosman, ñaupaq oqariy cosecha ofrendata jina.+ Ichaqa amapunin jaywankichischu sumaq q’apaq ruphachina ofrendata jinaqa.

13 ”Jak’u ofrendaykikunataqa kachiwan kachichasqatan jaywanki. Amapunin mana kachiyoqtaqa jaywankichu, chay kachin yuyarichisunki Dioswan rimanakusqaykita. Imatapas jaywaspaqa kachiyoqtapunin jaywanki.+

14 ”Jehová Diosniykiman ñaupaq cosecha oqariy ofrendata jaywayta munanki chayqa, chayraq poqosqa* cosecha oqarisqaykitan jaywanki. Chaytan jank’anki jinaspa chhanqallata* kutanki. Chaymi kanqa ñaupaq cosecha oqarisqayki ofrenda.+ 15 Chay kutasqaykimanmi aceiteta jich’aykunki, chay patamantaq yuraq inciensota churanki. Chayqa jak’u ofrendan kanqa. 16 Chay aceiteyoq chhanqa jak’utan sacerdoteqa llapa ofrendaq rantinpi juj chhikanta oqarinqa,+ jinaspa llapa inciensontinta altarpi q’osñichinqa. Chay ofrendaqa Jehová Diospaq ninawan ruphachisqa ofrendan kanqa.

3 ”Pipas sumaq kausay sacrificiota jaywanqa chayqa,+ wakata jaywaspaqa orqoña chinaña kaqtinpas, qhali animaltan Jehová Diospa ñaupanman apamunqa. 2 Chay uywaq umanmanmi ofrenda jaywaqqa makinta churaykunqa, jinaspa tupana karpaman jaykunapi ñak’anqa. Aaronpa wawan sacerdotekunataq yawarninta altar muyuriqman ch’aqchunqaku. 3 Chay sumaq kausay sacrificiota jaywasqanmantan wakin partenta Jehová Diospaq ruphachinqa.+ Chaypaqmi orqonqa llapa wijsa llika wiranta,+ ch’unchulnin wirakunata, 4 wasa rurunta llapa wirankunatawan. Wasa rurunwan kuskatan orqollanqataq higadon* wirakunatapas.+ 5 Chaykunatan Aaronpa churinkunaqa altarpi ruphachinqaku, chaytan churanqaku raurashaq llant’a patapi kaq ruphachina ofrenda pataman.+ Chay ofrendaqa ninapi kanasqa ofrendan, Jehová Diospaq sumaq q’apaq ofrenda.+

6 ”Pipas sumaq kausay sacrificiopaq ovejatapas cabratapas jaywanqa chayqa, orqoña chinaña kaqtinpas qhali uywatan Jehová Diosmanqa jaywanqa.+ 7 Malta carnero kaqtinqa Jehová Diospa ñaupanmanmi apamunqa. 8 Chay uywaq umanmanmi ofrenda jaywaqqa makinta churaykunqa, jinaspa tupana karpa punkupi ñak’anqa. Aaronpa wawan sacerdotekunataq yawarninta altar muyuriqman ch’aqchunqaku. 9 Chay sumaq kausay sacrificio jaywasqanpa wirantaqa Jehová Diospaqmi ruphachipunqa.+ Chaypaqmi k’uchumantapacha wit’unqa wirasapa chupanta; orqonqan llapa wijsan llika wiratapas, ch’unchulnin wirakunatapas. 10 Orqollanqataqmi wasa ruruntapas llapa wirakunantinta, chay wasa ruruwan kuskatan orqonqa higadon wirakunatapas.+ 11 Chaytan sacerdoteqa altarpi ruphachinqa, chayqa ninapi kanasqa ofrendan, Jehová Diospaq t’aqasqa mijuna.+

12 ”Cabrata jaywanqa chaypas Jehová Diospa ñaupanmanmi apamunqa. 13 Chay cabraq umanmanmi ofrenda jaywaqqa makinta churaykunqa, chaymantataq chay cabraqa tupana karpaq ñaupanpi ñak’asqa kanqa. Yawarnintataq Aaronpa wawankuna altar muyuriqman ch’aqchunqaku. 14 Chay ofrendamantan Jehová Diospaq ruphachinqa llapan wijsa llika wirata, ch’unchulnin wirata,+ 15 wasa rurunta llapa wirankunatawan. Chay wasa ruruwan kuskatan orqonqa higadon wirakunatapas. 16 Chaytan sacerdoteqa altarpi ruphachinqa. Chayqa Diospaq t’aqasqa mijunan, ninapi kanasqa sumaq q’apaq ofrenda. Llapa wirapas Jehová Diospaqmi kanqa.+

17 ”Chay kamachikuytaqa llapa mirayniykichis runakunan kasukunqaku, maypiña tiyankichis chaypas chayman jinan kausanqaku. Amapunin jayk’aqpas mijunkichischu wiratapas ni yawartapas,+ nispa”.

4 Jehová Diosmi Moisesta nillarqantaq: 2 “Israel runakunata niy: Pipas mana piensaylla+ Jehová Diospa ima prohibisqantapas ruwanqa chayqa, khaynatan ruwankichis:

3 ”Uma* sacerdotechus+ juchallikuspa+ llaqtata juchayoqman tukuchinman chayqa, Jehová Diosmanmi mana imanasqa malta torota apamunqa juchanmanta ofrendapaq, chaymi jucha pampachay ofrenda kanqa.+ 4 Chay torotan Jehová Diospa ñaupanman, tupana karpa punkuman apamunqa,+ chay toroq umanmanmi makinta churaykunqa jinaspa Jehová Diospa ñaupanpi ñak’anqa.+ 5 Yawarnintataq uma sacerdoteqa+ juj chhikanta tupana karpa ukhuman apaykunqa, 6 chay yawarmanmi payqa dedonta challpuykunqa,+ jinaspa Jehová Diospa ñaupanpi, cortinaq ñaupanpi qanchis kutita ch’allanqa.+ 7 Chay yawarllawantaqmi sacerdoteqa Jehová Diospa ñaupanpi kaq incienso q’apachina altarpa waqrankunatapas llusiykunqa.+ Wakin yawartataq tupana karpa punkupi kaq ofrenda ruphachina altarpa chakinman jich’anqa.+

8 ”Chaymantataq jucha pampachay ofrendapaq ñak’asqa toroq llapa wiranta orqonqa. Orqonqan wijsa llika wiranta, ch’unchulnin wirakunata, 9 wasa rurunta llapa wirantawan. Wasa rurunwan kuskatan orqollanqataq higadon* wiratapas.+ 10 Imakunatachus sumaq kausay sacrificiopaq toromanta orqon, chaykunatan payqa jucha pampachay ofrendapaq toromantapas orqonqa.+ Chaymantataq sacerdoteqa chay orqosqanta ofrenda ruphachina altarpi ruphachinqa.

11 ”Chay toroq qaranta, aychanta, umanta, patasninkunata, ch’unchulninkunata, phusnunta+ iman ichaqa 12 karpa-karpa jawaman apachinqa, maymanchus usphata jich’anku chayman. Chaypin sacerdoteqa llapanta llant’awan ruphachipunqa.+ Maymanchus usphata jich’anku chaypin kanasqa kanqa.

13 ”Llapa Israel runakunachus Jehová Diospa prohibisqanmanta mayqentapas mana piensaylla ruwankuman, chhaynapitaq juchayoq kapunkuman, manataq mayqenninkupas reparankumanchu jucha ruwasqankuta,+ 14 chaymantataq ichaqa yachakunman jucha ruwasqankuta chayqa, juj malta torotan jucha pampachay ofrendapaq apamunqaku, chaytan tupana karpaq ñaupanman apaykunqaku. 15 Chaypin llaqta umalliqkunaqa* Jehová Diospa ñaupanpi toroq umanman makinkuta churaykunqaku, jinaspa Jehová Diospa ñaupanpi ñak’apunqaku.

16 ”Uma sacerdotetaq chay toroq yawarninta juj chhikanta tupana karpa ukhuman apaykunqa. 17 Chay yawarmanmi payqa dedonta challpuykunqa, jinaspa Jehová Diospa ñaupanpi, cortinaq ñaupanpi qanchis kutita ch’allanqa.+ 18 Chaymantataq Jehová Diospa ñaupanpi kaq, tupana karpa ukhupi kaq altarpa+ waqrankunata juj chhikan yawarwan llusiykunqa. Wakin yawartataq tupana karpa punkupi kaq ofrenda ruphachina altarpa chakinman jich’anqa.+ 19 Chay toroq llapa wirantan orqopunqa jinaspa altar pataman churanqa q’osñinanpaq.+ 20 Jucha pampachay ofrendapaq juj kaq torowan ruwasqanta jinan chay torowanpas ruwallanqataq. Chhaynatan sacerdoteqa ofrendata jaywanqa llaqta runakunaq juchan pichasqa kananpaq,+ chhaynapin paykunaqa perdonasqa kanqaku. 21 Chaymantataq sacerdoteqa toroq aychanta tukuy imantawan karpa-karpa jawaman apachinqa, jinaspa juj kaq torota jina ruphachipunqa.+ Chaymi kanqa llapa runakunapaq jucha pampachay ofrenda.+

22 ”Llaqta umalli runachus+ Jehová Diospa prohibisqanmanta mayqentapas mana piensaylla ruwanman, chhaynapitaq juchayoq kapunman, 23 chaymantataq jucha ruwasqanmanta cuentata qokunman chayqa, mana imanasqa malta cabratan ofrendapaq apamunqa, orqon chay cabraqa kanqa. 24 Chay cabraq umanmanmi makinta churaykunqa, jinaspa Jehová Diospa ñaupanpi chay cabrata ñak’anqa, maypichus ruphachina ofrendapaq uywakunata ñak’anku chaypi.+ Chaymi kanqa jucha pampachay ofrenda. 25 Sacerdotetaq chay cabraq yawarninman dedonta challpuykunqa, chaywanmi ofrenda ruphachina altarpa waqrankunata llusiykunqa.+ Wakin yawartataq ofrenda ruphachina altarpa chakinman jich’anqa.+ 26 Llapa wirantataq altar patapi ruphachinqa, imaynan sumaq kausay sacrificiopaq uywaq wiranwan ruwan chhaynata.+ Chhaynatan sacerdoteqa ruwanqa chay runaq juchan pichasqa kananpaq, chhaynapin chay runaq juchanqa perdonasqa kanqa.

27 ”Llaqtapi pi runapas Jehová Diospa prohibisqanmanta mayqentapas mana piensaylla ruwanman, chhaynapitaq juchayoq kapunman,+ 28 chaymantataq jucha ruwasqanmanta cuentata qokunman chayqa, mana imanasqa malta china cabratan jucha pampachay ofrendapaq apamunqa. 29 Chay cabraq umanmanmi makinta churaykunqa, jinaspa maypichus ruphachina ofrendapaq uywakunata ñak’anku chaypi chay cabrata ñak’anqa.+ 30 Sacerdotetaq chay cabraq yawarninman dedonta challpuykunqa, chaywanmi ofrenda ruphachina altarpa waqrankunata llusiykunqa. Wakin yawartataq chay altarpa chakinman jich’anqa.+ 31 Wirantataq llapanta orqopunqa,+ imaynan sumaq kausay sacrificiopaq uywaq wiranta orqon chhaynata.+ Chay wiratan sacerdoteqa Jehová Diospaq sumaq q’apay ofrendata jina altarpi ruphachipunqa. Chhaynatan sacerdoteqa ruwanqa chay runaq juchan pichasqa kananpaq, chhaynapin chay runaqa perdonasqa kanqa.

32 ”Chay runachus jucha pampachay ofrendapaq ovejata apamunqa chayqa, china ovejatan apamunqa, mana imanasqa malta ovejata. 33 Chay ovejaq umanmanmi makinta churaykunqa, jinaspa maypichus ruphachina ofrendapaq uywakunata ñak’anku chaypi chay ovejata ñak’anqa.+ 34 Sacerdotetaq chay ovejaq yawarninman dedonta challpuykunqa, chaywanmi ofrenda ruphachina altarpa waqrankunata llusiykunqa.+ Wakin yawartataq ofrenda ruphachina altarpa chakinman jich’anqa. 35 Llapa wirantataq orqonqa, imaynan sumaq kausay sacrificiopaq malta carneroq wiranta orqon chhaynata. Chaytan sacerdoteqa altar patapi ruphachinqa, Jehová Diospaq ruphachisqa ofrenda patapi.+ Chhaynatan sacerdoteqa ruwanqa chay runaq juchan pichasqa kananpaq, chhaynapin chay runaqa perdonasqa kanqa.+

5 ”Pipas jujpa juchallikusqanta rikunman otaq chay juchamanta yacharunman,+ manataq testigananpaq wajasqa kashaspapas willakunmanchu chayqa, juchayoqmi payqa kanqa, chay juchanmantataqmi cuentata qonan kanqa.

2 ”Pipas qhellipaq rikusqa wañusqa salqa animalta tupaykunman, qhellipaq rikusqa wañusqa uywatapas tupaykunman, qhellipaq rikusqa tropapi puriq juch’uy animaltapas tupaykunman chayqa,+ qhellin chay runaqa kanqa, mana yachaspaña tupaykurqan chaypas juchayoqmi kanqa. 3 Pipas ima qhellitapas tupaykunqa,+ chhaynapitaq qhelli kapunman chayqa, mana yachaspaña tupaykurqan chaypas juchayoqmi chay runaqa kanqa.

4 ”Pipas mana allinta piensaspa apurasqa allinpaqpas mana allinpaqpas juramentota ruwanqa chayqa, manaña qallariypi reparakurqanchu chay jurasqanwan mana junt’ay atinanta chaypas juchayoqmi kanqa.+

5 ”Pipas chaykunamanta mayqentapas ruwanqa chayqa, sut’intan willakunqa+ ima juchamanchus urmarqan chayta. 6 Chaymantapas Jehová Diospaqmi apamunqa china ovejata otaq china cabrata, chaymi kanqa juchaman urmasqanmanta ofrenda.+ Chaytan sacerdoteqa jaywanqa jucha pampachay ofrendata jina chay runaq juchan pichasqa kananpaq.

7 ”Ichaqa manachus juj ovejapaq aypanqa chayqa, iskay kukuli urpita otaq iskay malqo* palomatan Jehová Diosman apamunqa,+ chaymi kanqa juchaman urmasqanmanta ofrenda; jujnin urpi otaq paloman kanqa jucha pampachay ofrendapaq, jujnintaq kanqa ruphachina ofrendapaq.+ 8 Chaykunatan iskayninta sacerdoteman apamunqa, sacerdotetaq jucha pampachay ofrendapaq kaqtaraq ñaupaqta jaywanqa. Chaypaqmi kunkanta q’ewispa qhasunqa, ichaqa aman umantaqa p’itinqachu. 9 Yawarnintan juj chhikanta altarpa jujnin ladonman ch’aqchunqa, wakin yawarnintataq altarpa chakinman phawachipunqa.+ Chaymi kanqa jucha pampachay ofrenda. 10 Juj kaqtataq sacerdoteqa ruphachina ofrendapaq jaywanqa imaynatachus ruwakunanman jinata.+ Chhaynatan sacerdoteqa ruwanqa chay runaq juchan pichasqa kananpaq, chhaynapin chay runaqa perdonasqa kanqa.+

11 ”Manachus iskay kukuli urpimanpas ni iskay malqo palomamanpas aypanqa chayqa, juj kilo*+ allin jak’utan* juchan perdonasqa kananpaq apamunqa, chaymi kanqa jucha pampachay ofrenda. Ichaqa aman chaymanqa aceitetaqa jich’aykunqachu, aman yuraq inciensotapas* churanqachu jucha pampachay ofrenda kasqanrayku. 12 Chay jak’utan sacerdoteman qonqa, sacerdotetaq llapa jak’uq rantinpi juj jaft’ay* jak’uta altar patapi ruphachinqa, Jehová Diospaq ruphachikusqan ofrendakuna patamanmi churanqa. Chaymi kanqa jucha pampachay ofrenda. 13 Chhaynatan sacerdoteqa ruwanqa chay runaq juchan pichasqa kananpaq. Chhaynatataqmi chay juchakunamanta mayqen juchapaqpas ruwakunqa, chhaynapin juchayoq runaqa perdonasqa kanqa.+ Puchuq jak’uqa jak’u ofrenda jinan sacerdotepaq qhepanqa,+ nispa”.

14 Jehová Diosmi Moisesta nillarqantaq: 15 “Pipas mana piensaylla noqa Jehová Diospa ch’uya cosasniykuna contra mana allin kaqta ruwanman, chhaynapitaq noqapaq ruwananwan mana junt’anmanchu chayqa,+ juj qhali carnerotan noqa Jehová Diosman apamuwanqa juchaman urmasqanmanta ofrendapaq.+ Chay uywa jayk’a qolqechus valenantaqa sacerdoten ninqa, ichaqa yupaychana karpapi siclo* pesoman jinan chay qolqeqa calculasqa kanqa.+ 16 Juchayoq runaqa mayqen cosasniy contrachus juchallikurqan chaypa jayk’achus valesqantan apamunqa, chaymantaq yapanqa pisqa partemanta jujninta.+ Chaytan llapanta qonqa sacerdoteman, chhaynapin sacerdoteqa juchamanta ofrendapaq carnerota jaywanqa chay runaq juchan pichasqa kananpaq,+ chhaynapin chay runaqa perdonasqa kanqa.+

17 ”Pipas noqa Jehová Diospa prohibisqayta ruwanman, chhaynapitaq juchallikunman chayqa, manaña reparakurqanchu chay ruwasqan jucha kasqanta chaypas, juchayoqmi chay runaqa kanqa, chay juchanmantataqmi cuentata qonan kanqa.+ 18 Sacerdotemanmi apamunqa juchaman urmasqamanta ofrenda jayk’achus valen chayman jina valeq carnerota.+ Chhaynapin sacerdoteqa chay ofrendata jaywanqa chay runaq juchan pichasqa kananpaq; mana reparakuspa, mana piensaspa juchallikusqan pichasqa kananpaq, chhaynapin chay runaqa juchanmanta perdonasqa kanqa. 19 Chaymi kanqa juchaman urmasqanmanta ofrenda. Chay runaqa noqa Jehová Dios contran juchallikurqan, chaymi juchayoq karqan”, nispa.

6 Jehová Diosmi Moisesta nillarqantaq: 2 “Pipas runamasinta engañanman chayqa noqa Jehová Dios contran juchallikun.+ Yaqapaschá chay runaqa runamasinpa imapas jap’iykachikusqanta,+ imatapas prendapi saqesqanta jap’ikapunman, otaq runamasinpa imantapas suwanman, engañollawan imantapas qechunman, 3 otaq ima tarisqantapas jap’ikapunman, paytaq ichaqa negakunman chay ruwasqanta, jurasparaqtaq ninman: Manan ima juchatapas ruwanichu, nispa.+ Chay pasaqtinqa kaytan ruwakunqa: 4 Juchayoqpunichus chay runa rijurinqa chayqa, kaqtan kutichipunqa runamasinpa kaqninta. Suwakurqanña, engañowanña qechurqan, runamasinta manchachispaña qechurqan, jujpa jap’ichikusqantaña jap’ikapurqan, imataña tarikurqan, 5 imamantaña yanqa jurarqan chaypas llapantan dueñonman qopunqa.+ Chaymantapas jayk’achus valesqanmanta pisqa kaq partetawanmi qonqa. Ima p’unchaychus juchayoq tarisqa kanqa chay p’unchaymi llapanta qopunqa. 6 Noqa Jehová Diospaqtaq juj qhali carnerota apamunqa, chaytan sacerdoteman qonqa juchaman urmasqanmanta ofrendapaq. Chay carneroqa jayk’atachus chay ofrendapaq carnero valen chayman jinan kanqa.+ 7 Chaytan sacerdoteqa noqa Jehová Diosman jaywawanqa chay runaq juchan pichasqa kananpaq, chhaynapin chay runaqa juchanmanta perdonasqa kanqa”,+ nispa.

8 Jehová Diosmi Moisesta nillarqantaq: 9 “Aaronta churinkunatawan niy: Kaymi kanqa ruphachina ofrendapaq kamachikuy.+ Ruphachina ofrendaqa raurashaq altar patapin tutantin kanqa, p’unchayamunankaman chaypi kanqa, ninapas aman wañunqachu. 10 Sacerdoten churakunqa lino q’aytumanta awasqa munay p’achanwan,+ churakullanqataqmi lino trusawanpas*+ chhaynapi aychan ama rikukunanpaq. Chaymantataq ninaq ruphasqan ruphachina ofrenda usphata orqonqa,+ chaytataq altarpa jujnin ladonman churanqa. 11 P’achanta cambiakuspataq+ chay usphata karpa-karpa jawapi limpio cheqasman apanqa.+ 12 Altarqa raurashallanqan, aman chaypi ninataqa wañuchinkichischu. Sapa tutamantanmi sacerdoteqa chayta llant’awan raurachinqa,+ chay patamantaq ruphachina ofrendata churanqa. Chay patapin ruphachinqa sumaq kausay sacrificio wirakunatapas.+ 13 Altarpi ninaqa tukuy tiempon raurashallanqa, aman pipas chaytaqa wañuchinqachu.

14 ”Kaymi kanqa jak’u ofrendapaq kamachikuy.+ Aaronpa churinkunan altarman chayta apamunqaku, jinaspa noqa Jehová Diosman jaywamuwanqaku. 15 Paykunamanta jujninmi chay jak’u ofrendamanta juj jaft’ay* jak’uta orqonqa aceiteyoqta, llapantan orqonqa jak’u ofrenda patapi kaq yuraq inciensotapas.* Chaytan altar patapi q’osñichinqa llapa jak’uq rantinpi. Chaymi kanqa noqa Jehová Diospaq sumaq q’apaq ofrenda.+ 16 Puchuq jak’utaqa Aaronwan churinkunapiwanmi t’antata ruwakapunqaku, ichaqa mana levadurayoqmi chayqa kanqa. Chaytan mijunqaku ch’uya partepi, tupana karpa patiopi.+ 17 Mana levadurallayoqtan chay t’antataqa ruwanqaku.+ Paykunamanmi chay ruphachina ofrendapaq apamuwasqankutaqa qoni.+ Chay puchuq jak’uqa ch’uyay-ch’uyan,+ jucha pampachay ofrenda jinan, juchaman urmasqamanta ofrenda jinan. 18 Chaytan mijunqaku Aaronpa llapa churinkuna.+ Noqa Jehová Diospaq apamusqanku ruphachina ofrendakunamantaqa puchuq jak’un Aaronpa churinkunapaq kanqa, llapa miraynin runakunapaqmi chhayna kanqa.+ Chay ofrendakunata imapas tupaykuqqa ch’uyan kanqa, nispa”.

19 Jujmantan Jehová Diosqa Moisesta rimaykullarqantaq, nirqanmi: 20 “Aceitewan jich’aykuspa ajllasqa kasqanku p’unchaypin Aaronqa churinkunapiwan noqa Jehová Diosman juj ofrendata jaywamuwallanqakupuni.+ Juj kilo*+ allin jak’utan* apamunqaku, chaymi kanqa jak’u ofrendanku.+ Kuskan partetan tutamantan jaywanqaku, kuskantataq tardenta. 21 Aceitewan tupachisqatan sartenpi chayachinqaku.+ Chaymi askhaman p’akisqa kanqa, chay patamantaq aceitewan jich’aykunqaku. Chaytan sumaq q’apaq jak’u ofrendata jina noqa Jehová Diosman jaywamuwanqaku. 22 Chaytaqa uma* sacerdoteq mayqen wawanchus qatiqnin uma sacerdote kanqa+ chaymi jaywanqa. Chay ofrendaqa llapanmi noqa Jehová Diosman jaywasqa kanqa. Chhaynatapunin chaytaqa ruwakunqa. 23 Sacerdotepaq ruwakusqan jak’u ofrendataqa llapantan jaywanqaku. Chaytaqa manan pipas mijunqachu”, nispa.

