Juj judía warmi willakun imaraykus Jesuspi iñipurqan chayta

Willawayku wawa kasqaykimanta

1979 watapin Estados Unidos nacionpi nacerqani. Kinsa watachayoq kashaqtiymi tayta-mamay divorcianakurqanku. Mamayqa judiokunaq yachachisqanman jinan juch’uyniymantapacha yachachiwaq. Chaymantapas judiokunaq yachachisqan escuelamanmi churawarqan. Qanchis watayoq kashaqtiytaq Israel nacionman astakurqayku. Qhepamantaq juj wata pasaqtin México nacionman ripurqayku.

Tiyasqayku qayllapiqa manan judiokunaq juñunakunanku wasi karqanchu, chhaynaña kaqtinpas sabadonkunapin velata jap’ichiq kani, judiokunaq Tora nisqanku qelqata leeq kani, jinaspa rezakunayku libroq nisqanman jina Diosmanta mañakuq kani. Chaymantapas estudiaqmasiykunamanmi niq kani: “Religionniymi cheqaq kaqqa”, nispa. Noqaqa manan jayk’aqpas leerqanichu Nuevo Testamentotaqa, chaypin willashan Jesús runakunaman yachachisqanmanta. Mamaypas niwaqmi: “Nuevo Testamentota leeruspaykiqa pantasqa yachachikuykunatan yachawaq”, nispa. Chaymi manapuni jayk’aqllapas leerqanichu.

¿Imaynapin Nuevo Testamentota leeyta qallarirqanki?

17 wataypi kashaspaymi Estados Unidos nacionman kutirqani estudioyta tukunaypaq. Juj amigoymi niwarqan: “Kusisqa kausanaykipaqqa Jesusmantan yachanayki”, nispa. Chaymi nirqani:

“Jesuspi iñiqkunaqa engañasqan kashanku”, nispa.

Paytaqmi tapuwarqan: “¿Jayk’aqllapas leerqankichu Nuevo Testamentota?”, nispa.

Jinan nirqani: “Manan”, nispa.

Chaymi niwarqan: “Chhaynaqa mana leeshaspari, ¿imanaqtintaq chhaynatari rimanki? Mana yachashaspaqa manan rimanachu”, nispa.

Chay niwasqanmi piensachiwarqan, noqapas mana yachashaspa rimaytaqa mana allinpaqmi qhawarirqani. Chaymi Biblianta chaskikurqani wasiyman apakunaypaq, jinan Nuevo Testamentota leeyta qallarirqani.

¿Ima niwaqmi leesqaykimanta?

Mosoq Testamentoqa judiokunaq qelqasqan kasqanta yacharuspaymi admirakurqani, chaymantapas leesqaypin yacharqani Jesusqa munakuq, mana jatunchakuq jinallataq runakunata yanapaykuq kasqanmanta. Jesusmanta yachayta munaspan paymanta rimaq sapaq librokunata bibliotecamanta orqorqani. Ichaqa manan mayqen libropas Mesías kasqanmantaqa sut’itachu rimarqan. Wakin librokunapin nirqan: “Jesusqa Diosmi”, nispa, chaytaqa manan allinpaqchu noqaqa qhawarirqani. Niqmi kani: “Sichus Jesús Dios kanman chayqa, ¿pimantataq Jesusri mañakushanman karqan? ¿Pay kikinmanta? Chaymantapas Jesusqa wañupurqanmi, ichaqa Bibliaqa Diosmantan nin: “qanqa mana wañuqmi kanki”, nispa.a

Chayri, ¿imatataq ruwarqanki?

“Bibliaqa jujllatan yachachin, manan iskaytaqa yachachinmanchu” nispaymi Diosmanta tukuy sonqoymanta waqaspa mañakurqani, manañataqmi rezakunay libromantachu. Chaymi mañakuyta tukuqtiy jinalla Jehová Diospa iskay testigonkuna punkuyta takaykamuwarqaku. Paykunawanmi rimarqayku, jinan juj folletota saqewarqanku, chaytan leerqani chaymi sapa kuti visitamuwaspanku Bibliamanta yachachiwarqanku. Chaypin cuentata qokurqani paykunaqa Bibliaq nisqaman jina yachachisqankuta. Jehová Diospa testigonkunapaqqa Jesusqa manan trinidad yachachikuypi nisqanman jinachu kinsa dioskunamanta jujnin, aswanpas “Diospa Churinmi”. b Chaymantapas, Jesustan tukuy imamantapas “ñaupaqta Dios kamarqan”.c

Chaymantan México nacionman kutirqani, chaypipas jinallan Jehová Diospa testigonkunawan estudiarqani Jesusmanta profeciakuna imayna Jesuspi cumplikusqanta. Ichaqa chaywanpas iskayasharqaniraqmi, chaymi sonqoypi tapukurqani: “¿Jesusllapichu Bibliapi profeciakuna cumplikunman karqan, icha runakunata engañananpaqchu Mesiasmanta pasachikurqanpas?”, nispa.

¿Iman yanaparqasunki amaña iskayanaykipaq?

Jehová Diospa testigonkunan Bibliawan qhawachiwarqanku imaynachus juj runapiqa mana junt’akunmanchu chayta. Ejemplopaq, 700 más watakuna ñaupaqtaraqmi profeta Miqueas willarqan, Mesiasqa Belén llaqtapi nacenanta.d ¿Ajllakunmanchu Jesús karqan maypi nacenanta? Manapunin. Chaymantapas Isaiasmi qelqarqan Cristo suwa runa jina millay wañuchisqa kananmanta, jinaspa qhapaqkunaq sepulturanpi p’ampasqa kananmanta.e Tukuy chay profeciakunaqa Jesuspin cumplikurqan.

Chaymantapas Jesús piqpa familianmanta jamusqanta yachasqaymi astawanqa yanapawarqan mana iskayanaypaq. Biblian willawanchis Mesiasqa Davidpa familianmanta kasqanta.f Chay tiempopi judiokunaqa qelqasqatan jap’iqku piqpa familianmanta runakuna kasqankuta. Sichus Jesús mana Davidpa familianmantachu kanman karqan chayqa, enemigonkunaqa chaytan sut’ita lliuman willankuman karqan. Ichaqa manan chhaynachu karqan, askhanpi runakunan Jesustaqa “Davidpa churin” nispa reqsirqanku.g

Jesuspa wañupusqanmanta 37 watakuna pasasqan qhepamanmi, 70 watapi Roma nacionpi tropakuna Jerusalenman jaykuspa llaqtata muyuykurqanku, chaypin chinkapurqan otaq ch’usaqman tukupurqan ima familiamanta kasqankuta willaq qelqakuna. Chhaynaqa ima familiamanta jamusqanta yachakunanpaqqa, Mesiasqa 70 wata ñaupaqtaraqmi rijurimunan karqan.

Kunanri, ¿imaninkitaq?

Deuteronomio 18:18, 19 textopin Diosqa nirqan Moisés jina profetata Israel llaqtapi jatarichinanta. Chaypin nirqan: “Pipas chay profetaq sutiypi rimasqanta mana uyarikunqachu chayqa, cuentatan mañasaq chay runamanta”, nispa. Kunanqa Bibliata llapanta estudiaruspaymi sut’ita yachani Nazaret llaqtamanta Jesús chay profeta kasqanta.