Diosmanta juj wawata mañakun

Israelmanta Elcaná sutiyoq runan iskay warmiyoq karqan, sutinkun karqan: Ana, Peniná. Ichaqa Anatan masta munakuq. Peninaqa askha wawakunayoqmi karqan, Anan ichaqa mana wawayoq karqan. Chaymi Peninaqa Anamanta burlakuq. Sapa watanmi Elcanaqa familianwan Siló llaqtata riq Jehová Diosta adoranankupaq. Juj kutinmi chaypi kashaqtinku Elcanaqa repararqan Ana sinchi llakisqa kasqanta. Jinan Anata nirqan: “Ana ama waqaychu. Noqaqa anchatan munakuyki”, nispa.

Chay p’unchaypin Anaqa sapallan rirqan mañakuq. Waqaykuspan Jehová Diosta mañakurqan yanapananpaq. Diosmanmi prometerqan: “Diosníy, juj qhari wawata qowanki chayqa, qanmanmi qopusayki wañupunankama servinasuykipaq”, nispa.

Uma sacerdote Elí rikurqan Anaq waqasqanta, siminpas kuyushasqanta jinan machasqa kananpaq piensarqan. Anataq nirqan: “Manan machasqachu kashani. Jatun llakin ñit’iwan chaytan Diosman willakushani”, nispa. Eliqa reparakurqanmi pantasqanta, jinan Anata nirqan: “Jehová Dios mañakusqaykiman kutichimuchun”, nispa. Anaqa kusisqa kutipurqan. Jinan manaraq watapi juj qhari wawata onqokurqan, sutinmi karqan Samuel. Ancha kusisqachá Anaqa sientekurqan ¿riki?

Anaqa manan qonqarqanchu Diosman prometesqanta. Samuel manaña ñuñuqtinmi Anaqa yupaychana karpaman apapurqan Diosta servinanpaq. Elitan nirqan: “Jehová Diosmantan kay qhari wawata mañakurqani, chaymi Diosman qopushani wañunankama servinanpaq”, nispa. Elcanawan Anawanqa sapa watanmi Samuelta visitaqku mana mangayoq p’achata apaspa. Tiempowanmi Anaqa kinsa qhari iskay warmi wawakunatawan onqokurqan.