24 Jujmantan Jehová Diosqa Moisesta rimapayallarqantaq, nirqanmi: 25 “Aaronta wawankunatawan nimuy: Kaymi kanqa jucha pampachay ofrendapaq kamachikuy.+ Jucha pampachay ofrendapaq uywataqa Jehová Diospa ñaupanpin ñak’akunqa, maypichus ruphachina ofrendapaq uywakunata ñak’akun chaypi.+ Chay ofrendaqa ch’uyay-ch’uya ofrendan. 26 Chay jucha pampachay ofrenda aychataqa jaywaq sacerdoten mijupunqa;+ chaytaqa mijunqa ch’uya partepin, tupana karpa patiopi.+

27 ”Chay ofrenda aychata imapas tupaykuqqa ch’uyan kapunqa. Yawarninchus ima p’achamanpas ch’eqeykurqan chayqa, ch’uya partepin chay p’achaqa t’aqsasqa kanqa. 28 Chay aychatachus t’uru mankapi t’impuchikurqan chayqa p’akisqan chay mankaqa kanqa, cobre mankapichus t’impuchikurqan chayqa allinta qhetuspan chay mankataqa unuwan maqchikunqa.

29 ”Chaytaqa llapa sacerdotekunan mijunqa.+ Chay ofrendaqa ch’uyay-ch’uya ofrendan.+ 30 Ichaqa jucha pampachay ofrendaq yawarninta tupana karpa ukhuman apaykunqaku chhaynapi juchayoq runa pampachasqa kananpaq chayqa, amapunin chay ofrendataqa pipas mijunqachu.+ Chayqa llapanmi ninapi ruphachisqa kanqa.

7 ”Kaymi kanqa juchaman urmasqamanta ofrendapaq kamachikuy.+ Chay ofrendaqa ch’uyay-ch’uyaymi. 2 Chay ofrendataqa maypichus ruphachina ofrendapaq uywakunata ñak’akun chaypin ñak’akunqa, yawarninwantaq+ altar muyuriqta ch’aqchukunqa.+ 3 Sacerdoteqa llapa wirantan Diosman jaywanqa.+ Chaypaqmi orqonqa uywaq wirasapa chupanta, wijsa llika wiranta, 4 wasa rurunta llapa wirantawan. Wasa ruruntawan kuskatan orqollanqataq higadon* wiratapas.+ 5 Chaytan sacerdoteqa Jehová Diospaq ruphachina ofrendata jina altar patapi ruphachinqa.+ Chaymi kanqa juchaman urmasqamanta ofrenda. 6 Chaytaqa llapa sacerdotekunan mijunqa.+ Ch’uya partepin chaytaqa mijunqaku. Chay ofrendaqa ch’uyay-ch’uya ofrendan.+ 7 Imaynan jucha pampachay ofrendawan ruwakun chhaynallatataqmi ruwakunqa juchaman urmasqamanta ofrendawanpas. Chay ofrenda aychaqa ofrenda jaywaq sacerdotepaqmi kanqa.+

8 ”Sacerdote pipaqpas ruphachina ofrendata jaywapunqa chayqa, paymi ofrenda jaywasqan animalpa qaranwanqa+ qhepakapunqa.

9 ”Jak’u ofrenda hornopi chayachisqapas, mankapi chayachisqapas, sartenpi chayachisqapas kanqa chayqa,+ ofrenda jaywaq sacerdotepaqmi chayqa kanqa; paymi chaywan qhepakapunqa.+ 10 Ichaqa chay ofrenda jak’uchus aceitewan tupachisqa kanqa+ otaq jak’u purulla kanqa+ chayqa, Aaronpa llapa wawankunapaqmi chayqa kanqa. Paykunan kaqtakama rakinakapunqaku.

11 ”Kaymi kanqa sumaq kausay sacrificiopaq kamachikuy,+ pipas chay sacrificiota Jehová Diosman jaywanqa chayqa, kaypi nisqanman jinan ruwakunqa. 12 Graciasta qonanpaqchus chay sacrificiota apamunqa chayqa,+ chay sacrificioqa graciasta qonapaq sacrificion kapunqa, chaywan kuskatan jaywanqa aceitewan tupachisqa mana levadurayoq rosquilla t’antata, aceitewan jich’aykusqa mana levadurayoq ñañu, llaflla* t’antata, allin jak’umanta* ruwasqa rosquilla t’antata ima; chay rosquillakunapas aceitewan jich’aykusqan kanqa. 13 Chay ofrendawan kuskatan jaywanqa levadurayoq t’anta rosquillakunata, graciasta qonapaq sumaq kausay sacrificiotawan. 14 Sapanka clase t’antamantan jujta Jehová Diospaq t’aqanqa. Chay t’aqasqan t’antakunaqa sumaq kausay sacrificiota jaywaq sacerdotepaqmi kanqa.+ 15 Graciasta qonapaq sumaq kausay sacrificio aychataqa chay p’unchayllan ofrenda jaywaqqa mijunqa, manan qhepantin p’unchaypaqqa waqaychanqachu.+

16 ”Chay sumaq kausay sacrificiochus kanman promesa ruway ofrenda+ otaq tukuy sonqo qoy ofrenda+ chayqa, chay p’unchayllan ofrenda jaywaqqa chay sacrificiota mijunqa, puchuqtinqa qhepantin p’unchaypas mijunmanmi. 17 Ichaqa minchha p’unchaykamachus chay aycha puchunman chayqa, kanasqan kanqa.+ 18 Pipas minchha p’unchaypi chay aychata mijunqa chayqa, manan chaskisqachu kanqa. Mana valeqmi chay sacrificio jaywasqanqa kapunqa, millakunapaqtaqmi kanqapas. Chayta mijuq runaqa juchanmantan cuentata qonan kanqa.+ 19 Aman pipas mijunqachu ima qhellitapas tupaykuq aychataqa, aswanmi chay aychataqa llapanta ninapi ruphachikapunqa. Chaymantapas limpio kaqllan mana qhellichasqa aychataqa mijunqa.

20 ”Pipas qhelli kashaspa Jehová Diosman qosqa sumaq kausay sacrificio aychata mijunqa chayqa, wañuchisqan kanqa.+ 21 Pipas qhelli kashaq runatapas,+ ima qhelli animaltapas,+ ima millakunapaq kaqtapas+ tupaykunman, jinaspa Jehová Diosman jaywasqa sumaq kausay sacrificio aychata mijunman chayqa, wañuchisqan kanqa, nispa”.

22 Jehová Diosmi Moisesta nillarqantaq: 23 “Israel runakunata niy: Aman mijunkichischu waka wiratapas, oveja wiratapas ni cabra wiratapas.+ 24 Wañusqa animalpa wiranwanqa, salqa animalpa wañuchisqan animalpa wiranwanpas imatapas ruwawaqchismi, ichaqa amapunin chay wirataqa mijunkichischu.+ 25 Pipas Jehová Diosman jaywasqan ruphachina ofrenda wirata mijunqa chayqa, wañuchisqan kanqa.

26 ”Maypiña tiyankichis chaypas aman yawartaqa mijunkichischu.+ Aman phalaq animalpa yawarnintapas ni ima animalpa yawarnintapas mijunkichischu. 27 Pipas yawarta mijunqa chayqa wañuchisqan kanqa,+ nispa”.

28 Jehová Diosmi Moisesta nillarqantaq: 29 “Israel runakunata nimuy, Diosmi nin: Pipas sumaq kausay sacrificiota noqa Jehová Diosman jaywamuwanqa chayqa, wakintan noqa Jehová Diospaq apamunqa.+ 30 Makinpin apamunqa wirankunata+ pechonta ima, chaymi kanqa noqa Jehová Diosman ruphachina ofrendata jina jaywamuwananpaq. Chaytan noqa Jehová Diospa ñaupaypi ñaupaqman qhepaman maywinqa, chaymi kanqa maywisqa ofrenda.+ 31 Wirataqa sacerdoten altarpi ruphachinqa,+ pechontaq Aaronpaq churinkunapaqwan qhepanqa.+

32 ”Sacerdotemanmi qollankichistaq sumaq kausay sacrificioq paña chakanta, chayqa ch’uya ofrendan kanqa.+ 33 Aaronpa mayqen wawanchus sumaq kausay sacrificioq yawarnintapas wirantapas jaywanqa chay kaq wawanmi paña chakantaqa chaskinqa.+ 34 Noqaqmi Israel runakunaq jaywasqan ofrenda pechopas, sumaq kausay sacrificio paña chakapas, chaytan noqaqa Aaronman churinkunamanwan qoni. Chayqa wiñaypaqmi chhaynapuni kanqa,+ nispa”.

35 Chaykunatan Israel runakunaqa sacerdote Aaronpaq wawankunapaqwan t’aqananku karqan, Jehová Diosman jaywasqanku ruphachisqa ofrendakunamantan chayta t’aqananku karqan. Aaronta wawankunatawan Jehová Diospa sacerdoten kanankupaq ajllasqanku p’unchaypipas chaytan ruwarqanku.+ 36 Aaronwan churinkunapiwan ajllasqa kasqanku p’unchaypin Jehová Diosqa Israel runakunata kamachirqan chaykunata qonankupaq.+ Llapa miraynin runakunapaqmi chhayna kanan karqan.

37 Chaykunan karqan ruphachina ofrendapaq,+ jak’u ofrendapaq,+ jucha pampachay ofrendapaq,+ juchaman urmasqamanta ofrendapaq,+ sacerdote churana sacrificiopaq,+ sumaq kausay sacrificiopaqwan+ kamachikuykuna. 38 Chayqa Jehová Dios Moisesta Sinaí orqopi+ kamachisqanman jinan karqan. Chay p’unchaymi payqa Sinaí ch’inneqpi+ Israel runakunata kamachirqan Jehová Diosman ofrendankuta apamunankupaq.

8 Jujmantan Jehová Diosqa Moisesta rimapayarqan, nirqanmi: 2 “Aaronta churinkunatawan pusamuy.+ Apamunkin p’achankunata,+ jawina aceiteta,+ jucha pampachay ofrendapaq torota, iskaynin orqo ovejakunata, mana levadurayoq t’anta canastatapas.+ 3 Llapa llaqtatan juñumunki tupana karpa jaykunaman”, nispa.

4 Moisesqa Jehová Diospa kamachisqanman jinan ruwarqan. Llaqta runakunapas llapankun Dioswan tupana karpa jaykunaman juñukamurqanku. 5 Chaymantataq Moisesqa llaqta runakunata nirqan: “Jehová Diosmi kaykunata ruwananchispaq kamachimuwan”, nispa. 6 Jinaspa Aaronta churinkunatawan asuykachimuspa paykunata unuwan maqchirqan.+ 7 Chaymantataq Aaronta jatun ukhu p’achawan+ churarqan, chaytataq chumpiwan+ watarqan. Chay patamantaq mana makiyoq jatun p’achawan+ churarqan, chaymantaq jatun unkuta*+ churarqan, jinaspa unkupi sirasqa chumpiwan+ allinta watarqan. 8 Chaykuna patamantaq qhasqo* ch’uspata+ churarqan, chay ch’uspa ukhumanmi Urimta Tumimtawan*+ churarqan. 9 Chaymantataq Moisesqa uma k’uyunata+ Aaronpa umanman churarqan, chay patamantaq k’anchashaq llaflla* qori tablillata churarqan, chaymi karqan Diospaq t’aqasqa kasqanmanta señal.+ Jehová Diospa kamachisqanman jinan Moisesqa ruwarqan.

10 Chaymantataq jawina aceitewan jich’aykurqan yupaychana karpata tukuy imaymanankunatawan,+ chhaynapin chaykunata Diospaq t’aqarqan. 11 Altartapas chay aceitewanmi qanchis kutita ch’allarqan. Ch’allarqanmi llapa imaymanankunatapas, jinallataq cobre puruñata* tiyanantapas, chhaynatan chaykunatapas Diospaq t’aqarqan. 12 Chaykuna qhepamantaq Aaronpa umanman juj chhikan jawina aceiteta jich’aykurqan, chhaynatan paytapas Diospaq t’aqarqan.+

13 Chaymantataq Moisesqa Aaronpa churinkunata asuykachimurqan, jinaspa paykunaman churarqan jatun p’achakunata, chaytataq chumpiwan watarqan, umankutataq uma k’uyunakunawan k’uyurqan.+ Moisesqa Jehová Diospa kamachisqanman jinan ruwarqan.

14 Chaymantataq Moisesqa jucha pampachay ofrendapaq torota apachimurqan, chay toroq umanmanmi Aaronqa churinkunapiwan makinkuta churaykurqanku.+ 15 Chay torotan Moisesqa ñak’arqan, jinaspa yawarninman+ dedonta challpuykuspa altarpi waqrakunata llusiykurqan, chhaynatan chay altarta juchamanta ch’uyancharqan. Wakin yawartataq altarpa chakinman jich’arqan altarta ch’uyanchananpaq, chhaynapi chay altarpi jucha pampachanapaq sacrificiokunata jaywanankupaq. 16 Chaymantataq Moisesqa toroq ch’unchulnin wirakunata, higadon* wirakunata, wasa rurunta wirankunatawan lliuta orqopurqan, jinaspa altar patapi ruphachirqan q’osñinanpaq.+ 17 Qaranta, aychanta, phusnunta imataq llapanta karpa-karpa jawapi kanachimurqan.+ Moisesqa Jehová Diospa kamachisqanman jinan ruwarqan.

18 Chaymantataq Moisesqa ruphachina ofrendapaq orqo ovejata apachimurqan, chay ovejaq umanmanmi Aaronpas churinkunapas makinkuta churaykurqanku.+ 19 Chay ovejatataq Moisesqa ñak’arqan, yawarninwanmi altar muyuriqta ch’aqchurqan, 20 aychantataq askhaman kuchurqan. Chay kuchusqan aychata, umanta, wiranta* iman Moisesqa altarpi ruphachirqan. 21 Jinamantaq Moisesqa ch’unchulninkunata, patasninkunatawan unupi maqchirqan jinaspa ovejata llapanta altarpi ruphachirqan. Chay ofrendaqa ancha sumaq q’apaymi Diospaq karqan, Jehová Diospaq ruphachisqa ofrendan karqan. Jehová Diospa kamachisqanman jinan Moisesqa chayta ruwarqan.

22 Chaymantataq Moisesqa juj kaq orqo ovejata apachimurqan, chaymi karqan sacerdote ajllanapaq oveja.+ Chay ovejaq umanmanmi Aaronpas churinkunapas makinkuta churaykullarqankutaq.+ 23 Chay ovejatapas Moisesqa ñak’arqanmi, yawarninwantaq Aaronpa paña ninrinpa ura puntanta llusiykurqan; llusiykullarqantaqmi paña makinpa mama dedontapas, paña chakinpa mama dedontapas. 24 Moisesqa asuykachimurqanmi Aaronpa churinkunatapas, paykunaq paña ninrinkuq ura puntantapas llusiykurqanmi yawarwan, llusiykullarqantaqmi paña makinkuq mama dedontapas paña chakinkuq mama dedontapas. Wakin yawarwantaq altar muyuriqta ch’aqchurqan.+

25 Chaymantataq Moisesqa chay ovejaq llapa wiranta orqorqan. Orqorqanmi wijsa llika wiranta, higadon wirata, rurunta llapa wirantawan; kuchurqanmi wirasapa chupantapas jinallataq paña chakantapas.+ 26 Chaymantataq Jehová Diospa ñaupanpi mana levadurayoq t’anta canastamanta orqorqan mana levadurayoq juj rosquilla t’antata,+ aceitewan tupachisqa juj rosquilla t’antata,+ juj llaflla t’antatawan. Chay t’antakunatataq churarqan wira pataman chakan patamanwan. 27 Chaykunatataq Aaronpa makinman churinkunaq makinmanwan churarqan, jinaspa ñaupaqman qhepaman maywirqan, chaymi karqan Jehová Diospaq maywisqa ofrenda. 28 Chaymantataq Moisesqa makinkumanta chaykunata chaskirqan, jinaspa altar patapi ruphachirqan, ruphachina ofrenda patapi. Chaymi karqan sacerdote ajllanapaq sumaq q’apay ofrenda, Jehová Diospaq ruphachisqa ofrenda.

29 Chaymantataq Moisesqa pecho aychata jap’ispa Jehová Diospa ñaupanpi ñaupaqman qhepaman maywirqan.+ Chay pecho aychaqa karqan sacerdote ajllanapaq ofrendamanta Moisesman tupaqmi. Chaytan Jehová Diosqa Moisesman kamachirqan.+

30 Chaymantataq Moisesqa juj chhikan jawina aceitewan+ altarpi yawarwan ima Aaronta p’achantawan ch’allarqan, ch’allallarqantaqmi churinkunata p’achankutapas. Chhaynatan ch’uyancharqan Aaronta p’achantawan, churinkunata+ p’achankutapas.+

31 Chaykuna qhepatataq Moisesqa Aaronta churinkunatawan nirqan: “Dioswan tupana karpaman jaykunapi chay aychata t’impuchiychis.+ Chaytan qankunaqa mijunkichis sacerdote ajllanapaq canastapi t’antatawan kuskata. Diosmi nimuwan: Aaronmi churinkunapiwan mijunqaku, nispa.+ 32 Aychapas t’antapas puchunqa chayqa, llapantan ruphachipunkichis.+ 33 Aman karunchakunkichischu Dioswan tupana karpaman jaykunamantaqa, qanchis p’unchaymi chayllapi kankichis. Qankunaqa qanchis p’unchaypin sacerdote kanaykichispaq nombrasqa kankichis,+ chay tukunankaman chayllapi kankichis. 34 Kunan p’unchay imachus ruwasqanchista ruwanapaqqa Jehová Diosmi kamachiwarqan, chhaynapi juchaykichis pichasqa kananpaq.+ 35 Qankunaqa tupana karpaman jaykunapin tuta-p’unchay qhepakunkichis. Qanchis p’unchaymi+ chaypi kankichis Jehová Diospaq imachus ruwanaykichista ruwaspa,+ chhaynapin mana wañunkichischu. Chhaynatan Dios kamachimuwan”, nispa.

36 Aaronwan churinkunawanqa llapantan ruwarqanku imakunatachus Jehová Dios Moisesman kamachirqan chayta.

9 Pusaq kaq p’unchaypin+ Moisesqa wajarqan Aaronta, churinkunata, Israelpi umalliqkunatawan.* 2 Aarontan nirqan: “Jucha pampachay ofrendapaq mana imanasqa malta torota apamuy,+ ruphachina ofrendapaqtaq mana imanasqa orqo ovejata apamuy, chaytan qanpa sutiykipi Jehová Diosman jaywanki. 3 Israel runakunatan ninki: Jucha pampachay ofrendapaqmi apamunkichis orqo cabrata, ruphachina ofrendapaqtaq apamunkichis watayoq mana imanasqa qhali torota, watayoq qhali orqo ovejatawan. 4 Apamullankichistaqmi sumaq kausay sacrificiopaq+ juj torota, juj orqo ovejatapas chaykunatan Jehová Diosman jaywasun; jaywasunmi jak’u ofrendatapas,+ chayqa aceitewan tupachisqan kanqa. Kunan p’unchaymi Jehová Dios rijurisunkichis, nispa”.+

5 Jinan paykunaqa Moisespa imachus kamachisqanta Dioswan tupana karpaq ñaupanman apamurqanku. Llaqta runakunapas llapankun jamurqanku, jinaspa chaypi Jehová Diospa ñaupanpi sayaykurqanku. 6 Moisestaq nirqan: “Chayta ruwanaykichispaqmi Jehová Dios kamachikun, chhaynapi Jehová Diospa k’anchayninta rikunaykichispaq”,+ nispa. 7 Chaymantataq Moisesqa Aaronta nirqan: “Altarman asuykuy jinaspa jucha pampachay ofrendaykita+ ruphachina ofrendaykitawan jayway, chhaynapi juchaykipas+ familiaykiq juchanpas pichasqa kananpaq. Jaywallaytaq llaqta runakunaq ofrendantapas,+ chhaynapi paykunaq juchankupas+ pichasqa kananpaq. Chaykunataqa Jehová Diospa kamachisqanman jinan ruwanki”, nispa.

8 Chayta niqtin jinan Aaronqa altarman asuykuspa malta torota ñak’arqan juchanmanta ofrendata jaywananpaq.+ 9 Churinkunataq payman yawarta+ jaywarqanku, Aarontaq chay yawarman dedonta challpuykuspa chaywan altarpi waqrakunata llusiykurqan, wakin yawartataq altarpa chakinman jich’arqan.+ 10 Chaymantataq Aaronqa jucha pampachay ofrendapaq ñak’asqan toroq wiranta altarpi ruphachirqan, ruphachirqanmi wasa ruruntapas higadon* wiratapas. Jehová Dios Moisesta kamachisqanman jinan ruwarqan.+ 11 Llapa aychanta qaranta imataq karpa-karpa jawapi ruphachipurqan.+

12 Chaymantataq Aaronqa ruphachina ofrendapaq carnerota ñak’arqan. Churinkunataq payman yawarta jaywarqanku, chaytataq Aaronqa altar muyuriqman ch’aqchurqan.+ 13 Paykunaqa askhaman kuchusqa aychata umanta iman Aaronman qorqanku, paytaq chayta altar patapi ruphachirqan. 14 Chaymantapas ch’unchulninkunata patasninkunata iman maqchirqan, chaykunatapas altarpi ruphachina ofrenda patamanmi churarqan.

15 Chaymantataq Aaronqa llaqta runakunapaq ofrendata jaywarqan. Runakunaq apamusqan orqo cabratan ñak’arqan, chaytataq runakunaq juchan pampachasqa kananpaq jaywarqan. Chaymi karqan runakunaq jucha pampachay ofrendan. Chaytaqa ñaupaq kaq ofrendawan ruwasqanta jinan ruwarqan. 16 Jaywarqanmi ruphachina ofrendatapas, chaytapas imaynachus ruwakunanman jinan ruwarqan.+

17 Chaymantataq Aaronqa jak’u ofrendata jaywarqan.+ Juj jaft’ayta* oqarispan altar patapi q’osñichirqan, tutamantan ruphachisqanku ofrendawan kuskatan ruphachirqan.+

18 Chaymantataq sumaq kausay sacrificiopaq torota orqo ovejatawan llaqtapaq ñak’arqan. Churinkunataq Aaronman yawarta jaywarqanku, chay yawarwanmi payqa lliu altar muyuriqta ch’aqchurqan.+ 19 Toroq wirantapas+ ovejaq wirantapas llapantan orqorqanku. Orqorqankun llapa wijsa llika wirankunatapas, wasa ruruntapas, higadon wirakunatapas. Kuchurqankun ovejaq wirasapa chupantapas.+ 20 Chaykunatataq toro aychaq pechonman oveja aychaq pechonman ima churarqanku. Chaymantataq Aaronqa llapa wirata altarpi ruphachirqan.+ 21 Iskaynin animalkunaq pechonta paña chakanta iman ichaqa ñaupaqman qhepaman Aaronqa maywirqan, chaymi karqan Jehová Diospaq maywisqa ofrenda. Moisespa kamachisqanman jinan Aaronqa chayta ruwarqan.+

22 Jucha pampachay ofrendata, ruphachina ofrendata, sumaq kausay sacrificiotawan jaywayta tukuspan Aaronqa makinta oqarispa llaqta runakunata bendecirqan,+ chaymantataq ofrenda jaywasqanmanta uraykampurqan. 23 Chay qhepamantaq Moiseswan Aaronpiwan Dioswan tupana karpa ukhuman jaykurqanku, chaymanta lloqsimuspataq llaqta runakunata bendecirqanku.+

Chaypin llapa llaqtantin runakunaman Jehová Diospa lliflli kaynin rijurirqan.+ 24 Jehová Diostaq ninata kachamurqan,+ chay ninan altar patapi ofrendata wirakunatawan rupharqan. Chayta rikuspan runakunaqa kusisqa qaparirqanku, chaymantataq pampakama k’umuykurqanku.+

10 Qhepamanmi Aaronpa churinkuna Nadabwan Abiupiwan+ sansa apana p’ukuman sansata churarqanku, chay patamantaq inciensota+ jich’aykurqanku, chaytataq Jehová Diosman jaywarqanku. Ichaqa manan Diospa kamachisqanman jinachu chayta ruwarqanku.+ 2 Chaymi Jehová Diosqa ninata kachaykamuspa paykunata rupharparichirqan,+ chhaynapin paykunaqa Jehová Diospa ñaupanpi wañurqanku.+ 3 Chaymantan Moisesqa Aaronta nirqan: “Jehová Diosmi nin: Llapa ñaupaypi kaqkunan yachananku noqaqa ch’uya Dios kasqayta,+ llaqtantin runakunan jatunchawananku, nispa”. Chayta uyarispan Aaronqa ch’inlla karqan.

