Tawa waynakuna Diosta kasukunku

Nabucodonosormi Judá nacionmanta umalliqkunata Aspenaz oficialpa makinpi churarqan. Jinan reyqa nirqan: “Chay umallikunamanta allin yuyaniyoq waynakunata ajllay, paykunan noqaq mijusqay mijunata mijunqaku, jinaspa Babiloniapi rimakusqan simita yachanqaku, kinsa watataq allin educacionta chaskinqaku Babiloniapi umalliqkuna kanankupaq”, nispa. Chay waynakunamanta wakinmi karqan Daniel, Hananías, Misael, Azarías ima. Aspenazmi ichaqa Beltsasar, Sadrac, Mesac, Abednego sutikunata churarqan. ¿Chay educacionta chaskisqanku t’aqanmanchu karqan Jehová Diosmanta?

Chay waynakunaqa Jehová Diostan kasukuyta munarqanku, yacharqankun Babilonia reypa mijusqan wakin mijunakunaqa Diospa jark’asqan kasqanta. Chaymi Aspenazta nirqanku: “Ama qowaykuchu reypa mijusqan mijunata”, nispa. Aspenaztaq nirqan: “Sichus mana qosaykichischu chayqa, reymi onqosqa uyayoqta rikusunkichis, jinan wañuchiwanqa”, nispa.

Chaymi Danielqa paykuna qhawariq guardiata nirqan: “Chunka p’unchayta verdurakunata unullatawan mijusaqku, jinaspa chay qhepaman comparawayku reypa mijusqanta mijuq waynakunawan”, nispa. Jinan chay guardiaqa “allinmi” nirqan.

Chunka p’unchay qhepamanmi chay waynakunaqa juj waynakunamanta aswan allin rikukurqanku. Diosqa kusikurqanmi kasukusqankumanta. Jinan Danielta yanaparqan yachayniyoq kananpaq, rijuriykunata mosqoykunatapas entiendenanpaq.

Kinsa wata qhepamanmi Aspenazqa waynakunata reypa ñaupanman pusarqan. Jinan Nabucodonosorqa repararqan Daniel, Hananías, Misael, Azariaspas juj waynakunamanta aswan yachayniyoq kasqankuta. Chaymi Babilonia nacionta kamachiypi yanapakunankupaq ajllarqan. Reymi sapa kutilla tapuq imatapas decidinanpaq. Jehová Diosmi yanaparqan watuqkunamanta waj runakunamantapas aswan yachayniyoq kanankupaq.

Daniel, Hananías, Misael, Azariaspas manan llaqtankupichu kasharqanku, chaywanpas kasukurqankun Jehová Diosta. Qanri, ¿kasukunkichu Jehová Diosta tayta-mamaykiña ladoykipi mana kaqtinpas?