Orqopi yachachisqan

Jesusqa 12 apostolninkunata ajllasqan qhepamanmi orqomanta uraykamuspa askha runakunaq kasqanman rirqan. Paykunaqa Galileamanta, Judeamanta, Tiromanta, Sidonmanta, Siriamanta, Jordán mayuq chimpanmantawanmi jamurqanku. Apamusqakutaq onqosqakunata, supaykunaq ñak’arichisqan runakunatawan. Jesusmi ichaqa llapankuta qhaliyachirqan. Jinaspa qhatanirayman wichaspa rimayta qallarirqan. Willarqanmi Diospa amigon kanapaq imachus ruwananchista. Ñaupaqtaqa Diostan reqsinanchis, jinaspa munakunanchis. Sichus runamasinchista mana munakunchischu chayqa, manan Diosta munakusunmanchu. Jinaspapas llapa runapaqmi allin kaqta ruwapunanchis.

Nirqanmi: “Manan amigollaykitachu munakunayki. Enemigoykitapas munakunaykin, sonqomantataq perdonanayki. Pipas qanwan phiñasqa kashan chayqa, perdonta mañakuspa allipunaychis. Llapankuta tratay imaynatachus tratanasuykita munawaq jinata”, nispa.

Jesusqa rimallarqantaqmi imaymanayoq kayta munaymanta. Nirqanmi: “Jehová Diospa amigon kaymi aswan importante askha qolqeyoq kaymantaqa. Suwapas qolqeykitaqa suwanmanmi, ichaqa Dioswan amigontin kasqaykitaqa manan pipas suwanmanchu. Ama llakikuychu mijunaykimanta, ujanaykimanta, p’achakunaykimantapas. Qhawariy phalaq animalkunata. Diosmi paykunaman mijuchin. Llakikuspaqa manan aswan unaytachu kausanki. Diosqa yachanmi imachus necesitasqaykita”, nispa.

Manan jayk’aqpas Jesuspa yachachisqanta jinaqa uyarirqankuchu. Religionpi umalliqkunapas manan chhaynatachu yachachirqanku. ¿Imaraykun Jesús allin yachachiq karqan? Jehová Diospa nisqanman jina yachachisqanrayku.