4 Chaymantataq Moisesqa Misaelta Elzafantawan wajamurqan, paykunaqa Aaronpa tion Uzielpa+ wawankunan karqanku, paykunatan Moisesqa nirqan: “Jamuychis, yupaychana karpaq ñaupanmanta wayqeykichiskunata orqoychis, karpa-karpa jawaman paykunata apaychis”, nispa. 5 Jinan paykunaqa jamuspanku Aaronpa iskaynin wañusqa wawankunata p’achantintakama karpa-karpa jawaman orqorqanku; Moisespa kamachisqanman jinan ruwarqanku.

6 Chay qhepamantaq Moisesqa Aaronta, iskaynin churinkuna Eleazarta Itamartawan nirqan: “Aman paykunamantaqa chujchaykichista t’ampayachinkichischu, nitaq p’achaykichistapas llik’ikunkichischu,+ chhaynapin mana wañunkichischu, manataqmi Diospas llaqta contra phiñakunqachu. Israel wayqeykichiskunañan Jehová Diospa ninawan wañuchisqan runakunamantaqa waqanqaku. 7 Qankunaqa Jehová Diospa jawina aceitenwantaq jawisqa kashankichis chayqa,+ aman Dioswan tupana karpaman jaykunamantaqa karunchakunkichischu, mana chayqa wañunkichismi”, nispa. Chaymi paykunaqa Moisespa kamachisqanman jina ruwarqanku.

8 Jehová Diosmi Aaronta nirqan: 9 “Tupana karpaman jaykunaykichis kaqtinqa aman qanpas ni wawaykikunapas vinota ni ima machanatapas tomankichischu,+ mana chayqa wañunkichismi. Kay kamachikuyqa llapa mirayniykichis runakunapaqwanmi kanqa. 10 Chhaynapin qankunaqa allinta reparankichis imachus ch’uya kaqta imachus mana ch’uya kaqtapas, imachus limpio kaqta imachus qhelli kaqtapas.+ 11 Allintataqmi Israel runakunamanpas yachachinkichis imakunatachus noqa Jehová Dios Moiseswan kamachirqaykichis chaytapas”,+ nispa.

12 Chaymantataq Moisesqa Aaronta iskaynin qhepaq churin Eleazarta Itamartawan nirqan: “Jehová Diospaq ruphachina ofrendakunamanta puchuq jak’uwan mana levadurayoq t’antata ruwakuychis, jinaspa altar qayllapi chayta mijuychis.+ Chay ofrendaqa ch’uyay-ch’uyan.+ 13 Jinaspapas chaytaqa ch’uya partepin mijunkichis,+ chaykunaqa Jehová Diosman jaywasqa ruphachina ofrendakunamanta qanman wawaykikunamanwan tupaq mijunan. Chayta qankunaman ninaypaqmi Dios kamachimuwan. 14 Ch’uya partepi qankunaq mijunaykichispaqmi kanqa maywisqa ofrenda pechopas ch’uya ofrenda chakapas,+ chaytan qanpas qhari wawaykikunapas warmi wawaykikunapas mijunkichis.+ Chaykunaqa Israel runakunaq jaywasqan sumaq kausay sacrificiomanta t’aqasqa aychakunan, chaytan Diosqa qanman wawaykikunamanwan qoshasunkichis. 15 Ruphachina ofrendapaq wiratawan kuskatan apankichis ch’uya ofrenda chakata maywisqa ofrenda pechotawan. Chaytan Jehová Diospa ñaupanpi ñaupaqman qhepaman maywinki, chaymi kanqa maywisqa ofrenda. Pechonwan chakanwanqa Jehová Diospa nisqanman jinan qankunapaq kanqa”,+ nispa.

16 Moisesmi maskhayta qallarirqan jucha pampachay ofrendapaq ñak’asqanku cabrata.+ Maskhasqanpin payqa yacharurqan llapanta ruphachipusqankuta. Chaymi payqa Aaronpa qhepaq churinkuna Eleazarpaq Itamarpaqwan sinchita phiñakurqan. Paykunatan nirqan: 17 “¿Imaraykun mana mijurqankichischu chay jucha pampachay ch’uyay-ch’uya ofrendata?+ Qankunaqa ch’uya partepimá chayta mijunaykichis karqan riki. ¿Manachu chayta Dios qorqasunkichis llaqta runakunaq juchanmanta cuentata qonaykichispaq? ¿Manachu chayta ruwaspa runakunaq juchanta Jehová Diospa ñaupanpi pichanaykichis karqan? 18 Manataq chay sacrificio uywaq yawarninqa ch’uya cuartoman apaykusqachu karqan chayqa,+ mijunaykichismi karqan chay ofrenda aychataqa. Diospa kamachiwasqanman jinan ch’uya partepi mijunaykichis karqan”, nispa. 19 Chayta uyarispan Aaronqa Moisesta nirqan: “Runakunaqa jaywankun Jehová Diosman jucha pampachay ofrendankuta, ruphachina ofrendankutapas.+ Ichaqa kaykuna pasawasqanraykun mana mijurqanichu chaykunata. Chaymantapas, mijuymanchus karqan chay jucha pampachay ofrendata chayqa, ¿allinpaqchu Jehová Dios chayta qhawarinman karqan?”, nispa. 20 Chayta uyarispan Moisesqa thaj qheparqan.

11 Chaykuna qhepatan Jehová Diosqa Moisesta Aarontawan nirqan: 2 “Israel runakunata nimuychis: Kay pachapi animalkunataqa manan llapan clase animaltachu mijunkichis,+ 3 aswanpas ukhukama kichasqa p’alqa phapatuyoq khastuq* animalkunallatan mijunkichis.

4 ”Wakin p’alqa phapatuyoq animalkunata wakin khastuq animalkunatawanmi ichaqa ama mijunkichischu. Chay animalkunamanta jujninmi camello. Camelloqa khastuqmi, ichaqa manan p’alqa phapatuyoqchu. Chay animalqa qhellin qankunapaqqa.+ 5 Aman mijunkichischu damán qowitapas,+ chay qowiqa khastuqmi, ichaqa manan p’alqa phapatuyoqchu. Chay animalqa qhellin qankunapaqqa. 6 Aman mijunkichischu liebre qowitapas,* chay qowipas khastuqmi, ichaqa manan p’alqa phapatuyoqchu. Chay animalqa qhellin qankunapaqqa. 7 Aman mijunkichischu khuchitapas,+ chay animalqa p’alqa phapatuyoqmi, ichaqa manan khastunchu. Chay animalpas qhellin qankunapaqqa. 8 Aman chay animalkunaq aychantaqa mijunkichischu, nitaq wañusqatapas tupaykunkichischu. Chay animalkunaqa qhellin qankunapaqqa.+

9 ”Lamar-qochapipas, mayukunapipas, may unupipas tiyaq animalkunamantaqa aletasniyoq sarphayoq* kaqkunallatan mijunkichis.+ 10 Mana aletasniyoq, mana sarphayoq kaqkunatan ichaqa ama mijunkichischu; askhanpi puriqña kanqa chaypas, ima animalña kanqa chaypas aman mijunkichischu, millakunkichismi chay animalkunataqa. 11 Arí, millakunkichispunin chay animalkunataqa. Amapunin aychantapas ni imantapas mijunkichischu,+ wañusqata rikuspapas sinchi millaypaqmi qhawarinkichis. 12 Unupi tiyaq mana aletasniyoq mana sarphayoq animaltaqa millay qhellita jinapunin rikunkichis.

13 ”Phalaq animalkunamantaqa kay animalkunatan millakunkichis amataq mijunkichischu: ankata,+ qocha ankata, suwiq’arata,*+ 14 puka wamanta,* imaymana clase yana wamanta, 15 imaymana clase cuervota,* 16 avestruzta, jukuta,* qellwata, imaymana clase k’illichuta, 17 juch’uy jukuta, qocha cuervota, ninriyoq jukuta, 18 cisneta, pelicanota, condorta, 19 cigüeñata, imaymana clase mayu sunsuta, abubillata, masuta* ima. 20 Askhanpi puriq tawa chaki rafrayoq kurukunatapas millakunkichismi.

21 ”Chaywanpas chay tawa chakiwan puriq rafrayoq kurukunamanta wakintaqa mijuwaqchismi, chay kurukunaqa p’itananpaq chakikunayoqmi kanan, chay chakinkunaqa aswan jatunmi kanan wakin chakinkunamantaqa. 22 Chay kurukunan kaykuna: karuta puriq imaymana clase langostakuna,* juj langostakuna,+ ch’illikukuna, t’isku-t’iskukuna* ima. 23 Wakin tawa chakiwan puriq rafrayoq kurukunatan ichaqa millakunkichis. 24 Chaykunatachus mijuwaqchis chayqa qhellin kawaqchis. Pipas chay kurukunamanta mayqentapas wañusqata tupaykunqa chayqa, inti jaykuykaman qhelli kanqa.+ 25 Pipas chay kurukunamanta mayqentapas wañusqata apanqa chayqa, p’achantan t’aqsanqa,+ inti jaykuykamataq chay runaqa qhelli kanqa.

26 ”Ima animalpas p’alqa phapatuyoq kanman, ichaqa mana p’alqankuna ukhukama kicharisqachu kanman, manataq khastuq animalpaschu kanman chayqa, qhellin qankunapaqqa kanqa. Pipas chay animalkunata tupaykuqqa qhellin kanqa.+ 27 Tawa chakiwan puriq silluyoq animalkunapas qhellin qankunapaqqa kanqa. Pipas chay animalkunamanta mayqentapas wañusqata tupaykunqa chayqa, inti jaykuykaman qhelli kanqa. 28 Pipas chay wañusqa animalta oqarinqa chayqa t’aqsanqan p’achanta;+ chaymantapas inti jaykuykaman chay runaqa qhelli kanqa.+ Chay animalkunaqa qhellin qankunapaqqa.

29 ”Askhanpi puriq juch’uy animalkunamantaqa kaykunan qankunapaqqa qhelli kanqa: juk’uchakuna,+ topo juk’uchakuna, imaymana clase qaraywakuna, 30 geco qaraywakuna, jatun lagartokuna, mayu qaraywakuna, juch’uy qaraywakuna, camaleonkuna ima. 31 Chay animalkunaqa qhellin qankunapaqqa kanqa.+ Pipas chaykunamanta mayqentapas wañusqata tupaykunqa chayqa, inti jaykuykaman qhelli kanqa.+

32 ”Chay animalkunamanta mayqenpas ima patamanpas wañusqa urmaykunqa chayqa, qhellin chayqa kanqa. K’ullumanta ruwasqa serviciomanña, p’achamanña, qaramanña, qhasqa telamanña urmaykunqa chaypas, qhellin chayqa kanqa. Usasqaykichis mayqen serviciomanña urmaykunqa chaypas, unupin chay serviciotaqa maqchinkichis. Inti jaykuykaman chayqa qhelli kanqa, chaymantañan limpio kanqa. 33 T’uru p’uyñumanchus urmaykun chayqa, p’akinkichismi chay p’uyñutaqa; imaña chaypi kasharqan chaypas qhellin chayqa kanqa.+ 34 Chay p’uyñupi unu karqan chayqa, chay unuta ima mijunamanpas jich’aykuqtinkuqa qhellin chay mijunaqa kanqa; ima tomanapas chay p’uyñupi karqan chayqa, qhellin kanqa. 35 Ima patamanña chay wañusqa animalkuna urmaykunqa chaypas qhellin kanqa. Hornomanña q’onchamanña urmaykunqa chaypas thuninkichismi. Qhellin chaykunaqa kanqa, manañan jap’inkichisñachu. 36 Pujyumanpas, pozomanpas urmaykunqa chayqa, manan chay pujyupas ni pozopas qhellichu kanqa; chay wañusqa animalta orqoqmi ichaqa qhelli kanqa. 37 T’akanapaq mujumanchus urmaykunqa chayqa, manan chay mujuqa qhellichu kanqa. 38 Ichaqa unuwan jich’aykusqa mujumanchus chay wañusqa animalkunamanta mayqenpas urmaykunman chayqa, qhellin chay mujuqa kanqa.

39 ”Mijuna animalmanta mayqenpas wañunqa chayqa, pipas chay wañusqa animalta tupaykuqqa inti jaykuykaman qhelli kanqa.+ 40 Pipas chay wañusqa animalpa aychanta mijunqa chayqa, p’achantan t’aqsanqa, inti jaykuykamataqmi qhelli kanqa.+ Chay animalta apaqpas p’achantan t’aqsanqa, inti jaykuykamataqmi qhelli kanqa. 41 Amapunin askhanpi puriq juch’uy animalkunataqa mijunkichischu, millakunkichismi chaykunataqa.+ 42 Chay juch’uy animalkunamantaqa aman mijunkichischu suchuq kaqkunata, tawa chakiyoq kaqkunata, ni askha chakiyoq kaqkunatapas. Millakunkichismi chaykunataqa.+ 43 Aman mijunkichischu chay juch’uy animalkunataqa, mana chayqa millakunamanmi tukuwaqchis. Amapunin chaykunawanqa qhellichakunkichischu.+ 44 Noqaqa Diosniykichis Jehová Diosmi kani.+ Qankunaqa limpion kanaykichis ch’uyataqmi kanaykichispas+ noqa Diosniykichis ch’uya kasqayrayku.+ Chhaynaqa amapunin askhanpi puriq ima juch’uy animalwanpas qhellichakunkichischu. 45 Noqaqa Egiptomanta orqomuqniykichis Jehová Diosmi kani, noqan qankunata orqomurqaykichis Diosniykichis kasqayta rikuchinaypaq.+ Qankunaqa ch’uyan kanaykichis+ noqa ch’uya kasqayrayku.+

46 ”Chaykunan kanqa jallp’api puriq animalkunamanta, phalaq animalkunamanta, unupi tiyaq animalkunamanta, askhanpi puriq juch’uy animalkunamantapas kamachikuykuna. 47 Chay kamachikuykunawanmi yachankichis mayqenchus limpio mayqentaqchus qhelli chayta, mayqenchus mijunapaq mayqentaqchus mana mijunapaq chaytapas, nispa”.+

12 Jehová Diosmi Moisesta nirqan: 2 “Israel runakunata niy: Mayqen warmipas onqoq kaspa juj qhari wawata onqokunqa chayqa, qanchis p’unchaymi qhelli kanqa. Killanwan kasqan p’unchaykunapi jinan qhelli kanqa.+ 3 Pusaq kaq p’unchaypitaq chay wawaq qhari kaynin qaracha kuchusqa kanqa.+ 4 Chay warmiqa kinsa chunka kinsayoq p’unchaytawanmi yawarninmanta ch’uyanchakunqa. Manan Diospaq ima t’aqasqatapas tupaykunqachu, manataqmi yupaychana karpamanpas qayllaykunqachu. Ch’uyanchakunan p’unchaykuna junt’akunankaman chhayna kanqa.

5 ”Warmi wawatachus onqokunqa chayqa chunka tawayoq p’unchaymi payqa qhelli kanqa. Killanwan kasqan p’unchaykunapi jinan payqa qhelli kanqa. Chaymantapas soqta chunka soqtayoq p’unchaytawanraqmi payqa yawarninmanta ch’uyanchakunqa. 6 Ch’uyanchakunan p’unchaykuna junt’akuqtinmi payqa qhari wawayoqña warmi wawayoqña kaspapas, watayoq orqo ovejata malqo* palomatawan otaq kukuli urpitawan tupana karpa jaykunaman apamunqa, chaytan sacerdoteman qonqa. Ovejan kanqa ruphachina ofrendapaq,+ malqo palomataq otaq kukuli urpitaq kanqa jucha pampachay ofrendapaq. 7 Chaytan sacerdoteqa Jehová Diosman jaywanqa chay warmiq juchan pichasqa kananpaq, chhaynapin payqa yawar apayninmanta ch’uyanchasqa kanqa. Chaymi kanqa qhari wawatapas warmi wawatapas onqokuq warmipaq kamachikuy. 8 Manachus juj ovejaman aypanqa chayqa, iskay kukuli urpita otaq iskay malqo palomatan apamunqa.+ Jujninmi kanqa ruphachina ofrendapaq juj kaqtaq kanqa jucha pampachay ofrendapaq. Chaytan sacerdoteqa jaywanqa chay warmiq juchan pichasqa kananpaq, chhaynapin payqa ch’uya kapunqa, nispa”.

13 Jehová Diosmi Moisesta Aarontawan nirqan: 2 “Piqpa cuerponpipas rijurinman ima punkipas, ima khirkipas, ima k’anchashaqpas chayqa, yaqapaschá chayqa lepra* onqoy+ kashanman. Chhayna kaqtinqa chay runatan pusamunqaku sacerdote Aaronman otaq mayqen sacerdote churinmanpas.+ 3 Sacerdoten allinta qhawanqa chay runaq cuerponpi imachus rijurishan chayta. Chay partepi pelokunachus yuraq kanqa, aychanpas ukhuman jaykusqa jinachus rikukunqa chayqa, lepra onqoymi chayqa. Chayta qhawaspan sacerdoteqa lliupa uyarisqan willanqa chay runaqa qhelli kasqanta. 4 Chay k’anchashaq aychachus yuraq kanqa, manataq aycha qaranpas ukhuman jaykusqa jinachu rikukunqa, nitaq chay partepi pelokunapas yuraqchu kanqa chayqa, qanchis p’unchaymi sacerdoteqa chay runata sapaqman t’aqanqa.+ 5 Qanchis kaq p’unchaypin sacerdoteqa chay runaq cuerponta jujmanta qhawanqa. Cuerponpi imapas rijurisqanchus kaqlla kashanman manataqchus mast’arikunmanpas chayqa, qanchis p’unchaytawanmi sacerdoteqa chay runata t’aqanqa.

6 ”Qanchis kaq p’unchaypin sacerdoteqa jujmanta chay runaq cuerponta qhawanqa. Chinkapurqanchus chay imachus rijurisqan, manataqchus cuerponpipas mast’arikurqan chayqa, lliupa uyarisqanmi sacerdoteqa willanqa chay runa limpio kasqanta.+ Cuerponpi chay rijurisqanqa khirkillan karqan. Chay runataq p’achanta t’aqsanqa, jinaspa ch’uya kapunqa. 7 Limpio kasqanta sacerdote willasqan qhepamanchus chay runaq cuerponpi jujmanta khirki rijurinman, jinaspa mast’arikunman chayqa, jujmantan chay runaqa sacerdoteman rinqa. 8 Sacerdotetaq chayta qhawanqa. Khirkichus cuerponpi mast’arisqa kanqa chayqa, lliupa uyarisqanmi sacerdoteqa willanqa chay runa qhelli kasqanta. Lepra onqoyniyoqmi chay runaqa kashan.+

9 ”Pipas lepra onqoyniyoq rijurinqa chayqa, sacerdotemanmi apanqaku. 10 Paytan sacerdoteqa qhawanqa.+ Cuerponpi may partechus yuraq punkisqa kashanman, chaypi pelokunapas yuraqchus kashanman, llagapas kashanmanchus chayqa,+ 11 mana thaniy atiq lepra onqoymi chay runataqa jap’ishan. Sacerdoteqa lliupa uyarisqanmi willanqa chay runa qhelli kasqanta. Manañan t’aqanqapaschu;+ qhellin chay runaqa kashan. 12 Ichaqa lliutachus chay runata lepra onqoy tukunqa, umanmanta chakinkamachus jap’inqa, sacerdoteq maykama rikuy atisqanpipas chhaynachus kanqa chayqa, 13 allinta qhawaspan sacerdoteqa lliupa uyarisqan willanqa chay runa limpio kasqanta.* Llapa cuerpontaq yuraq kashanman chayqa, ch’uyan chay runaqa kanqa. 14 Ichaqa cuerponpi llaga rijurinqa chayqa, qhellin chay runaqa kanqa. 15 Sacerdoten qhawanqa chay llagata, jinaspa lliupa uyarisqan willanqa chay runa qhelli kasqanta.+ Chay llagaqa lepra onqoymi, qhellin chayqa.+ 16 Chay llagachus yuraqman tukunqa chayqa, jujmantan sacerdoteman jamunqa. 17 Sacerdotetaq chayta qhawanqa.+ Chay llagata yuraqta tarinqa chayqa, lliupa uyarisqanmi sacerdoteqa willanqa chay runa limpio kasqanta. Chay runaqa ch’uyan kashan.

18 ”Piqpa aycha qaranpipas lleqthi* rijurinman, chaymantataq thanipunman, 19 ichaqa chay lleqthiq kasqanpi yuraq punki rijurinman otaq chay parte pukaniraq k’anchaq yuraqman tukunman chayqa, sacerdotemanmi chay runaqa rinqa. 20 Sacerdotetaq chayta qhawanqa,+ aycha qaranchus ukhuman jaykusqa jina rikukunman, chaypi pelokunapas yuraqchus kashanman chayqa, lliupa uyarisqanmi sacerdote willanqa chay runa qhelli kasqanta. Lepra onqoymi lleqthiq kasqanpi rijurin. 21 Ichaqa manachus sacerdote ima yuraq pelotapas tarinqa, manataq aycha qaranpas ukhuman jaykusqa jinachu kanqa, aswanpas thanipuq jinachus kanqa chayqa, qanchis p’unchaymi sacerdoteqa t’aqanqa.+ 22 Cuerponpi k’anchashaq partechus mast’arikushanman chayqa, lliupa uyarisqanmi sacerdoteqa willanqa chay runa qhelli kasqanta. Juj onqoymi chay runapi kashan. 23 Ichaqa kaqllachus kashanman manataqchus mast’arikunman chayqa, lleqthiq punkichisqallanmi chayqa. Sacerdotetaq lliupa uyarisqan willanqa chay runaqa limpio kasqanta.+

24 ”Pipas aycha qaranta ruphachikunman, ruphachikusqan llullu aychataq pukaniraq yuraq k’anchaqman otaq yuraqman tukunman chayqa, 25 sacerdoten chayta qhawanqa. Chaypi pelokunachus yuraq kanqa, aycha qarapas ukhuman jaykusqa jinachus rikukunqa chayqa, lepra onqoymi ninaq ruphasqanpi kashan. Sacerdoten lliupa uyarisqan willanqa chay runaqa qhelli kasqanta. Lepra onqoymi chay runapi kashan. 26 Ichaqa manachus sacerdote ima yuraq pelotapas tarinqa chay k’anchashaq partepi, manataq aycha qaranpas ukhuman jaykusqa jinachu rikukunqa, chinkapuq jinachus kanqa chayqa, qanchis p’unchaytan sacerdoteqa chay runata t’aqanqa.+ 27 Qanchis kaq p’unchaypin sacerdoteqa chay runaq cuerponta qhawanqa. Sichus chay k’anchashaq parte mast’arikurqan chayqa, lliupa uyarisqanmi sacerdoteqa willanqa chay runa qhelli kasqanta. Lepra onqoywanmi chay runaqa kashan. 28 Chay k’anchashaq partechus kaqlla kashanman, manataq mast’arikunmanchu, thanipushanmantaq chayqa, lliupa uyarisqanmi sacerdoteqa willanqa chay runaqa limpio kasqanta. Chay k’anchashaq parteqa ruphachikusqanmanta punkisqallanmi.

