Perqapi juj willakuy rijurin

Tiempowanmi Babilonia nacionpi Belsasar rey kapurqan. Juj tutan payqa 1000 umalliqkunaman jatun mijuyta invitarqan. Jinan reyqa kamachirqan Jehová Diospa templonmanta Nabucodonosorpa apachimusqan qori vasokunata apamunankupaq. Jinaspa chay vasokunata utilizarqanku ujanankupaq, diosninkutataq alabarqanku. Chayllamanmi juj maki perqapi qelqarqan mana piqpa entiendesqan simikunata.

Belsasarqa mancharikurqanmi, jinan watuqkunata wajachimuspa prometerqan: “Kay simikunata explicawaq runan Babilonia nacionpi kinsa kaq kamachikuq kanqa”, nispa. Chaymi llapanku explicayta munarqanku, ichaqa manan atirqankuchu. Jinan reinaqa jamuspa nirqan: “Daniel sutiyoq runan Nabucodonosorman explicarqan mosqokusqankunata. Payqa atinmi chay simikuna explicayta”, nispa.

Danielqa rirqanmi Belsasarpa kasqanman, jinan reyqa nirqan: “Sichus explicawanki kay simikunata chayqa, qorimanta collarta qosayki, kinsa kaq kamachikuqtaq kanki”, nispa. Danieltaq nirqan: “Manan munanichu regaloykitaqa. Ichaqa willasaykin chay simikuna significasqanta. Papayki Nabucodonosorqa jatunchakuq runan karqan, chaymi Jehová Diosqa k’umuykachirqan. Yacharqankin papaykiwan imachus pasasqanta, chaywanpas manan Jehová Diosta respetankichu. Templonmanta qori vasokunatan utilizarqanki vinota ujanaykipaq. Chaymi Diosqa MENÉ, MENÉ, TEQUEL, PARSÍN simikunata qelqachirqan. Chay simikunaq significasqanqa kaymi: Medopersia nacionmi Babiloniata jap’ikapunqa, qantaq manaña reychu kanki”, nispa.

Babilonia llaqtaqa jatunkaray perqakunayoqmi karqan, jatun mayutaqmi llaqtaq muyuriqninpi karqan, chaymi chay llaqtaman jaykuyqa sasa karqan. Ichaqa chay tutatan Medopersia ejercitoqa Babiloniata atacarqan. Persia nacionmanta kamachikuq Ciron mayuta juj ladoman aparqan, jinan soldadokunaqa facilta llaqtaq punkunkama chayarqanku. Llaqtaq punkunkunatan mana wisq’asqakuchu. Jinan soldadokunaqa kaqpacha atacaspanku llaqtata jap’ikapurqanku, reytataq wañuchirqanku. Jinaspa Babiloniapi Ciro rey kapurqan.

Kamachiyta qallarishaspan Ciroqa nirqan: “Jehová Diosmi niwarqan Jerusalén templota wajmanta sayarichinaypaq. Riyta munaq judiokunaqa richunku”, nispa. Chaymi askha judiokuna kutipurqanku. 70 watan pasarqan Jerusalén llaqta thunisqa kasqanmanta. Chhaynapin junt’akurqan Jehová Diospa prometesqan. Ciroqa nillarqantaqmi Diospa templonmanta Nabucodonosorpa apamusqan cosaskunata apapunankupaq. Diosqa Cirotan utilizarqan llaqtanta yanapananpaq ¿riki?