Josiasqa Diospa simintan munakurqan

Josiasqa pusaq watanpi kashaspan Judá nacionta kamachiyta qallarirqan. Chay tiempopin runakunaqa magiata utilizaqku idolokunatapas adoraqku. Josiasqa 16 watanpi kashaqtinmi Jehová Diosta allinta adorayta munarqan. 20 watanpi kashaqtintaq idolokunata altarninkunatapas thunirqan. 26 watanpitaq Jehová Diospa templonta allichayta qallarirqan.

Uma sacerdote Hilquiasmi templopi tarirusqa Diospa leyninkunamanta k’uyuta. Yaqapaschá karqan Moisespa qelqasqan k’uyu. Jinan Safán secretarioqa alto kunkawan leerqan Josías uyarinanpaq jina. Chaymi Josiasqa repararqan llaqtaq sinchi juchallikusqanta, jinan Hilquiasta nirqan: “Diosqa sinchi phiñasqachá noqanchiswan kashan. Jehová Diosta tapuy imatachus ruwananchista”, nispa. Jinan Jehová Diosqa profetisa Huldawan willachirqan: “Judá llaqtan saqerpariwan, chaymi castigasaq, ichaqa manan Josiaspa kausasqan tiempopichu k’umuykukuq kasqanrayku”, nispa.

Chayta uyarispan Josiasqa Judá nacionmanta runakunata templopi juñurqan, jinaspa llapankuq uyarisqan Diospa kamachikuyninta leerqan. Jinan llapallanku Diosman prometekurqanku tukuy sonqowan Diosta kasukunankupaq.

Askha watakunañan Judá nacionqa Pascua Fiestata mana ruwarqankuchu. Diospa kamachikuyninta leespan Josiasqa yacharqan sapa wata ruwana kasqanta. Jinan runakunata kamachirqan Pascua Fiestata ruwanankupaq askha sacrificiokunata alistanankupaq. Takiqkunatapas juñumurqanmi templopi takinankupaq. Chaymi Judá runakunaqa Pascua Fiestata, Mana Levadurayoq T’anta Fiestatawan qanchis p’unchay ruwarqanku. Samuelpa tiemponpi jinaraqmi chay fiestaqa karqan. Josiasqa munakurqanmi Diospa kamachikuyninkunata. Qanri, ¿Josías jinachu Diosmanta yachayta munanki?