29 ”Piqpa umanpipas otaq k’akinpipas imapas llaga jina jatarinman chayqa, 30 sacerdoten chayta allinta qhawanqa.+ Chay partechus ukhuman chinkaykusqa jina rikukunqa, chaypi pelokunapas q’elluchus kanman, pisillataq kanmanpas chayqa, lliupa uyarisqanmi sacerdoteqa willanqa chay runa qhelli kasqanta. Chayqa uma qaranpi otaq sunkhanpi millay onqoymi, umanpi otaq k’akinpi lepra onqoymi. 31 Ichaqa manachus ukhuman jaykusqa jinachu rikukunman, manataq chay partepipas yana pelokuna kanmanchu chayqa, qanchis p’unchaytan sacerdoteqa chay runata t’aqanqa.+ 32 Qanchis kaq p’unchaypin sacerdoteqa chay runata qhawanqa. Sichus chay runaq llagan mana mast’arisqachu kashanman, q’ellu pelokunapas mana kanmanchu, manataq ukhuman jaykusqa jinapaschu rikukunman chayqa, 33 chujchanta otaq sunkhantan chay runaqa k’isukunqa, ichaqa manan llagaq kasqan partetaqa k’isukunqachu. Chaymantataq sacerdoteqa qanchis p’unchayta chay runata t’aqanqa.

34 ”Qanchis kaq p’unchaypin sacerdoteqa jujmanta qhawanqa llagaq kasqan parteta. Sichus chay runaq llagan uma qaranpi otaq sunkhanpi mana mast’arisqachu kashanman, manataq ukhuman jaykusqa jinapaschu rikukunman chayqa, lliupa uyarisqanmi sacerdoteqa willanqa chay runa limpio kasqanta, chay runataq p’achanta t’aqsanqa, chhaynapitaq ch’uya kanqa. 35 Ichaqa limpio nisqa kasqan qhepamanchus chay llaga jujmanta rijurinman, mast’arikunmantaq chayqa, 36 sacerdoten chayta allinta qhawanqa. Sichus chay llaga mast’arisqa kashanman chayqa, manañan sacerdoteqa q’ellu pelotaqa maskhanqañachu. Chay runaqa qhellin kashan. 37 Ichaqa chay llaga mana mast’arisqachu kashanman, chay partepitaq yana pelo wiñashanman chayqa, thanisqañan chayqa kashan. Chay runaqa limpion kashan, chaymi sacerdoteqa lliupa uyarisqan willanqa chay runa limpio kasqanta.+

38 ”Piqpa aycha qaranpipas juj parte yuraq k’anchashaqman tukunman chayqa, 39 sacerdoten chayta allinta qhawanqa.+ Chay k’anchashaq partechus yuraqniraq kashanman chayqa, mana imanakuq khirki qhopukunallan chaypi kashan. Limpion chay runaqa.

40 ”Piqpa umanpas p’aqlaman tukunman chayqa, manan chay runaqa qhellichu kanqa, limpiollan kanqa. 41 Mat’i chujchallanchus urmanman jinaspa chay partella p’aqla kanman chaypas, limpiollan payqa kanqa. 42 Ichaqa p’aqla umanpipas otaq p’aqla mat’inpipas pukaniraq yuraq llaga rijurinqa chayqa, lepra onqoymi p’aqlanpi jatarishan. 43 Sacerdoten chayta allinta qhawanqa. Uma qaranpi otaq p’aqla mat’inpi llagachus pukaniraq yuraq kashanman, lepra jinataqchus rikukunmanpas chayqa, 44 lepra onqoyniyoqmi chay runaqa kashan, qhellitaqmi kashanpas. Llapa runaq uyarisqanmi sacerdoteqa willanqa chay runa qhelli kasqanta. Umanpi chay onqoy kasqanraykun chayta ruwanqa. 45 Pipas lepra onqoyniyoqqa p’achan llik’isqa uman t’ampayasqan purinqa. Chaymantapas siminta tapakuspan qaparinqa: ¡Qhellin kani! ¡Qhellin kani!, nispa. 46 Qhaliyanan p’unchaykaman chay runaqa qhelli kanqa. Qhellitaq kashan chayqa jujkunamanta t’aqasqan tiyanqa, karpa-karpa jawapitaqmi tiyanqapas.+

47 ”Yaqapaschá lepra onqoy rijurinman ima p’achapipas, willmamanta ruwasqa p’achapi, lino p’achapi, 48 allwisqa q’aytupi, minipi, qarapi, qaramanta ruwasqa cosaspipas. 49 Yaqapaschá p’achapi, qarapi, allwisqa q’aytupi, minipi, qaramanta ruwasqa cosaspipas rijurinman q’omerniraq q’ellu qhoqayasqa otaq pukaniraq qhoqayasqa. Chhayna kaqtinqa lepra onqoymi chayqa, sacerdotemanmi chayta apankichis. 50 Sacerdoten chayta allinta qhawanqa, jinaspa qanchis p’unchay waqaychanqa.+ 51 Qanchis kaq p’unchaypin payqa jujmanta qhawallanqataq. Chay qhoqayasqachus p’achapipas, allwisqa q’aytupipas, minipipas, qarapipas, qaramanta ima ruwasqapipas mast’arisqa kashanman chayqa, sinchi millay lepran chayqa. Lepra onqoytaq chaykunamanta mayqenpipas kashanman chayqa, qhellin chayqa kanqa.+ 52 Sacerdoteqa kanapunqan chayta. P’achaña, allwisqa q’aytuña, willma q’aytu miniña, lino q’aytu miniña, qara cosasña kanqa chaypas llapantan kananqa. Millay lepra onqoymi chaypi kashan.

53 ”Ichaqa chay p’achapi, allwisqa q’aytupi, minipi, qarapi qhoqayasqachus kaqlla kashanman manataq mast’arikunmachu chayqa, 54 sacerdoten chayta allinta t’aqsachinqa, chaymantataq qanchis p’unchaytawan waqaychanqa. 55 Chay qhepamanmi sacerdoteqa jujmanta qhawanqa allinta t’aqsachispa waqaychasqanta. Chay qhoqayasqachus kaqlla kanqa chayqa, manaña mast’arikurqanchu chaypas qhellin chayqa kanqa, chaymi chayqa kanasqa kanqa. Jawanña ukhunña ismusqa kanqa chaypas kanakapunqan chaytaqa.

56 ”Ichaqa chay qhoqayasqachus allin t’aqsasqa kasqan qhepaman chinkashanman chayqa, sacerdoten maypichus qhoqayasqa kasharqan chay parteta k’utuchinqa. P’achaña, qaraña, allwisqa q’aytuña, miniña kanqa chaypas chaytan ruwanqa. 57 Chay p’achapichus, allwisqa q’aytupichus, minipichus, qarapichus juj partepiñataq qhoqayay rijurinqa chayqa, mast’arikushanmi chay onqoyqa. Chaykunamanta mayqenpiña mast’arikushan chaypas, kanasqan chayqa kanqa.+ 58 Ichaqa chinkapunqachus chay qhoqayay p’achamantapas, allwisqa q’aytumantapas, minimantapas, qaramantapas chayqa, jujmantan t’aqsasqa kanqa, chhaynapin limpio kapunqa.

59 ”Chaymi kanqa willmamanta ruwasqa p’achapipas, lino p’achapipas, allwisqa q’aytupipas, minipipas, qarapipas rijuriq lepra onqoypaq kamachikuy. Chay kamachikuyman jinan qhellipas limpiopas kanqa”, nispa.

14 Jehová Diosmi Moisesta nillarqantaq: 2 “Kaymi kanqa lepra onqoyniyoq runata ch’uyanchanapaq kamachikuy. Chay ch’uyanchakusqan p’unchaymi payta sacerdoteman pusamunqaku.+ 3 Sacerdoten karpa-karpa jawaman rispa chay runata qhawanqa. Chay runachus lepra onqoymanta qhaliña kanqa chayqa, 4 sacerdoten kamachinqa phalaq ch’uya animalkunamanta iskayta kausashaqllata apamunanpaq, kamachillanqataqmi cedro k’aspita, k’anchaq puka q’aytuta, hisopo plantata apamunanpaqpas; chaykunawanmi sacerdoteqa chay runata ch’uyanchanqa.+ 5 Chaymantataq sacerdoteqa pujyu unuyoq t’uru mankapi jujnin phalaq animalpa kunkanta p’itichinqa. 6 Jinaspa juj kaq phalaq animalta, cedro k’aspita, k’anchaq puka q’aytuta, hisopo plantatawan jap’ispa chay pujyu unuyoq manka ukhuman challpunqa, maypichus jujnin phalaq animalpa yawarninta sut’uchikurqan chay mankaman. 7 Chay yawarwanmi sacerdoteqa ch’uyanchakuq runata qanchis kutita ch’aqchunqa, jinaspa lliupa uyarisqan willanqa limpio kasqanta, kausashaq phalaq animaltataq campoman kacharipunqa.+

8 ”Chaymantataq ch’uyanchakuq runaqa p’achanta t’aqsakunqa, k’isukunqan chujchantapas cuerponpi llapa pelontapas, chaymantapas bañakunqan, chhaynapin ch’uya kapunqa. Chaykuna qhepamanñan karpa-karpa ukhumanqa jaykunqa, ichaqa manan karpanmanqa jaykunqaraqchu, aswanmi jawallapiraq qanchis p’unchay tiyanqa. 9 Qanchis kaq p’unchaypitaq k’isukunqa llapa chujchanta, sunkhanta, cejasninkunata ima. Llapanta k’isukuspataq p’achanta t’aqsakunqa, bañakunqa ima, chhaynapin ch’uya kapunqa.

10 ”Pusaq kaq p’unchaytaq chay runaqa mana imanasqa iskay malta orqo ovejakunata, mana imanasqa watayoq china ovejatawan apamunqa;+ apamullanqataqmi jak’u ofrendapaq aceitewan tupachisqa kinsa kilo kuskan* allin jak’utapas*+ jinallataq juj cuarta* aceitetapas.+ 11 Ch’uyanchaq sacerdoten chay runata ofrendankunatawan Jehová Diospa ñaupanman tupana karpa jaykunaman qayllaykachinqa. 12 Sacerdoten jujnin orqo ovejata jap’ispa juj cuarta aceitetawan kuskata juchaman urmasqamanta ofrendapaq jaywanqa,+ chaytan maywisqa ofrendata jina Jehová Diospa ñaupanpi maywinqa.+ 13 Chaymantataq chay orqo ovejata ñak’anqa. Chaytaqa ñak’anqa maypichus jucha pampachay ofrendatapas, ruphachina ofrendatapas ñak’akun chay ch’uya partepin.+ Jucha pampachay ofrendapas juchaman urmasqamanta ofrendapas sacerdotepaqmi.+ Chay ofrendakunaqa ch’uyay-ch’uyaymi.+

14 ”Juchaman urmasqamanta ofrendapaq ñak’asqa uywaq yawarninwanmi sacerdoteqa ch’uyanchakuq runaq paña ninrinpa ura puntanta llusiykunqa. Llusiykullanqataqmi paña makinpa mama dedontapas, paña chakinpa mama dedontapas. 15 Chay runaq apamusqan cuarta aceitetan+ sacerdoteqa lloq’e makin qochaman* juj chhikanta jich’aykunqa. 16 Chay lloq’e makinpi kaq aceitemanmi sacerdoteqa paña dedonta challpuykunqa, chaytataq qanchis kutita Jehová Diospa ñaupanpi ch’allanqa. 17 Chaymantataq sacerdoteqa makinpi puchuq aceitewan llusiykunqa ch’uyanchakuq runaq paña ninrinpa ura puntanta. Llusiykullanqataqmi paña makinpa mama dedontapas, paña chakinpa mama dedontapas. Juchaman urmasqamanta ofrenda animalpa yawarnin patamanmi chayta llusinqa. 18 Makinpi wakin puchuq aceitetataq sacerdoteqa ch’uyanchakuq runaq umanman sut’uykachipunqa, chhaynatan sacerdoteqa ruwanqa chay runaq juchan Jehová Diospa ñaupanpi pichasqa kananpaq.+

19 ”Chaymantataq sacerdoteqa jucha pampachay ofrendapaq uywata ñak’anqa,+ chaywanmi ch’uyanchakuq runaq juchan pichasqa kanqa. Chay qhepamantaq ruphachina ofrendapaq uywata ñak’anqa. 20 Chay ruphachina ofrendatan sacerdoteqa jak’u ofrendatawan+ altar patapi jaywanqa. Chhaynatan sacerdoteqa ruwanqa chay runaq juchan pichasqa kananpaq,+ chhaynapin chay runaqa ch’uya kapunqa.+

21 ”Ichaqa chay runachus wajcha* kanman, pisitaq imanpas kanman chayqa, juj malta orqo ovejatan apamunqa juchaman urmasqamanta ofrendapaq. Chay ovejan kallanqataq chay runaq juchan pichasqa kananpaq maywisqa ofrendapaqpas. Apamullanqataqmi jak’u ofrendapaq aceitewan tupachisqa juj kilo* allin jak’uta, juj cuarta aceitetapas. 22 Aypasqanman jinan apamullanqataq iskay kukuli urpitapas otaq iskay malqo* palomatapas. Jujninmi kanqa jucha pampachay ofrendapaq, juj kaqtaq kanqa ruphachina ofrendapaq.+ 23 Pusaq kaq p’unchaymi+ chay runaqa llapa chaykunata Jehová Diospa ñaupanman, tupana karpa jaykunaman apamunqa, jinaspa sacerdoteman qonqa, chhaynapi ch’uya nisqa kananpaq.+

24 ”Sacerdoten malta orqo ovejata jap’ispa juj cuarta aceitetawan kuskata juchaman urmasqamanta ofrendapaq jaywanqa,+ chaytan maywisqa ofrendata jina Jehová Diospa ñaupanpi maywinqa.+ 25 Chaymantataq juchaman urmasqamanta ofrendapaq malta orqo ovejata ñak’anqa. Chay ovejaq yawarninwanmi sacerdoteqa ch’uyanchakuq runaq paña ninrinpa ura puntanta llusiykunqa. Llusiykullanqataqmi paña makinpa mama dedontapas, paña chakinpa mama dedontapas.+ 26 Chaymantataq sacerdoteqa lloq’e makin qochaman juj chhikan aceiteta jich’aykunqa.+ 27 Chay lloq’e makinpi aceitetan payqa paña maki dedonwan juj chhikanta Jehová Diospa ñaupanpi ch’allanqa, qanchis kutitan chayta ruwanqa. 28 Chaymantataq sacerdoteqa makinpi kaq aceitewan llusiykunqa ch’uyanchakuq runaq paña ninrinpa ura puntanta. Llusiykullanqataqmi paña makinpa mama dedontapas, paña chakinpa mama dedontapas. Juchaman urmasqamanta ofrenda animalpa yawarnin patamanmi chayta llusinqa. 29 Makinpi wakin puchuq aceitetataq sacerdoteqa ch’uyanchakuq runaq umanman sut’uykachipunqa, chhaynatan sacerdoteqa ruwanqa chay runaq juchan Jehová Diospa ñaupanpi pichasqa kananpaq.

30 ”Chaymantataq sacerdoteqa ch’uyanchakuq runa atisqanman jina apamusqan jujnin kukuli urpita otaq jujnin malqo palomata jaywanqa.+ 31 Jujnintan jaywanqa jucha pampachay ofrendapaq, jujnintataq ruphachina ofrendapaq.+ Chaytaqa jak’u ofrendatawan kuskatan jaywanqa. Chhaynatan sacerdoteqa ruwanqa ch’uyanchakuq runaq juchan Jehová Diospa ñaupanpi pichasqa kananpaq.+

32 ”Chaymi kanqa lepra onqoyninmanta qhaliyapuq wajcha runapaq kamachikuy. Chay kamachikuyman jinan payqa ruwanqa, chhaynapi ch’uya nisqa kananpaq”, nispa.

33 Chaymantataq Jehová Diosqa Moisesta Aarontawan nirqan: 34 “Qankunaman qosaq chay Canaán jallp’api+ tiyashaqtiykichischus piqpa wasintapas lepra onqoywan+ jap’ichisaq chayqa, 35 wasiyoq runan sacerdoteman rispa ninqa: Imachá wasiypi qhelli jina jatarishan, nispa. 36 Sacerdotetaq payta kamachinqa wasinta qasichinanpaq chhaynapi qhawaq jaykunanpaq, mana chayqa wasipi llapa imaymanan qhelli nisqa kanman. Chaymantan sacerdoteqa chay wasita jaykunqa, 37 jinaspa allinta qhawanqa maypichus chay qhelli lloqsishan chayta. Chay partechus mijusqa jina t’oqo-t’oqo kashanman, q’elluniraq q’omerchus otaq pukaniraqchus kashanman, ukhuman mijusqa jinachus kashanmanpas chayqa, 38 sacerdoten chay wasimanta lloqsimuspa qanchis p’unchayta wisq’anqa.+

39 ”Qanchis kaq p’unchaypin sacerdoteqa jujmanta chay wasita qhawallanqataq. Chay qhellichus astawan wasi perqapi mast’arikurqan chayqa, 40 chay perqa rumikunatan sacerdoteqa orqochinqa, jinaspa llaqta jawapi qhelli nisqa ladoman apachinqa. Chaypin chay rumikunata wijch’unqaku. 41 Chaymantataq wasi perqata allinta thupachinqa. Chay thupasqanku yesotapas jallp’atapas llaqta jawapi qhelli nisqa ladomanmi wijch’uchimunqa. 42 Rumi orqosqankumanqa juj rumikunatan churachipunqa, chaytataq t’uruwan llut’achinqa.

43 ”Ichaqa rumita khakaspa wajmanta llut’asqanku qhepamanchus, wasitapas thupasqanku qhepamanchus jujmanta chay qhelli rijurinqa chayqa, 44 sacerdoten chay wasiman jaykuspa allinta qhawanqa. Chay qhellichus chay wasipi mast’arikurqan chayqa, sinchi millay lepran+ chay wasipi kashan. Qhellin chay wasiqa kanqa. 45 Sacerdoteqa llapantan chay wasita thunichinqa. Llapantan ruminkunatapas, k’aspinkunatapas, yesontapas, jallp’antapas orqochinqa, chaykunatataq llaqta jawapi qhelli nisqa ladoman apachinqa, chaypin wijch’umunqaku.+ 46 Sacerdoteq wisq’asqan p’unchaykuna+ pipas chay wasiman jaykunqa chayqa, inti jaykuykaman qhelli kanqa.+ 47 Pipas chay wasipi puñunqapas mijunqapas chayqa, p’achantan t’aqsanqa.

48 ”Ichaqa chay wasi jujmanta llut’asqa kasqan qhepaman sacerdote jaykuspa chay qhellita mana mast’arisqatachu tarinqa chayqa, lliupa uyarisqanmi payqa willanqa chay wasi limpio kasqanta. Manañataq chay qhelli kanchu chayqa limpioñan chay wasiqa kashan. 49 Chay wasita ch’uyanchananpaqmi sacerdoteqa iskay phalaq animalkunata, cedro k’aspita, k’anchaq puka q’aytuta, hisopo plantatawan oqarinqa.+ 50 Jujnin phalaq animalpa kunkantan pujyu unuyoq t’uru manka patapi p’itinqa. 51 Chaymantataq cedro k’aspita, hisopo plantata, k’anchaq puka q’aytuta, kausashaq phalaq animaltawan chay pujyu unuyoq manka ukhuman challpunqa, maypichus jujnin phalaq animalpa yawarninta sut’uchikurqan chay mankaman. Chay yawarwanmi wasitapas qanchis kutita ch’aqchunqa.+ 52 Phalaq animalpa yawarninwan, pujyu unuwan, kausashaq phalaq animalwan, cedro k’aspiwan, hisopo plantawan, k’anchaq puka q’aytuwan iman sacerdoteqa chay wasita ch’uyanchanqa. 53 Kausashaq phalaq animaltaqa llaqta jawaman apaspan sacerdoteqa campopi kacharipunqa, chhaynatan payqa chay wasita limpianqa, chhaynapin wasiqa ch’uya kapunqa.

54 ”Chaymi kanqa lepra onqoypaq kamachikuy. Chay onqoy uma qarapiña, k’akipiña,+ 55 p’achapiña,+ wasipiña+ rijurinqa chaypas, 56 punkisqapiña, khirkipiña, k’anchashaq aycha qarapiña rijurinqa chaypas,+ 57 kaypi kaq lepra onqoypaq kamachikuy kasqanman jinan ruwakunqa.+ Chayman jinan qhelli nisqapas limpio nisqapas kanqa”,+ nispa.

15 Jehová Diosmi Moisesta Aarontawan nillarqantaq: 2 “Israel runakunata nimuychis, Diosmi nin: Pi runaqpas qhari kayninmanta q’ea lloqsimunqa chayqa, qhellin chay runaqa kanqa.+ 3 Q’ea lloqsimusqanraykun payqa qhelli kanqa. Chay q’ea lloqsimunqaña watakamunqaña chaypas qhellin payqa kanqa.

4 ”Maypiña chay q’ea jisp’ay onqoyniyoq runa puñunqa chaypas qhellin chay puñunaqa kanqa, maypiña tiyaykunqa chaypas qhellin chay tiyanapas kanqa. 5 Pipas chay puñunata tupaykuqqa p’achantan t’aqsanqa, bañakunqa iman, inti jaykuykamataqmi qhelli kanqa.+ 6 Pipas chay runaq tiyasqanpi tiyaykuqpas p’achantan t’aqsakunqa, bañakunqa iman, inti jaykuykamataqmi qhelli kanqa. 7 Chay onqoyniyoq runata tupaykuqpas p’achantan t’aqsakunqa, bañakunqa iman, inti jaykuykamataqmi qhelli kanqa. 8 Chay runa mayqen limpio kashaq runamanpas thoqaykunqa chayqa, p’achantan chay thoqaykusqa runaqa t’aqsakunqa, bañakunqa iman, inti jaykuykamataqmi qhelli kanqa. 9 Chay onqoyniyoq runaq sillakusqan monturapas qhellin kanqa. 10 Chay runaq imapipas tiyasqanta pipas tupaykunqa chayqa, inti jaykuykaman qhelli kanqa. Tiyasqanta apaqpas p’achantan t’aqsakunqa, bañakunqa iman, inti jaykuykamataqmi qhelli kanqa. 11 Chay q’ea jisp’ay onqoyniyoq runachus+ makinta mana maqchikuspa pitapas tupaykunqa chayqa, chay tupaykusqan runaqa p’achantan t’aqsakunqa, bañakunqa iman, inti jaykuykamataqmi qhelli kanqa. 12 Chay runa ima t’uru mankatapas llamiykunqa chayqa, p’akisqan kanqa chay mankaqa. Ima k’ullu cosastapas llamiykunqa chayqa, unuwan maqchisqan kanqa chay cosasqa.+

13 ”Chay runaq q’ea jisp’ay onqoyninchus thanipunqa, jinaspa limpio kapunqa chayqa, qanchis p’unchaymi payqa ch’uyanchakunqa. P’achantan t’aqsakunqa, pujyu unuwan iman bañakunqa, chhaynapin payqa ch’uya kapunqa.+ 14 Pusaq kaq p’unchaytaq noqa Jehová Diospa ñaupayman tupana karpa jaykunaman iskay kukuli urpita otaq iskay malqo* palomata apamunqa,+ chaytan sacerdoteman qonqa. 15 Jujnintan sacerdoteqa jaywanqa jucha pampachay ofrendapaq, juj kaqtataq ruphachina ofrendapaq. Chaywanmi sacerdoteqa noqa Jehová Diospa ñaupaypi chay runata qhelli kayninmanta limpianqa.

