K’uychi rikhurimun

¿IMATAN Noé familianwan ruwaran arcamanta lloqsispa hina? Ofrendatan Diosman haywaran. Qhawariy, chaytan ruwashan kay dibujopi. Kay animalkunatan Noeqa Diosman sacrificiopi haywaran, paytapas familiantapas millp’uq para unupi qespichisqanmanta agradecekuspa.

¿Chaskiranchu Jehová Dios chay haywasqanta? Arí, chaskiranmi. Chay raykun Noeman prometeran manaña hayk’aqpas millp’uq para unuwan runakunata wañuchinanpaq.

Unu ch’akipusqan qhepamanmi Noepas familianpas arcamanta lloqsispa allpapi tiyaranku. Diosmi paykunata saminchaspa niran: ‘Askhata miraychis, kay pachaman hunt’anaykichiskama,’ nispa.

Qhepa tiempoman millp’uq para unumanta uyarispaqa, manchakunkumanpaschá karan hukmanta chayamunanta yuyaykuspa. Chay raykun Diosqa señalta qoran manaña hayk’aqpas Allpata unuwan millp’uchinanpaq. ¿Yachankichu ima señaltan Dios qoran chayta yuyarinankupaq? K’uychitan rikhurichiran.

K’uychitaqa askha kutitan hanaq pachapi rikunchis para pasaqtin hina Inti k’anchamuqtin. K’uychiqa sumaq colorkunayoqmi. ¿Rikurankichu hayk’aqllapas? ¿Rikushankichu kay dibujopi?

Kaytan Dios niran: ‘Manañan hayk’aqpas millp’uq para unu kanqachu, llapa runakunatapas animalkunatapas tukuchinaypaq. K’uychiytan phuyupi sayachishani, k’uychi rikhurimuqtinmi yuyarisaq qankunawan rimanakusqayta,’ nispa.

Chay rayku, ¿imatan yuyarinayki k’uychita rikuspa? Diospa prometesqanta, manaña hayk’aqpas millay runakunata unuwan wañuchinanpaq.