Umalliq T’aqaq cartan

Ancha munasqa wayqeykuna panaykuna:

Kaypi piensariy: Jujnin apostolsi kawaq, chaypis qankunaqa Olivos orqopi kashankichis, chayllamansi Jesusqa manaraq janaq pachaman ripushaspa rijurisunkichisman, jinaspa nisunkichisman: “Atiytan chaskinkichis santo espíritu qankunaman chayamuqtin, jinan noqamanta willankichis Jerusalenpi, lliu Judeapi, Samariapi ima; kay pachaq k’uchunkunakamaraqmi chayankichis”, nispa (Hech. 1:8). ¿Imaniwaqmi chayta uyarispayki?

Yaqapaschá mancharikusunman, jinaspa nisunman: “¡Pisillamá kayku riki¡ ¿Imaynatataq Diospa simintari kay pachaq k’uchunkunakamaraq chayachisaqku?”, nispa. Chaymantapas yaqapaschá yuyarisunman manaraq wañupushaspa Jesuspa imachus nisqanta, paymi nirqan: “Aman qonqankichischu, kamachiqa manan patronninmantaqa kuraqchu nispa qankunaman nisqayta. Noqatataq qatikachawarqanku chayqa, qankunatapas qatikachallasunkichistaqmi; simiytachus kasukurqanku chayqa, simiykichistapas kasukullanqakutaqmi. Sutiy jawan llapa chaykunataqa ruwasunkichis, pichus kachamuwarqan chayta mana reqsisqankurayku”, nispa (Juan 15:20, 21). Chhaynatataq Jesús nirqan chayqa yaqapaschá nisunman: “Qatikachasqataq cheqnisqataq kasaqku chayqa, ¿imaynatataq runakunamanri Diospa willakuyninta chayachisaqku?”, nispa.

Kunanqa kay tiempopiñataq piensarisunchis. Kay tiempopipas Jehová Diospa testigonkunaqa yaqapaschá chhaynata tapukushanchis. ¿Imarayku? Noqanchispas llapa runakunamanmi chayachinanchis kashan Diospa siminta, “kay pachaq k’uchunkunakamaraqmi chayananchis” kashan. “Llapa nacionmanta runakunan” chaytaqa uyarikunanku (Mat. 28:19, 20). Ichaqa, Bibliapas qatikachasqan kankichis nirqantaq chayqa, ¿imaynatan llapa runakunaman chayasun?

Hechos libropin willashan imaynatas ñaupa tiempopi apostolkuna chay kamachikuyta junt’arqanku chayta; willashanmi imaynatas Jehová Diosqa paykunata yanaparqan chaytapas. Kay libroqa chaykunata allinta entiendenanchispaqmi ruwasqa kashan. Rikushasunmanpas jinan yachasun ñaupa tiempo iñiqkuna imakunatachus ruwarqanku chayta. Yachasunmi imaynas ñaupa tiempo iñiqkunaq ruwasqankuman jina kunan tiempopas ruwakushan chayta. Chaypiqa yachasun manan imaynatas Diosmanta willaqku chayllatachu, yachasunmi imaynatas chaykunata apariqku, imayna organizasqas kasharqanku chaytapas. Llapa chaykunapin allinta reparasunchis imaynas Jehová Diospuni llaqtantaqa pusarishan chayta.

Jehová Diosmantan mañakushayku kay libroq yanapayninwan paypi astawan confianaykichispaq, espiritunwan yanapanasuykichispaq, kallpachanasuykichispaq ima. Mañakushallaykutaqmi kay libroq yanapayninwan Diospa gobiernonmanta willakuyta llapa runakunaman chayachinaykichispaqpas, chhaynapi munaqkunaqa wiñay kausayta tarinankupaq (Hech. 28:23; 1 Tim. 4:16).