16 ”Pi qhariqpas mujun lloqsinman chayqa, unuwanmi cuerponta bañakunqa. Inti jaykuykamataqmi payqa qhelli kanqa.+ 17 Mayqen p’achanpas jap’isqan ima qarapas mujunwan qhellichasqa kashan chayqa t’aqsanqan, inti jaykuykamataqmi chayqa qhelli kanqa.

18 ”Juj qharichus warminwan kanqa, jinaspa mujun lloqsimunqa chayqa, iskayninkun bañakunqaku inti jaykuykamataq qhelli kanqaku.+

19 ”Mayqen warmipas killanwan kanqa chayqa, qanchis p’unchaymi qhelli kanqa.+ Imataña tupaykunqa chaypas inti jaykuykaman chay tupaykusqan cosasqa qhelli kanqa.+ 20 Killanwan kashaspa maypiña siriykunqa* chaypas, qhellin chay siriykusqanqa kanqa; maypiña tiyaykunqa chaypas qhellin chay tiyasqanqa kanqa.+ 21 Pipas chay warmiq puñunanta tupaykunqa chayqa, p’achantan t’aqsakunqa, bañakunqa iman, inti jaykuykamataqmi qhelli kanqa. 22 Pipas chay warmiq imapi tiyasqantapas tupaykunqa chayqa, p’achantan t’aqsakunqa, bañakunqa iman, inti jaykuykamataqmi qhelli kanqa. 23 Piña chay warmiq puñunanta imapi tiyasqantapas tupaykunqa chayqa, inti jaykuykaman qhelli kanqa.+ 24 Pi qharipas chay warmiwan puñunman, chhaynapitaq chay warmiq yawarninwan qhellichakunman chayqa,+ qanchis p’unchaymi chay runaqa qhelli kanqa ,maypiña puñunqa chaypas qhellin chay puñunapas kanqa.

25 ”Pi warmipas manaraq killan+ jamunan tiempopi kashaspa askha p’unchay yawar apaywan kanqa,+ otaq killan jamunan p’unchaykunamanta aswan askha p’unchaykunatawan jamunqa chayqa, killan jamunan p’unchaykunapi jinan payqa qhelli kanqa, yawar apaynin thaninankaman chhayna kanqa. 26 Yawar apaywan kasqan p’unchaykunapi ima puñunapipas puñunqa chayqa, qhellin chay puñunaqa kanqa,+ imapipas tiyaykunqa chaypas qhellin chay tiyanaqa kanqa, killanwan kasqan p’unchaykunapi jinan chayqa kanqa. 27 Pipas chaykunata tupaykuqqa qhellin kanqa. P’achantan t’aqsakunqa, bañakunqa iman, inti jaykuykamataqmi qhelli kanqa.+

28 ”Yawar apayninchus thanipunqa chayqa, qanchis p’unchaytan payqa suyanqa, chay qhepamantaq ch’uya kapunqa.+ 29 Pusaq kaq p’unchaytaq iskay kukuli urpita otaq iskay malqo palomata+ tupana karpa jaykunaman apamunqa, jinaspa sacerdoteman qonqa.+ 30 Jujnintan sacerdoteqa jaywanqa jucha pampachay ofrendapaq, juj kaqtataq ruphachina ofrendapaq. Chaywanmi sacerdoteqa noqa Jehová Diospa ñaupaypi chay warmita qhelli kayninmanta limpianqa.+

31 ”Chhaynatan qankunaqa Israel runakunata ima qhellimantapas t’aqasqata kachinkichis, mana chayqa chaupinkupi kaq ch’uya karpaytan qhelli kayninkuwan qhellichankuman chhaynapitaq wañunkuman.+

32 ”Chaymi kanqa q’ea jisp’ay onqoyniyoq qharipaq, mujun lloqsimusqanwan qhellichakuq qharipaqpas kamachikuy.+ 33 Chay kamachikuymi kallanqataq killanwan kaq warmipaq,+ yawar apay onqoywan kashaq warmipaq,+ qhelli nisqa kashaq warmiwan puñuq qharipaqpas, nispa”.

16 Aaronpa iskay churinkunan wañurqanku Jehová Diosman mana respetowan qayllaykusqankumanta,+ chay qhepatan Jehová Diosqa Moisesta rimaykurqan. 2 Jehová Diosmi payta nirqan: “Wayqeyki Aaronqa manan munasqan ratuchu chaupi cortinaq+ qhepanpi ch’uyay-ch’uya cuartomanqa+ jaykumunqa, maypichus kashan rimanakuyniy arca* chaypa ñaupanmanqa, mana chayqa wañunqan.+ Noqaqa chay arcaq tapan patapin+ kashasaq phuyu chaupipi.+ Chayta payman willamuy.

3 ”Aarón ch’uyay-ch’uya cuartoman jaykunanpaq jamuspaqa jucha pampachay ofrendapaq+ malta torota, ruphachina ofrendapaq+ orqo ovejata iman apamunqa. 4 Unuwan+ bañakuspan Aaronqa ch’uya p’achawan+ churakunqa. Linomanta jatun p’achawanmi+ churakunqa, chaytataq lino chumpiwan+ watakunqa, churakunqan trusantapas.+ Umantapas uma k’uyunawanmi+ k’uyukunqa.

5 ”Aaronqa Israel runakunamantan+ chaskinqa jucha pampachay ofrendapaq iskay malta orqo cabrakunata, ruphachina ofrendapaq juj orqo ovejatawan.

6 ”Chaymantataq Aaronqa jucha pampachay ofrendapaq torota qayllaykachimunqa, chaywanmi paypas+ ayllunpas juchankumanta pichasqa kanqaku.

7 ”Chaymantataq iskaynin cabrakunata tupana karpaq ñaupanman qayllaykachimunqa, jinaspa noqa Jehová Diospa ñaupaypi sayaykachinqa. 8 Chay cabrakunatan Aaronqa sorteanqa, jujninmi kanqa noqa Jehová Diospaq, juj kaqtaq kanqa llaqta runakunaq juchanta apananpaq.* 9 Mayqenchus noqa Jehová Diospaq sorteopi+ tupawarqan chay cabratan Aaronqa jucha pampachay ofrendata jina jaywamuwanqa. 10 Jucha apananpaq sorteasqa cabratataq kausashaqllata noqa Jehová Diospa ñaupayman asuykachimunqa, chaywanmi Israel llaqta runakunaq juchan pichasqa kanqa. Chaymantataq chay cabrata ch’inneqman qatirparipunqaku llapa runakunaq juchanta apananpaq.+

11 ”Chaymantataq Aaronqa jucha pampachay ofrendapaq torota asuykachimunqa, chhaynapi paypa juchanpas ayllunpa juchanpas pichasqa kananpaq. Chay torotan Aaronqa ñak’anqa, jinaspa juchankuna pampachasqa kananpaq jaywanqa.+

12 ”Chay qhepamantaq Aaronqa noqa Jehová Diospa ñaupaypi kaq altarmanta+ sansata apamunqa, sansa apana p’uku+ junt’atan chayta apamunqa; sumaq q’apaq ñut’u inciensotataq+ iskay jaft’ayta* apamunqa, chaykunatan chaupi cortinaq+ qhepanman apaykunqa. 13 Noqa Jehová Diospa ñaupaypin+ chay inciensota sansaman churaykunqa, chay q’osñitaq rimanakuyniy+ arcaq tapanta+ pakanqa, chhaynapin payqa mana wañunqachu.

14 ”Toroq yawarnintan+ payqa Diospa rimanakuynin arcaq tapanpa ñaupanpi dedonwan ch’allanqa, inti lloqsimuy ladoman jinan chayta ruwanqa. Qanchis kutitan chay tapaq ñaupanpi ch’allanqa.+

15 ”Chaymantataq jucha pampachay ofrendapaq cabrata ñak’anqa, chaywan llaqta runakunaq juchan pampachasqa kananpaq.+ Chay yawartapas cortina+ qhepamanmi apaykunqa. Imaynatachus toroq yawarninwan ruwarqan chhaynatan chay yawarwanpas+ ruwanqa. Diospa rimanakuynin arcaq tapanpa ñaupanpin ch’allanqa.

16 ”Aaronqa ch’uyay-ch’uya cuartotawanmi ch’uyanchanqa Israel runakunaq mana allinkuna ruwasqanmanta, mana kasukuq kasqankumanta, imaymana juchankumantawan.+ Kaqtan ruwallanqataq tupana karpawanpas qhelli runakuna ukhupi kasqanrayku.

17 ”Manan pipas tupana karpamanqa jaykunqachu. Ch’uyay-ch’uya cuartopi jucha pampachay ruwanawan Aarón tukunankaman mana pipas jaykunqachu. Aaronqa paypaq, ayllunpaq,+ llapa Israel runakunapaq+ iman jucha pampachayta ruwanqa.

18 ”Chaymantataq Aaronqa lloqsimuspa noqa Jehová Diospa ñaupaypi altarman asuykunqa,+ jinaspa chay altarta ch’uyanchanqa, chaypaqmi toroq yawarninwan cabraq yawarninwan ima chay altarpi tawantin waqrakunata llusinqa. 19 Chaymantapas jujnin dedonwanmi juj chhikan yawarta qanchis kutita chay altarman ch’allanqa, chhaynatan chay altarta ch’uyanchanqa Israel runakuna qhelli kasqankuwan qhellichasqankumanta.

20 ”Ch’uyay-ch’uya cuartota, tupana karpata, altartawan+ ch’uyanchayta+ tukuspan Aaronqa kausashaq cabrata apamunqa.+ 21 Chay cabraq umanmanmi Aaronqa iskaynin makinta churaykunqa, jinaspa Israel runakunaq llapa pantasqanta, llapa mana kasukusqanta, llapa juchankutawan Diosman willanqa. Chay cabraq+ uman patamanmi llapa chay juchakunata churaykapunqa, chaymantataq chaypaq ajllasqa runawan ch’inneqman apachipunqa. 22 Chay cabran Israel runakunaq llapa juchanta+ ch’in ladoman+ apapunqa. Apaq runan chay cabrata ch’inneqman+ qatirparinqa.

23 ”Chaymantataq Aaronqa tupana karpa ukhuman jaykunqa, jinaspa ch’uyay-ch’uya cuartoman jaykunanpaq churakusqan lino p’achanta ch’utikunqa, chay p’achatataq chayllaman saqenqa. 24 Chaymantataq juj ch’uya partepi bañakunqa,+ sacerdote p’achanwan+ churakuspataq lloqsimunqa. Lloqsimuspan payqa ruphachina ofrendanta,+ llaqta runakunaq ruphachina ofrendantawan+ jaywanqa, chhaynatan ruwanqa paypa juchan, llaqta runakunaq juchanpas pichasqa kananpaq.+ 25 Jucha pampachay ofrendapaq ñak’asqan uywakunaq wirankunatan payqa altar patapi ruphachinqa.

26 ”Jucha apaq cabrata+ kacharpariq runaqa p’achantan t’aqsakunqa, bañakunqa iman; chayraqmi karpa-karpa ukhumanqa jaykumunqa.

27 ”Jucha pampachay ofrendapaq toroq yawarninta cabraq yawarnintawan ch’uyay-ch’uya cuartoman Aaronpa apaykusqan qhepamanmi, chay uywakunaq aychanta, qaranta, phusnunta ima karpa-karpa jawaman apanqaku, chaypin ruphachisqa kanqa.+ 28 Chay ruphachiq runaqa p’achantan t’aqsakunqa, bañakunqa iman; chayraqmi karpa-karpa ukhumanqa jaykunqa.

29 ”Kaytan qankunaqa sapa watan ruwankichis: Qanchis kaq killaq chunka kaq p’unchayninpin juchaykichismanta sinchi llakisqa kankichis.* Aman ima llank’anatapas ruwankichischu,+ aman qankuna ukhupi tiyaq waj llaqtayoq runakunapas llank’anqachu. 30 Chay p’unchaymi juchaykichis pichasqa kanqa+ chhaynapi ch’uya kanaykichispaq. Noqa Jehová Diospa ñaupaypin juchaykichismanta limpiasqa kankichis.+ 31 Chay p’unchayqa samana p’unchaymi kanqa, chay p’unchaymi juchaykichismanta sinchi llakisqa kankichis.+ Kay nisqayqa wiñaypaq kamachikuymi kanqa.

32 ”Mayqen sacerdotechá taytanpa rantinpi+ uma sacerdote kananpaq ajllasqa kanqa+ aceitewanpas jich’aykusqa kanqa, chay sacerdoten jucha pampachay p’unchaypiqa ch’uya lino p’achawan+ churakunqa. 33 Paymi ch’uyay-ch’uya cuartopaq,+ tupana karpapaq,+ altarpaq,+ sacerdotekunaq juchanpas, llaqta runakunaq juchanpas pichasqa kananpaq ofrendakunata jaywanqa.+ 34 Sapa watanmi qankunaqa chay kamachikuyman jina tukuy imatapas ruwankichis.+ Watapi juj kutitan Israel runakunaq llapa juchan pichasqa kanqa”,+ nispa.

Aaronqa Jehová Dios Moisesta kamachisqanman jinan chaykunata ruwarqan.

17 Jehová Diosmi Moisesta nillarqantaq: 2 “Aaronta churinkunata Israel runakunatawan nimuy, Jehová Diosmi nin:

3 ”Mayqen Israel runapas karpa-karpa ukhupipas jawapipas ñak’anman torotapas, malta carnerotapas, cabratapas, 4 manataq chayta noqa Jehová Diospa ch’uya karpayman apamunmanchu noqa Jehová Diosman jaywamuwananpaq chayqa, yawar jich’asqanmantan chay runaqa juchayoq kanqa. Yawarta jich’asqanraykun payqa wañuchisqa kanqa. 5 Kaytaqa kamachishayki Israel runakuna amaña campopi uywakunata ñak’anankupaqmi. Aswanmi chay uywakunataqa tupana karpa jaykunaman, noqa Jehová Diosman apamunqaku. Chaytan sacerdoteman qonqaku, paytaq sumaq kausay sacrificiota jina noqa Jehová Diosman jaywamuwanqa.+ 6 Sacerdoteqa tupana karpa jaykunapi kaq noqa Jehová Diospa altarniytan yawarwan ch’aqchunqa, chaymantataq uywaq wiranta chay altarpi ruphachinqa. Chaymi kanqa noqa Jehová Diospaq sumaq q’apaq ofrenda.+ 7 Israel runakunaqa amañan jayk’aqpas cabraman rijch’akuq idolokunaman sacrificiokunata jaywanqakuchu,+ chay idolokunata adoraspan paykunaqa qhelli juchata ruwashanku.+ Kay kamachikuytaqa wiñaypaqmi qankunaqa kasukunkichis, nispa.

8 ”Chaymantapas Israel runakunatan nillankitaq, Diosmi nin: Qankunamanta mayqenniykichispas, qankuna ukhupi tiyaq waj llaqtayoq runapas ruphachina ofrendata otaq ima sacrificiotapas jaywanqa, 9 manataq chayta tupana karpaman apamunqachu noqa Jehová Diosman jaywamuwananpaq chayqa, wañuchisqan kanqa.+

10 ”Mayqen Israel runapas, qankuna ukhupi tiyaq waj llaqtayoq runapas ima yawartapas mijunqa chayqa,+ noqan chay yawar mijuq runa contra jatarisaq, jinaspa wañuchisaq. 11 Ima kausaqpa kausayninpas yawarninpin kashan,+ chaytan qankunaman qoykichis altarman+ jich’aykunaykichispaq, chhaynapi juchaykichis pichasqa kananpaq. Yawarmi juchataqa pichan+ chay yawarpi kausay kasqanrayku. 12 Chaymi Israel runakunata kamachini: Aman mayqenniykichispas yawartaqa mijunkichischu, aman qankuna ukhupi tiyaq waj llaqtayoq runapas+ yawartaqa mijunqachu,+ nispa.

13 ”Mayqen Israel runapas qankuna ukhupi tiyaq waj llaqtayoq runapas mijuna salqa animalta otaq mijuna phalaq animalta jap’inqa chayqa, yawarnintan phawachinqa,+ jinaspa jallp’awan pakanqa. 14 Yawarpin kashan kausayqa, chaymi ima kausaqpa kausayninpas yawarnin. Chayraykun Israel runakunataqa kamachirqani: Aman ima yawartapas mijunkichischu, ima kausaqpa kausayninpas yawarninpin kashan. Pipas yawarta mijunqa chayqa wañuchisqan kanqa,+ nispa. 15 Mayqen Israel runapas waj llaqtayoq runapas wañusqa animalpa aychanta otaq salqa animalpa wañuchisqan animalpa aychanta mijunqa chayqa,+ p’achantan t’aqsanqa bañakunqa iman, inti jaykuykamataqmi qhelli kanqa.+ Chaymantañan limpio kanqa. 16 Ichaqa manachus p’achanta t’aqsanqa nitaq bañakunqapaschu chayqa, juchanmantan cuentata qonan kanqa,+ nispa”.

18 Jehová Diosmi Moisesta nillarqantaq: 2 “Israel runakunata nimuy, Diosmi nin: Noqaqa Diosniykichis Jehová Diosmi kani.+ 3 Aman tiyamusqaykichis Egipto llaqtapi runakuna jinaqa imatapas ruwankichischu. Amallataqmi maymanchus pusashaykichis chay Canaán jallp’api runakuna jinaqa imatapas ruwankichischu.+ Amapunin paykuna jinaqa kausankichischu. 4 Llapa nisqaytan junt’ankichis, llapa kamachisqaytan kasukunkichis, chayman jinan kausankichis.+ Noqaqa Diosniykichis Jehová Diosmi kani. 5 Llapa kamachisqaykunata, llapa simiytan kasukunkichis. Pipas chaykunata kasukuqqa chay kamachikuyraykun kausanqa.+ Noqaqa Jehová Diosmi kani.

6 ”Aman pi qharipas familian warmiwanqa kanqachu.+ Noqaqa Jehová Diosmi kani. 7 Aman taytaykiwanqa kankichu, aman mamaykiwanpas kankichu, mamaykin payqa. Amapunin mamaykiwanqa kankichu.

8 ”Aman taytaykiq qhepa warminwanqa puñunkichu.+ Chayta ruwaspaqa p’enqaymanmi taytaykita churawaq.

9 ”Aman panaykiwanqa kankichu. Papaykiq ususinña, mamaykiq ususinña kanqa chaypas, wasiykipiña juj ladopiña nacerqan chaypas, amapunin paywanqa kankichu.+

10 ”Aman puñunkichu warmi wawaykiq ususinwan qhari wawaykiq ususinwanpas, chayta ruwawaq chayqa sinchi p’enqaymi qanpaq kanman.

11 ”Aman taytaykiq warminpa ususinwanqa kankichu, payqa taytaykiq churiyasqanmi, panaykin.

12 ”Aman taytaykiq pananwanqa kankichu, payqa taytaykiq yawarninmi.+

13 ”Aman mamaykiq ñañanwanqa kankichu, payqa mamaykiq yawarninmi.

14 ”Aman taytaykiq wayqenpa warminwanqa kankichu. Chayta ruwaspaqa taytaykiq wayqentan p’enqayman churawaq. Chaymantapas tiyaykin payqa.+

15 ”Aman qhachuniykiwanqa puñunkichu,+ payqa churiykiq warminmi. Amapunin paywanqa kankichu.

16 ”Aman wayqeykiq warminwanqa puñunkichu,+ chayta ruwawaq chayqa wayqeykitan p’enqayman churawaq.

17 ”Aman mamantin ususintinwanqa kankichu.+ Aman qhari wawanpa ususinwanpas ni warmi wawanpa ususinwanpas puñunkichu. Paykunaqa familiantinmi kanku. Chayta ruwawaq chayqa millay qhelli juchatan ruwashawaq.

18 ”Aman warmiykiq ñañanwanqa casarakunkichu, chayta ruwawaq chayqa cheqninasqan kausankuman.+ Amapunin paywanqa kankichu warmiyki kausashaqtinqa.

19 ”Aman killanwan qhelli kashaq warmiwanqa kankichu.+

20 ”Aman runamasiykiq warminwanqa kankichu, paywan kawaq chayqa qhellichakuwaqmi.+

21 ”Aman Mólek idolomanqa mayqen wawaykitapas jaywankichu,+ chayta ruwawaq chayqa Diosniykiq sutintan qhellichawaq.+ Noqaqa Jehová Diosmi kani.

22 ”Aman qharipuraqa warmi-qharintin jinaqa kankichischu,+ chayqa sinchi millay ruwaymi.

23 ”Aman ima animalwanpas t’inkikunkichu. Aman pi warmipas juj animalpa ñaupanmanqa churakunqachu chaywan t’inkichikunanpaqqa.+ Chayqa sinchi millay ruwaymi.

24 ”Aman chaykunawanqa qhellichakunkichischu. Chaykunata ruwaspan qhellichakurqanku ñaupaykichismanta qarqosaq chay nacionkunapas.+ 25 Chayraykun chay jallp’aqa qhelli kashan, chaymi noqaqa chaypi tiyaqkunata castigasaq. Chay jallp’an chay runakunata aqtumunqa.+ 26 Qankunaqa simiytan kasukunkichis, kamachisqayman jinan imatapas ruwankichis.+ Amapunin chay sinchi millay ruwaykunataqa ruwankichischu, aman chaytaqa ruwanqachu qankuna ukhupi tiyaq waj llaqtayoq runapas.+ 27 Chay qhelli ruwaykunatan chay jallp’api tiyaq runakunaqa unayña ruwashanku,+ chaymi chay jallp’aqa qhelli kashan. 28 Chayraykun chay runakunataqa chay jallp’a aqtumunqa. Mana kasukuspachus qankunapas chay jallp’ata qhellichankichis chayqa, aqtumusunkichismi qankunatapas. 29 Pipas chay millay ruwaykunamanta mayqentapas ruwanqa chayqa, wañuchisqan kanqa. 30 Qankunaqa junt’anaykichispunin noqapaq imachus ruwanaykichiswan. Aman chay runakuna jinaqa imatapas ruwankichischu, amapunin chay qhelli ruwayninkutaqa qatikunkichischu.+ Aman chaykunawanqa qhellichakunkichischu. Noqaqa Diosniykichis Jehová Diosmi kani, nispa”.

19 Jehová Diosmi jujmanta Moisesta rimapayarqan, nirqanmi: 2 “Llapa Israel runakunata nimuy, Diosmi nin: Ch’uyan kanaykichis noqa Jehová Diosniykichis ch’uya kasqayrayku.+

3 ”Sapankaykichismi taytaykichistapas mamaykichistapas respetankichis;*+ waqaychankichismi samana p’unchayniykunatapas samana wataykunatapas.+ Noqaqa Diosniykichis Jehová Diosmi kani. 4 Aman yanqa dioskunataqa adorankichischu,+ amallataqmi ima idolotapas* ruwakunkichischu.+ Noqaqa Diosniykichis Jehová Diosmi kani.

5 ”Jehová Diosman sumaq kausay sacrificiota jaywaspaqa,+ sonqonman chayaqta jinan jaywankichis, chhaynapi sumaqta qhawarinasuykichispaq.+ 6 Chay jaywasqaykichis sacrificiotaqa chay p’unchayta qhepantin p’unchayllatawanmi mijunkichis. Kinsa kaq p’unchaykama puchunqa chayqa, ruphachipunkichismi chaytaqa.+ 7 Pipas chay aychata kinsa kaq p’unchaypi mijunqa chayqa, sinchi qhellin kapunqa chay sacrificioqa, manataqmi chaskisqachu kanqa. 8 Chay mijuq runaqa noqa Jehová Diospaq t’aqasqa kaqtan qhellichan, chay juchanmantan cuentata qonan kanqa. Wañuchisqan chay runaqa kanqa.

9 ”Chajraykita rutuspaqa aman cantonpi kaqkunatawanchu rutunki, usuqtapas aman pallapankichu.*+ 10 Uvas chajraykipi puchuqtapas aman pallankichu, pampaman usuqkunatapas jinallatan saqenki. Wajchakunapaq+ waj llaqtayoqkunapaqwanmi chayqa kanqa. Noqaqa Diosniykichis Jehová Diosmi kani.

