Pablota Roma llaqtaman apanku

Pabloqa kinsa kaq viaje ruwasqantaqa Jerusalenpin tukurqan. Chaypi kashaqtinmi presota jap’irqanku. Juj tutan carcelpi kashaqtin rijuriypi Jesús nirqan: “Roma llaqtamanmi rinki, chaypitaq predicanki”, nispa. Jinan Pablota Jerusalenmanta Cesarea llaqtaman aparqanku. Chaypiqa iskay watan carcelpi karqan. Juj p’unchaymi Festo kamachikuq juzgashaqtin Pabloqa nirqan: “Romapi rey juzgawanantan munani”, nispa. Festotaq nirqan: “Paypa juzgasqan kaytataq munanki chayqa Roma reyman apachisayki”, nispa. Jinan Pablota Roma llaqtaman riq barcoman wichachirqanku, Lucaswan Aristarcowantaq compañarqanku.

Viajashaqtinku askha p’unchaykuna sinchita wayramurqan paramurqan ima, jinan mana maymanpas riyta atirqankuchu. Llapankun wañunankupaq piensarqanku, Pablon ichaqa nirqan: “Wiraqochakuna ama manchakuychischu, juj angelmi mosqoyniypi niwarqan: Ama manchakuychu, chayankin Roma llaqtaman, barcopi kaqkunapas salvakunqakun”, nispa.

Barcopi kaqkunaqa 14 p’unchaymi barcota ñak’ayta purichirqanku, jinan rikurqanku Malta sutiyoq islata. Manaraq chayashaqtinkun barcoqa plantakuspa p’akikapurqan, 276 viajaqkunataq nadaspa barcoq k’aspinkunamanta jap’ipakuspa ima islaman chayarqanku. Chay islamanta runakunaqa sumaqta chaskispan q’oñikunankupaq ninata raurachirqanku.

Kinsa killa qhepamanmi Pablota juj barcopi Roma llaqtaman aparqanku. Chayamusqanta yachaspan hermanokunaqa chaskiq jamurqanku. Paykunata rikuspan Pabloqa Diosta agradecekurqan, kallpachasqataq sientekurqan. Presoña karqan chaypas, wasita alquilakuspan soldadoq qhawasqan tiyarqan. Chaypin iskay wata karqan, runakunaqa visitaqkun, paytaq Diospa gobiernonmanta predicaq Jesusmantapas yachachiq. Cartakunatapas qelqarqanmi Asia Menor ladopi, Judea llaqtapi tarikuq iñiq t’aqakunaman. Arí, Diosmi Pablota utilizarqan askha nacionkunapi predicananpaq.