11 ”Aman suwakunkichischu,+ aman llullakunkichischu,+ amallataqmi engañanakunkichispaschu. 12 Aman pipas sutiypiqa yanqa juranqachu,+ chayta ruwaspaqa noqa Diosniykichispa sutiytan qhellichashawaqchis. Noqaqa Jehová Diosmi kani. 13 Aman runamasiykitaqa engañankichu+ ni suwankipaschu.+ Aman llank’aqniykiq pagonwanqa qhepantin p’unchaykamaqa qhepakunkichu.+

14 ”Aman roqt’u runataqa ñakankichu, aman ñausa runaq ñaupanmanpas ima misk’anatapas churankichu.+ Diosniykitan manchakunki.+ Noqaqa Jehová Diosmi kani.

15 ”Juiciota apaspaykiqa, chanintan juzganki. Aman wajcha runamanpas ni qhapaq runamanpas sayapakunkichu.+ Chanintapunin runamasiykitaqa juzganki.

16 ”Aman llaqtayki ukhupi jujkunamanta mana kaqta rimaspaqa purinkichu.+ Aman runamasiykitaqa wañuy pataman churankichu.*+ Noqaqa Jehová Diosmi kani.

17 ”Aman wayqeykitaqa sonqoykipi cheqnikunkichu.+ Anyankin runamasiykitaqa,+ chhaynapi ama juchallikuqmasin kanaykipaq.

18 ”Aman pimantapas vengakunkichu,+ amataqmi sonqoykipipas cheqnikunkichu. Aswanmi runamasiykitaqa qan kikiykita jina munakunki.+ Noqaqa Jehová Diosmi kani.

19 ”Kasukunkichismi kay kamachisqaytapas: aman iskay clase uywakunataqa cruzachinkichischu, aman iskay clase mujutapas chhaqrutaqa t’akankichischu,+ amallataqmi iskay clase q’aytuwan awasqa p’achawanpas churakunkichischu.+

20 ”Pipas juj qharipaq t’aqasqa warmi kamachiwan kanman, ichaqa manaraqpas chay warmi rantisqachu karqan nitaq librepaschu kashanman karqan chayqa, iskayninkun paykunaqa castigasqa kanqaku. Ichaqa manan wañuchisqachu kanqaku chay warmi mana librechu kasqanrayku. 21 Qhari kaqmi juchaman urmasqanmanta ofrendata noqa Jehová Diosman jaywamuwanqa, chaypaqmi tupana karpa jaykunaman juj orqo ovejata apamunqa.+ 22 Chay ovejatan sacerdoteqa noqa Jehová Diosman jaywamuwanqa, chaywanmi chay runaq juchanqa pichasqa kanqa, chhaynapitaq perdonasqa kanqa.

23 ”Qankunaman qonay jallp’aman jaykuspaykichis ima fruta sach’atapas plantankichis chayqa, qhellin chay sach’aq rurunqa kanqa, aman chay sach’amanqa asuykunkichischu. Kinsa watan ama asuykunkichischu, aman ima ruruntapas mijunkichischu. 24 Tawa kaq wataqa ch’uyan chay sach’aq rurunqa kanqa. Noqa Jehová Diosmanmi chaytaqa kusikuywan apamuwankichis.+ 25 Pisqa kaq watapin ichaqa qankuna rurusqanta pallakapunkichis. Chhaynapin cosechaykichisqa yapakunqa. Noqaqa Diosniykichis Jehová Diosmi kani.

26 ”Aman imatapas yawarnintintaqa mijunkichischu.+

”Aman imatapas qhawankichischu qhepaman imachus kananta watunapaqqa, amallataqmi layqakunaq ruwaynintapas yachankichischu.+

27 ”Aman umaykichis muyuriq canto chujchaykichistaqa rutuchikunkichischu. Aman sunkhaykichispa puntantapas comuntaqa k’utuchikunkichischu.+

28 ”Pipas wañunqa chayqa aman* cuerpoykichista kuchukunkichischu.+ Amallataqmi cuerpoykichispiqa ima marcatapas ruwakunkichischu. Noqaqa Jehová Diosmi kani.

29 ”Aman ususiykita p’enqayman churankichu ramera warmiman tukuchispa,+ mana chayqa ramera warmikuna jawan tiyasqayki llaqta qhelliman tukunman, sinchitan millay kausaypas q’oñirinman.+

30 ”Samana p’unchayniykunatapas samana wataykunatapas waqaychankichispunin,+ ch’uya karpaytapas anchatan respetankichis.* Noqaqa Jehová Diosmi kani.

31 ”Aman rinkichischu wañusqakunata tapuqkunamanqa,+ amallataqmi rinkichischu watuq runakunamanpas,+ chaykunamanchus riwaqchis chayqa qhellin kawaqchis. Noqaqa Diosniykichis Jehová Diosmi kani.

32 ”Edadniyoq* runaq ñaupanpiqa sayaykunkin,+ respetankin kuraq runataqa.+ Manchakunkin Diosniykita.+ Noqaqa Jehová Diosmi kani.

33 ”Llaqtaykichispi tiyanqa waj llaqtayoq runa chayqa, aman paytaqa sarunchankichischu.+ 34 Chay waj llaqtayoq runataqa llaqtamasiykichista jinan rikunkichis,+ qankuna kikiykichista jinan munakunkichis. Aman qonqankichischu qankunapas Egipto llaqtapi forastero kasqaykichista.+ Noqaqa Diosniykichis Jehová Diosmi kani.

35 ”Imata medispapas, imata pesaspapas, imata jich’aspapas chanillantan ruwankichis.+ 36 Chanin balanzata, chanin pesakunatan qankunaqa jap’inaykichis. Ch’aki mijuy tupunaykichispas,* unu cosas medinaykichispas* chaninmi kanqa.+ Noqaqa Diosniykichis Jehová Diosmi kani, noqan Egiptomanta orqomuqniykichis Diosqa kani. 37 Llapa simiyta, llapa kamachisqaytan kasukunkichis, chayman jinan kausankichis.+ Noqaqa Jehová Diosmi kani, nispa”.

20 Jehová Diosmi Moisesta nillarqantaq: 2 “Israel runakunata nimuy, Diosmi nin: Mayqen Israel runapas qankuna ukhupi tiyaq waj llaqtayoq runapas Mólek idoloman mayqen wawantapas qonqa* chayqa, wañunqan.+ Llaqtantinmi paytaqa rumiwan ch’aqespa wañuchinqaku. 3 Noqa kikiymi chay runa contra sayarisaq jinaspa llaqtaykichis ukhumanta chinkachisaq. Mólek idoloman wawanta qospa ch’uya karpayta qhellichasqanrayku,+ ch’uya sutiytapas sarunchasqanraykun chayta ruwasaq. 4 Llaqta runakunachus jinallata qhawanqa chay runa wawanta chay idoloman qonanta, manataq wañuchinqakuchu chayqa,+ 5 noqa kikiymi chay runa contra familian contra sayarisaq.+ Llaqtaykichis ukhumantan chinkachisaq chay runata, chinkachisaqmi paywan kuska Mólek idolota adoraspa qhelli juchata ruwaq* runakunatapas.

6 ”Pipas noqata wasanchawanman* wañusqakunata tapuq runaman+ rispa, watuq runamanpas+ rispa chayqa, llaqtaykichis ukhumantan chay runata chinkachisaq.+

7 ”Qankunaqa limpion kanaykichis ch’uyataqmi kanaykichispas,+ noqa Jehová Dios qankunaq Diosniykichis kasqayrayku. 8 Qankunaqa noqaq kamachisqaykunatan kasukunkichis, chayman jinataqmi kausankichispas.+ Noqaqa Jehová Diosmi kani, noqan qankunataqa ch’uyanchashaykichis.+

9 ”Pipas taytantapas mamantapas ñakanqa chayqa, wañuchisqapunin kanqa.+ Tayta-mamantataq ñakan chayqa, pay kikinmi juchayoq kanqa wañusqanmanta.

10 ”Pipas runamasinpa warminwan pantanqa chayqa, wañuchisqapunin kanqa. Wañuchisqan kanqa jujwan pantaq qharipas jujwan pantaq warmipas.+ 11 Pipas taytanpa warminwan kanqa chayqa, taytantan chay runaqa p’enqayman churan,+ chaymi paykunaqa warmipas qharipas wañuchisqapuni kanqaku. Paykunallataqmi wañusqankumantaqa juchayoq kanqaku.* 12 Pipas qhachuninwan kanqa chayqa, wañuchisqapunin kanqa chay runaqa, wañuchisqan kanqa warmipas. Sinchi millay juchatan paykunaqa ruwanku, chaymi paykunallataq juchayoq kanqaku wañusqankumanta.+

13 ”Pipas qharimasinwan warmiwan jina puñunman chayqa, sinchi millay juchatan ruwashan,+ paykunaqa iskayninkun wañuchisqapuni kanqaku. Paykunallataqmi wañusqankumantaqa juchayoq kanqaku.

14 ”Pipas mamantin ususintinwan casarakunman chayqa, sinchi millay ruwaytan ruwashan.+ Chay pasaqtinqa chay runata iskaynin warmikunatawanmi wañuchispa kanapunkichis,+ chhaynapi qankuna ukhupi ama chhayna millay ruwaykuna kananpaq.

15 ”Pi runapas juj animalwan t’inkinakunqa chayqa, wañuchisqapunin kanqa. Chay animaltapas wañuchinkichismi.+ 16 Mayqen warmipas juj animalwan t’inkichikunman chayqa,+ chay warmita chay animaltawanmi wañuchinkichis. Wañuchisqapunin kanqa chay warmipas chay animalpas. Animalwan t’inkinakuq runapas warmipas paykunallataqmi wañusqankumantaqa juchayoq kanqaku.

17 ”Pipas pananwanpas, papanpa ususinwanpas, mamanpa ususinwanpas kanman chayqa, p’enqaytan chaytaqa ruwashanman.+ Paykunaqa llapa runakunaq rikushasqanmi wañuchisqa kanqaku. Chayta ruwaq runaqa p’enqaymanmi churan pananta, chaymi payqa juchanmanta cuentata qonqapuni.

18 ”Pipas killanwan kashaq warmiwan kanman chayqa, manan chay qhariqa warmiq yawarninta respetanchu,+ nitaq warmipas respetanchu, chaymi paykunaqa iskayninku wañuchisqa kanqaku.

19 ”Aman taytaykiq pananwanpas ni mamaykiq ñañanwanpas kankichu. Mayqenwanpas kawaq chayqa, familiaykitan pisichashawaq.+ Pipas chayta ruwaqqa juchanmantan cuentata qonqa. 20 Pipas tionpa esposanwan kanqa chayqa, tiontan p’enqayman churashan.+ Chay qharipas chay warmipas juchankumantan cuentata qonqaku. Mana wawallayoqmi wañuchisqa kanqaku. 21 Pipas wayqenpa warminwan casarakunman chayqa, sinchi mana allin ruwaytan chaytaqa ruwashanman.+ Chay runaqa p’enqaymanmi wayqenta churan. Mana wawallayoqmi wañuchisqa kanqaku.

22 ”Llapa simiyta llapa kamachisqaytan kasukunkichis,+ chayman jinataqmi kausankichispas,+ chhaynapin maymanchus pusashaykichis chay jallp’aqa mana aqtumusunkichischu.+ 23 Aman ñaupaykichismanta qarqosaq chay nacionkuna jinaqa imatapas ruwankichischu.+ Paykunaqa llapa chay mana allin ruwaykunatan ruwashanku, chayraykun paykunataqa millakuni.+ 24 Chaymi noqaqa qankunata nirqaykichis: Qankunan chay nacionkunaq jallp’ankuta jap’ikapunkichis, noqan chay runakunaq jallp’anta qopusaykichis, maypichus lechepas mielpas askha kan chaytan qopusaykichis.+ Noqaqa Diosniykichis Jehová Diosmi kani, noqan juj llaqtakunamanta t’aqarqaykichis,+ nispa. 25 Qankunaqa allintan reparanaykichis mayqen animalchus ch’uya mayqentaqchus qhelli chayta, mayqen phalaq animalchus ch’uya mayqentaqchus qhelli chaytapas.+ Aman qhelli nisqay suchuq animalwanpas, pampan puriq animalwanpas, ni phalaq animalwanpas qhellichakunkichischu.+ 26 Qankunaqa ch’uyan kankichis noqa Jehová Dios ch’uya kasqayrayku.+ Noqan juj llaqtakuna ukhumanta qankunata t’aqarqaykichis llaqtay kanaykichispaq.+

27 ”Pi qharipas otaq warmipas wañusqakuna tapuqpas watuqpas* kanman chayqa, wañuchisqapunin kanqa.+ Llaqtantinmi paytaqa rumiwan ch’aqespa wañuchinqaku. Chay juchallikuqqa pay kikinmi juchayoq kanqa wañusqanmanta, nispa”.

21 Jehová Diosmi Moisesta nillarqantaq: “Aaronpa wawan sacerdotekunata niy, Diosmi nin: Aman mayqen sacerdotepas llaqtaykichispi piqpa ayanwanpas qhellichakunqachu.*+ 2 Ichaqa mamaykichischus, papaykichischus, qhari wawaykichischus, warmi wawaykichischus, wayqeykichischus wañunman chayqa, atiwaqchismi qhellichakuyta. 3 Ladoykichispi tiyaq mana pi qhariwanpas kaq soltera panaykichis wañupuqtinpas atiwaqchismi qhellichakuyta. 4 Ichaqa llaqtaykichispi mayqen runaq warminpas wañunqa chayqa, amapunin qhellichakunkichischu chay wañuqwanqa. 5 Aman chujchaykichistaqa p’aqlata rutuchikunkichischu,+ aman sunkhaykichispa puntantapas k’utuchikunkichischu, nitaqmi cuerpoykichistapas kuchukunkichischu.+ 6 Qankunataq noqa Jehová Diosniykichisman ofrendakunata, t’antata* jaywamuwankichis chayqa, ch’uyan kanaykichis,+ aman ch’uya sutiytapas qhellichankichischu.+ Qankunaqa ch’uyapunin kanaykichis.+ 7 Aman ramera warmiwanpas,+ qhariwan kaq warmiwanpas, ni qosanmanta t’aqanasqa warmiwanpas+ casarakunkichischu. Qankunaqa noqapaq ajllasqa ch’uya sacerdotekunan kankichis. 8 Qankunapas Israel runakuna, noqapaq t’aqasqata jinan rikunkichis sacerdotetaqa,+ paymi noqa Diosniykichisman t’anta jaywaqqa. Payqa ch’uyan qankunapaqqa kanqa, qankunata ch’uyanchaq noqa Jehová Dios ch’uya kasqayrayku.+

9 ”Sacerdoteq ususinchus ramera warmi kaspa qhellichakunman chayqa, taytantan payqa qhellichashan. Chay warmitaqa wañuchispan ninawan kanankichis.+

10 ”Mayqen sacerdotechus sacerdotekuna ukhupi uma sacerdote kanqa, mayqenpa umanmanchus jawina aceite jich’aykusqa kanqa,+ mayqenchus sacerdote p’achata churakunanpaq ajllasqa kanqa+ chay sacerdoteqa aman chujchantaqa jinallatachu t’ampayachinqa, amataqmi p’achantapas llik’ikunqachu.+ 11 Aman piqpa ayanmanpas asuykunqachu.+ Aman taytanpa ayanmanpas ni mamanpa ayanmanpas asuykunqachu, mana chayqa qhellichakunqan. 12 Aman ch’uya karpamantaqa lloqsinqachu, aman noqa Diosninpa karpantapas qhellichanqachu,+ aceitey+ paypi kasqanrayku, arí, noqapaq t’aqasqa kasqan señal paypi kasqanrayku. Noqaqa Jehová Diosmi kani.

13 ”Uma sacerdoteqa doncella sipasllawanmi* casarakunqa.+ 14 Manan payqa casarakunqachu viuda warmiwanpas, qosanmanta t’aqanasqa warmiwanpas, qhariwan kaq warmiwanpas, ni ramera warmiwanpas; aswanmi casarakunqa llaqtanmanta kaq doncella sipaswan. 15 Chhaynapin uma sacerdoteqa llaqtanpi miraynin runakunata mana qhellichanqachu.+ Noqaqa Jehová Diosmi kani, noqan paytaqa ch’uyanchashani, nispa”.

16 Jehová Diosmi Moisesta nillarqantaq: 17 “Aaronta niy, Diosmi nin: Mirayniykimanta mayqen runapas cuerponpi imanpas mana normalchu kanman chayqa, manan t’anta ofrendataqa jaywamuwanqachu. 18 Chay runaqa manan asuykamuwanqachu, manan ñausa qharipas, wist’upas,* senqan imanasqapas,* jujnin jatun chakipas, jujnin jatun makipas, 19 chakin p’akisqapas, makin p’akisqapas, 20 qhopu wasapas, eqopas,* ñawin imanasqapas, sarnayoqpas, aycha qaranpi ima onqoyniyoqpas, qhari kaynin imanasqapas asuykamuwanqachu.+ 21 Sacerdote Aaronpa mirayninmanta mayqen runaq cuerponpas mana normalchu kanqa chayqa, manan noqa Jehová Diosmanqa ruphachina ofrendataqa jaywamuwanqachu. Cuerpon mana allin kasqanraykun payqa noqa Diospa t’antaytaqa mana jaywamuwanqachu. 22 Ch’uyay-ch’uya kaq mijunatapas,+ ch’uya kaq mijunatapas+ mijunmanmi. 23 Ichaqa aman cortinamanqa+ qayllaykamunqachu nitaqmi altarmanpas+ asuykamunqachu, mana chayqa ch’uya karpaytan+ qhellichanman. Noqaqa Jehová Diosmi kani, noqan paykunataqa* ch’uyanchashani,+ nispa”.

24 Chaykunatan Moisesqa willarqan Aaronman, churinkunaman, llapa Israel runakunamanwan.

22 Jujmantan Jehová Diosqa Moisesta rimapayarqan, nirqanmi: 2 “Aaronta churinkunatawan niy, Israel runakunaq apamusqan ch’uya ofrendakunawan ama comuntachu imatapas ruwanankupaq,+ chhaynapi ch’uya sutiy ama pisichasqa kananpaq.+ Noqaqa Jehová Diosmi kani. 3 Paykunata niy, Diosmi nin: Mirayniykichis runakunamanta mayqenpas qhelli kashaspa Israel runakunaq apamusqan ch’uya ofrendaman, noqa Jehová Diospa ofrendayman asuykunman chayqa, wañuchisqan kanqa.+ Noqaqa Jehová Diosmi kani. 4 Aaronpa miraynin runamanta mayqenpas lepra onqoyniyoq+ kashanman, qhari kayninmantapas q’ea+ lloqsimushanman chayqa, aman chay ch’uya ofrendakunataqa mijunqachu, pay ch’uya kanankaman mana mijunqachu.+ Manan mijunqachu ayawan qhellichakuq runata tupaykuq runapas,+ mujunpa lloqsimusqanwan qhellichakuq runapas.+ 5 Askhanpi puriq qhelli animalta tupaykuqpas,+ qhelli kashaq runata tupaykuqpas+ manan mijunqachu. 6 Chay qhelli kaqkunamanta mayqentapas tupaykuq runaqa inti jaykuykaman qhelli kanqa, manataqmi ch’uya ofrendakunataqa mijunqachu, bañakunankaman mana chaykunataqa mijunqachu.+ 7 Inti jaykuy qhepatan payqa ch’uya kapunqa, chay qhepamanqa mijullanqan ch’uya ofrendakunatapas, chaykunaqa paypa mijunanmi.+ 8 Aman mijunqachu wañusqa animaltapas ni salqa animalkunaq wañuchisqan animaltapas, chaytachus mijunman chayqa qhellin kapunman.+ Noqaqa Jehová Diosmi kani.

9 ”Paykunaqa llapa kamachisqaytan kasukunqaku, chhaynapin mana juchallikunqakuchu. Manachus kamachisqaykunata kasukunqaku chayqa, wañuchisqan kanqaku ch’uya ofrendaykunata qhellichasqankumanta. Noqaqa Jehová Diosmi kani, noqan paykunataqa ch’uyanchashani.

10 ”Sacerdote familiamanta kaqllan chay ch’uya ofrendataqa mijunqa, manan jujkunaqa mijunqachu.+ Manan sacerdoteq alojasqan waj llaqtayoq runapas ni llank’apakuqnin runapas mijunqachu. 11 Ichaqa chay sacerdote pitapas rantinman chayqa, mijunqan chay runaqa. Wasinpi naceq kamachipas mijunqan.+ 12 Sacerdoteq mayqen ususinpas mana juj sacerdotewanchu casarakunman chayqa, manan mijunqachu chay ch’uya ofrendakunataqa. 13 Sacerdoteq mayqen ususinpas viuda kapunman otaq qosanmanta t’aqakapunman, manataq wawanpas kanmanchu, taytanpa wasinmantaq kutimpunmanpas chayqa, atinmanmi ñaupaqpi jina taytanpa mijuynin mijuyta.+ Waj runan* ichaqa mana chaytaqa mijunqachu.

14 ”Pipas mana reparaspa noqapaq t’aqasqa kaqta mijunman chayqa, kaqtan chayta kutichipunqa, chay ofrenda jayk’achus valesqanmanta pisqa kaq partetawanmi sacerdoteman qopunqa.+ 15 Sacerdotekunaqa amapunin dejanqakuchu Israel runakuna noqa Jehová Diospaq apamusqanku ch’uya ofrendakuna qhellichasqa kanantaqa.+ 16 Jinatachus qhawankuman chayqa, llapa Israel runakunan juchayoq kapunkuman ch’uya ofrendakunata mijusqankumanta. Noqaqa Jehová Diosmi kani, noqan paykunataqa ch’uyanchashani, nispa”.

17 Jehová Diosmi Moisesta nillarqantaq: 18 “Aaronta, churinkunata, llapa Israel runakunatawan niy: Diosmi nin: Mayqen Israel runapas, qankuna ukhupi tiyaq waj llaqtayoq runapas noqa Jehová Diosman ruphachina ofrendata+ jaywamuwayta munan, chhaynapi promesa ruwasqanta junt’ananpaq otaq tukuy sonqo qoy ofrendata+ jaywamuwananpaq chayqa, 19 jaywamuwanmanmi mana imanasqa torotapas, malta orqo ovejatapas, malta orqo cabratapas,+ chhaynapi chay runa chaskisqa kananpaq. 20 Aman mana allin uywataqa jaywamuwankichischu,+ mana chayqa manan chaskisaykichischu.

21 ”Pipas noqa Jehová Diosman sumaq kausay ofrendata jaywamuwanqa+ promesa ruway ofrendata qonanpaq otaq tukuy sonqo qoy ofrendata jaywamuwananpaq chayqa, chaskisqa kananpaqqa mana imanasqa allin torota otaq mana imanasqa ovejatan jaywamuwanqa. Mana imanasqa qhalin chay uywaqa kanqa. 22 Aman noqa Jehová Diosmanqa ñausatapas, chakin p’akisqatapas, iman kuchusqatapas, tijtiyoqtapas, sarnayoqtapas, aycha qaranpi ima onqoyniyoqtapas jaywamuwankichischu. Amapunin chhayna animalkunataqa apamunkichischu noqa Jehová Diospaqqa, aman chaytaqa altarniypiqa jaywamuwankichischu. 23 Tukuy sonqo qoy ofrendata jaywamuwaspaqa atiwaqchismi jujnin jatun chaki otaq jujnin juch’uy chaki torotapas ovejatapas jaywamuwayta. Ichaqa aman chaytaqa jaywamuwankichischu promesa ruway ofrendapaqqa; manan chayqa chaskisqachu kanqa. 24 Aman noqa Jehová Diosmanqa jaywamuwankichischu ima animaltapas runtun k’irisqatapas, runtun ñit’isqatapas, ni kapasqatapas. Maypiña tiyankichis chaypas aman chhayna animaltaqa jaywamuwankichischu. 25 Aman waj llaqtayoq runakunamantapas chhayna animalkunataqa chaskinkichischu Diosniykichispaq t’antanpaqqa. Chay animalkunaqa onqoyniyoqtaq kanman, cuerponpi imapas manataq allinchu kanman chayqa, manan chaskisqachu kanqa, nispa”.

26 Jujmantan Jehová Diosqa Moisesta rimapayarqan, nirqanmi: 27 “Toropas, orqo ovejapas, cabrapas nacenqa chayqa, qanchis p’unchaymi mamanwan kanqa.+ Pusaq kaq p’unchaymantaqa listoñan kanqa noqa Jehová Diosman ruphachina ofrendata jina jaywamuwanaykichispaq. 28 Aman wakatapas ovejatapas uñantawan kuskataqa ñak’ankichischu, aman kaq p’unchayllaqa ñak’ankichischu.+

29 ”Noqa Jehová Diosman graciasta qonapaq sacrificiota jaywamuwaspaqa,+ sonqoyman chayaqta jinan jaywamuwankichis, chhaynapi chaskisqa kanaykichispaq. 30 Chaymantapas chay sacrificioqa chay kikin p’unchaymi mijusqa kanqa, aman chaytaqa qhepantin p’unchaypaqqa puchunkichischu.+ Noqaqa Jehová Diosmi kani.

31 ”Llapa kamachisqaytan kasukunkichis, chayman jinataqmi kausankichispas.+ Noqaqa Jehová Diosmi kani. 32 Aman ch’uya sutiytaqa qhellichankichischu,+ aswanmi noqataqa llapa Israel runakuna ch’uyapaq jap’iwanqaku.+ Noqaqa Jehová Diosmi kani, noqan qankunata ch’uyanchashaykichis.+ 33 Noqan Egiptomanta orqomurqaykichis Diosniykichis kanaypaq.+ Noqaqa Jehová Diosmi kani”, nispa.

23 Jehová Diosmi Moisesta nillarqantaq: 2 “Israel runakunata niy: Jehová Diospaqmi fiestakunata ruwankichis,+ chay fiesta p’unchaykunaqa Diosta yupaychanaykichispaqmi llaqtata juñunkichis.+ Chay fiestakunan kaykuna kanqa:

3 ”Soqta p’unchayllan llank’ankichis, qanchis kaq p’unchaymi ichaqa llapaykichis samankichis,+ chay p’unchayqa Diosta yupaychana p’unchaymi kanqa, aman chay p’unchayqa imapipas llank’ankichischu. Maypiña tiyankichis chaypas Jehová Diospaq t’aqasqata jinan rikunkichis chay p’unchaytaqa.+

4 ”Kay p’unchaykunapin Jehová Diospaq fiestata ruwankichis, kay p’unchaykunapin Diosta yupaychanaykichispaq llaqtata juñunkichis: 5 Ñaupaq kaq killapin chunka tawayoq p’unchaypi+ tutayaykuyta jina Jehová Diospaq Pascua Fiestata+ ruwankichis.

6 ”Chay killaq chunka pisqayoq p’unchayninpitaq Mana Levadurayoq T’anta Fiestata Jehová Diospaq ruwankichis.+ Qanchis p’unchaymi mana levadurayoq t’antata mijunkichis.+ 7 Ñaupaq kaq p’unchayqa Diosta yupaychanaykichispaqmi juñukunkichis,+ amataqmi imapipas llank’ankichischu. 8 Qanchisnintin p’unchaymi Jehová Diosman ninawan ruphachisqa ofrendakunata jaywankichis. Qanchis kaq p’unchaypitaq llaqtata juñunkichis Diosta yupaychanaykichispaq. Aman chay p’unchayqa imapipas llank’ankichischu, nispa”.

9 Jehová Diosmi Moisesta nillarqantaq: 10 “Israel runakunata niy, Diosmi nin: Qankunaman qonay jallp’aman jaykuspa mijuyniykichista oqarispaykichisqa, ñaupaq rutusqaykichis+ juj marq’ay cebadatan sacerdoteman qonkichis, chaymi kanqa ñaupaq oqariy cosecha ofrenda.+ 11 Chay cebadatan sacerdoteqa noqa Jehová Diospa ñaupaypi ñaupaqman qhepaman maywinqa, chhaynapi chaskisqa kanaykichispaq. Chaytaqa ruwanqa samana p’unchay qhepatan. 12 Cebadata jaywakusqan p’unchaypin mana imanasqa watayoq malta carnerota ruphachina ofrendata jina noqa Jehová Diosman jaywamuwallankichistaq. 13 Jaywamuwallankichistaqmi jak’u ofrendatapas, chaypaqmi apamunkichis aceitewan tupachisqa iskay kilo* allin jak’uta.* Chaymi kanqa noqa Jehová Diospaq ancha sumaq q’apaq ofrenda. Vino ofrendapaqtaq apamunkichis juj litro* vinota. 14 Aman chay cosecha oqarisqaykichis cebadataqa jank’ankichischu ni chaymantaqa t’antatapas ruwankichischu, noqa Diosniykichisman ofrendata apamunaykichis p’unchaykaman ama chaytaqa mijunkichischu. Maypiña tiyankichis chaypas kasukunkichismi kay kamachisqaytaqa, kasukunqakun mirayniykichis runakunapas.

15 ”Samana p’unchaypa qhepan p’unchaymantapacha, maywisqa ofrendapaq marq’ay cebadata apamusqaykichis p’unchaymantapachan qanchis semana junt’ata yupankichis.*+ 16 Pisqa chunka p’unchaytan+ yupankichis qanchis semana p’unchay qhepakama. Chay p’unchaymi noqa Jehová Diosman jaywamuwankichis chayllaraq cosechasqa trigo jak’u ofrendata.+ 17 Maypichus tiyasqaykichismantan iskay t’antata apamunkichis maywisqa ofrendapaq. Chay t’antaqa iskay kilo allin jak’umantan ruwasqa kanqa; levadurayoqta iman chaytaqa ruwankichis.+ Chaymi kanqa noqa Jehová Diospaq ñaupaq oqariy trigo ofrenda.+ 18 Chay t’antatawan kuskatan apamunkichis mana imanasqa qanchis orqo ovejakunata, sapankan kanqa watayoqkama. Apamullankichistaqmi juj malta torota, iskay carnerotapas.+ Chaykunan noqa Jehová Diospaq ruphachina ofrenda kanqa, chaykunawan kuskatan jaywamuwallankichistaq jak’u ofrendatapas vino ofrendatapas. Chaymi kanqa noqa Jehová Diospaq ruphachisqa ancha sumaq q’apaq ofrenda. 19 Juj malta orqo cabratan jaywankichis jucha pampachay ofrendapaq,+ watayoq iskay orqo ovejatataq sumaq kausay sacrificiopaq.+ 20 Chay iskaynin ovejakunata, ñaupaq oqariy trigo t’antatawan kuskatan sacerdoteqa noqa Jehová Diospa ñaupaypi ñaupaqman qhepaman maywinqa, chaymi kanqa maywisqa ofrenda. Chaymantapas chaykunaqa noqa Jehová Diospaq t’aqasqan kanqa, sacerdotepaqtaqmi kanqapas.+ 21 Chay p’unchaymi llaqta runakunata juñunkichis+ Diosta yupaychanaykichispaq. Aman imapipas chay p’unchayqa llank’ankichischu. Maypiña tiyankichis chaypas kasukunkichismi kay kamachisqaytaqa, kasukunqakun mirayniykichis runakunapas.

22 ”Chajraykichista rutuspaykichisqa aman cantonpi kaqkunatawanchu rutunkichis, aman puchuqkunatapas oqarinkichischu.+ Chaykunaqa wajchakunapaq+ waj llaqtayoqkunapaqwanmi+ kanqa. Noqaqa Diosniykichis Jehová Diosmi kani, nispa”.

23 Jehová Diosmi Moisesta nillarqantaq: 24 “Israel runakunata niy: Qanchis kaq killaq qallariynin p’unchaypiqa samankichismi, aman chay p’unchayqa imapipas llank’ankichischu. Chay p’unchaymi trompetakunata tocankichis,+ juñukuspa Diosta yupaychana p’unchay kasqanta yuyarinaykichispaq. 25 Chay p’unchayqa aman imapipas llank’ankichischu. Jehová Diosmanmi ninawan ruphachisqa ofrendakunata jaywankichis, nispa”.

26 Jehová Diosmi Moisesta nillarqantaq: 27 “Qanchis kaq killapi chunka kaq p’unchaypin Jucha Pampachay P’unchay kanqa.+ Chay p’unchaymi yupaychawanaykichispaq llaqtata juñunkichis, chaymantapas juchaykichismantan sinchi llakisqa kankichis,*+ noqa Jehová Diosmantaq ninawan ruphachisqa ofrendata jaywamuwankichis. 28 Aman chay p’unchayqa imapipas llank’ankichischu, chay p’unchayqa noqa Jehová Diosniykichispa ñaupaypi juchaykichis pichasqa kananpaq p’unchaymi.+ 29 Pipas chay p’unchaypi mana llakisqa kaqqa wañuchisqan kanqa.+ 30 Pipas chay p’unchaypi imapipas llank’anqa chayqa, noqa kikiymi chay runata wañuchisaq. 31 Amapunin chay p’unchayqa imapipas llank’ankichischu. Maypiña tiyankichis chaypas kasukunkichismi kay kamachisqaytaqa, kasukunqakun mirayniykichis runakunapas. 32 Chay p’unchayqa samana p’unchaymi kanqa. Chay killapi isqon kaq p’unchay inti jaykuy qhepatan qankunaqa sinchi llakisqa kankichis.+ Chay horasmanta qhepantin p’unchay chhayna horaskaman qankunaqa chay samana p’unchayta waqaychankichis”, nispa.

33 Jehová Diosqa jujmantan Moisesta rimapayallarqantaq, nirqanmi: 34 “Israel runakunata niy, Diosmi nin: Chay qanchis kaq killapi chunka pisqayoq p’unchaypin qallarinqa noqa Jehová Diospaq Ch’ujlla Ruway Fiesta. Chay fiestaqa qanchis p’unchaymi kanqa.+ 35 Ñaupaq kaq p’unchayqa Diosta yupaychanaykichispaqmi juñukunkichis. Chay p’unchayqa aman imapipas llank’ankichischu. 36 Qanchisnintin p’unchaymi noqa Jehová Diosman jaywamuwankichis ninawan ruphachisqa ofrendakunata. Pusaq kaq p’unchaytaq yupaychawanaykichispaq juñukunkichis,+ chay p’unchaypas noqa Jehová Diosmanqa jaywamuwallankichistaqmi ninawan ruphachisqa ofrendataqa. Chay juñunakuyqa yupaychawanaykichispaqmi kanqa. Aman chay p’unchayqa imapipas llank’ankichischu.

37 ”Chaykunan kanqa noqa Jehová Diospaq fiesta ruwana p’unchaykuna.+ Chay p’unchaykunaqa yupaychawanaykichispaqmi llaqtata juñunkichis,+ jinaspa ninawan ruphachisqa ofrendakunata noqa Jehová Diosman jaywamuwankichis. Imaynachus sapa p’unchaypas aparikunanman jinan ruphachina ofrendatapas,+ jak’u ofrendatapas,+ vino ofrendatapas+ jaywamuwankichis. 38 Chay ofrendakunaqa samana p’unchaykunapi+ noqa Jehová Diosman jaywamuwanaykichis ofrendakunamanta, regaloykichiskunamanta,+ promesa ruway ofrendaykichismanta,+ noqa Jehová Diospaq tukuy sonqo qoy ofrendaykichismantapas+ sapaqmi kanqa. 39 Mijuyniykichista oqariyta tukuspaykichistaqmi qanchis kaq killapi chunka pisqayoq p’unchaypi noqa Jehová Diospaq fiestata ruwankichis, qanchis p’unchaymi chay fiestataqa ruwankichis.+ Ñaupaq kaq p’unchayqa aman imapipas llank’ankichischu, pusaq kaq p’unchaypas aman imapipas llank’ankichischu.+ 40 Ñaupaq kaq p’unchaymi ancha allin sach’akunaq rurunta pallamunkichis. Palmera k’allmakunata,+ raphisapa sach’akunaq k’allmankunata, wayq’okunapi wiñaq álamo sach’akunaq k’allmankunata iman pallamunkichis. Qanchis p’unchaymi+ noqa Jehová Diosniykichispa ñaupaypi kusisqa kankichis.+ 41 Watapi juj kutitan qanchis p’unchayta noqa Jehová Diospaq chay fiestata ruwankichis.+ Qanchis kaq killapin chay fiestaqa aparikunqa. Kay kamachisqayqa qankunapaq mirayniykichis runakunapaqwanmi kanqa. 42 Qankunaqa qanchis p’unchaytan ch’ujllakunapi tiyankichis.+ Llapan Israel runakunan ch’ujllakunapi tiyanqaku, 43 chhaynapin qhepa wiñay runakunaqa yachanqaku+ imaynas Egiptomanta orqomuspaqa ch’ujllakunapi tiyachirqaykichis chayta.+ Noqaqa Diosniykichis Jehová Diosmi kani, nispa”.

44 Chaymantataq Moisesqa Israel runakunaman willarqan Jehová Diospaq chay fiestakuna ruwanankumanta.

24 Jehová Diosmi Moisesta rimapayallarqantaq, nirqanmi: 2 “Israel runakunata kamachiy mana imawan chhaqrusqa aceituna aceiteta* apamunasuykikupaq. Chaywanmi candeleropi mecherokunata* sapa tutan k’anchachikunqa.+ 3 Aaronmi chay mecherokunata jap’ichinqa, paymi tupana karpa ukhupi kaq rimanakuyniy arcaq ñaupanpi, cortinaq ñaupanpi kaq candeleropi mecherokunata jap’ichinqa. Tardeyaykuyta jinan jap’ichinqa, qhepantin p’unchaykamataqmi chayqa noqa Jehová Diospa ñaupaypi k’anchanqa. Kay kamachikuyqa qankunapaq llapa mirayniykichis runakunapaqwanmi kanqa. 4 Aaronmi chay qori candeleroq+ mecheronkunata alistanqa, chhaynapi noqa Jehová Diospa ñaupaypi k’anchachinanpaq.

5 ”Allin jak’umantan* ruwanki chunka iskayniyoq rosquilla t’antakunata, sapanka t’antatan ruwanki iskay kilo* allin jak’uwan. 6 Chay t’antakunatan noqa Jehová Diospa ñaupaypi qori mesa+ pataman tauqanki, iskay tauqan kanqa, sapanka tauqapitaqmi soqta t’anta kanqa.+ 7 Sapanka tauqa patamanmi churanki ch’uya yuraq inciensota,* chaytan ruphachikunqa t’antaq rantinpi,+ chaymi kanqa noqa Jehová Diospaq ninawan ruphachisqa ofrenda. 8 Sapa samana p’unchaymi chay t’antaqa noqa Jehová Diospa ñaupayman churasqa kanqa.+ Chayta mana p’itiyta* ruwanankupaqmi noqaqa Israel runakunawan rimanakuni. 9 Chay t’antakunaqa Aaronpaq wawankunapaqwanmi kanqa.+ Chaytan paykunaqa ch’uya partepi mijunqaku.+ Chay t’antakunaqa noqa Jehová Diosman jaywamuwasqa llapa ruphachisqa ofrendakunamantapas aswan ch’uyan sacerdotepaqqa kanqa. Kay kamachisqayqa wiñaypaqmi kanqa”, nispa.

10 Israel runakuna ukhupin tiyarqan juj runa, mamanmi karqan Israel llaqtamanta, taytantaq karqan Egipto llaqtamanta.+ Juj kutinmi chay runaqa karpa-karpa ukhupi juj Israel runawan maqanakurqan. 11 Chay runan millayta rimaspa Diospa sutinta pisicharqan ñakarqan ima.+ Jinan chay runata Moisespa ñaupanman apamurqanku.+ Mamanqa Dan ayllumanta Dibriq ususin Selomijmi karqan. 12 Chay ñakaq runaqa Jehová Dios imatachus ninankaman preso jap’isqa karqan.+

13 Chaymantan Jehová Diosqa Moisesta nirqan: 14 “Sutiy ñakaq runata karpa-karpa jawaman orqomuy. Imachus rimasqanta llapa uyariq runakunan paypa umanman makinkuta churaykunqaku jinaspa llaqtantin runakuna rumiwan ch’aqespa wañuchinqaku.+ 15 Chaymantataq Israel runakunata ninki: Pipas Diosta ñakanqa chayqa, paymi juchanmanta cuentata qonqa. 16 Pipas Jehová Diosmanta millayta rimaspa sutinta sarunchanqa chayqa, wañuchisqapunin kanqa.+ Llaqtantin runakunan paytaqa rumiwan ch’aqenkichis. Llaqtamasiykichis runaña kanqa chaypas, waj llaqtayoqña kanqa chaypas wañuchisqapunin payqa kanqa. Millayta rimaspa sutiyta sarunchasqanmantan payqa wañunqa.

17 ”Pipas runamasinta wañuchinqa chayqa, wañuchisqapunin paypas kanqa.+ 18 Pipas jujpa uywanta wañuchinqa chayqa, kaqtan juj uywata sayachipunqa. Kausaymantan kausayta qonqa. 19 Pipas runamasinta k’irinqa chayqa, kaqtan chay k’iriq runataqa ruwakullanqataq.+ 20 P’akisqamanta p’akisqawan, ñawimanta ñawiwan, kirumanta kiruwan. Imatachus ruwarqan chaytan kaqta paytapas ruwakullanqataq.+ 21 Pipas jujpa uywanta wañuchinqa chayqa, kaqtan juj uywata sayachipunqa;+ runamasinta wañuchiqmi ichaqa wañuchisqa kanqa.+

22 ”Chay kamachikuyqa igualmi kanqa qankunapaqpas qankuna ukhupi tiyaq waj llaqtayoq runakunapaqpas.+ Noqaqa Diosniykichis Jehová Diosmi kani, nispa”.

23 Chay qhepamanmi Moisesqa Israel runakunawan rimarqan, jinan paykunaqa Diospa sutin ñakaq runata karpa-karpa jawaman orqomurqanku jinaspa rumiwan ch’aqespa wañuchirqanku.+ Israel runakunaqa Jehová Dios Moisesta kamachisqanman jinan ruwarqanku.

25 Jehová Diosmi Sinaí orqopi jujmanta Moisesta rimapayallarqantaq, nirqanmi: 2 “Israel runakunata niy, Diosmi nin: Qankunaman qonay jallp’aman jaykuqtiykichisqa,+ chay jallp’an noqa Jehová Diospaq samanqa.+ 3 Soqta watan chajraykichista llank’ankichis, soqta watan uvas sach’aykichiskunatapas kuchupankichis, soqta watan cosechatapas oqarinkichis.+ 4 Qanchis kaq watan ichaqa jallp’apaqqa samana wata kanqa, watantinmi noqa Jehová Diospaq samanqa. Aman chay wataqa tarpunkichischu ni t’akankichispaschu, aman uvas sach’aykichiskunatapas kuchupankichischu. 5 Aman rutunkichischu chay watapi wiñaq k’ipataqa, aman mana kuchupasqa uvastapas pallankichischu. Chay wataqa samana watan kanqa jallp’apaq. 6 Ichaqa chay watapi wiñaq mijuykunataqa mijuwaqchismi, mijunmanmi qhari kamachiykipas, warmi kamachiykipas, llank’apakuqniykipas, qanwan tiyaq waj llaqtayoq runapas. 7 Mijunmanmi uywaykichispas campopi tiyaq salqa animalkunapas. Chay watapi wiñaq mijuykunataqa atiwaqchismi mijuyta.

8 ”Qanchis samana watakunatan yupankichis, qanchis kutikaman qanchis watakunata yupankichis, chhaynapin llapanpiqa tawa chunka isqonniyoq wata kanqa. 9 Jinan qankunaqa qanchis kaq killapi, chunka p’unchaypi, Jucha Pampachay P’unchaypi+ llapa llaqtantinman uyarikuqta waqrata tocankichis. 10 Pisqa chunka kaq watatan Diosniykichispaq t’aqankichis. Chay watan kanqa Kacharipuna Wata.+ Sapankaykichismi jallp’aykichista chajraykichista jujmanta jap’ikapunkichis, sapankaykichismi familiaykichisman kutipunkichis.+ 11 Pisqa chunka kaq wataqa Kacharipuna Watan kanqa. Chay wataqa aman tarpunkichischu ni t’akankichischu, aman ima k’ipatapas rutunkichischu. Aman uvas sach’aykichismantapas ni imatapas pallankichischu.+ 12 Chay wataqa Kacharipuna Watan kanqa, ch’uya watan qankunapaqqa kanqa. Jallp’api kikillanmanta wiñaq mijuykunatan mijunkichis.+

13 ”Chay Kacharipuna Wataqa sapankaykichismi jallp’aykichista jujmanta jap’ikapunkichis.+ 14 Imataña vendenkichis imataña rantinkichis chaypas, aman runamasiykichistaqa engañankichischu.+ 15 Pipas imatapas rantinqa chayqa, Kacharipuna Watamanta jayk’a watañachus pasarun chayman jinan rantinqa. Vendeqpas jayk’a wataraqchus kashan rantiq runa chajrata llank’ananpaq chayman jinan vendenqa.+ 16 Kacharipuna Watapaq askha wataraq kanqa chayqa, astawanmi chay jallp’aqa valenqa, chay watapaq pisillaña kanqa chaytaq pisillata valenqa. Vendeqqa jayk’a cosechatachus chay jallp’amanta oqarikunqa chaytan vendeshan. 17 Aman pipas runamasiykichistaqa engañankichischu.+ Noqatan manchakuwankichis,+ noqaqa Diosniykichis Jehová Diosmi kani.+ 18 Simiytachus kasukuwankichis, kamachisqayman jinataqchus kausankichispas chayqa, mana imata manchakuspan thaj chay jallp’api tiyankichis.+ 19 Chaymantapas chay jallp’an mijuyta qosunkichis,+ qankunataq sajsanaykichiskama mijunkichis, mana imata manchakuspataq thaj kausankichis.+

20 ”Ichaqa yaqapaschá ninkichis: Manataq tarpusunchu ni cosechasunpaschu chayqa, ¿imatataq qanchis kaq watapiri mijusunchis?,+ nispa. 21 Aman chaymantaqa llakikunkichischu noqan bendicionta churamusaykichis, soqta kaq watan kinsa watapaq mijuyta oqarinkichis.+ 22 Pusaq kaq watapiñan qankunaqa chajraykichista llank’ankichis, chay watapi llank’asqaykichista cosechanaykichiskaman qankunaqa soqta kaq watapi oqarisqaykichista mijunkichis, isqon kaq watakaman chayta mijunkichis.

23 ”Aman pipas jallp’antaqa wiñaypaqqa vendenqachu,+ jallp’aqa noqaqmi.+ Qankunaqa forastero runakunallan noqapaqqa kankichis, waj llaqtayoq runakunallan kankichis.+ 24 Chaymi jallp’ayoqqa rantikapullanqa jallp’antaqa, aman pipas chaytaqa jark’anqachu.

25 ”Llaqtamasi wayqeykichus wajchayapunqa,* jinaspa jallp’anta vendenqa chayqa, libraq parientenmi jamuspa kaqta wayqenpa vendesqanta rantipunqa.+ 26 Manataq libraq parienten kanmanchu, paytaq qhapaqman tukunman, kanmantaq qolqen chajranta rantikapunanpaq chayqa, payllataqmi rantikapunqa. 27 Jayk’a watañachus vendesqanmanta pasarun, jayk’a watataqchus Kacharipuna Watapaq faltashan chayman jinan payqa vendesqan runaman qopunqa. Chayta qopuspañan payqa kaqninta jap’ikapunqa.+

28 ”Ichaqa manachus chay runa imachus vendesqanta rantikapuyta atinqa chayqa, Kacharipuna Watakaman rantiq runaqa chay jallp’ata llank’anqa.+ Kacharipuna Watapin ichaqa kaqta dueñonman kutichipunqa.+

29 ”Ichaqa pipas muyuriq perqayoq llaqta ukhupi wasinta vendenqa chayqa, juj watan chay wasiqa libre kanqa wajmanta rantikapunanpaq. Vendesqanmantapachan juj watalla tiempo kanqa jujmanta rantikapunanpaq.+ 30 Wata junt’akunankamachus chay dueño mana wasinta rantikapunqachu chayqa, rantiq runaq wasinmi chay wasiqa kapunqa, wiñaypaqmi chay wasita jap’ikapunqa. Manan Kacharipuna Watapipas chay wasitaqa kutichipunqachu. 31 Perqasqa llaqta jawapi wasikunaqa, campopi wasikunaqa, chajrakuna jinan rikusqa kanqa. Pipas chay wasinta vendenman chayqa atinmanmi kaqta rantikapuyta, Kacharipuna Wata chayamuqtinpas kaqtan dueñoqa chaskikapunqa.

32 ”Leví ayllu runakunaq llaqtan ukhupi+ mayqen Leví runapas wasinta vendenqa chayqa, payqa atinmanmi imay ratupas wasinta kaqta rantikapuyta. 33 Ichaqa manachus chay Leví runa wasinta rantikapuyta atinqa chayqa, Kacharipuna Watapin rantiq runaqa kaqta payman kutichipunqa.+ Israel runakuna ukhupiqa, llaqtallankupitaq Leví runakunaq wasin kanman chayqa, kaqtan rantiq runaqa chay wasita qopunqa.+ 34 Llaqtanku muyuriqpi pasto pampakunataqa+ manan vendenqakuchu, chay campokunaqa wiñaypaqmi paykunapaq kanqa.

35 ”Llaqtamasi wayqeykichus wajchayapunman, manataq imanpas kausananpaq kanmanchu chayqa, qanmi chay runata yanapanki+ imaynan llaqtayki ukhupi tiyaq waj llaqtayoq runatapas+ yanapawaq jinata, qanwan kuskan payqa kausanqa. 36 Ichaqa aman paymantaqa ima manusqaykimantapas interesta mañankichu.+ Noqa Diosniykitan manchakuwanki,+ chay llaqtamasiykiqa qanwan kuskan kausanqa. 37 Qolqeta manuspapas aman interestaqa cobrankichu,+ mijunaykita qospapas aman imatapas gananaykiraykuqa qonkichu. 38 Noqaqa Diosniykichis Jehová Diosmi kani, noqan qankunataqa Egiptomanta orqomurqaykichis+ Canaán jallp’ata qankunaman qonaypaq, qankunaq Diosniykichis kanaypaq.+

39 ”Llaqtamasi wayqeykichus wajchayapunman jinaspa qanman vendekusunkiman chayqa,+ aman paytaqa esclavo runakunata jinachu llank’achinki.+ 40 Llank’apakuq runata jina,+ waj llaqtayoq runata jinan paytaqa jap’inki. Kacharipuna Wata chayamunankaman payqa servisunki. 41 Chay watapin payqa wasiykimanta ripunqa. Payqa wawankunawan kuskan ayllunman kutipunqa, kaqtan chaskikapunqa ñaupa taytankunaq jallp’ankunatapas.+ 42 Paykunaqa noqaq kamachiykunan kanku, noqan paykunataqa Egiptomanta orqomurqani.+ Paykunataqa manan pipas esclavo runakunata jinaqa vendenqachu. 43 Aman paytaqa sufrichinkichu,+ noqa Diosniykitan manchakuwanki.+ 44 Qhari kamachitapas warmi kamachitapas munankichis chayqa, muyuriqniykichispi kaq nacionkunamantan rantikunkichis, paykunan kamachiykichiskunaqa kanqaku. 45 Kamachiykichispaqqa rantikuwaqchismi qankuna ukhupi tiyaq waj llaqtayoq runakunaq wawankunatapas,+ llaqtaykichispi naceq wawankunatapas. Paykunan qankunaq kaqniykichis kanqaku. 46 Paykunataqa saqewaqchismi wawaykichispa herencianpaqpas, chhaynapi paykunaq kaqninku kanankupaq. Paykunan llank’aqniykichiskuna kanqaku. Israel llaqtayoq runataqa aman jayk’aqpas sufrichinkichischu.+

47 ”Llaqtaykipi tiyaq mayqen waj llaqtayoq runapas qhapaq kapunman, qayllanpi tiyaq llaqtamasi wayqeykitaq wajchayapunman, jinaspa chay waj llaqtayoq runaman otaq chay runaq mayqen familianmanpas vendekunman chayqa, 48 paytaqa pipas imay ratupas rantipullanmanmi, mayqen wayqenpas rantipullanmanmi.+ 49 Rantillanmanmi tionpas, tionpa wawanpas, familianmanta mayqen runapas.

”Qhapaqman tukuspaqa, pay kikinpas rantikunmanmi.+ 50 Rantiqninwanmi payqa yupanqa jayk’a watañachus rantiqninta servishan chayta, jayk’a wataraqchus Kacharipuna Watapaqpas kashan chaytawan.+ Jayk’a watachus faltashan chayman jinan payqa qolqeta kutichipunqa.+ Qolqetaqa tanteanqa jayk’atachus llank’aq runa p’unchaypi ganan chayman jinan.+ 51 Askha wataraq Kacharipuna Watapaq faltanqa chayqa, chayman jinan chay runaqa rantiqnin runaman paganqa, chhaynapi libre kananpaq. 52 Pisillaña Kacharipuna Watapaq faltanqa chayqa, chayman jina tanteaspan chay runaqa rantiqnin runaman kutichipunqa. 53 Vendekuq runaqa sapa watanmi rantiqnin runata llank’apakuq runa jina servinqa. Aman rantiq runaqa vendekuq runata sufrichinqachu, qankunaqa allintan chayta qhawankichis.+ 54 Ichaqa manachus jujmanta pay kikinta rantikuyta atinqa chayqa, manachus kaypi nisqanman jina ruwayta atinqa chayqa, Kacharipuna Watapin paypas wawankunapas libre kanqaku.+

55 ”Israel runakunaqa noqaq kamachiykunan kanku. Arí, paykunaqa kamachiykunan kanku, noqan paykunataqa Egiptomanta orqomurqani.+ Noqaqa Diosniykichis Jehová Diosmi kani.

26 ”Aman ima yanqa diostapas,+ ima idolotapas+ ruwakunkichischu, aman yupaychana rumitapas sayachikunkichischu, amallataqmi ima rijch’ayman thupasqa rumitapas+ sayachikunkichischu, amapunin chaykunamanqa k’umuykunkichispaschu.+ Noqaqa Diosniykichis Jehová Diosmi kani. 2 Respetankichismi samana p’unchayniykunatapas samana wataykunatapas, respetankichismi* ch’uya karpaytapas. Noqaqa Jehová Diosmi kani.

3 ”Tukuy nisqaytachus kasukunkichis, llapa kamachisqaytachus junt’ankichispas chayqa,+ 4 tiempollanpin parata qomusaykichis,+ jinan chajraykichiskunapas campopi sach’akunapas sumaqta rurunqa.+ 5 Eray tiempon uvas pallay tiempokamaraq kanqa, uvas pallay tiempotaq t’akay tiempokamaraq kanqa. Sajsanaykichiskaman mijunkichis, mana imata manchakuspataqmi thaj kausankichis.+ 6 Thajmi jallp’aykichispi kausankichis,+ mana imata manchakuspan puñunkichis.+ Manan llaqtaykichispiqa ima phiña animalpas kanqachu, manataqmi ima guerrapas kanqachu. 7 Qankunan enemigoykichiskunataqa qatirinkichis, qankunan paykunataqa espadawan wañuchinkichis. 8 Pisqallan pachajta qatinkichis, pachajtaq chunka waranqata qatinkichis. Enemigoykichiskunaqa espadawan wañuchisqan kanqaku.+

9 ”Noqan qankunataqa sumaqta qhawarisaykichis. Qankunaqa askha wawakunayoqmi kankichis, askhamanmi tukuchisaykichis.+ Qankunawan rimanakusqaytan junt’asaq.+ 10 Ñaupaq wata mijuy oqarisqaykichista mijushallaqtiykichisraqmi mosoq mijuykunaqa ña lloqsimushanqaña, jinan chay mosoq mijuyta waqaychanaykichispaqqa ñaupaq wata mijuytaraq wijch’upunaykichis kanqa. 11 Qankuna ukhupin karpayta churasaq;+ manan jayk’aqpas cheqnikusaykichischu. 12 Qankuna ukhupin purisaq, noqan Diosniykichis kasaq,+ qankunataq llaqtay kankichis.+ 13 Noqaqa Diosniykichis Jehová Diosmi kani; Egiptopi esclavo kasqaykichismanta orqomuqniykichis Diosmi kani. Noqan kamachi yugoykichista p’akispa uma oqarisqata pusamurqaykichis.

14 ”Ichaqa, manachus uyarikunkichis, manataq kamachisqaykunatapas kasukunkichischu,+ 15 aswanpas cheqnikunkichischus ima kamachisqaytapas,+ millakunkichischus ima nisqaytapas, manataq simiytapas kasukunkichischu, manataq rimanakusqanchistapas junt’ankichischu chayqa,+ 16 imaymanawanmi castigasaykichis: llakitan apachimusaykichis, tuberculosis onqoymi jap’isunkichis, cuerpoykichismi fiebre onqoywan rupharinqa, jinan ñawiykichisraq tutayanqa, manañan vidaykichispichu kankichis. Yanqan chajraykichistapas llank’ankichis, enemigoykichiskunan chaytaqa apakapunqaku.+ 17 Noqan qankuna contra sayarisaq, enemigoykichiskunan atipasunkichis.+ Cheqnikuqniykichis runakunan sarunchasunkichis;+ pipas mana qatishaqtinmi manchakuymanta ayqekunkichis.+

18 ”Manachus chaywanpas uyarikunkichis chayqa, qanchis kutitawanmi juchaykichismanta castigasaykichis. 19 Jatunchakuq kayniykichistan sarusaq. Cielotan fierroman tukuchisaq,+ jallp’atataq cobreman tukuchisaq. 20 Yanqapaqmi kallpaykichista tukunkichis llank’aspa, manan chajraykichisqa imatapas rurunqachu,+ manan campopi sach’akunapas rurunqachu.

21 ”Manachus chaywanpas kasuwankichis, contraypitaq sayarinkichispas chayqa, juchaykichisman jinan qanchis kutitawan castigasaykichis. 22 Phiña monte animalkunatan kachamusaykichis+ chaykunan wawaykichiskunatapas uywaykichiskunatapas mijupunqa,+ chhaynapin pisiyankichis. Ñanniykichiskunapas ch’inmi kapunqa.+

23 ”Manachus chaywanpas wanankichis,+ astawanchus noqa contra sayarinkichis chayqa, 24 qankuna contran noqapas sayarisaq, jinaspa juchaykichismanta qanchis kutitawan castigasaykichis. 25 Enemigoykichiskunatan qankunaman kachamusaq, paykunan castigasunkichis; rimanakusqanchista mana junt’asqaykichisraykun qankunamanta vengakusaq.+ Llaqtaykichis ukhupiña pakakunkichis chaypas onqoytan kachaykamusaykichis,+ chhaynapin enemigoykichiskuna jap’isunkichis.+ 26 T’anta waqaychanaykichistan p’akisaq.+ Juj hornollapin chunka warmikuna t’antata ruwanqa, chaytapas pesasparaqmi rakisunkichis.+ Pisin mijunaykichis kanqa, jinan yarqaymanta kankichis.+

27 ”Manapunichus chaywanpas uyarikunkichis, astawanchus noqa contrapas sayarinkichis chayqa, 28 astawanmi noqapas qankuna contra sayarisaq,+ jinaspa juchaykichismanta qanchis kutitawan castigasaykichis. 29 Qhari wawaykichiskunaq warmi wawaykichiskunaq aychantan mijunkichis.+ 30 Yupaychanaykichis patakunatan* thunisaq,+ incienso q’apachinaykichis altarkunatan ñut’usaq, ayaykichiskunatan millay asnaq idoloykichiskuna pataman wijch’uykusaq,+ millakuspan qankunamanta ayqerisaq.+ 31 Llaqtaykichista, idolokunata yupaychanaykichiskunata iman thunisaq,+ manan sacrificio q’apachimusqaykichistapas chaskisaykichischu. 32 Llaqtaykichistan ch’usaqman tukuchisaq,+ jinan chaypi tiyaq enemigoykichis runakunaqa admirasqa chay jallp’ata qhawaykunqaku.+ 33 Llapa nacionkunamanmi ch’eqerichisaykichis,+ qhepaykichistan juj espadata kachamusaq.+ Jallp’aykichispas ch’inmi kapunqa,+ llaqtaykichiskunapas lliumi thunisqa kanqa.

34 ”Chay tiempopin jallp’aykichisqa samanqa, mana jayk’aq samachisqaykichistan samanqa. Enemigoykichiskunaq llaqtanpi kamushanaykichiskaman jallp’aykichisqa samanqa.+ 35 Lliumi chay jallp’aqa ch’in kanqa jinan samanqa, chaypi tiyashaspa mana samachisqaykichistan samanqa.

36 ”Qankunamanta puchuq runakunataqa+ enemigonkuq llaqtanpin manchapachisaq, raphiq chhaq nisqallanmi paykunataqa qatirinqa. Mana piqpa qatisqanmi enemigonkupas espadawan qatishanman jinaraq ayqekunqaku, chaypitaq urmanqaku.+ 37 Guerrapi qatisqa runakuna jinan phawanqaku, phawasqankupin paykunapura sarunakunqaku. Manan atinqakuchu enemigon runakunawan maqanakuytapas.+ 38 Waj nacionkunapin wañunqaku,+ enemigoykichiskunaq jallp’anmi paykunata millp’unqa. 39 Puchuq runakunaqa juchankuraykun enemigoykichiskunaq jallp’anpi umphuyapunqaku.+ Taytankuq juchanraykun enemigoykichiskunaq llaqtanpi wañu-wañullaña purinqaku.+ 40 Chaypachan juchankuta, ñaupa taytankuq juchanta, mana kasukuq kasqankutapas reqsikunqaku,+ chayraqmi reparakunqaku noqa contra juchallikusqankuta.+ 41 Chaypachaqa noqapas paykuna contran kashasaq,+ enemigoykichiskunaq jallp’anpiñan kashanqaku, noqan chayman paykunata apasaq.+

”Chaywanqa yaqapas k’ullu sonqonku llamp’uyanqa,+ chhaynapitaq juchankumanta paganqaku. 42 Chay pachan noqaqa yuyarisaq Jacobwan+ rimanakusqayta, Isaacwan+ rimanakusqayta, Abrahanwan+ rimanakusqaytapas, yuyarisaqmi jallp’aykichistapas. 43 Paykuna juj ladokunapi kashanankukaman jallp’aykichisqa ch’in kanqa, mana samasqanmantan samanqa.+ Paykunataq juchankumanta paganqaku, simiyta mana kasukusqankumanta, kamachisqaykunatapas cheqnikusqankumantan paganqaku.+ 44 Chaywanpas manan noqaqa paykunataqa wijch’upusaqchu,+ manan chinkachinaykamachu cheqnikusaq, mana chayqa manachá paykunawan rimanakusqayta junt’ashaymanchu.+ Noqaqa paykunaq Diosninku Jehová Diosmi kani. 45 Chaypachan ñaupa taytankuwan rimanakusqayta yuyarisaq,+ lliu nacionkunaq rikushasqan Egiptomanta orqomusqay runakunatan yuyarisaq.+ Diosninku kanaypaq orqomusqay runakunatan yuyarisaq. Noqaqa Jehová Diosmi kani, nispa”.

46 Chay simikunata, chay kamachikuykunata iman Jehová Diosqa Israel runakunaman qorqan, Moiseswanmi Sinaí orqopi chaykunata qochirqan.+

27 Jehová Diosmi Moisesta nillarqantaq: 2 “Israel runakunata niy: Pipas juj runaq jayk’achus valesqanta Jehová Diosman qonanpaq promesata ruwanqa chayqa,+ 3 qharimantan qonqa pisqa chunka siclo* pesaq qolqeta. Qhariqa iskay chunka watayoqmanta soqta chunka watayoqkaman pisqa chunka siclota valenqa. Chay sicloqa yupaychana karpapi siclo pesoman jinan pesasqa kanqa. 4 Warmimantataq qonqa kinsa chunka siclota. 5 Pisqa watanmanta iskay chunka watankama qharimantataq qonqa iskay chunka siclota, warmimantataq qonqa chunka siclota. 6 Juj killayoqmanta pisqa watayoqkama qhari wawamantataq qonqa pisqa siclo pesaq qolqeta, warmi wawamantataq qonqa kinsa siclo pesaq qolqeta.

7 ”Soqta chunka watayoqpas otaq maspas kanqa chayqa, qhariqa chunka pisqayoq siclotan valenqa, warmitaq chunka siclota. 8 Promesa ruwaq runachus sinchi wajcha kanman,+ manataq precio churasqata qonanpaq qolqen aypanmanchu chayqa, sacerdotemanmi payqa jamunqa, sacerdoten ninqa atisqanman jina jayk’atachus qonman chayta.+

9 ”Pipas ofrendapaq jina kaq uywata qonanpaq Jehová Diosman promesata ruwanqa chayqa, imayna uywaña Jehová Diospaq t’aqasqa kanqa chaypas, Diospañan chay uywaqa kanqa. 10 Manan mayqenpas cambiasqachu kanqa; allinña mana allinña kanqa chaypas manan cambiasqachu kanqa. Juj uywachus jujwan cambiasqa kanqa chayqa, Diospan kanqa cambiasqa uywapas cambianapaq qosqa uywapas, iskayninmi paypaq t’aqasqa kanqa. 11 Ichaqa chay uywachus qhelli+ nisqa kanqa, mana Jehová Diosman sacrificiopi jaywanapaq uywachu kanqa chayqa, sacerdotemanmi chaytaqa apamunqa. 12 Chay uywa imaynachus kashan chayman jinan sacerdoteqa preciota churanqa. Sacerdoten ninqa jayk’atachus chay uywa valenqa chayta. 13 Chay promesa ruwaqchus uywanta wajmanta rantikapuyta munanqa chayqa, chay uywaq jayk’achus valesqanmanta pisqa kaq partetawanmi paganqa.+

14 ”Pipas Jehová Diosman qonanpaq wasinta t’aqanqa chayqa, sacerdoten chay wasita qhawanqa, jinaspa imaynachus kashan chayman jina preciota churanqa. Jayk’amanchus sacerdote valechinqa chaymi chay wasiq precionqa kanqa.+ 15 Ichaqa Diosman wasinta qoqchus wajmanta wasinta rantikapuyta munanqa chayqa, chay wasi jayk’achus valesqanmanta pisqa kaq partetawanmi paganqa, chhaynapin chay wasiqa paypa kapunqa.

16 ”Pipas wakin chajranta Jehová Diospaq t’aqanqa chayqa, jayk’a mujuwanchus t’akakunman chayman jinan chay chajraq precionqa tanteasqa kanqa. Pachaj kinsa chunka kilo* cebada mujun valenqa pisqa chunka siclo pesaq qolqe. 17 Chay chajrantachus Kacharipuna Watapi Diospaq t’aqanqa chayqa,+ kaqllan precionqa kanqa. 18 Kacharipuna Wata pasaytachus t’aqanqa chayqa, jayk’a wataraqchus kashan jamuq Kacharipuna Watapaq chayman jinan sacerdoteqa chay chajraq precionta tanteanqa. Valorninqa manañan igualñachu kanqa aswanmi pisiyanqa.+ 19 Jallp’anta Diospaq t’aqaq runachus wajmanta rantikapuyta munanqa chayqa, chay jallp’a jayk’achus valesqanmanmi pisqa kaq partetawan yapanqa, jinan chay jallp’aqa paypa kapunqa. 20 Ichaqa manachus chay dueño chajranta rantikapunqa aswanpas jujmanchus vendepunqa chayqa, manañan jayk’aqpas chay chajrataqa rantikapuyta atinqañachu. 21 Chay jallp’a Kacharipuna Watapiña libre kanqa chaypas Jehová Diospan chayqa kapunqa, paymi wiñaypaq dueño kapunqa. Sacerdoten chay jallp’ataqa jap’ikapunqa.+

22 ”Pipas rantisqan jallp’ata Jehová Diospaq t’aqanqa, manataq chay jallp’aqa ñaupa taytankunaq qosqan herenciachu kanqa chayqa,+ 23 jayk’a wataraqchus kashan Kacharipuna Watapaq chayman jinan sacerdoteqa chay jallp’aq precionta tanteanqa. Chay kikin p’unchaymi chay runaqa chay jallp’a jayk’achus valesqanta sacerdoteman qonqa.+ Chayqa Jehová Diospaq t’aqasqan kanqa. 24 Kacharipuna Watapiqa dueñonpa makinmanmi chay jallp’aqa kutipunqa, pimantachus rantirqan chaymanmi kaqta qopunqa.+

25 ”Llapa chaykunaq precionqa yupaychana karpapi siclo pesoman jinan tanteasqa kanqa. Juj sicloqa iskay chunka guerá* pesoman jinan kanqa.

26 ”Manan pipas ñaupaq wachay uywakunataqa Diospaqqa t’aqanqachu, chaykunaqa ñan Jehová Diospaña.+ Ñaupaq wachay toropas, ovejapas Jehová Diospañan.+ 27 Chay ñaupaq wachay uywachus kanman qhelli nisqa uywa chayqa, dueñon chay uywamanta paganqa jayk’atachus valen chayman jina, chaymantapas valorninmanmi pisqa kaq partetawan yapanqa.+ Manachus paganqa chayqa, sacerdoten chayta vendenqa jayk’achus valesqanman jina.

28 ”Pipas uywatapas, runatapas, chajratapas, imatapas Jehová Diospaq wiñaypaq t’aqanqa chayqa, manan chay t’aqasqantaqa rantinqachu ni vendenqapaschu. Imapas wiñaypaq t’aqasqa kaqqa Jehová Diospañan, ch’uyay-ch’uyataqmi kanpas.+ 29 Pipas juchachasqa kaspa wañunanpaq t’aqasqa kaqqa manan salvasqachu kanqa.+ Chay runaqa wañuchisqapunin kanqa.+

30 ”Chajraq rurusqanmanta chunka kaq partepas,*+ sach’akunaq rurusqanmanta chunka kaq partepas Jehová Diospan. Jehová Diospaq t’aqasqan chaykunaqa kanqa. 31 Pipas chay t’aqasqanmanta wakinta rantiyta munanqa chayqa, chay rantisqan jayk’atachus valen chaymanmi pisqa kaq partetawan yapanqa. 32 Diosmanqa qollankitaqmi wakaykimanta, ovejaykimanta, cabraykimantapas chunka kaq parteta; chaypaqmi uywaykita yupaspa sapa chunkaman chayaspa k’aspiwan marcanki, chaykunan Jehová Diospaq t’aqasqa kanqa. 33 Aman qhawankichu chay uywa allinchus kashan icha manachus chaytaqa, amataqmi cambiankipaschu. Pipas t’aqasqan uywata cambiayta munanqa chayqa, Diospan kanqa cambiasqan uywapas cambianapaq qosqan uywapas.+ Manan chaytaqa dueñoqa jujmanta rantiyta atinqañachu, nispa”.

34 Chay kamachikuykunatan Jehová Diosqa Israel runakunaman qorqan, Moiseswanmi Sinaí orqopi chayta qochirqan.+